ꢱꢸꢬꢶꢡ꣄ꢒꢶꢥ꣄ ꢮꢬꣁ

ꢂꢪꢶ ꢯ꣄ꢮꢵꢱꣁ ꢒꢾꢬꢬꢶꢫꣁ ꢮꢬꣁꢒꢶꢥ꣄ ꢂꢪꢶ ꢙꢶꢮꢱ꣄ꢡꢒꢸ ꢒꢵꢥ꣄ꢡꢶ ꢣꢿꢬꢶꢫꣁ ꢱꢸꢬꢶꢡꢸ ꢂꢪ꣄ꢒꣁ ꢚꢸꢒ꣄ꢒꢸ ꢪꢸꢒ꣄ꢫꢪ꣄ ꣎ ꢏꢠ꣄ꢜꢾꢣꢶ ꢱꢸꢬꢶꢡꢸꢒ꣄ꢒꢶꢥ꣄ ꢮꢬꣁ ꢮꢡ꣄ꢡꣁ ꢒꢾꢬ꣄ꢭꢶꢫꢵꢱ꣄ ꣎ ꢱꢸꢬꢶꢡꢸꢒ꣄ ꢯꢾꢫ꣄ꢥꢸ ꢮꢬꣁ ꢂꢲꢖ꣄ꢒꢵꢬ꣄ꢒꢥꢶ  “ ꢲꢿ ꢲꢹꢥꢶ ! ꢡꣁꢬꣁ ꢱꣁꢪ꣄ꢪꢬ꣄ ꢪꢷꢱ꣄ ꢮꢷꢬꢸ ꢪꣁꢒꣂꢱ꣄ ꢨꣁꢭꢪ꣄ ꢚꢸꢒ꣄ꢒꢸ ꢯꢿꢡꢿ” ꢪꢾꢥꢶ ꢱꢖ꣄ꢔꢾꢱ꣄ ꣎ ꢄꢫꢾ ꢎꢒꢾ ꢱꢸꢬꢶꢡꢸ ꢲꢱꢶꢭꢿꢡ꣄ꢒꢥꢶ “ꢡꢹ ꢪꢴꣁꢜ꣄ꢜ ꢨꢭꢱꢵꢳꢶꢱ꣄ ꢌꢪꢵꢪ꣄ ꢡꢷꢳ꣄ ꢱꢿꢬꢸ ꢪꢾꢳ꣄ꢳꣁ ꢱꣁꢪ꣄ꢱꢾ ꢥꢴꢷ ꣎ ꢲꣁꢫꢾꢡꢶ ꢡꣁꢬ꣄ ꢱꣁꢪ꣄ꢪꢬ꣄ ꢪꢷ ꢤꢷꢬꢸꢞꢸ” ꢪꢾꢥꢶ ꢱꢸꢬꢶꢡ꣄ ꢱꢖ꣄ꢔꢾꢱ꣄ ꣎ ꢥꢴꢷꢱ꣄ ꢥꢴꢷ ! ꢪꢷꢱ꣄ ꢤꢷꢬꢸꢞꢸ ꢪꣁꢬ꣄ ꢙꣁꢮꢳꢸꢱ꣄ ꢚꢸꢒ꣄ꢒꢸ ꢨꣁꢭꢪ꣄ ꢯꢿꢡꢿ ! ꢡ꣄ꢫꢾ ꢪꢷ ꢥꢶꢬꢹꢦꢥꣁ ꢒꢾꢬꢱ꣄ꢡꢒꢸ ꢪꢸꢱꣀ ! ꢪꢾꢥꢶ ꢮꢬꣁ ꢱꢖ꣄ꢔꢾꢱ꣄ ꣎  ꢒꢶꢱꣁ ꢥꢶꢬꢹꢦꢥꣁ ꢒꢾꢬꢫ꣄ ? ꢪꢾꢥꢶ ꢱꢸꢬꢶꢡ꣄ ꢦꢸꢱꢾꢱ꣄ ꣎

ꢡꢾꢭꢵ ! ꢡꢿꢜꢸ ꢣꢸꢣꢹꢬꢸꢪ꣄ ꢱꢵ ꢏꢙꢥꣁ ꢂꢖ꣄ꢔ꣄ꢬꣁ ꢕꢭ꣄ꢭꢶ ꢗꢭꢶ ꢂꢮ꣄ꢭꢿꢡꢸ ꢯꢿꢥꢴꢫꢵ ! ꢪꣁꢬ꣄ ꢯꢒ꣄ꢡꢶ ꢲꢵꢭꢶ ꢡꢾꢥꣁ ꢕꢭ꣄ꢭꢶ ꢯꢿꢡ꣄ꢡꢾ ꢂꢖ꣄ꢔ꣄ꢬꣁ ꢲꢾꢞꢞꢸꢱ꣄ ꢱꢵ ꣎ ꢢꢾꢨ꣄ꢨꣁ ꢡꢹ ꢪꣁꢬꣁ ꢨꣁꢭꢪ꣄ ꢩꢶꢠ꣄ꢞꢸꢭꣀ ꢲꢵ ? ꢒꢵꢫ꣄ ꢪꢾꢥꢱ꣄ ? ꢪꢾꢥꢶ ꢮꢬꣁ ꢦꢸꢱ꣄ꢡꣁ ꣎ ꢱꢸꢬꢶꢡꢸ ꢱꢾꢬ꣄ꢒꢱ꣄ ꢪꢾꢥꢶ ꢪꢾꢥꢾꢱ꣄ ꣎

ꢬꢸꢮ꣄ꢮꣁ ꢕꢾꢞꢶꢪ꣄ ꢮꢬꣁ ꢨꢶꢱ꣄ꢱꣁꢒꢥꢶ ꢲꢥꢥ꣄ ꢥꢶꢒꢶꢳ꣄ꢞꢶꢫꣁ  ꣎ ꢂꢦꢸꢭ꣄ ꢩꣂꢬ꣄ ꢨꣁꢭꢪ꣄ ꢣꢾꢒ꣄ꢒꢞꢾꢱ꣄ ꢮꢬꣁ ꣎ ꢮꢬꣁ ꢨꢶꢱ꣄ꢱꣁꢒꢥꢶ ꢲꢥꢬꢶꢫꣁ ꢲꢵꢭꢶ ꢲꢷꢪ꣄ ꢯꢾꢒ꣄ꢒꢥꢵꢱ꣄ꢡꢒꢸ ꢡ꣄ꢫꢾ ꢪꢾꢥꢶꢒꢸ ꢂꢦꢸꢭ꣄ ꢂꢖ꣄ꢔ꣄ꢬꣁ ꢲꣂꢜ꣄ꢒꢥꢶ ꢆꢜ꣄ꢗꢶ ꢤꢾꢬ꣄ꢭꢶꢫꢾꢱ꣄ ꣎ ꢄꢫꢾ ꢱꢶꢭꢿꢡ꣄ ꢲꣁꢡꢾ ꢱꢸꢬꢶꢡ꣄ ꢮꢬꢵꢒꢸ ꢯꢾꢫ꣄ꢥꢸ “ ꢲꢿ ꢦꢮꢥꢵ ꢪꣁꢬ꣄ ꢨꣁꢭꢪ꣄ ꢣꢾꢒ꣄ꢒꢞꢸꢫꢵ ?” ꢪꢾꢥꢶ ꢦꢸꢱꢾꢱ꣄ ꣎

ꢡ꣄ꢫꢾꢒꣁ ꢮꢬꣁ ꢮꢾꢫ꣄ ꢣꢾꢒ꣄ꢒꢵꢞꢶ ꢪꢾꢥꢶ ꢪꢾꢥꢾꢱ꣄ ꣎  ꢒ꣄ꢰꢠ ꢕꢾꢞꢶꢪ꣄ ꢱꢸꢬꢶꢡ꣄ ꢂꢦꢸꢭ꣄ ꢦꢹꢬ꣄ꢠꢸ ꢒꢵꢥ꣄ꢡꢶ ꢱꢾꢥ꣄ꢡꣁ ꢙꢸꢭꢾꢱ꣄ ꢆꢔ꣄ꢔꢸꢬ꣄ꢒꢥꢶ  ꣎ ꢡꢾꢭ꣄ꢭꢾ ꢪꢾꢥꢶꢒꢸ ꢱꢸꢬꢶꢡꢸ ꢲꢸꢥ꣄ꢥꣁ ꢯꢾꢒ꣄ꢒꢥꢵꢱ꣄ꢡꢒꢸ ꢂꢦꢸꢭ꣄ ꢕꢭ꣄ꢭꢶ ꢲꣁꢡꢾ ꢂꢖ꣄ꢔ꣄ꢬꣁ ꢱꢾꢮ꣄ꢞꢶ ꢡꢔꢶ ꢫꣂꢒ꣄ ꢚꢵꢞꢸ ꢘꣀꢭꢵꢪ꣄ ꢙꢷꢒꢶꢥ꣄ ꢨꢶꢱꢾꢱ꣄ ꣎ ꢄꢫꢾ ꢱꢶꢫꢾ ꢮꢬꣁ ꢂꢦꢸꢭ꣄ ꢂꢙꢷꢔ꣄ ꢩꢶꢠ꣄ꢞꢶꢭꢶꢫꢾꢱ꣄ ꢂꢲꢖ꣄ꢒꢵꢬ꣄ ꢲꢾꢞꢶ ꢡꢔꢾꢱ꣄ ꣎