ꢡꢵꢱꢸꢒꢾ ꢪꢲꢶꢪꣁ !!!

ꢱꢿꢭꢪ꣄ ꢱꢾꢮ꣄ꢮꢵꢫ꣄ ꢦꢿꢜ꣄ꢜꣀ ꢱꣃꢬꢵꢰ꣄ꢜ꣄ꢬ ꢱꢩꢵ ꢂꢖ꣄ꢔꢸꢥ꣄ ꢱꢾꢮ꣄ꢮꢵꢫ꣄ ꢦꢿꢜ꣄ꢜꣀ ꢱꣃꢬꢵꢰ꣄ꢜ꣄ꢬ ꢪꢵꢣꢬ꣄ ꢱꢖ꣄ꢔꢪ꣄ ꢗꢾꢬꢶ ꢗꢭ꣄ꢡ ꢒꢬꢾ ꢱꣁꢥ꣄ꢥꢵ ꢮꣀꢩꢮꢸꢪ꣄ (ꢮꣀꢩꢮ꣄ ꢪꢸꢱꢬꢶꢫ ꢣꢶꢥ꣄ꢥꢸꢪ꣄       ꣒꣔-꣐꣙-꣑꣙꣙꣕ ꢪ꣄) ꢡꢵꢱꢸꢒꢾ ꢪꢲꢶꢪꣁ (ꢥꢿꢬꢡ꣄ꢡꢶꢥ꣄ ꢱꢶꢬꢦ꣄ꢦꢸ) ꢪꢾꢥꢶ ꢮꢡ꣄ꢡ ꢒꢬꢾ ꢯ꣄ꢬꢷ ꢭꢿꢥꢵ ꢡꢪꢶꢳ꣄ꢮꢵꢠꢥ꣄ ꢥꢸ ꢡꢪꢶꢳꢸꢪ꣄ ꢮꢗꢾ ꢮꢗꢶꢥꢶ ꢂꢮ꣄ꢬꢾ ꢱꣃꢬꢵꢰ꣄ꢜ꣄ꢬ ꢩꢵꢰꢵꢪ꣄ ꢂꢥꢸꢮꢵꢡ꣄ ꢒꢬꢶ ꢩꢵꢰꢵꢩꢶꢪꢵꢥꢶ ꢣꢶꢮꢳꢶ ꢧꢹꢭꢸꢪ꣄ ꣑꣙꣙꣕ ꢪ꣄ ꢂꢮ꣄ꢬꢾꢱꢶ ꣎

ꢒꣂꢥꣁꢠ꣄ꢜ꣄ꢫꢾ ꢒꢵꢪ꣄ ꢒꢾꢬ꣄ꢥ ꢲꣁꢫꢾꢡ꣄ꢒꢵꢫ꣄ ꢒꣂꢥꣁꢠ꣄ꢜ꣄ꢫꢾ ꢡꢾꢖ꣄ꢒꣁ ꢣꢾꢒ꣄ꢒꢶ ꢮꢡ꣄ꢡꣁ ꢒꢾꢬ꣄ꢥ ꢪꢾꢥꢾꢡ꣄ ꢒꢵꢫ꣄, ꢡ꣄ꢫꢿ ꢡ꣄ꢫꢿ ꢡꢵꢱꢸꢪꢹꢱ꣄ ꢱꢸꢜ꣄ꢜꢸꢥꢵꢱ꣄ꢡ꣄ꢡꢒꢸ ꢒꢵꢪꢸꢥ꣄ ꢒꢾꢬ꣄ꢡꢸꢥꣁ ! ꢣꢾꢒ꣄ꢒꢶ ꢮꢡ꣄ꢡꢵꢥ꣄ ꢒꢾꢬꢶ ꢒꢵꢪꢸꢥ꣄ ꢪꢸꢱꢳ꣄ꢳꢸꢞ꣄ꢥꣁ ꣎ ꢧꢭ꣄ꢗꣁ ꢒꢾꢬ꣄ꢭꢾꢥ꣄ ꢪꢾꢥꢶꢡꢷ, ꢕꢾꢞꢶ ꢱꢸꢜ꣄ꢜꢶ ꢕꢾꢞꢶꢪ꣄ꢡꢷ ꢒꢵꢪꢸꢥ꣄ ꢒꢾꢬꢥ꣄ ꢲꣂꢥꢵ ꢪꢾꢥꢱ꣄ꢡ꣄ꢡꢾ ꢡꢵꢱꢸꢒꢾ ꢪꢲꢶꢪꣁ ꢙꢥ꣄ꢫꢵꢱ꣄ꢡ꣄ꢡꢾꢥꢸ ꢙꢥ꣄ꢭꢥ꣄ ꣎

ꢡꢵꢱꢸꢒꢾ ꢪꢲꢶꢪꣁ ꢏꢬ꣄ꢱꢸ, ꢪꢴꢞꣁ, ꢱꢦ꣄ꢡꢵꢒꢸ, ꢣꢶꢥ꣄ꢥꢸ, ꢕꢵꢜꢸ, ꢕꢾꢞꢶ, ꢮꢶꢕꢾꢞꢶ, ꢱꢡꢪ ꢮꢶꢕꢾꢞꢶ, ꢱꢹꢒ꣄ꢰ꣄ꢪ ꢮꢶꢕꢾꢞꢶ, ꢪꢾꢥꢶ ꢩꣁꢮꢾ ꢮꢵꢜꢸꢥꢸꢪ꣄ ꢒꢳꢳ꣄ꢭꢸꢮꢵꢫ꣄ ꣎

ꢏꢬ꣄ꢱꢸꢒꢾ ꢪꢲꢶꢪꣁ ꢦꢬꢷꢒ꣄ꢰꢾꢪ꣄ ꢥꢸꢥꣁ(ꢧꢾꢫ꣄ꢭ꣄) ꢲꣁꢫꢾ ꢮꢶꢣ꣄ꢫꢵꢬ꣄ꢡꢶꢥ꣄ ꢙꣁꢮꢳ꣄ ꢡꣁꢒꢥ꣄ ꢙꢥ꣄ꢭꢸꢮꢵꢫ꣄ ꣎ ꢥꢸꢥꣁ ꢲꣁꢫꢾ ꢭꢾꢥ꣄ꢡꣁ ꢧꢷꢬ꣄ ꢏꢠ꣄ꢜ꣄ꢫꢾ ꢏꢬ꣄ꢱꢸ ꢡ꣄ꢫꢿꢱ꣄ ꢮꢬ꣄ꢔꢸꢪ꣄ ꢄꢔꢶ (ꢗꢾꢮ꣄ꢣꢶ) ꢦꢬꢷꢒ꣄ꢰꢵꢪ꣄ ꢱꢶꢣ꣄ꢤꢶ ꢦꣁꢥ꣄ꢣꢸꢥꣁ ꢦꢙꢾ ꣎ ꢏꢠ꣄ꢜ꣄ꢫꢾ ꢏꢬ꣄ꢱꢸ ꢮꢺꢡꢵ ꢲꣁꢫꢾꢱ꣄ꢥ ꢪꢾꢥꢶ ꢂꢖ꣄ꢔꢸꢭꢵꢦ꣄ ꢦꣁꢥ꣄ꢣꢥ꣄ ꢅ ꢮꢶꢣ꣄ꢫꢵꢬ꣄ꢡꢶ ꢙꣁꢮꢳ꣄ ꢡꣁꢒꢥ꣄ ꢏꢬ꣄ꢱꢸꢒꢾ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎

ꢪꢴꢞꢵꢒꢾ ꢪꢲꢶꢪꣁ ꢏꢠ꣄ꢜꢾ ꢪꢴꢞꢵ ꢱꣁꢪ꣄ꢪꢬꢸꢪ꣄ ꢙꢬ꣄ꢒꢾꢪ꣄ ꢲꣁꢫꢾ ꢕꢾꢮ꣄ꢬꢬꢶꢥ꣄ ꢙꣁꢮꢳ꣄ ꢡꣁꢒꢥ꣄ ꢒꢳꢳ꣄ꢭꢸꢮꢵꢫ꣄ ꣎ ꢪꢴꢞ ꢱꣁꢪ꣄ꢪꢬꢸꢪ꣄ ꢙꢬ꣄ꢒꢾꢪ꣄ ꢲꣁꢫꢾ ꢭꢾꢥ꣄ꢡꣁ ꢙꢾꢥꢾ ꢥꢴꢸꢬꢸꢒ꣄ ꢦꣂꢡꢶ ꢒꢾꢬ꣄ꢥ ꢯꢿꢱ꣄ꢡꢾ ꢱ꣄ꢬꢪꢵꢥ꣄ ꢔꣃꢥꢸꢪ꣄ ꢂꢥ꣄ꢭꢾꢡꢶ ꢧꢸꢳ꣄ꢳꢸꢙꢾ ꢥꢴꢸꢬꢸ ꢒꢸ ꢒꣂꢥꢒ꣄ ꢩꣁꢣ꣄ꢣꢸꢬꢪ꣄ ꢱꢾꢫ꣄ꢭꢸꢥꣁ ꢪꢾꢥꢶ ꢙꢥ꣄ꢫꢾꢡꢶ ꢅ ꢪꢴꢞꢵꢒꢾ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎

ꢱꢦ꣄ꢡꢵꢒꢸꢒꢾ ꢪꢲꢶꢪꣁ ꢮꢵꢬꢵꢥ꣄ꢣ꣄ꢬ ꢦꢡ꣄ꢬꢶꢒꢾ ꢗꢭ꣄ꢡꢒꢾꢬꢥ꣄ ꢚꢜ꣄ꢡꢶꢡꢸ ꢙꣁꢮꢳ꣄ ꢡꣁꢒꢥ꣄ ꢒꢳꢳ꣄ꢭꢸꢮꢵꢫ꣄ ꣎ ꢒꢵꢪ꣄ ꢲꣁꢭ꣄ꢭ ꢒꢵꢪ꣄ ꢱꢸꢜ꣄ꢜꢸꢥꢵꢱ꣄ꢡ꣄ꢡꢒꢸ ꢒꢾꢬ꣄ꢭꢿꢡ꣄ ꢬꢴꢶꢫꢾꢡꢷꢱ꣄ ꢱꢾꢬ꣄ꢒ ꢲꣁꢫꢾ ꢮꢵꢬꢸ ꢩꢶꢡ꣄ꢡꢬꢸꢪ꣄ ꢦꢡ꣄ꢬꢶꢒꢾ ꢩꢬꢵꢜ꣄ ꢂꢥꢸꢮꢵꢫ꣄ ꣎ ꢱꢦ꣄ꢡꢵꢒꢸ ꢱꢦ꣄ꢡꢵꢒꢸ ꢱꢸꢜ꣄ꢜꢸꢥꢵꢱ꣄ꢡ꣄ꢡꢒꢸ ꢱꢾꢬ꣄ꢒ ꢲꣁꢫꢾ ꢮꢵꢬꢸ ꢩꢶꢡ꣄ꢡꢬꢸꢪ꣄ ꢦꢡ꣄ꢬꢶꢒꢾ ꢩꢬꢵꢜ꣄ ꢂꢥꢥ꣄ ꢚꢜ꣄ꢡꢶꢡꢸ ꢙꣁꢮꢳ꣄ ꢡꣁꢒꢥꢹꢱ꣄ ꢱꢦ꣄ꢡꢵꢒꢸ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎

ꢣꢶꢥ꣄ꢥꢸꢒꢾ ꢪꢲꢶꢪꣁ ꢣꢶꢥ ꢆꢗ꣄ꢭꢵꢮꢶ ꢒꢹꢱ꣄ ꢒꢳꢵꢫ꣄ ꣎ ꢡꢾꢥ꣄ꢣꢸꢱ꣄ ꢡꢾꢥ꣄ꢣꢸꢱ꣄ ꢦꣂꢜꢸ ꢩꢵꢡꢸꢒ꣄ ꢡꢾꢥ꣄ꢣꢸꢱ꣄ ꢡꢾꢥ꣄ꢣꢸꢱ꣄ ꢒꢵꢪ꣄ ꢒꢾꢬꢶ ꢆꢗ꣄ꢭꢵꢮ꣄ ꢱꢾꢫ꣄ꢭ꣄ꢥ ꢯꢿꢱ꣄ꢡꢾꢒ ꢒꢵꢪ꣄ ꢒꣀ ꢂꢨ꣄ꢨꢸꢥꢵ ꢙꢶꢫꢾꢡꢶ ꢒꢵꢪ꣄ ꢒꢾꢬꢥ꣄ ꢪꢸꢱꢸꢥꢵ ꢙꢶꢫꢾꢡꢶ ꢏꢒꢾ ꢮꢿꢳꢸꢪ꣄ ꢚꢔꢸꢮꣁ ꢪꢾꢥ꣄ꢡꢶꢫꢾꢡꢶ ꢡꢾꢥ꣄ꢣꢸꢱ꣄ ꢦꣂꢜꢸꢬ꣄ ꢏꢭ꣄ꢭ ꢨꣁꢜ꣄ꢜꣁ ꢡꢔꢸꢭ꣄ꢥ ꢯꢿꢱ꣄ꢡꢿꢱ꣄ ꣎ ꢄꢱꢒ ꢦꣂꢜꢸꢬ꣄ ꢲꢥ꣄ꢥꢶ ꢦꣁꢞꢥ꣄ ꢣꢶꢥ ꢆꢗ꣄ꢭꢵꢮꢶ ꢙꣁꢮꢳ꣄ ꢡꣁꢒꢥ꣄ ꢣꢶꢥ꣄ꢥꢸ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎

ꢕꢵꢜꢸ ꢪꢲꢶꢪꣁ ꢏꢫ꣄ꢣꢦ꣄ꢦꢥ꣄ ꢒꢾꢬꢥ꣄ ꢏꢫ꣄ꢣꢸꢥꢸꢒ꣄ ꢒꢳꢵꢫ꣄ ꣎ ꢡꢾꢥꢸ ꢪꢾꢥꢱ꣄ꢡ꣄ꢡꢾ ꢎꢒ꣄ꢒꢶ ꢬꢴꢮ꣄ꢮꢵꢫ꣄ ꢏꢠ꣄ꢜꢾ ꢕꢵꢜꢸ ꢧꢸꢳ꣄ꢳꢵꢪ꣄ ꢡꢸꢪꢶ ꢍꢜ꣄ ꢨꣁꢭ꣄ꢭꢶ ꢑꢬꢴꢶꢫꢾꢡ꣄ ꢪꢷ ꢏꢫ꣄ꢣꢦ꣄ꢦꢥ꣄ ꢒꢾꢬꢶꢒꢶꢥ꣄ ꢙꢷꢮ꣄ ꢲꢵꢥꢶ ꢲꣂꢥꢵꢱ꣄ꢡ꣄ꢡꢒꢸ ꢒꢾꢬꢫ꣄ꢫꢶꢬꢴꢫ꣄ ꣎ ꢄꢱꢒ ꢂꢱ꣄ꢒꢶ ꢪꢸꢱꢥ꣄ ꢮꢿꢳ꣄ꢥꢵ ꢍꢜ꣄ ꢡꢸꢪꢶ ꢨꣁꢭ꣄ꢭꢶ ꢑꢞ꣄ꢫꢵ ! ꢏꢠ꣄ꢜꢾ ꢕꢵꢜꢸ ꢧꢸꢳ꣄ꢳꢵꢪ꣄ ꢑꢞ꣄ꢬꢴꢶꢫꢾꢡ꣄ ꢙꢷꢮ꣄ ꢲꢵꢥꢶ ꢲꣁꢫ꣄ꢬꢴꢵꢥꢵꢥꢵ ꢪꢾꢥꢶ ꢲꣃꢜꢶ ꢱꢶꢫꢾꢡꢶ ꢕꢵꢜꢸꢒꢾ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎

ꢕꢾꢞꢶꢒꢾ ꢪꢲꢶꢪꣁ ꢡꣁꢬꢥꢸ ꢔꢸꢰ꣄ꢜꢶ ꢤꢾꢬꢥ꣄ ꢱꣁꢞꢶ ꢣꣁꢳꢵ ꢡꣂꢒꢸ (ꢮꢾꢣꢸꢬ꣄) ꢔꢸꢰ꣄ꢜꢶ ꢥꢶꢒꢶꢳꢶ ꢨꢶꢱ꣄ꢱ ꢙꢵꢬꢶꢫꢾ ꢱꢾꢫ꣄ ꢩꢾꢫ꣄ꢱꣁ ꢦꣁꢞꢶ ꢲꢶꢨ꣄ꢨꢶꢬꢾꢱ꣄ꢡ꣄ꢡꢾꢒ ꢙꣁꢮꢳ꣄ ꢡꣁꢒꢥ꣄ ꢒꢳꢳ꣄ꢭꢸꢮꢵꢫ꣄ ꣎ ꢏꢠ꣄ꢜꢾ ꢕꢾꢞꢶ ꢧꢸꢳ꣄ꢳꢵꢪ꣄ ꢑꢞ꣄ꢬꢴꢶꢫꢾꢡ꣄ ꢡꣁꢬꢥꢸ ꢔꢸꢰ꣄ꢜꢶ ꢤꢾꢬꢶ ꢲꢶꢖ꣄ꢔꣀꢫꢶꢬꢴꢵꢫ꣄ ꢥꢵ ꢪꢾꢥꢶ ꢪꢾꢥꢬꢶꢫꢾꢡ꣄ꢡꢾꢒ ꢙꣁꢮꢳ꣄ ꢡꣁꢒꢥ꣄ ꢕꢾꢞꢶꢒꢾ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎

ꢮꢶꢕꢾꢞꢶꢒꢾ ꢪꢲꢶꢪꣁ ꢮꢷꢡꢸꢪ꣄ ꢮꢿꢔꢸ ꢔꢸꢰ꣄ꢜꢶ ꢂꢮꢶ ꢤꢶꢒ꣄ꢒꢾ ꢭꢾꢥ꣄ꢡꣁ ꢦꣁꢞꢶ ꢒꢵꢫ꣄ ꢲꣁꢫꢾꢫꣂ ꢪꢾꢥꢶ ꢒꢳꢵꢥ꣄ ꢧꢸꢳ꣄ꢳꢵꢪꢹꢱ꣄ ꢙꢷꢮ꣄ ꢙꢶꢫꢾꢱ꣄ꢡ꣄ꢡꢾꢒ ꢱꢾꢫ꣄ ꢎꢫ꣄ꢫꣂ ꢏꢠ꣄ꢜꢾ ꢮꢶꢕꢾꢞꢶ ꢥꢶꢳ꣄ꢗꢶ ꢑꢬꢴꢶꢫꢾꢡ꣄ ꢅ ꢂꢒ꣄ꢬꢪꣁ ꢗꢭ꣄ꢬꢴꢵꢥꢵꢥꢵ ꢪꢾꢥꢶ ꢡ꣄ꢫꢿ ꢮꢶꢨꢡ꣄ ꢗꢭꢾꢫꣁ ꢱꢶꢫꢾ ꢱꢾꢙ꣄ꢙꢾꢥ꣄ ꢱꢖ꣄ꢔꢱ꣄ꢡ꣄ꢡꢾꢪꢵꢪ꣄ ꢡꣁꢒꢥ꣄ ꢮꢶꢕꢾꢞꢶꢒꢾ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎

ꢱꢡꢪ ꢕꢾꢞꢶꢒꢾ ꢪꢲꢶꢪꣁ ꢏꢭꢶꢪ꣄ꢦꢶꢒ꣄ ꢦꣁꢥ꣄ꢡꢶꢪ꣄ ꢤꢵꢪꢸ ꢦꣁꢥ꣄ꢡꢶꢪ꣄ꢡꢷ, ꢡꢷꢬꢸ ꢦꣁꢥ꣄ꢡꢶꢪ꣄ꢡꢷ ꢱꣁꢥ꣄ꢥꢵ ꢪꢸꢣ꣄ꢬꣁ ꢂꢨ꣄ꢨꢥ꣄ꢱꢸꢜ꣄ꢜꢶ ꢬꢸꢦ꣄ꢦꢵ ꢪꢸꢣ꣄ꢬꣁ ꢓꢜꢾ ꢓꢵꢳꢸꢮꢷꢬꢸ ꢙꣁꢮꢳ꣄ ꢦꢸꢱꢶ ꢱꢶꢫꢾꢡ꣄ ꢒꢳꢳ꣄ꢭꢸꢮꢵꢫ꣄ ꣎ ꢒ꣄ꢰꢠ ꢮꢶꢕꢾꢞꢶ ꢨꢶꢱ꣄ꢱ ꢑꢞ꣄ꢬꢴꢶꢫꢾꢡ꣄ ꢬꢸꢦ꣄ꢦꣁ ꢂꢨ꣄ꢨꢶꢬꢶꢫꣁ ꢱꣁꢥ꣄ꢥꣁ ꢲꣁꢫ꣄ꢫꢶꢬꢴꢵꢫ꣄ꢥꢵ ꢪꢾꢥꢥ꣄ ꢡꢷ ꢓꢵꢳ꣄ ꢮꢷꢬꢸ ꢙꣁꢮꢳ꣄ ꢡꣁꢒꢥ꣄ ꢱꢡꢪ ꢕꢾꢞꢶꢒꢾ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎

ꢱꢹꢒ꣄ꢰ꣄ꢪ ꢮꢶꢕꢾꢞꢶꢒꢾ ꢪꢲꢶꢪꣁ ꢔꢠꢸꢭꣁ ꢒꢵꢪ꣄ ꢒꢾꢬꢥ꣄ ꢮꢿꢔ꣄ ꢱꢶꢫꢾꢡ꣄ ꢙꢥ꣄ꢭꢸꢮꢵꢫ꣄ ꣎ ꢏꢠ꣄ꢜꢾ ꢮꢶꢕꢾꢞꢶ ꢱꢱꢬ꣄ ꢮꢜ ꢒꢾꢬꢶ ꢡꢾꢪꢵꢪ꣄ ꢏꢠ꣄ꢜꢾ ꢮꢜ ꢱꢹꢒ꣄ꢰ꣄ꢪ ꢮꢶꢕꢾꢞꢶ ꢲꣂꢬꢶꢫꣁ, ꢡꢶꢱꢵ ꢏꢠ꣄ꢜꢾ ꢱꢹꢒ꣄ꢰ꣄ꢪ ꢮꢶꢕꢾꢞꢶꢪ꣄ ꢔꢠꢸꢭꣁ ꢱꣂꢒ꣄ ꢭꢾꢒ꣄ꢒꢸꢬ꣄ ꢂꢱꢶ ꢱꢱꢬꢸ ꢲꢷꢱꢸꢥ꣄ ꢒꢾꢬ꣄ꢡꢸꢒꢫ꣄ ꣎ ꢒꢵꢫ꣄ ꢨꢶꢱ꣄ꢱ ꢒꢵꢫ꣄ ꢨꢶꢱ꣄ꢱ, ꢅ ꢔꢠꢸꢭꣁ ꢒꢵꢪ꣄ ꢒꢾꢬꢬꢶꢫꣁ ꢱꢮꣁ ꣎ ꢌꢪꢵꢪ꣄ ꢡꣁꢒꢥ꣄ ꢱꢹꢒ꣄ꢰ꣄ꢪ ꢮꢶꢕꢾꢞꢶꢒꢾ ꢪꢲꢶꢪꣁ ꢙꢥ꣄ꢭꢸꢮꢵꢫ꣄ ꣎