ꢱꣃꢬꢦꢭ꣄ꢭꢶ ꢪꢾꢥꢱ꣄ꢡꢾ ꢦꣁꢜ꣄ꢒ꣄ꢫꢵꢞꢸꢪꢸ ꢫꣂꢒ꣄ ꢣꣁꢮ꣄ꢬꢶ ꢲꣁꢡꢶꢱ꣄꣎ ꢡꢶꢒꣁ ꢙꣁꢮꢳ꣄ ꢣꢷ ꢔꢵꢫꢶꢥ꣄ ꢲꣁꢡꢾꢱ꣄ ꣎ ꢡ꣄ꢫꢾ ꢔꢵꢫꢶꢥ꣄ ꢣꢹꢡ꣄ ꢣꢶꢭꢿꢡꢸ ꢲꣁꢡꢾꢱ꣄ ꣎ ꢡ꣄ꢫꢾ ꢣꢹꢡꢸ ꢮꢶꢒ꣄ꢒꢶꢥꢸ ꢡꢾꢪꢵꢪ꣄ ꢂꢨ꣄ꢨꢬꢶꢫꣁ ꢲꢥ꣄ꢥꢮ꣄ ꢢꣁꢮꢶꢭꢶ ꢡꢶꢥꣁ ꢣꢶꢥ꣄ꢥꢸ ꢔꢪ꣄ꢜꢶꢭꢶꢫꢮꢶꢱ꣄ ꣎ ꢄꢫꢾ ꢣꣁꢮ꣄ꢬꢶꢒꢸ ꢫꣂꢒ꣄ ꢨꢾꢜꢶ ꢲꣁꢡꢶꢱ꣄ ꣎ ꢡꢶꢒꣁ ꢣꣁꢮ꣄ꢬꢶ ꢦ꣄ꢬꢿꢮ꣄ꢒꢥꢶ ꢲꣁꢮ꣄ꢞꢶꢭꢶꢫꢮꢶꢱ꣄ ꣎
ꢔꢵꢫꢶꢥ꣄ ꢙꣁꢮꢳ꣄ ꢬꢴꢷ ꢣꣁꢮ꣄ꢬꢶ ꢣꢹꢡ꣄ ꢦꢶꢳꢶ ꢣꢶꢫꢾꢡꢶ ꢡꢾꢒ ꢨꢾꢜꢶ ꢡꢶꢫꢾ ꢓꢳ꣄ꢳꢶꢥꢸ ꢱꢾꢙ꣄ꢙ ꢦꢭ꣄ꢭꢶꢥꢸꢒꢸ ꢓꢳ꣄ꢳꢶ ꢙꢷꢒꢶꢥ꣄ ꢮꢶꢒ꣄ꢒꢶꢡꢶ ꢂꢮꣀ ꣎ ꢏꢠ꣄ꢜꢾꢣꢶ ꢡ꣄ꢫꢾ ꢙꣃꢠꢶ ꢓꣁꢨ꣄ꢨꢶꢪ꣄ ꢱꣁꢒꢥ꣄ ꢣꣁꢱ꣄ꢒꣁ ꢆꢛ꣄ꢗꣁ ꢣꢹꢡꢸ ꢩꣁꢥ꣄ꢥꣁ ꢱꢾꢥ꣄ꢡꣁ ꢱꢾꢙ꣄ꢙ ꢦꢭ꣄ꢭꢶꢒꢸ ꢗꢭꢶ ꢙꢶꢭꢿꢡꢸ ꢲꣁꢡꢶꢱ꣄ ꣎ ꢙꢾꢞꢒ꣄ꢒꢾꢬꢶ ꢡꢶꢒ ꢪꣁꢥ꣄ꢥꢸꢪ꣄ ꢫꣂꢒ꣄ ꢗꢶꢥ꣄ꢡꢥꣁ ꢧꢸꢭꢾꢱ꣄ ꣎
“ ꢌꢭ꣄ꢭꢾ ꢣꢹꢡ꣄ ꢂꢪꢶ ꢂꢣ꣄ꢣꢶ ꢪꣂꢭꢸꢒꢸ ꢮꢶꢒ꣄ꢒꢾꢡꢶ ꢚꢸꢒ꣄ꢒꢸ ꢬꢸꢦꢵꢫꢶꢥ꣄ ꢂꢨ꣄ꢨꣀ ꣎ ꢡ꣄ꢫꢾ ꢢꣁꢮꢶꢭꢶꢥꢸ ꢫꣂꢒ꣄ ꢒꢸꢒꢸꢞꢶ ꢓꢞꢸꢮꢵꢫ꣄ ! ꢡ꣄ꢫꢾ ꢥꢶꢗ꣄ꢗꢸ ꢂꢠ꣄ꢞꣁ ꢱꣁꢞꣀ ! ꢡ꣄ꢫꢾ ꢂꢠ꣄ꢞꣁ ꢮꢶꢒ꣄ꢒꢶꢥꢸ ꢚꢸꢒ꣄ꢒꢸ ꢲꢥ꣄ꢥꢮ꣄ ꢙꣁꢞꢸꢛ꣄ꢗꢶ ꢪꢴꣁꢜ꣄ꢜꣁ ꢪꣁꢣ꣄ꢬꢳꢶꢥ꣄ ꢲꣁꢫ꣄ꢫꢮꢵꢫ꣄ ! ꢚꢸꢒꢸ ꢥꣁꢮ꣄ꢮꣁ ꢧꢿꢭꢸꢥ꣄ ꢩꢹꢰꢸꢠ꣄ ꢕꢭ꣄ꢭꢸꢮꢵꢫ꣄ ! ꢡ꣄ꢫꢾ ꢯꢾꢫ꣄ꢥꢸ ꢂꢱ꣄ꢒꢶ ꢡꢾꢥꢸ ꢪꣁꢬ꣄ ꢙꣁꢮꢳ꣄ ꢮꢡ꣄ꢡꣁ ꢒꢾꢬꢱ꣄ꢡꢒꢸ ꢪꢶꢳꢶꢫꢮꢥ꣄ ! ꢪꢷ ꢡꢾꢖ꣄ꢒꣁ ꢱꢷꢡꢶꢒꢶꢥ꣄ ꢱꢵꢥꢵꢱ꣄ꢡꢶꢥꣁ ꢱꣁꢒꢥ꣄ ꢮꢡ꣄ꢡꣁ ꢒꢾꢬ꣄ꢥꢵꢱ꣄ꢡꢒꢸ ꢣꣁꢱ꣄ꢒꣁ ꢪꢵꢡ꣄ꢬꢪ꣄ ꢲꢮ꣄ꢳꢸꢮꢵꢫ꣄” ꢪꢾꢥꢶ ꢪꣁꢥ꣄ꢥꢸꢪ꣄ ꢗꢶꢥ꣄ꢡꢥꣁ ꢤꢪꢭ꣄ꢭꢶꢱ꣄ ꣎
ꢣꣁꢱ꣄ꢒꣁ ꢆꢛ꣄ꢗꣁ ꢣꢹꢡꢸ ꢩꣁꢥ꣄ꢥꣁ ꢯꢿꢡ꣄ꢡꢾ ꢲꢜ꣄ꢮꢥ꣄ ꢮꢶꢱꢸꢬꢳ꣄ꢳꢶꢒꢶꢥ꣄ ꢂꢭꢒ꣄ꢰꢶꢫꢪ꣄ꢒꢥꢶ ꢣꣁꢱ꣄ꢒꣁ ꢲꢮ꣄ꢳꢶꢱ꣄ ꣎ ꢣꢹꢡꢸ ꢩꣁꢥ꣄ꢥꣁ ꢓꢵꢭ꣄ ꢦꣁꢞꢶ ꢧꢸꢜ꣄ꢜꢶ ꢣꢹꢡꢱ꣄ꢒꢶ ꢮꢶꢬ꣄ꢡꢵꢒ꣄ ꢲꣁꢫ꣄ꢫꣁ ꣎ ꢄꢫꢾ ꢱꢶꢫꢾ ꢡ꣄ꢫꢾ ꢙꣃꢠꢶ ꢲꢵ ꢲꢵ ꢪꣁꢬ꣄ ꢮꢶꢬ꣄ꢡꢵꢒꢸ ꢲꣁꢫꢾ ꢱꣁꢮ꣄ꢥꣁ ꢲꢵꢭꢶ ꢌꢭ꣄ꢭꢾ ꢔꢡꢶ ꢑꢞꢶꢫꣁ ꢥꢵ ꢪꢾꢥꢶ ꢮꢶꢗꢵꢬ꣄ ꢦꣁꢞꢶꢱ꣄ ꣎ ꢬꣁꢞ꣄ꢭꢿꢡ꣄ꢒꢥꢶ ꢕꢿꢬ꣄ ꢙꢷꢱ꣄ ꣎ ꢂꢦꢸꢭ꣄ ꢪꢵꢫ꣄ ꢙꣁꢮꢳ꣄ ꢗꢭꢾ ꢮꢶꢮꢬꢸꢥꢱ꣄ꢒꢶ ꢱꢖ꣄ꢔꢶꢱ꣄ ꣎
ꢡ꣄ꢫꢾ ꢣꣁꢮ꣄ꢬꢶ ꢡꢾꢒ ꢨꢾꢜꢶꢒ꣄ ꢯꢾꢫ꣄ꢥꢸ ꢮꢶꢗꢵꢬ꣄ ꢦꣁꢠ꣄ꢠꢒꣁ ꢓꣁꢨ꣄ꢨꢶꢪ꣄ ꢂꢦꢸꢭ꣄ ꢒꢵꢪ꣄ꢪꢸ ꢙꢔꢬꢪ꣄ꢒꢥꢶ ꢬꢴꢥꣁ ! ꢪꢾꢥꢶ ꢱꢖ꣄ꢔꢶꢱ꣄ ꣎ ꢡꢾꢥ꣄ꢣꢸꢱ꣄ ꢣꢶꢥ꣄ꢥꢵꢪ꣄ ꢬꢴꢷ ꢮꢶꢬ꣄ꢡꢵꢒ꣄ ꢲꣁꢫꢾ ꢱꣁꢮ꣄ꢥꢵꢥ꣄ ꢗꢶꢥ꣄ꢡꢥꢵꢥ꣄ ꢂꢱ꣄ꢒꢶ ꢱꣁꢞ꣄ꢞꢶꢒꢶꢥ꣄ ꢂꢦꢸꢭ꣄ ꢒꢵꢪ꣄ꢪꢸ ꢙꢔꢬꢪ꣄ꢒꢥꢶ ꢗꢭ꣄ꢭꢶꢱ꣄ ꢡ꣄ꢫꢾ ꢙꣃꢠꢶ ꣏
Leave a Reply
You must be logged in to post a comment.