ꢱ꣄ꢮꢩꢵꢮꢸ

ꢏꢙꢥꢵꢒꢸ ꢡꢾꢒ ꢱ꣄ꢮꢩꢵꢮꢸꢪꢸ ꢱꢸꢭꢩꢪ꣄ꢒꢥꢶ ꢫꣂꢒ꣄ ꢮꢱ꣄ꢡꢸ ꢂꢨ꣄ꢨꢾꢡꢶ ꢡꢾꢭ꣄ꢫꢒꢵ ꢪꢲꢡ꣄ꢮꢪ꣄ ꢙꢥ꣄ꢭꢸꢥꢵꢱ꣄ꢡꢒꢸ ꢂꢭ꣄ꢦꢸꢒꢥꢶ ꢲꢜ꣄ꢮꣀ ! ꢄꢫꢾ ꢤꢾꢬꢶ ꢨꣂꢤꢥꣁ ꢒꢾꢬꢥ꣄ ꢥꢴꢥ꣄ꢥ ꢓꢾꢥꢶ ꢱꢶꢫꢾꢥꢮꣁ ꣏

ꢣꣁꢖ꣄ꢔꢬ꣄ ꢬꢵꢠꢸꢪ꣄ ꢮꢱꢶꢭꢶꢫꢮꢬꢶꢫꣁ ꢏꢙꢥꣁ ꢙꣁꢮꢳ꣄, ꢂꢦꢸꢭ꣄ ꢣꢵꢬꢸ ꢩꢵꢜꢵꢪ꣄ ꢧꢶꢬꢶ ꢱꢥꢵꢬ꣄ ꢥꢴꢷꢱ꣄ꢡꢒꢸ ꢫꣂꢒ꣄ ꢮꢶꢔ꣄ꢬꢲꢪ꣄ ꢲꣁꢡꢾꢱ꣄ ꣎ ꢏꢠ꣄ꢜꢾꢣꢶ ꢡꢾꢭ꣄ꢭꢾ ꢣꣁꢖ꣄ꢔꢬ꣄ ꢬꢵꢠꢸꢒꢸ ꢍꢒꢸ ꢥꢔꢬꢮꢵꢱꢶ ꢂꢮꢾꢱ꣄ | ꢡꢾꢥꣁ ꢡ꣄ꢫꢾ ꢮꢶꢔ꣄ꢬꢲꢸꢒꢸ ꢃꢯ꣄ꢗꢬ꣄ꢫꢸꢒꢥꢶ ꢂꢨꢸꢬꢹꢮ꣄ꢒꢥꢶ ꢱꢶꢫꢾꢱ꣄ ! ꢡꢿꢝꢵꢪ꣄ ꢲꣁꢡꢾ ꢮꢥꢮꢵꢱꢶ ꢙꣁꢮꢳ꣄ ꢡ꣄ꢫꢾ ꢮꢶꢔ꣄ꢬꢲꢸ ꢒꢵꢫ꣄ ꢪꣂꢭ꣄ ꢪꢾꢥꢶ ꢦꢸꢱꢾꢱ꣄ ꢥꢔꢬꢮꢵꢱꢶ ꣎ ꢮꢥꢮꢵꢱꢶ ꢂꢦꢸꢭ꣄ ꢪꣁꢥ꣄ꢥꢸꢪ꣄ ꢲꢜ꣄ꢮꢶꢭꢶꢫꢾꢱ꣄ ꢌꢭ꣄ꢭꢾ ꢒꢳ ꢣꢾꢔꢸꢞꣁ ꢒꣁꢒ꣄ꢒꢶꢒꢸ ꢆꢦꢫꣂꢒ꣄ ꢥꢴꢷ ꢂꢪ꣄ꢒꣁ ꢂꢞ꣄ꢞꢪ꣄ꢒꢥꢶ ꢯꢿ ꢌꢭ꣄ꢭꢾ ꢥꢔꢬꢮꢵꢱꢶ ꢙꣁꢮꢳ꣄ ꢂꢪꢶ ꢪꣂꢭ꣄ ꢒꢾꢬ꣄ꢡꢸꢥꣁ ꢯꢿꢡ꣄ꢡꢾꢱ꣄ ꢪꢾꢥꢶ ꢲꢜ꣄ꢮꢶꢭꢶ ꢌꢭ꣄ꢭꢾ ꢣꢾꢔꢸꢞꢵ ꢪꣂꢭ꣄ ꢣꢷꢬꢸꢦꢵꢫ꣄ ꢪꢾꢥꢶ ꢱꢖ꣄ꢔꢶꢥꢸ ꢥꢔꢬꢮꢵꢱꢶ ꢙꣁꢮꢳ꣄ ꢮꢶꢒ꣄ꢒꢶꢡꢶꢫꣁ ꣎ ꢥꢔꢬꢮꢵꢱꢶ ꢡ꣄ꢫꢾ ꢮꢶꢔ꣄ꢬꢲꢪ꣄ ꢓꢳ꣄ꢳꢶꢥꢸ ꢂꢦꢸꢭ꣄ ꢔꢵꢪꢸꢒꢸ ꢙꢿꢞꢶꢫꣁ ꣎ ꢪꢵꢱꢸꢥ꣄ ꢤꢪꢾꢱ꣄ ꢦꢵꢛ꣄ꢗꢾ….

ꢏꢠ꣄ꢜꢾꢣꢶ ꢮꢥꢮꢵꢱꢶ ꢦꢜ꣄ꢠꢪꢸꢒꢸ (ꢥꢔꢬꢶꢒꢸ) ꢂꢮꢾꢱ꣄ | ꢡꢿꢜ꣄ ꢫꣂꢒ꣄ ꢪꢴꣁꢜ꣄ꢜꣁ ꢪꢲꢵꢭꢸꢪ꣄ ꢂꢨꢸꢬꢹꢮ꣄ ꢲꣁꢫꢾ ꢮꢱ꣄ꢡꢸꢥꢱ꣄ꢒꢶ ꢪꢾꢥ꣄ꢒ꣄ꢫꢵꢥ꣄ ꢱꢵꢡ꣄ꢡꢒꢸ ꢢꣁꢮꢶ ꢲꣁꢡꢶꢫꢵꢱ꣄ | ꢡꢿꢝꢵꢪ꣄ ꢌꢭ꣄ꢭꢾ ꢮꢥꢮꢵꢱꢶ ꢙꢶꢫꢾꢱ꣄ ! ꢩꢶꢡ꣄ꢡꢬ꣄ ꢡꢸꢬꢱ꣄ꢡꢒꢸ ꢱꣂꢮꢸ ꢬꢸꢦꢵꢫ꣄ ꢩꢥ꣄ꢣꢶꢡꢶ ꢫꢵꢡ꣄ꢬꢵꢦꢡ꣄ꢬꢸ ꢓꢳ꣄ꢳꢶ ꢩꢶꢡ꣄ꢡꢬ꣄ ꢙꢶꢫꢾꢱ꣄ | ꢡꢿꢝꢵꢪ꣄ ꢩꢶꢡ꣄ꢡꢬꢸꢪ꣄ ꢌꢥꣁ ꢮꢶꢒ꣄ꢒꢾ ꢡꢾꢭ꣄ꢭꢾ ꢮꢶꢔ꣄ꢬꢲꢸꢒꢸ ꢯꢾꢫ꣄ꢥꢸ ꢡꣂꢠꢸ ꢲꢸꢔꢶꢞꢶꢭꢶ ꢲꢶꢨ꣄ꢨꢾꢱ꣄ ꣎ ꢃꢲꢵ ꢌꢭ꣄ꢭꢾ ꢣꢾꢔꢸꢞꣁ ꢂꢮ꣄ꢬꢾ ꢕꢿꢬꢸ ꢣꢵꢬꢸ ꢩꢵꢜꢵꢪ꣄ ꢲꣁꢡꢾꢫꣁ ꢥꢵ ꢌꢭ꣄ꢫꢾꢒꣁ ꢄꢡ꣄ꢒ ꢪꢲꢡ꣄ꢮꢪ꣄ ꢯꢿꢡ꣄ꢡꢾ ꢪꢾꢥꢶ ꢪꣁꢒꣁ ꢒꢳꢫꢾꢥꢶ ꢥꢵ ꢪꢾꢥꢶ ꢗꢶꢥ꣄ꢡꣁ ꢦꣁꢞꢾꢱ꣄ ꣏

ꢂꢪ꣄ꢬꢾ ꢪꢵꢫ꣄ ꢩꢵꢰꣁ ꢲꣁꢫꢾ ꢱꣃꢬꢵꢰ꣄ꢜ꣄ꢬꢵ ꢩꢵꢰꣁ ꢪꢾꢳ꣄ꢳꢶ ꢄꢱꣂꢱ꣄ | ꢡꢾꢜ꣄ꢡꢿꢜ꣄ ꢕꣁꢪ꣄ꢪꣁ ꢬꢴꢶꢫꢾ ꢏꢥ꣄ꢥꢸ ꢮꢿꢱ꣄ ꢥꢴꢷꢡ꣄ꢡꢒꢸ ꢱꢶꢒ꣄ꢒꢞꢶ ꢣꢿꢱ꣄ꢡꢒꢸ ꢪꢾꢥ꣄ꢒ꣄ꢫꢵꢥ꣄ ꢯꢿ | ꢲꣁꢫꢾꢡꢶ ꢱꢶꢒ꣄ꢒꢸꢭꢱ꣄ꢡꢒꢸ ꢪꢾꢥ꣄ꢒ꣄ꢫꢵꢥ꣄ ꢥꢴꢷ ! ꢂꢦꢸꢭ꣄ ꢂꢦꢸꢭ꣄ ꢪꢵꢫ꣄ ꢩꢵꢰꢵꢪ꣄ ꢦꢵꢠ꣄ꢞꢶꢡ꣄ꢫꢪ꣄ꢒꢥꢸ ꢯꢿꢡ꣄ꢡꢾꢖ꣄ꢒꣁ ꢂꢱ꣄ꢒꢶ ꢬꢵꢙꢵꢖ꣄ꢔꢸꢪ꣄ ꢪꢴꣁꢜ꣄ꢜꣁ ꢪꢴꣁꢜ꣄ꢜꣁ ꢒꢵꢪ꣄ ꢂꢨ꣄ꢨꣀ ! ꢮꢶꢣꢿꢯꢸꢪ꣄ ꢒꢵꢪ꣄ ꢂꢨ꣄ꢨꣀ ! ꢪꢾꢥꢶ ꢪꢲꢡ꣄ꢮꢪꢸꢥ꣄ ꢗꢾꢞ꣄ꢮꢶꢭꢶ ꢬꢴꢶꢫꢾꢡꢶ ꢭꢾꢒ꣄ꢒꢸꢥꢸ ꢒꣁꢣ꣄ꢣꢶ ꢮꢿꢱ꣄ꢥꢸ ꢒꢾꢬꢶꢥꢸ ꢱꣃꢬꢵꢰ꣄ꢜ꣄ꢬ ꢩꢵꢰꣁ ꢱꢶꢒ꣄ꢒꢥ꣄ ꢪꢾꢥ꣄ꢒ꣄ꢫꢵꢥ꣄ ! ꢌꢭ꣄ꢭꢿꢱ꣄ ꢪꢾꢥ꣄ꢒ꣄ꢫꢵꢥꢸ ꢱ꣄ꢮꢩꢵꢮꢸ ꣏

ꢒꢵꢫ꣄ ꢮꢱ꣄ꢡꢸ ꢲꣁꢫꢾꢡ꣄ꢒꢵꢫ꣄ ꢂꢪ꣄ꢒꣁ ꢱꢸꢭꢩꢪ꣄ꢒꢥꢶ ꢂꢨ꣄ꢨꢬꢱ꣄ ꢪꢾꢥ꣄ꢡꢶ ꢂꢪꢶ ꢲꢳ꣄ꢮꣁꢒꢥꢶ ꢲꢜ꣄ꢮꢥ꣄ ꢲꣂꢥꢵ ! ꢮꢱ꣄ꢡꢸ ꢤꢾꢬꢾ ꢪꢲꢡ꣄ꢮꢪꢸꢥ꣄ ꢙꢥ꣄ꢭꢸꢥꣁ ꣏