ꢡꣁꢦ꣄ꢦꢭ꣄ ꢡꢶꢥ꣄ꢥꢵꢳ꣄ ꢓꢾꢥꢶ – ꢩꢵꢔ꣄ ꣔

ꢲꢳ꣄ꢔꢾꢱꢵꢪ꣄: ꢂꢪ꣄ꢒꣁ ꢒꣁꢥ꣄ꢥꢶ ꢤꢪꢬꢶꢫꣁꢥꢴꢷ ꣎ ꢧꢬꢵꢡꢸ ꢪꣁꢬ ꢱꢾꢬꣁ ꢌꢭ꣄ ꢎ ꢱꢶ ꢪꢸ ꢒꢵꢪ꣄ ꢒꢾꢬꢾ ꢪꢿꢥꢿꢙꢬ꣄ ꢕꢿꢬ꣄ ꢙꣁꢮꢭ꣄ ꢂꢮꢶ ꢡꢾꢒ ꢨꢾꢜꣁ ꢙꣁꢮꢭ꣄ ꢦꢸꢱꢾꢡ꣄ꢡꢾꢒꣁ, ꢡꢾꢥꢸ “ꢡꢸꢪꢶ ꢒꣂꢥ꣄ ꢮꢷꢣꢸꢪ꣄ ꢲꢶꢨ꣄ꢨꢶꢬꢴꢮꢞꢾꢫꣂ “ ꢪꢾꢥꢶ ꢦꢸꢱꢶꢫꢵꢱ꣄ ꣎ ꢡꢶꢫꣂ ꢮꢿꢳꢸꢱ꣄ ꢂꢪ꣄ꢒꣁ ꢱꢾꢥ꣄ꢣꢿꢮ꣄ ꢂꢮꢶ ꢱꣁꢪ꣄ꢪꢬꢸ ꢱꢾꢥ꣄ꢣꢸꢪ꣄ ꢙꢶ ꢮꢾꢒ꣄ꢒꢾꢡꢶ ꢱ꣄ꢒꢹꢜ꣄ꢜꢬ꣄ ꢡꢿꢞꢸꢱ꣄ ꢲꢶꢨ꣄ꢨꢶ ꢲꣁꢡꢾꢱ꣄ ꣎ ꢡ꣄ꢫꣂ ꢮꢿꢳꢸꢱ꣄ , “ꢙꢵꢬꢨ꣄ꢨꢵ” ꢪꢾꢥꢶ ꢭꢔꢾꢱ꣄ ꣎

ꢒꢸꢦ꣄ꢦꢸꢱꢵꢪ꣄: ꢗꣁꢒ꣄ꢒꢜ꣄ ꢒꢵꢪ꣄ ꢙꢮꣂ ꣎ ꢨꣂꢠ꣄ꢞꢶ ꢂꢨ꣄ꢨꢿꢱ꣄ ꢥꢵ ꣎ ꢱꢾꢬ꣄ꢒꢱ꣄ ꣎ ꢦꢞꢸꢪꢸꢥ꣄ ꢓꣁꢨ꣄ꢨꣁ ꢤꢾꢬꢾꢫꣁ ꣎

ꢲꢳ꣄ꢔꢾꢱꢵꢪ꣄: ꢲꢵꢫ꣄ ꢲꢵꢫ꣄ ꣎ ꢦꢞꢸꢪꢸꢥ꣄ ꢏꢠ꣄ꢜꢾ ꢣꢶꢫ꣄ꢫꣁ ꢤꢸꢨꢵꢬꢶꢒꢶꢥ꣄ ꢐꢠ꣄ꢜꢾ ꢣꢶꢫ꣄ꢫꣁ ꢬꢵꢡꢶꢪ꣄ ꢤꢾꢬꢾꢫꣁ ꣎ ꢡꢶꢱꣂꢱ꣄ ꢏꢠ꣄ꢜꢾ ꢣꢶꢫ꣄ꢫꣁ ꢱꣂꢥꢶ ꢒꢿꢪꢬꢵꢪ꣄ꢒꢶꢥ꣄ , ꢐꢠ꣄ꢜꢾ ꢣꢶꢫ꣄ꢫꣁ ꢱꣂꢥꢶ ꢌꢬꢶꢒ꣄ꢱꢥ꣄ ꢱꢾꢭ꣄ꢧꣂꢥꢸꢪ꣄ ꢤꢾꢬ꣄ꢬꢶꢫꣂ ꣎

ꢒꢸꢦ꣄ꢦꢸꢱꢵꢪ꣄: ꢪꢾꢥꢡꢶ ꢡꢶꢥ꣄ꢥꢵꢳꢸꢪ꣄ ꢄꢒ꣄ꢒ ꢪꢸꢔꢵꢪ꣄ ꢙꢶ ꢥꢾꢱ꣄ꢒꢶꢥꢶ ꢦꣁꢞ꣄ꢭꢶ ꢦꢞꢸꢪꢸꢥ꣄ ꢤꢾꢬꢶ ꢂꢮ꣄ꢬꢾ ꢏꢭꢱ꣄ꢢꢵꢥꢸꢪ꣄ꢪꢸ ꢂꢱ꣄ꢒꢶ ꢡꢾꢥꢸ ꢱꢥꣂ ꢪꢾꢥꢶ ꢲꢮ꣄ꢜꢡ꣄ꢡꢒ꣄ ꢪꢴꣁꢜ꣄ꢜꣁ ꢪꣁꢥ꣄ꢥꢸ ꢦꢙꢿ , ꢣꢵꢥꢸ ꣎

ꢲꢳ꣄ꢔꢾꢱꢵꢪ꣄: ꢡꢸꢪꢶ ꢪꢾꢥꢬꢶꢫꣁ ꢪꢵꢣꢶꢬꢶ , ꢣꢸꢱꢸꢬ ꢡꢾꢥꢸ ꢪꢾꢳ꣄ꢳꢶ ꢂꢪꢶ ꢒꢾꢬꢬꢶꢫꣁ ꢒꢵꢪꢸꢥ꣄ ꢪꣁꢥ꣄ꢥꢸꢪ꣄ ꢢꣁꢮ꣄ꢭꢶ ꢮꢶꢱ꣄ꢮꢵꢱ꣄ꢒꢥ꣄ ꢬꢴꢵꢥ꣄ ꢪꢾꢥꢶ ꢪꢾꢳ꣄ꢭꢬꢶꢫꣂ ꣎

ꢒꢸꢦ꣄ꢦꢸꢱꢵꢪ꣄: ꢣꢸꢱꢸꢬ ꢒꣂꢥ꣄ꢡꢶ ꢂꢮ꣄ꢬꢾ ꢪꢾꢥ꣄ꢒ꣄ꢫꢵꢥꢸꢒ꣄ ꢣꢾꢒ꣄ꢫꢵꢱ꣄ꢫꢵ ?

ꢲꢳ꣄ꢔꢾꢱꢵꢪ꣄: ꢂꢮ꣄ꢬꢾ ꢡꢾꢥꢸ ꢒꢶꢡ꣄ꢒꢾ ꢡꢾꢥꢸ ꢂꢮ꣄ꢬ꣄ꢫꢵꢱꢶ ꢪꢾꢥꢡ꣄ꢡꢾ ꢱꢾꢬ꣄ꢒ꣄ꢒꣁ ꢱꢵꢡ꣄ꢡꢒ꣄ ꢪꢸꢱꢾꢥꢶ ꣎ ꢲꣁꢫꢾꢡꢶ ꢒꣂꢫꢪ꣄ꢨꢸꢡ꣄ꢡꢸꢬ꣄ ꢱꣃꢬꢵꢰ꣄ꢜ꣄ꢬ ꢱꢖ꣄ꢔꢪ꣄ ꢦ꣄ꢬꢱꢶꢞꢾꢠ꣄ꢜ꣄ ꢯ꣄ꢬꢶ ꢌꢥ꣄ ꢌꢱ꣄ ꢬꢵꢙꢵꢥꢸ ꢣꢾꢒ꣄ꢒꢶꢭꢶꢞꢶꢫꢵ ꣎ ꢡ꣄ꢫꣁ ꢮꢿꢳ꣄ ꢗꣁꢮꢬꢪ꣄ ꢪꢭ꣄ꢪꢾ ꢤꣃꢬꣁ ꢦꣁꢒ꣄ꢒꢜ꣄ ꢂꢮ꣄ꢞꢶ ꢲꣁꢡꢾꢫꣂ ꣎ ꢔꢸꢪ꣄ꢦꢸ ꢧꢶꢬ꣄ꢭ ꢲꣁꢡ꣄ꢫꢵꢱ꣄ ꣎ ꢡꢾꢖ꣄ꢒ ꢱꣃꢬꢵꢰ꣄ꢜ꣄ꢬ ꢒ꣄ꢳꢨ꣄ ꢦꣁꢒ꣄ꢒꢜ꣄ ꢙꢷ ꢗꣁꢮ꣄ꢬꢪ꣄ ꢱꢮꣂ ꢪꢾꢥꢶ ꢪꢾꢥ꣄ꢡꢶ ꢂꢪꢶ ꢂꢮ꣄ꢞꢾꢫꣂ ꣎

ꢒꢸꢦ꣄ꢦꢸꢱꢵꢪ꣄: ꢚꢸꢒ꣄ꢒꢸ ꢱꣁꢥ꣄ꢡꣂꢰ꣄ ꣎ ꢲꢵꢫ꣄ꢫꢵ, ꢨꢾꢜꢵꢥ꣄ ꢂꢱ꣄ꢒꢶ ꢱꢾꢖ꣄ꢒꢵꢞꢶ ꢂꢮ꣄ꢫꢵꢥꢶꢫꢵ ?

ꢲꢳ꣄ꢔꢾꢱꢵꢪ꣄: ꢨꢾꢜꢵꢥ꣄ ꢡꢶꢥ꣄ꢥꢵꢳ꣄ ꢱꢵꢡ꣄ꢡꢒ꣄ ꢂꢮ꣄ꢫꢵꢥꢶ ꣎ ꢂꢡ꣄ꢡ ꢒꢭꢪ꣄ꢪꢸ ꢥꢴꢥ꣄ꢥꣁ ꢲꣁꢞꢵꢥꢸꢒ꣄ ꢡꢶꢥ꣄ꢥꢵꢳ꣄ ꢡꢿꢬꢿꢪ꣄ ꢂꢱ꣄ꢒꢶ ꢂꢒ꣄ꢒꢬꢥꢴꢷ ꣎ “ ꢐꢭ꣄ꢞꢹꢱ꣄ ꢔꣂꢭ꣄ꢞꢸ“ ꢪꢾꢥꢶ ꢂꢪꢷꢱ꣄ ꢦꢵꢜ꣄ ꢡꢾꢜ꣄ꢜꢶꢭꢶ ꢬꢴꢥꣂ ꣎

ꢒꢸꢦ꣄ꢦꢸꢱꢵꢪ꣄: ꢲꢵꢫ꣄ ꢲꢵꢫ꣄ ꢬꢴꢡ꣄ꢡ ꢮꢡ꣄ꢡꣁ ꢲꣁꢫ ꢮꢡ꣄ꢡꣂꢱ꣄ , ꢣꢵꢥꢸ

ꢌꢒꢬ꣄ ꢪꢶꢛ꣄ꢗꢶ ꢮꢡ꣄ꢡꣁ ꢒꢾꢬꢾꢡꢶ ꢜꢵꢦꢶꢒ꣄ ꢣꢸꢱꢸꢬ ꢦꣁꢒ꣄ꢒꢜ꣄ ꢙꢿꢞꣀ ꢪꢾꢥꢶ ꢪꣁꢥ꣄ꢥꢸꢪ꣄ ꢲꢮ꣄ꢜꢶꢭꢿꢡ꣄ ꢱꢾꢬ꣄ꢒꢱ꣄ ꢣꢵꢥꢸ ꢕꢾꢠ꣄ꢜꣁ ꢲꣁꢫ꣄ꢫꢵꢬꢿꢱ꣄ ꣎ ꢱꣃꢔꢵꢱ꣄ꢒꢥ꣄ ꢬꢴꢵꢡ꣄ꢡꢮꢿꢳ꣄ ꢂꢖ꣄ꢔꢸꢥ꣄ ꢮꢡ꣄ꢡꢵꢥ꣄ ꢒꢾꢬꢾꢖ꣄ꢔꢾꢥ꣄ ꣎ ꢧꢬꢵꢡꢸ ꢣꢾꢒ꣄ꢒꢾꢖ꣄ꢔꢾꢥ꣄ ꣎

ꢓꢾꢥꢶ ꢪꢸꢱꢾꢱꢶ