ꢮꢶꢒ꣄ꢬꢪꢵꢣꢶꢡ꣄ꢫꢬꢙꣁ ꢮꢿꢡꢵꢳꢸꢒꢸ ꢤꢾꢬ꣄ꢭꢶ ꢂꢮꢡ꣄ꢢꢾꢨ꣄ꢨꣁ ꢮꢿꢡꢵꢳꢸ ꢫꣂꢒ꣄ ꢓꢾꢥꢶ ꢱꢖ꣄ꢔꢥ꣄ ꢥꢶꢒꢶꢳꢾꢱ꣄ ꣎
ꢲꢿ ꢩꢹꢦꢵ ! ꢔꣂꢪꢮꢡꢶ ꢥꢔꢬꢶꢪ꣄ ꢯ꣄ꢬꢿꢰ꣄ꢠꣁ ꢪꢾꢥꢥ꣄ ꢩꣃꢠꣁ ꢲꣁꢡꢾꢱ꣄ ꣎ ꢡꢾꢥꣁ ꢱꢒꢭ ꢯꢵꢱ꣄ꢡꢬꢸꢥ꣄ ꢯꢶꢒ꣄ꢒꢾ ꢦꢠ꣄ꢞꢶꢡꢸ ꣎ ꢡꢾꢒ ꢲꣁꢬꢵꢜ꣄ ꢲꣁꢫꢶ ꢣꢾꢱ꣄ꢱꢸ ꢮꣁꢬ꣄ꢱꢸ ꢧꢬꢵꢡꢸ ꢥꢴꢸꢬꢸ ꢧꣂꢳ꣄ ꢙꢸꢞꢾꢱ꣄ ꣎ ꢡ꣄ꢫꢿ ꢥꢴꢸꢬꢸꢒꢸ ꢤꢬ꣄ꢪꢿꢯ꣄ ꢪꢾꢥꢶ ꢥꢵꢮ꣄ ꢕꢭꢶ ꢱꢒꢭ ꢯꢵꢱ꣄ꢡꢬꢸꢥ꣄ ꢯꢶꢒ꣄ꢒꢞꢶꢣꢷꢒꢶꢥ꣄ ꢲꣁꢞ꣄ꢮꢾꢱ꣄ ꣎ ꢡ꣄ꢫꢿ ꢥꢴꢸꢬꢸ ꢯꢾꢠꢪ꣄ ꢂꢱ꣄ꢒꢶ ꢯꢵꢱ꣄ꢡꢬꢸꢥ꣄ ꢯꢶꢒ꣄ꢒꢶꢭꢶꢞꢶꢫꣁ ꣎꣎
ꢂꢦꢸꢭ꣄ ꢨꢾꢜꣁ ꢂꢮꢥ꣄ꢒꢵꢭꢸꢪ꣄ ꢪꢴꣁꢜ꣄ꢜꣁ ꢦꢠ꣄ꢞꢶꢡꢸ ꢲꣂꢫ꣄ ꢪꢾꢥꢶ ꢯ꣄ꢡꢿꢰ꣄ꢠꣁ ꢲꢜ꣄ꢮꢾꢱ꣄ ꣎ ꢲꣁꢫꢾꢡꢶ ꢡꢾꢒ ꢨꢾꢜꣁ ꢧꢥ꣄ꢣꢬ꣄ ꢮꣁꢬ꣄ꢱꢸꢪꢸ ꢪꣁꢬ꣄ꢙꣁ ꣎ ꢨꢾꢜꣁ ꢔꢾꢔꢾ ꢭꢾꢥ꣄ꢡꣁ ꢯ꣄ꢬꢿꢰ꣄ꢠꣁꢒꢶꢥ꣄ ꢡꢾꢒ ꢩꢵꢬ꣄ꢫꣁ ꢲꣂ ꢒꢾꢬꢶ ꢬꣁꢞ꣄ꢭꢿꢡ꣄ ꢲꣁꢡ꣄ꢫꢵꢱ꣄ ꣎ ꢣꢸꢒ꣄ꢓꢸ ꢭꢾꢥ꣄ꢡꣁ ꢂꢦꢸꢭ꣄ ꢨꢾꢜꢵꢒ꣄ ꢪꣁꢱ꣄ꢫꢵꢥꢸꢒ꣄ ꢨꣁꢭ꣄ꢭꢶ ꢙꢷꢒꢶꢥ꣄ ꢣꢲꢥꢪ꣄ ꢒꢾꢬ꣄ꢥꣁ ꢪꢾꢥꢶ ꢲꢜ꣄ꢮꢶꢫꢵꢥꢶ ꣎ ꢔꢵꢪꢸ ꢪꢴꣁꢜ꣄ꢜꢵꢥ꣄ ꢂꢱ꣄ꢒꢶꢥꢶ ꢪꢶꢳꢶ ꢪꣁꢬꢾ ꢣꢿꢲꢸ ꢄꢱꣁ ꢡꢔꢶ ꢢꣁꢮ꣄ꢭꣁ ꢲꣂꢥꢵ ꢪꢾꢥꢶ ꢗꣂꢞ꣄ꢲꢷꢥ꣄ ꢱꢖ꣄ꢔꢶ ꢣꢾꢒ꣄ꢒꢞꢶꢫꢵꢱ꣄ ꣎
ꢧꢭ꣄ꢗꣁ ꢪꣁꢱ꣄ꢫꢵꢥꢸꢒ꣄ ꢨꣁꢳ꣄ꢳꢶ ꢙꢷ ꢣꢲꢥꢪ꣄ ꢒꢾꢬꢡ꣄ꢡꢮꢿꢳ꣄ ꢡꢿꢜ꣄ ꢂꢮꢾ ꢫꣂꢒ꣄ ꢮꢺꢣ꣄ꢤ ꢪꢸꢥꢶ ꢯ꣄ꢬꢿꢰ꣄ꢠꣁ ꢨꢾꢜꢵꢒ꣄ ꢪꣁꢬꢥ꣄ ꢣꢷꢞꢶ ꢬꣁꢞꢬꢶꢫꣁ ꢯꢾꢫ꣄ꢥꢸ “ꢂꢦꢸꢭ꣄ ꢪꢥ꣄ꢡ꣄ꢬ ꢯꢒ꣄ꢡꢶ ꢲꢵꢭꢶ ꢯꢬꢷꢬ꣄ ꢱꣁꢞ꣄ꢞꢶ ꢯꢬꢷꢬ꣄ ꢡꢸꢬꢾꢥ꣄” ꢪꢾꢥꢶ ꢲꢜ꣄ꢮꢶꢭꢿꢡ꣄ ꢲꢱꢾꢱ꣄ | ꢲꢱꢶꢭꢿꢡ꣄ ꢧꢭ꣄ꢗꣁ ꢬꣁꢞꢾꢱ꣄ ꢪꢸꢥꢶ ꣎ ꢪꢸꢥꢶ ꢂꢦꢸꢭ꣄ ꢪꢥ꣄ꢡ꣄ꢬ ꢯꢒ꣄ꢡꢶꢥ꣄ ꢲꢵꢭꢶ ꢂꢦꢸꢭ꣄ ꢯꢬꢷꢬ꣄ ꢱꣁꢞ꣄ꢞꢶ ꢤꢬ꣄ꢪꢿꢯ꣄ ꢯꢬꢷꢬꢸꢪ꣄ ꢡꢸꢬꢾꢱ꣄ ꣎ ꢤꢬ꣄ꢪꢿꢯ꣄ ꢲꢸꢜꢶꢨꢶꢱꢶꢳ꣄ꢞꢶꢫꣁ ꢪꢵꢫ꣄ ꢨꢵꢦꢸꢥ꣄ ꢪꣁꢬ꣄ ꢨꢾꢜꢵꢒ꣄ ꢙꢷꢮ꣄ ꢂꢮ꣄ꢞꢶꢫꣁ ꢪꢾꢥꢶ ꢩꢾꢳꢶ ꢱꣁꢥ꣄ꢡꣂꢰ꣄ ꢦꣁꢞ꣄ꢫꢵꢱ꣄ ꣏
ꢲꢿ ꢩꢹꢦꢵ ! ꢌꢭ꣄ꢭꢾ ꢪꢸꢥꢶ ꢤꢬ꣄ꢪꢿꢯ꣄ ꢯꢬꢷꢬꢸꢪ꣄ ꢡꢸꢬꢱ꣄ꢡꢾ ꢪꢸꢭ꣄ꢭꢵꢪ꣄ ꢒꢔꣁ ꢬꣁꢞꢾꢫꣁ ? ꢧꢷꢬ꣄ ꢒꢔꣁ ꢲꢱꢾꢫꣁ ? ꢪꢾꢥꢶ ꢮꢿꢡꢵꢳꢪ꣄ ꢦꢸꢱꢾꢱ꣄ ꣎꣎ ꢡꢾꢭ꣄ꢫꢾꢒꣁ “ ꢪꢸꢥꢶꢒ꣄ ꢂꢮꢾ ꢮꢷꢒꢵꢬꢸꢱ꣄ ꢒꢵꢬꢠꣁ ꣎ ꢚꢸꢒꢸ ꢣꢶꢥ꣄ꢥꢸ ꢙꢶꢮ꣄ꢭꢿꢡ꣄ ꢲꣁꢡꢾ ꢂꢦꢸꢭ꣄ ꢯꢬꢷꢬ꣄ ꢱꣁꢞꢥ꣄ ꢙꢵꢬꢶꢫꣁ ꢲꢜ꣄ꢮꢶ ꢪꢸꢭ꣄ꢭꣁ ꢬꣁꢞꢾꢫꣁ ꣎ ꢧꢭ꣄ꢗꣁ ꢙꢸꢥ꣄ꢥ ꢦꣁꢞꢾ ꢌꢭ꣄ꢭꢾ ꢯꢬꢷꢬ꣄ ꢱꣁꢞ꣄ꢞꢶ ꢣꢸꢱꢸꢬꢾ ꢙꣃꢠ ꢯꢬꢷꢬ꣄ ꢂꢨ꣄ꢨꢬꢱ꣄ ꢪꢾꢥꢶ ꢲꢜ꣄ꢮꢶ ꢲꢱꢶꢬꢶꢫꣁ ꢪꢾꢥꢶ ꢮꢶꢒ꣄ꢬꢪꢵꢣꢶꢡ꣄ꢫꢬꢙꣁ ꢙꢾꢮꢵꢦ꣄ ꢒꢾꢬꢾꢱ꣄ ꣎
ꢬꢙꣁ ꢙꢾꢮꢵꢦ꣄ ꢒꢾꢬꢾ ꢕꢾꢜꢶꢪ꣄ ꢮꢿꢡꢵꢳꢸ ꢧꢷꢬ꣄ ꢂꢦꢸꢭ꣄ ꢔꢵꢜ꣄ ꢱꣁꢞ꣄ꢮꢶꢭꢶ ꢯꢶꢪ꣄ꢯꢦꢵ ꢚꢵꢞꢸ ꢲꣂꢬ꣄ ꢲꢶꢖ꣄ꢔꢶꢥꢸ ꢭꣁꢪ꣄ꢨ ꢥꢶꢒꢶꢳ꣄ꢞꢶꢫꣁ ꣏
ꢓꢾꢥꢶ ꢗꣁꢮ꣄ꢣꢡꣁ ꢗꣁꢒ꣄ꢒꢜ꣄ ꢭꢔꢾꢱ꣄…ꢙꢸꢒ꣄ꢒꢸ ꢤꢥ꣄ꢥꢸ ꢣꢵ ꣎
ꢩꢾꢳ꣄ꢳꢶ ꢱꣁꢥ꣄ꢡꣂꢰ꣄ ꢤꢥ꣄ꢥꢸ ꣎