ꢱꢸꢥꢵ ꢦꢹꢱ꣄ ꢓꢾꢥꢶ – ꣑

ꢙꢥꢒꢦꢸꢬꢶ ꢪꢾꢥꢥ꣄ ꢦꢜ꣄ꢠꢪꢸ ꢂꢡꢶꢫꢵꢱ꣄ꢡꣁ ꢤꢾꢬꢾ ꢣꢸꢬ꣄ꢨꢳ꣄ ꢲꣁꢡꢾꢱ꣄ ꣎ ꢂꢦꢸꢭ꣄ ꢣꢬꢶꢣ꣄ꢬꢸꢦ꣄ꢦꢥ꣄ ꢙꢮꢳ꣄ꢳꢱ꣄ꢡꢒ꣄  ꢮꢒ꣄ꢬ ꢗꢶꢥ꣄ꢡꢥꣁ ꢒꢾꢬ꣄ꢭꢿꢡ꣄ ꢲꣁꢡꢾꢱ꣄ ꣎ ꢏꢠ꣄ꢜꢾꢣꢶ ꢡꢾꢒ ꢗꢶꢥ꣄ꢡꢥꢵꢪ꣄ “ꢂꢪꢶ ꢏꢠ꣄ꢜꢾ ꢩꢹꢡꢸꢒ꣄ ꢂꢮ꣄ꢬꢾ ꢮꢱꣁ ꢒꢾꢬꢶ ꢢꣁꢮ꣄ꢭꢸꢥꣁ | ꢂꢪꢶ ꢲꢸꢔꢾ ꢒꢵꢪꢱ꣄ꢒꢶ ꢒꢾꢬ꣄ꢥꣁ ꢪꢾꢥꢶ ꢲꢜ꣄ꢮꢶꢭꢶ ꢩꢹꢡ꣄ ꢤꢾꢬꢶ ꢣꢿꢬꢶꢫꣁ ꢡꢾꢖ꣄ꢒ ꢮꢾꢒ꣄ꢒꢶꢭꢶ ꢔꢵꢪꢱ꣄ꢒꣁ ꢭꢸꢠ꣄ꢜꢶꢭꢿꢡ꣄ ꢂꢮꢡ꣄ꢡꢮꢿꢳ꣄ ꢏꢠ꣄ꢜꢾ ꢪꢲꢵ ꢪꢸꢥꢶꢒ꣄ ꢣꢾꢒ꣄ꢒꢾꢱ꣄ | ꢡꢾꢖ꣄ꢒ ꢙꣁꢮꢳ꣄ “ꢏꢠ꣄ꢜꢾ ꢩꢹꢡ꣄ ꢤꢾꢬꢶ ꢣꢾꢮꣁ” ꢪꢾꢥꢶ ꢪꢔꢶꢭꢶꢫꢾꢱ꣄. ꢡꢾꢭ꣄ꢫꢾꢒ ꢪꢲꢵꢪꢸꢥꢶ “ ꢩꢹꢡꢸꢒ꣄ ꢢꣁꢮ꣄ꢭꢶ ꢡꢹ ꢒꢵꢫ꣄ ꢒꢬꢛ꣄ꢙꢵꢬꢶꢫꣁ ? ꢪꢾꢥꢶ ꢦꢸꢱ꣄ꢫꢵꢱ꣄ | ꢡ꣄ꢫꢾꢒ “ꢪꢷ ꢱꢖ꣄ꢔꢬꢶꢫꣁ ꢒꢵꢪꢱ꣄ꢒꢶ ꢒꢬꢡ꣄ꢡꢒꢸ ꢩꢹꢡ꣄ ꢦꢙꢾ” ꢪꢾꢥꢶ ꢡꢾꢭ꣄ꢫꢾ ꢣꢸꢬ꣄ꢨꢳ꣄ ꢱꢖ꣄ꢔꢾꢱ꣄ | ꢧꢭ꣄ꢗꣁ ꢪꢲꢵꢪꢸꢥꢶ ꢣꢸꢬ꣄ꢨꢳꢸꢒ꣄ ꢱꢾꢫ꣄ “ꢮꢶꢬ꣄ꢡꢵꢒ꣄ꢒꢥꢶ ꢗꢶꢥ꣄ꢡꣁ ꢒꢾꢬ꣄ꢥꢵꢱ꣄ꢡꣁ ꢕꢿꢬ꣄ ꢙꢵ” ꢪꢾꢥꢶ ꢆꢦꢣꢿꢱ꣄ ꢱꢖ꣄ꢔꢶ ꢤꢞ꣄ꢞꢶꢫꢵꢱ꣄ | 

ꢧꢷꢬ꣄ ꢗꢵꢬ꣄ꢣꢶ ꢧꢭ꣄ꢗꣁ ꢪꢲꢵꢪꢸꢥꢶꢒ꣄ ꢣꢾꢒ꣄ꢒꢶ ꢪꣁꢒꣁ ꢏꢠ꣄ꢜꢾ ꢩꢹꢡ꣄ ꢤꢾꢬꢶ ꢣꢾꢮꣁ ꢪꢾꢥꢶ ꢏꢠ꣄ꢜꢾ ꢦꢔꢸꢭꢸꢪ꣄ ꢲꢶꢨ꣄ꢨꢶ ꢱꢶꢥꢞꢾꢱ꣄ |  ꢪꢸꢥꢶꢒ꣄ ꢬꢵꢒꢮꢶ “ ꢍꢭꢵ ꢌꢭ꣄ꢭꢾ ꢪꣁꢥ꣄ꢡꢸꢬ꣄ ꢎꢒꢶꢭꢿ | ’ꢲꣂ ꢲꣂ ꢙꢶꢖ꣄ꢔꢵ ꢃꢮ꣄ ꢃꢮ꣄ ꢙꢶꢖ꣄ꢔꢵ’ ꢌꢭ꣄ꢭꢾ ꢪꣁꢥ꣄ꢡꢸꢬ꣄ ꢡꢹ ꢪꢾꢥ꣄ꢭꢿꢡ꣄ ꢂꢮꢾꢡ꣄ ꢩꢹꢡ꣄ ꢡꣁꢬ꣄ ꢮꢱꣁ ꢲꣁꢫꢶꢒꢶꢥ꣄  ꢡꢹ ꢱꢖ꣄ꢔꢾ ꢒꢵꢪꢱ꣄ꢒꢶ ꢒꢾꢬꢶ ꢣꢿꢫ꣄ | ꢲꣁꢫꢾꢡ꣄ ꢏꢠ꣄ꢜꢾ ꢮꢶꢰꢫꢪ꣄ ꢲꢜ꣄ꢮꢥ꣄ ꢢꣁꢮ꣄ꢭꢿ |  ꢡꢹ ꢱꢬ꣄ꢮ ꢙꢵꢒ꣄ꢬꢣꢾꢒꢥ꣄ ꢬꢴꢥꣁ | ꢩꢹꢡꢸꢥ꣄ ꢩꢫꢖ꣄ꢔꢬꢪ꣄ ꢲꣁꢫꢾꢫꣁ | ꢩꢹꢡꢸꢒ꣄ ꢱꢣꢵ ꢒꢵꢪꢸꢥ꣄ ꢣꢶꢭꢿꢡ꣄ ꢬꢴꢥꣁ | ꢒꢵꢪ꣄ ꢣꢿꢥꢵ ꢙꢶꢫꢾꢡ꣄ ꢡꣁꢬ꣄ ꢙꢷꢮ꣄ ꢪꢶꢖ꣄ꢔꢸꢡꣀ ꢲꢜ꣄ꢮꢥ꣄ ꢢꣁꢮ꣄ꢭꢿ |” ꢪꢾꢥꢶ ꢱꢖ꣄ꢔꢶꢫꢵꢱ꣄. “ꢒꢵꢪ꣄ ꢱꢖ꣄ꢔꢡ꣄ꢡꢾꢪꢵꢪ꣄ ꢒꣀ ꢱꢶꢬꢪꣁ ꢙꢸꢠ꣄ꢠꢵ | ꢡꢾꢒꢵ ꢃꢫꢸꢱ꣄ ꢬꢴꢵ ꢭꢾꢥ꣄ꢡꢸ ꢒꢵꢪ꣄ ꢣꢿꢡ꣄ꢡꢒ꣄ ꢪꣁꢬ꣄ ꢲꢵꢭ꣄ ꢱꢾꢒ꣄ꢒꢵꢫ꣄” ꢪꢾꢥꢶ ꢱꢖ꣄ꢔꢶꢡꢶ ꢂꢜꢮꢶꢒ꣄ ꢙꢷꢒꢶꢥ꣄ ” ꢲꣂ..ꢲꣂ..ꢙꢶꢖ꣄ꢔꢵ.. ꢃꢮ꣄ ꢃꢮ꣄ ꢙꢶꢖ꣄ꢔꢵ” ꢪꢾꢥꢶ ꢪꢾꢥ꣄ꢭꢿꢡ꣄ ꢡꢦꢱꢸꢒ꣄ ꢨꢶꢱꢾꢱ꣄ |

ꢬꢸꢮ꣄ꢮꢣꢶꢪ꣄ ꢏꢠ꣄ꢜꢾ ꢕꣂꢬꢪꢸꢓ ꢩꢹꢡ꣄ ꢒꢵꢒ꣄‍ꢰꢶ ꢣꢷꢫꢾꢱ꣄, ‘ ꢪꢷ ꢏꢠ꣄ꢜꢾ ꢩꢹꢡ꣄ | ꢡꣁꢬ꣄ ꢪꢥ꣄ꢡ꣄ꢬ ꢱꢒ꣄ꢡꢶ ꢲꢵꢭ꣄ ꢡꣁꢬ꣄ ꢮꢱꣁ ꢲꣁꢫꢾꢱ꣄ ꢪꢷ’ | ꢲꣁꢫꢾꢡ꣄ ꢡꢹ ꢱꢣꢵ ꢪꣁꢒꣁ ꢒꢵꢪꢸꢥ꣄ ꢣꢶꢭꢿꢡ꣄ ꢬꢴꢥꣁ ꢥꢴꢷ ꢙꢶꢫꢾꢡ꣄ ꢡꣁꢒꣁ ꢗꢮꢶ ꢪꢶꢖ꣄ꢔꢸꢡꢸꢒꢸ ꢪꢷ ꢪꢾꢥꢶ ꢩꢹꢡ꣄ ꢱꢖ꣄ꢔꢸꢡꣁ….  ꢱꢾꢬ꣄ꢒꢱ꣄ ꢪꢾꢥꢾꢱ꣄ ꢣꢸꢬ꣄ꢦꢳ꣄ | ꢧꢭ꣄ꢗꣁ ꢲꢿ ꢙꢶꢖ꣄ꢔꢵ ꢪꣁꢬꣁ ꢒꢸꢬ꣄ꢗ꣄ꢗꢶ ꢪꢴꣁꢜ꣄ꢜꢒꢥꢶ ꢏꢠ꣄ꢜꢾ ꢬꣃꢳ꣄ ꢩꢥ꣄ꢣꢶ ꢪꢾꢥꢶ ꢪꢾꢥꢾꢱ꣄ | ꢣꣁꢳꣁ ꢪꢶꢱ꣄ꢒꢶ ꢲꢸꢞꢱ꣄ꢡ ꢭꣂꢦꢸꢭꢵꢪ꣄ ꢪꢴꣁꢜ꣄ꢜ ꢬꣃꢳ꣄ ꢩꢥ꣄ꢣꢶ ꢡꢶꢫꢾꢱ꣄ ꢡ꣄ꢫꢿ ꢩꢹꢡ꣄ | ꢦꢭ꣄ꢗꣁ ꢲꢥ꣄ꢥꢮ꣄, ꢱꣁꢥ꣄ꢥꣁ, ꢲꢶꢬꣁ, ꢬꢸꢦ꣄ꢦꣁ ꢘꢾꢞꢵꢮ꣄ ꢮꢱ꣄ꢡꢸꢥꢱ꣄ꢒꢶ ꢓꢳ꣄ꢳꢶꢫꢵꢮ꣄ ꢪꢾꢥ꣄ꢡꣁ , ꢌꢭꢵ ꢤꢿꢬ꣄ ꢪꢾꢥꢶ ꢒ꣄‍ꢰꢠ ꢕꢾꢞꢶꢪ꣄ ꢩꢹꢡ꣄ ꢣꢸꢬ꣄ꢦꢳ꣄ ꢙꣁꢮꢳ꣄ ꢣꢶꢫꢾꢱ꣄ | 

ꢧꢭ꣄ꢗꣁ ꢌꢭ꣄ꢭꢾ ꢬꢵꢠꢱ꣄ꢒꢶ ꢥꢱ꣄ꢡꢶꢒꢶꢥ꣄ ꢏꢠ꣄ꢜꢾ ꢔꢵꢪ꣄ ꢒꢿꢬ꣄ ꢪꢾꢥꢶ ꢪꢾꢥꢾ ꢕꢾꢞꢶꢪ꣄ ꢒꢾꢬꢶ ꢪꢸꢱꢜ꣄ꢜꢶꢫꣁ ꢩꢹꢡ꣄ ꣎ ꢧꢭ꣄ꢗꣁ ꢒꢵꢫ꣄ ꢦꢙꢾ ꢧꢭ꣄ꢗꣁ ꢒꢵꢫ꣄ ꢦꢙꢾ ꢪꢾꢥꢶ ꢩꢹꢡ꣄ ꢦꢸꢱ꣄ꢡꣁ ꢣꢸꢬ꣄ꢨꢳꢸꢒ꣄ ꢤꢵꢒꢮꢶ ꢭꢔꢾꢱ꣄ ꣎ ꢂꢲꣂ ꢌꢭ꣄ꢭꢾ ꢩꢹꢡꢸꢒ꣄ ꢣꢿꢡ꣄ꢡꢒ꣄ ꢒꢵꢪꢸꢥ꣄ ꢒꣀ ꢣꢾꢒ꣄ꢒꢵꢥꢶ ꢥꢵ ꢪꢾꢥꢶ ꢤꢒ꣄ꢒꢾꢱ꣄ ꣎ ꢡꢶꢡ꣄ꢒꢵꢪ꣄ ꢦꢹꢡ꣄ ꢒꢵꢪ꣄ ꢣꢿꢱ꣄ꢒꢶ ꢡꣁꢒꣁ ꢗꢮꢶ ꢪꢶꢖ꣄ꢔꢸ ꢪꢾꢥꢶ ꢩꢮꢵꢜ꣄ ꢡꢔꢾꢱ꣄. ꢣꢸꢬ꣄ꢨꢳ꣄ ꢤꢒ꣄ꢒꢶ ꢤꢪꢶ ꢪꢸꢥꢶꢮꢬ꣄ ꢙꣁꢮꢳ꣄ ꢂꢮꢾꢱ꣄ ꣎