ꢫꢵꢙꢸ ꢧꣂꢳꢸ

ꢃꢣꢶꢪ꣄ ꢣꢯꢬꢢ ꢥꢺꢦꣁ ꢂꢫꣂꢤ꣄ꢫꢵ ꢥꢔꢬꢶ ꢱꢸꢰ꣄ꢝꢸꢒꢥꢶ ꢦꢬꢶꢦꢵꢭꢥꣁ ꢒꢾꢬꢶꢭꢿꢡꢸ ꢂꢮꢾꢱ꣄ ꣎ ꢡꢾꢒ ꢬꢵꢙ꣄ꢙꢶꢪ꣄ ꢦ꣄ꢬꢙꢵꢥꢱ꣄ꢒꢶ ꢱꢥ꣄ꢡꢸꢰ꣄ꢜꢶꢒꢥꢶ ꢙꢶꢮ꣄ꢭꢶ ꢂꢮ꣄ꢫꢵꢱ꣄ ꣎ ꢣꢯꢬꢢ ꢬꢙꢵꢒꢸ ꢢꢷꢥ꣄ ꢩꢵꢬ꣄ꢫꢵꢥ꣄ ꣎ ꢢꢷꢥ꣄ ꢩꢵꢬ꣄ꢫꢵꢥꢸꢪ꣄ ꢪꢴꣁꢜꣁ ꢩꢵꢬ꣄ꢫꢵꢬ꣄ꢫꣁ ꢒꣃꢱꢭ꣄ꢫꣁꢒꢶꢥ꣄ ꢣꢯꢬꢢꣁ ꢫꣂꢒ꣄ ꢨꢾꢜ꣄ꢒꢶ ꢥꢴꢸꢬꢸ ꢙꢾꢥ꣄ꢫꢵꢱꢶ ꣎ ꢥꢴꢸꢬꢸꢒꢸ ꢯꢵꢥ꣄ꢡꢵ ꢪꢾꢥꢶ ꢥꢵꢮ꣄ ꢕꢭꢶ ꢗꣁꢖ꣄ꢔꢸ ꢱꢒꢭ ꢮꢶꢣ꣄ꢫꢵꢥ꣄ ꢯꢵꢱ꣄ꢡꢬ꣄ꢥꢸ ꢱꢶꢒ꣄ꢒꢞꢶꢫꢵꢱꢶ ꣎ ꢏꢣꢶ ꢒꣃꢯꢭ꣄ꢫꢵꢒꢸ ꢨꢾꢫ꣄ ꢲꣁꢫꢶꢡ꣄ꢡꢶꢥꣁ ꢮꢬ꣄ꢰ꣄ꢥꢶꢫꢮꢶ ꢲꣂ ꢪꢵꢫꢶ ! ꢲꣂ ꢩꢮꢵ ! ꢪꣁꢒꣁ ꢥꢴꢸꢬꢸ ꢧꣂꢳ꣄ ꢣꢾꢒ꣄ꢒꢵꢥꢶ ꢡꢾꢒ ꢲꢵꢭꢶ ꢪꢷ ꢡꢸꢪꢶ ꢙꢾꢥꢾ ꢥꢴꢸꢬꢸ ꢯꢵꢥ꣄ꢡꢵꢒꢸ ꢱ꣄ꢮꢷꢒꢵꢬ꣄ ꢒꢾꢬ꣄ꢭꢸꢱꢸ ! ꢡꢸꢪꢶ ꢥꢴꢷ ꢯꢒ꣄ꢒꢸꢥꢵ ꢪꢾꢥꢶ ꢪꢾꢥ꣄ꢥꢵꢱ꣄ꢡꣁ ꢱꢪ꣄ꢪꢡ꣄ ꢪꢾꢥ꣄ꢥꣁ ꢪꢾꢥꢶ ꢮꢶꢥꢫꢪ꣄ꢒꢥꢶ ꢪꢔꢸꢭꢸꢡꣁ ꣎ ꢪꢲꢵꢣꢵꢡꢺ ꢲꣁꢫꢾ ꢣꢯꢬꢢꣁ ꢱꢾꢬ꣄ꢒꢱ꣄ ꢲꣂꢥ꣄ꢣꢒꢸ ꢪꢾꢥꢶ ꢂꢦꢸꢭ꣄ ꢨꢾꢜꢶꢒ꣄ ꢱ꣄ꢮꢷꢒꢵꢬ꣄(ꢦꣁꢱꢸꢥꢵꢒ꣄) ꢣꢶꢫꢵꢱ꣄ ꣎

ꢢꢾꢮ꣄ꢞꣁ ꢮꣁꢬ꣄ꢰꢸꢥ꣄ ꢧꢭ꣄ꢗꣁ ꢣꢯꢬꢢꢸ ꢪꣁꢥ꣄ꢥꢸꢪ꣄ “ꢂꢮ꣄ꢬꢾ ꢧꢬꢵꢡꢸ ꢬꢵꢙ꣄ꢙꢶ ꢗꢭ꣄ꢮꢱ꣄ꢡꢒꢸ ꢂꢪ꣄ꢒꣁ ꢨꢵꢳꢸ ꢧꣂꢳ꣄ ꢣꢾꢒ꣄ꢒꢵꢥꢶ ꢥꢵ ! ꢂꢪ꣄ꢬꢾ ꢬꢵꢰ꣄ꢜ꣄ꢬꢸꢪ꣄ ꢮꢺꢰ꣄ꢜꢶꢥ꣄ ꢆꢥ꣄ꢥꣁ ꢲꣂꢬꢱ꣄ꢥꢵ ! ꢄꢱꣁ ꢬꢴꢶꢫꢾꢡ꣄ ꢬꢵꢙ꣄ꢙꢶꢒ꣄ꢒꢶꢥ꣄ ꢂꢮ꣄ꢬꢾ ꢒꢸꢭꢪꢸꢒ꣄ ꢲꢵꢥꢶ ꢂꢮꢶ ꢭꢔꣀꢥꢵ ꢪꢾꢥꢶ ꢲꢜ꣄ꢮꢶ ꢂꢣ꣄ꢣꢶ ꢗꢶꢥ꣄ꢡꣁ ꢦꣁꢞꢾꢱ꣄ ꣎ ꢄꢱꣁ ꢣꢶꢥ꣄ꢥꢸ ꢙꢶꢭꢿꢡ꣄ ꢬꢴꢡꣁ ꢐꢠ꣄ꢜꢾꢣꢶ ꢬꢵꢙ ꢈꢰꢶꢥꢸꢒ꣄ ꢣꢾꢒ꣄ꢒꢶ ꢂꢦꢸꢭ꣄ ꢒꢾꢰ꣄ꢜꢪꢸꢥꢱ꣄ꢒꢶ ꢱꢖ꣄ꢔꢶꢭꢶꢫꢾꢱ꣄ ꢣꢯꢬꢢꣁ ꣎ ꢈꢰꢶꢥ꣄ ꢣꢯꢬꢢ ꢬꢵꢜꢸꢒ꣄ ꢯꢾꢫ꣄ꢥꢸ ꢲꣂ ꢬꢙꢵ ! ꢗꢶꢥ꣄ꢡꣁ ꢦꣁꢠ꣄ꢠꢒꣁ ! ꢡꢹ ꢈꢰ꣄ꢫꢯꢺꢖ꣄ꢔꢸ ꢪꢾꢥꢥ꣄ ꢈꢰꢶꢒꢸ ꢱꢒꢭ ꢕꢾꢥꢪ꣄ ꢒꢾꢬꢶꢥꢸ ꢨꣁꢭ꣄ꢭꢶꢫꢮꢶ ꢡꢾꢖ꣄ꢒ ꢲꢡꢬꣁ ꢫꢵꢔꢸꢥ꣄ ꢗꢭ꣄ꢮꢾꢡꢶ ꢡꣁꢒꣁ ꢂꢮꢶ ꢭꢔꢶꢬꢶꢫꣁ ꢒꢾꢰ꣄ꢜꢪꢸꢥ꣄ ꢤꢪꢸꢞꣀꢫꢶ ꢪꢾꢥꢶ ꢬꢵꢙ ꢈꢰꢶꢥ꣄ ꢪꢾꢥ꣄ꢫꢵꢱ꣄ ꣎

ꢣꢯꢬꢢ ꢬꢵꢜꢸ ꢬꢵꢙ ꢈꢰꢶꢥ꣄ ꢱꢖ꣄ꢔꢾ ꢤꢵꢥꢸꢒ꣄ ꢈꢰ꣄ꢫꢯꢺꢖ꣄ꢔꢸꢒꢸ ꢨꣁꢭ꣄ꢭꢶꢫꢮꢾꢱ꣄ ꢈꢰ꣄ꢫꢯꢺꢖ꣄ꢔꢸ ꢂꢫꣂꢤ꣄ꢫꢵ ꢥꢔꢬꢶꢒꢸ ꢦꢔꢸꢭ꣄ ꢢꣁꢮꢾ ꢒ꣄ꢰꢠꢪꢸ ꢡꢾꢖ꣄ꢒ ꢪꢲꢶꢪꢵꢪ꣄ ꢦꣃꢱ꣄ ꢦꣁꢞꢾꢱ꣄ ꣎ ꢧꢬꢵꢡꢸ ꢫꢵꢙꢸ ꢗꢭ꣄ꢮꢱ꣄ꢡꢒꢸ ꢢꢵꢪ꣄ ꢥꢶꢬ꣄ꢪꢵꢥ꣄ ꢒꢾꢬꢶꢒꢶꢥ꣄ ꢂꢯ꣄ꢮꢪꢿꢤ ꢫꢵꢙꢸ ꢂꢖ꣄ꢔꢸꢥ꣄ ꢦꢸꢡ꣄ꢬꢒꢵꢪꢿꢰ꣄ꢜꢶ ꢫꢵꢙꢸ ꢗꢭ꣄ꢡꣁ ꢒꢾꢬ꣄ꢫꢵꢱꢶ ꣎ ꢧꢬꢵꢡꢸ ꢫꢵꢙꢸ ꢔꢸꢠ꣄ꢞꢪꢸ ꢬꢴꢷ ꢅꢯ꣄ꢮꢸꢬꢸ ꢂꢮꢶ ꢂꢪꢺꢡꢸ ꢣꢶꢫꢾꢱ꣄ ꣎ ꢡ꣄ꢫꢾ ꢣꢯꢬꢢꣁ ꢓꢳ꣄ꢳꢶꢒꢶꢥ꣄ ꢂꢦꢸꢭ꣄ ꢩꢵꢬ꣄ꢫꢵꢥꢸꢒ꣄ ꢣꢶꢫꢾꢱꢶ ꣎ ꢫꢵꢙꢸ ꢧꣂꢳꢸ ꢭꢾꢥ꣄ꢡꣁ ꢅꢯ꣄ꢮꢸꢬꢸ ꢦ꣄ꢬꢷꢡꢶ ꢲꣁꢫꢶ ꢦꣃꢱ꣄ꢦꢥꢶ ꢙꢸꢞꢾꢱ꣄ ꣎ ꢣꢯꢬꢢꢬꢵꢜꢸꢒꢸ ꢥꢴꢸꢬꢸ ꢧꣂꢳ꣄ ꢙꢸꢞꢶꢥꢸ ꢮꢪ꣄ꢯꢪ꣄ ꢮꢺꢣ꣄ꢤꢶ ꢲꣁꢫꢾꢱ꣄ ꣎ ꢣꢯꢬꢢꢬꢵꢜꢸ ꢱꢥ꣄ꢡꢸꢰ꣄ꢜꢶꢭꢶ ꢬꢵꢰ꣄ꢜ꣄ꢬ ꢦꢬꢶꢦꢵꢭꢥꣁ ꢒꢾꢬꢾꢱ꣄ ꣎ ꢙꢥꢸꢥꢱ꣄ꢒꢶ ꢱꣁꢥ꣄ꢡꢸꢒꢥꢶ ꢙꢶꢮ꣄ꢫꢵꢱ꣄ ꣏