ꢏꢠ꣄ꢜꢾꢣꢶ ꢮꢷꢳ꣄ꢜꣁ ꢫꣂꢒ꣄ ꢱꢸꢥꣁꢒꢶꢥ꣄ ꢫꣂꢒ꣄ ꢮꢺꢒꣁ ꢣꢾꢒ꣄ꢒꢶꢭꢶꢫꢾꢱ꣄꣎ ꢚꢸꢒꢸ ꢣꢶꢥ꣄ꢥꢸ ꢱꢾꢬ꣄ꢒꣁꢒꢥꢶ ꢓꢥꢶꢥ꣄ ꢓꢵꢥꢵꢱ꣄ꢡꢾ ꢲꢵꢭꢶ ꢮꢺꢒꣁ ꢩꢾꢳ꣄ꢳꢶ ꢗꢶꢒ꣄ꢒꢫꢶꢒꢶꢥ꣄ ꢲꣁꢡꢾꢱ꣄꣎ ꢱꢸꢥꣁ ꢮꢺꢒꢵꢒꢸ ꢯꢾꢫ꣄ꢥꢸ “ꢲꢿ ꢪꢶꢡ꣄ꢬꢵ ! ꢒꢔꣁ ꢡꢹ ꢮꢶꢗꢵꢬ꣄ꢒꢥꢶ ꢯꢿꢡꢿ ? ꢡꣁꢒꣁ ꢒꢵꢫ꣄ ꢆꢥ꣄ꢥꣁ ?” ꢪꢾꢥꢶ ꢦꢸꢱꢾꢱ꣄꣎ ꢡꢾꢭ꣄ꢭꢾꢒꣁ ꢮꢺꢒꣁ “ꢪꢷ ꢓꢥꢶꢥ꣄ ꢓꢫꢶ ꢢꢷꢥ꣄ ꢣꢶꢥ꣄ꢥꢸ ꢲꣁꢭ꣄ꢭꣁ ꢲꣁꢫ꣄ꢫꢶꢬꢶꢫꣁ! ꢩꢹꢒꢸꢪ꣄ ꢱꢸꢒ꣄ꢒꢶꢭꢶ ꢯꢿꢡꢿ” ꢪꢾꢥꢶ ꢙꢾꢮꢵꢦ꣄ ꢒꢾꢬꢾꢱ꣄꣎ ꢄꢫꢾ ꢎꢒꢶ ꢮꢶꢗꢵꢬ꣄ ꢦꣁꢞꢾ ꢱꢸꢥꣁ “ꢲꢿ ꢪꢶꢡ꣄ꢬꢵ! ꢗꢶꢥ꣄ꢡꣁ ꢥꣁꢒ꣄ꢒꣁ꣎ ꢪꢷ ꢡꣁꢒꣁ ꢱꢲꢵꢮ꣄ ꢒꢾꢬꢸꢱꢸ꣎ ꢪꣁꢬ꣄ ꢱꢾꢥ꣄ꢡꣁ ꢃꢮ꣄, ꢪꣁꢒꣁ ꢲꣁꢮ꣄ꢞꢬꢶꢫꣁ ꢡꢾꢖ꣄ꢒ ꢕꣁꢪ꣄ꢪꣁ ꢙꢶꢫꢾꢥ꣄! ꢡꢿꢜꢸ ꢓꢵꢡ꣄ꢡꢒꢸ ꢚꢸꢒ꣄ꢒꢸ ꢓꢥꢶꢥ꣄ ꢣꢿꢥ꣄! ꢩꢹꢒꢸꢪ꣄ ꢱꢸꢒ꣄ꢒꢥ꣄ ꢮꢿꢱ꣄ ꢥꢴꢷ” ꢪꢾꢥꢶ ꢱꢸꢥꣁ ꢪꢾꢥꢾꢱ꣄ ꣎ ꢮꢺꢒꣁ ꢱꣁꢥ꣄ꢡꣂꢰ꣄ꢒꢥꢶ ꢱꢸꢥ ꢱꢾꢥ꣄ꢡꣁ ꢥꢶꢒꢶꢳꢾꢱ꣄ ꣎
ꢮꢺꢒꣁꢒꢶꢥ꣄ ꢱꢸꢥꣁ ꢮꢡ꣄ꢡꣁ ꢒꢾꢬ꣄ꢭꢿꢡ꣄ ꢙꢶꢫꢾꢱ꣄꣎ ꢬꢸꢮ꣄ꢮꣁ ꢣꢹꢬ꣄ ꢙꢶꢫꢾ ꢧꢭ꣄ꢗꣁ ꢂꢔꢱ꣄ꢪꢵꢡ꣄ꢒꢥꢶ ꢱꢸꢥꢵ ꢔꢾꢳꢵꢪ꣄ ꢩꢥ꣄ꢣꢶ ꢲꣁꢡꢾ ꢔꢾꢳꢵ ꢥꢣ꣄ꢬꢶ ꢱꢶꢫꢾꢱ꣄ ꢮꢺꢒꣁ ! ꢌꢭ꣄ꢭꢾ ꢒꢵꢫꣁ ꢒꢒꣁ ꢡꣁꢬꣁ ꢔꢾꢳꢵꢪ꣄ ꢩꢥ꣄ꢣꢶꢬꢶꢫꣁ ꢪꢾꢥꢶ ꢮꢺꢒꣁ ꢦꢸꢱꢾꢱ꣄꣎ “ꢄꢫꢾ ꢪꣁꢒꣁ ꢲꣁꢮ꣄ꢞꢬꢶꢫꣁ ꢡꢾꢥꢸ ꢩꢥ꣄ꢣꢶꢬꢶꢫꣁ꣎ ꢌꢪꢵꢪꢸ ꢲꢷꢒꢸ ꢱꢪ꣄ꢜꢜꢶ ꢪꣁꢒꣁ ꢩꢥ꣄ꢣꢶ ꢡꢒꢥ꣄꣎ ꢪꣁꢒꣁ ꢣꢷꢱꢱ꣄ꢒꣁ ꢩꢥ꣄ꢣꢶ ꢢꣁꢮꢥ꣄ ꢬꢵꢡꢶꢪꢸ ꢱꣁꢞ꣄ꢮꢶ ꢱꣁꢞ꣄ꢞꢥ꣄꣎ ꢪꢾꢥꢶ ꢱꢸꢥꣁ ꢱꢖ꣄ꢔꢶꢡꢶ ꢂꢮꢾ ꢙꢶꢫꢾꢥ꣄ ꢪꢾꢥꢶ ꢮꢺꢒꢵꢒꢸ ꢨꣁꢮꢾꢱ꣄ ꢱꢸꢥꣁ꣎ ꢓꢾꢥꢶꢥꢸ ꢪꢛ꣄ꢙꢬꢶꢦꢸꢜꣁ ꢄꢫꢾ ꢎꢒꢾ ꢮꢺꢒꣁ ꢱꢸꢥꢵꢒꢸ ꢯꢾꢫ꣄ꢥꢸ, “ꢦ꣄ꢬꢿꢮ꣄ ꢩꣁꢬꢾ ꢪꢶꢡ꣄ꢬꢵ! ꢡꢸꢪ꣄ꢬꢾ ꢱꢲꢵꢮꢸꢒꢸ ꢪꣁꢬ꣄ ꢮꢶꢱ꣄ꢮꢵꢱ꣄ ꢒꢳꢳ꣄ꢳꢬꢱ꣄ ꣎ ꢲꣁꢫꢾꢡꢶ ꢪꢷ ꢩꢹꢒꢸꢪ꣄ ꢱꢸꢒ꣄ꢒꢶꢥꢵ ꢪꣁꢬꢸꢱ꣄! ꢓꢥꢶ ꢂꢨ꣄ꢨꣀ ꢪꢾꢥꢶ ꢪꢷ ꢩꢜꢸꢒꢥꢶ ꢙꢶꢮꢱ꣄ꢡꢒꢸ ꢪꣁꢒꣁ ꢄꢰ꣄ꢜꢪ꣄ ꢥꢴꢷ” ꢪꢾꢥꢶ ꢱꢖ꣄ꢔꢶꢡꢶ ꢂꢦꢸꢭ꣄ ꢮꢵꢜ꣄ ꢯꢾꢫ꣄ꢥꢸ ꢥꢶꢒꢶꢳꢾꢱ꣄ ꢮꢺꢒꣁ꣏
Leave a Reply
You must be logged in to post a comment.