ꢒꣁꢖ꣄ꢒꣁ ꢙꣁꢮꢳ꣄ ꢪꢥ꣄ꢡ꣄ꢬ ꢮꢶꢣ꣄ꢫꢵ ꢱꢖ꣄ꢔꢸꢮꢵꢫ꣄ ꢪꢾꢥꢶ ꢫꣂꢱꢥꣁ ꢒꢾꢬꢡ꣄ꢡꢮꢿꢳ꣄ ꢡꢾꢥꢵꢭꢶꢬꢵꢪ꣄ ꢲꣂꢬ꣄ ꢲꢮ꣄ꢜꢥꢮꢶ ꢡꢾꢥꢵꢭꢶꢬꢵꢪꢵꢒ꣄ ꢨꣁꢮꢥ꣄ ꢤꢞ꣄ꢞꢶꢫꢵꢱ꣄ ꣏ ꢡꢾꢥꢵꢭꢶꢬꢵꢪꣁ ꢱꢥ꣄ꢫꢵꢱꢶ ꢙꣁꢮꢳ꣄ ꢂꢮꢾꢱ꣄ ꣎ ꢡꢾꢥꢵꢭꢶꢬꢵꢪꢵ ꢪꣁꢒꣁ ꢂꢥ꣄ꢡꢶꢪꢒꢵꢭ꣄ ꢂꢮ꣄ꢞꢶꢬꢶꢫꣁ ꢪꣁꢒꣁ ꢱꢶꢰ꣄ꢫꢵꢥ꣄ ꢙꢸꢠ꣄ꢠꢵꢡ꣄ꢡ ꢭꢾꢥ꣄ꢡꣁ ꢡꣁꢒꣁ ꢢꢾꢮ꣄ꢞ ꢪꢥ꣄ꢡ꣄ꢬ ꢮꢶꢣ꣄ꢫꢵꢥ꣄ ꢆꢦꢣꢿꢱ꣄ ꢒꢾꢬꢸꢱ꣄ ꣎ ꢲꢶꢥ꣄ꢣꣁ ꢲꢣ꣄ꢣꢸꢬꢵꢡꢶ ꢒꢵꢳꢶ ꢤꣃꢬꢵꢒ꣄ ꢙꢷꢒꢶꢥ꣄ ꢒꢵꢳꢶ ꢱꣁꢪ꣄ꢪꢬ꣄ ꢲꢶꢨ꣄ꢨꢶ ꢥꢪꢶꢭꢶ ꢪꢷ ꢱꢖ꣄ꢔꢥ꣄ ꢪꣁꢥ꣄ꢡꢸꢬ꣄ ꢱꢱꢬ꣄ꢮꢵꢳ꣄ ꢱꢖ꣄ꢔꢾꢡ꣄ ꢒꢵꢳꢶꢪꢵꢡꢵ ꢡꣁꢒꣁ ꢣꢬ꣄ꢱꢥꣁ ꢣꢿꢫ꣄ ꣎ ꢡꢹ ꢡꢶꢒ ꢔꣂꢬꢉꢦ꣄ ꢯꢾꢫ꣄ ꢤꢒ꣄ꢒꢸꢥꢵꢡ꣄ꢡꣁ ꢡꣁꢒꣁ ꢦꢙꢾ ꢲꣁꢫꢾ ꢮꢬꢸꢥ꣄ ꢪꢔꢶꢭꢶ ꢱꣁꢥ꣄ꢡꣂꢯ꣄ꢒꢥ꣄ ꢬꢴꢵ ꢪꢾꢥꢶ ꢱꢥ꣄ꢫꢵꢱꢶ ꢱꢖ꣄ꢔꢸꢡꣁ ꣎꣎ ꢡꢾꢥꢵꢭꢶꢬꢵꢪꢵꢒ꣄ ꢏꢠ꣄ꢜꢿ ꢃꢯ꣄ꢗꢬ꣄ꢫꢸꢒꢥ꣄ ꢲꣁꢣꢾꢱ꣄ ꣎ ꢪꢥ꣄ꢡꢸꢬ꣄ ꢱꢖ꣄ꢔꢾꢡ꣄ ꢒꢵꢳꢶ ꢂꢮꣀ ꢲꢵ? ꢱꢾꢬ꣄ꢒꢱ꣄ ꢱꢥ꣄ꢫꢵꢱꢶ ꢱꢖ꣄ꢔꢾ ꢱꣁꢒꢥ꣄ ꢲꢶꢥ꣄ꢣꣁ ꢒꢵꢳꢶ ꢤꣃꢬꢵꢒ꣄ ꢙꢷꢒꢶꢥ꣄ ꢪꢥ꣄ꢡꢸꢬ꣄ ꢱꢖ꣄ꢔꢾꢥ꣄ ꢪꢾꢥ꣄ꢡꢶ ꢒꢵꢳꢶ ꢤꣃꢬꢵꢒ꣄ ꢙꢷ ꢪꣁꢥ꣄ꢡꢸꢬ꣄ ꢱꢖ꣄ꢔꢾꢱ꣄ ꣏ ꢡꢾꢥꢵꢭꢶꢬꢵꢪꣁ ꢱꢥ꣄ꢫꢵꢱꢶ ꢱꢖ꣄ꢔꢶꢣꢶꢫꢾ ꢪꢥ꣄ꢡꢸꢬ꣄ ꢱꢖ꣄ꢔꢾ ꢕꢾꢜꢶꢪ꣄ ꢒꢵꢳꢶꢪꢵꢡꢵ ꢡꢾꢒꢮꢾꢣꢸꢬ꣄ ꢣꢬ꣄ꢱꢥꣁ ꢣꢷꢱ꣄ ꣎ ꢣꣁꢳꢵꢥꢸꢪ꣄ ꢮꢶꢱ꣄ꢡꢮ꣄ ꢲꢸꢞꢸꢡ ꢭꢪ꣄ꢨ ꢣꢵꢡꢸꢥꢸꢪ꣄ ꢬꢴꢷ ꢬꢾꢔꢡ꣄ ꢔꢾꢭ꣄ꢡ ꢣꢷꢲꢵꢡꢸꢥ꣄ ꢱꢱꢬ꣄ ꢣꣁꢱ꣄ꢒꣁ ꢱꢾꢥ꣄ꢡꣁ ꢔꣂꢬ ꢉꢦꢸꢪ꣄ ꢲꣁꢣꢶꢱ꣄ ꣏ ꢂꢦꢸꢭ꣄ ꢲꢵꢡꢸꢪ꣄ ꢲꣁꢣꢾ ꢱꢹꢭꢵꢫꢸꢣꢪ꣄ ꢩꢹꢛꢶꢬ꣄ ꢒꢸꢱ꣄ꢒꢶꢱ꣄ ꣎ ꢡꢿꢝꢵꢪ꣄ ꢏꢠ꣄ꢒꢡ꣄ꢡꢶꢱꣁ ꢲꢱꢶꢱ꣄ ꣎ ꢒꢵꢳꢶ ꢪꢵꢡꢵ ꢔꣂꢬ ꢉꢦ꣄ ꢯꢾꢫ꣄ ꢂꢱ꣄ꢒꢶꢥ꣄ ꢤꢒ꣄ꢒꢥ꣄ ꢲꣁꢫꢾꢡ꣄ ꢡꢾꢥꢵꢭꢶꢬꢵꢪꣁ ꢒꢵꢳꢶꢪꢵꢡꢵꢒ꣄ ꢆꢛ꣄ꢗꢬꢴꢷ ꢓꢵꢭ꣄ ꢭꢾꢥ꣄ꢡꢸ ꢯꢾꢫ꣄ ꢲꢱꢾꢱ꣄ ꣏ ꢒꢵꢳꢶꢪꢵꢡꢵꢒ꣄ ꢬꢵꢒ꣄ ꢂꢣ꣄ꢣꢶꢂꢮꢾꢱ꣄ ꣎ ꢪꣁꢬ꣄ ꢉꢦ꣄ ꢯꢾꢫ꣄ ꢂꢱ꣄ꢒꢶꢥ꣄ ꢤꢒ꣄ꢒꢥ꣄ ꢡꢹ ꢒꢵꢫ꣄ ꢲꢱꢬꢶꢫꣁ ꢪꢾꢥꢶ ꢪꢵꢡꢵ ꢦꢸꢱꢶꢱ꣄ ꣎
ꢡꢾꢒ ꢡꢾꢥꢵꢭꢶꢬꢵꢪꣁ ꢂꢪ꣄ꢨꢵ ꢪꢵꢫꢶ ꢪꣁꢒꣁ ꢏꢠ꣄ꢜꢾ ꢣꣁꢱ꣄ꢒꣁꢒꢶꢥ꣄ ꢣꢷ ꢲꢵꢡꢸꢥ꣄ ꢯꢿꢡ꣄ꢡꢾ ꣎ ꢪꣁꢒꣁ ꢦꣁꢜ꣄ꢯꢾ ꢤꢾꢬꢾꢡ꣄ ꢪꣁꢒꣁ ꢯꢿꢡ꣄ꢡꢾ ꢏꢠ꣄ꢜꢾ ꢥꢵꢒ꣄ ꢦꣁꢱꢡ꣄ꢡꢒꢸꢱ꣄ ꢍ ꢣꢷ ꢲꢵꢡ꣄ ꢧꢸꢬꢬꢥꢶ ꣎ ꢡꣁꢒꣁ ꢱꢱꢬ꣄ ꢣꣁꢱ꣄ꢒꣁ ꢯꢿ ꢡꣁꢒꣁ ꢦꣁꢜ꣄ꢯꢾ ꢤꢾꢬꢾꢡ꣄ ꢦꣁꢱꢸꢭꢡ꣄ꢡꣁ ꢱꢱꢬ꣄ ꢲꢵꢡ꣄ ꢧꢸꢬꣀ ꢫꢵ ꢡꣁꢒꣁ ꢚꢸꢒ꣄ꢒꢸ ꢒꢾꢰ꣄ꢜꢪ꣄ꢒꢥ꣄ ꢬꢴꢵꢫ꣄ ꢥꢵ ꢪꢾꢥꢶ ꢲꢮ꣄ꢞꢶꢱꢶꢫꢾꢫꣁ ꢂꢱꣁ ꢂꢮꢾꢱ꣄ ꢪꢾꢥꢶ ꢱꢖ꣄ꢔꢶꢡꢶ ꢲꢱꢶꢭꢿꢡ꣄ ꢲꣁꢣꢾꢱ꣄ ꢡꢾꢥꢵꢭꢶꢬꢵꢪꣁ ꣏ ꢌꢒ ꢮꢡ꣄ꢡꣁ ꢎꢒ꣄ꢒꢶ ꢒꢵꢳꢶ ꢪꢾꢳ꣄ꢳꢶ ꢲꢱ꣄ꢡꢶꢒꢶ ꣎ ꢡꢾꢥꢵꢭꢶꢬꢵꢪꢵ ꢣꢿꢮ꣄ ꢲꣁꢫꢾ ꢪꣁꢒꣁ ꢯꢾꢫ꣄ ꢮꢬꢸꢥ꣄ ꢪꢔꢸꢥꢵꢡ꣄ꢡꣁ ꢪꣁꢬ꣄ ꢉꢦ꣄ ꢯꢾꢫ꣄ ꢲꢱꢬꢱ꣄ꢥꢵ ꢪꣁꢒꣁ ꢪꢾꢳ꣄ꢳꢶ ꢂꢱꢜ꣄ꢜꢶꢫꣁ ꢥꢵ ꣎ ꢡꣁꢬ꣄ ꢨꢸꢣ꣄ꢣꢶ ꢓꢹꢬꢸꢒ꣄ ꢪꢷ ꢥꢥ꣄ꢣꢬꢶꢱ꣄ ꣎ ꢲꢶꢥ꣄ꢣꣁ ꢬꢴꢷ ꢡꢹ ꢮꢶꢒꢞꢒꢮꢶ ꢪꢾꢥꢥ꣄ ꢥꢵꢮ꣄ ꢱꢾꢖ꣄ꢔꣁ ꢭꢪ꣄ꢨꢸꢬꢸꢪ꣄ ꢬꢴꢵꢫ꣄ ꢪꢾꢥꢶꢱ꣄ ꢒꢵꢳꢶ ꢪꢵꢡꢵ ꣏ ꢮꢶꢒꢞꢒꢮꢶ ꢪꢾꢥꢥ꣄ ꢥꢵꢮ꣄ ꢎꢒ꣄ꢒꢸꢥꢵ ꢡꢶꢡ꣄ꢒꢵꢪ꣄ ꢱꢾꢬ꣄ꢒꣁ ꢲꣁꢫꢾ ꢥꢵꢮ꣄ ꢣꢷꢬꢶꢱ꣄ ꢪꢵꢫꢶ ꣎ ꢄꢱꣁ ꢗꢾꢮ꣄ꢣꢾꢡ꣄ꢒꢵꢫ꣄ ꢮꣁꢂꢞꢒꢮꢶ ꢡꢶꢱꣁ ꢗꢾꢮ꣄ꢣꢾꢡ꣄ꢒꢵꢡ꣄ ꢮꢶꢒꢞꢒꢮꢶꢱ꣄ ꢪꢾꢥꢶ ꢪꢾꢥ꣄ꢡꢶ ꢲꢱꢾꢱ꣄ ꢬꢵꢪꣁ ꣏ ꢡꢾꢥꢵꢭꢶꢬꢵꢪ ꢨꢸꢣ꣄ꢣꢶꢓꢹꢬ꣄ ꢯꢾꢫ꣄ ꢒꢵꢳꢶ ꢪꢵꢡꢵ ꢱꣁꢥ꣄ꢡꣂꢰ꣄ ꢦꣁꢞꢶꢱ꣄ ꣎
ꢂꢦꢸꢭ꣄ ꢙꢔꢸꢥ ꢣꢔꢸꢬ ꢲꢵꢡꢸꢪ꣄ ꢣꢷ ꢦꢶꢖ꣄ꢔꢠꢶ ꢣꢾꢒ꣄ꢒꢞꢶ ꢮꢶꢒꢞꢒꢮꢶ ꢪꣁꢬ꣄ ꢙꢔꢸꢥ ꢲꢵꢡꢸꢪ꣄ ꢣꢹꢡ꣄ ꢯꢿꢡ꣄ꢡꢾ ꢌꢭ꣄ꢭꢾ ꢦꢶꢫꢾꢡ꣄ ꢡꣁꢒꣁ ꢛꢵꢥ꣄ ꢂꢨ꣄ꢨꣀ ꣎ ꢣꢔꢸꢬ ꢲꢵꢡꢸꢪ꣄ ꢤꢾꢫꢶꢥ꣄ ꢯꢿꢡ꣄ꢡꢾ ꢌꢭ꣄ꢭꢾ ꢦꢶꢫꢾꢡ꣄ ꢤꢥꢪ꣄ ꢂꢨ꣄ꢨꣀ ꣎ ꢌꢪꢵꢪ꣄ ꢡꣁꢒꣁ ꢒꣂꢥꢾ ꢦꢙꢾꢒꢷ ꢓꢳ꣄ꢳꢶ ꢦꢿ ꢪꢾꢥꢶ ꢒꢵꢳꢶ ꢪꢵꢡꢵ ꢱꢖ꣄ꢔꢶꢱ꣄ ꣏ ꢡꢾꢥꢵꢭꢶꢬꢵꢪ꣄,ꢂꢪ꣄ꢨꢵ ꢣꢷ ꢡꢾꢪꢵꢪ꣄ ꢒꣂꢥꢾ ꢬꢸꢗ꣄ꢗꢶꢒꢥ꣄ ꢬꢴꢵꢫ꣄ ꢪꢾꢥꢶ ꢪꢷ ꢒꣂꢥꢒ꣄ ꢙꢥꢸ ꢦꢷ ꢱꢶꢫꢾꢡꢶꢱ꣄ ꢥꢵ ꢬꢸꢗ꣄ꢗꢶꢒꢳꢵꢫ꣄ ꢪꢾꢥꢶ ꢱꢖ꣄ꢔꢶꢭꢿꢡ꣄ ꢣꢷ ꢲꢵꢡꢸꢪ꣄ ꢯꢿꢡ꣄ꢡꢾꢫꣁ ꢓꢳ꣄ꢳꢶ ꢏꢠ꣄ꢜꢵꢳꢸꢪ꣄ ꢦꢷꢡꢶꢫꣁ ꣎ ꢧꢭ꣄ꢗꣁ ꢒꢵꢳꢶꢪꢵꢡꢵꢒ꣄ ꢯꢾꢫ꣄ ꢬꢵꢪꣁ ꢂꢪ꣄ꢨꢵꢛꢵꢥ꣄ꢒꢶꢥ꣄ ꢲꢥ꣄ꢥꢮ꣄ ꢬꢴꢶꢫꢾꢡꢶꢱ꣄ ꢥꢵ ꢙꢶꢡ꣄ꢬꢮ꣄ ꢗꣁꢒ꣄ꢒꢜ꣄ ꢬꢴꢵꢫ꣄ ꣎ ꢡꢾꢒ ꢲꢵꢭꢶꢱ꣄ ꢪꣁꢒꣁ ꢣꢶꢫ꣄ꢫꣁ ꢦꢙꢾ ꢪꢾꢥ꣄ꢡꢶ ꢡꣁꢬ꣄ ꢣꢷ ꢲꢵꢡꢸꢪ꣄ ꢲꣁꢡꢾ ꢤꢾꢫꢶꢥ꣄ ꢒꢶꢥ꣄ ꢣꢹꢡ꣄ ꢓꢳ꣄ꢳꢶ ꢦꢶꢫꢾꢫꣁ ꣎ ꢪꢷ ꢒꢾꢬꢾꢡ꣄ꢡꢾꢪꣁ ꢒꣀ ꢗꢹꢒ꣄ ꢥꢴꢷꢥꢵ ꢪꢾꢥꢶ ꢦꢸꢱꢾꢱ꣄ ꣏ ꢒꢵꢳꢶ ꢪꢵꢡꢵ ꢡꢾꢥꢵꢭꢶꢬꢵꢪꢸ ꢨꢸꢣ꣄ꢣꢶꢓꢹꢬ꣄ꢒꢶꢥ꣄ ꢡꢾꢥꣁ ꢒꢾꢬꢾ ꢒꢵꢪ꣄ ꢯꢾꢫ꣄ ꢱꣁꢥ꣄ꢡꣂꢰ꣄ ꢦꣁꢞꢶ ꢗꣁꢒ꣄ꢒꢜ꣄ ꢮꢶꢒꢞꢒꢮꢶꢒꢥ꣄ ꢭꢪ꣄ꢨꢸꢬꢸꢪ꣄ ꢬꢴꢵꢫ꣄ ꢡꣁꢬ꣄ ꢥꢵꢮ꣄ ꢭꢪ꣄ꢨꢸꢬꢸꢪ꣄ ꢬꢴꢵꢫ꣄ ꢪꢾꢥꢶ ꢥꢥ꣄ꢣꢶꢡꢶ ꢂꢥ꣄ꢡꢬ꣄ ꢲꣁꢫꢶꢱ꣄ ꢒꢵꢳꢶꢪꢵꢡꢵ ꣏
Leave a Reply
You must be logged in to post a comment.