ꢙꢥꢥꢶ ꢪꢾꢥꢥ꣄ ꢏꢠ꣄ꢜꢾ ꢨꢵꢳꢒꢷ ꢂꢦꢸꢭ꣄ ꢨꢵꢦ꣄ ꢙꣁꢮꢳ꣄ ꢫꣂꢒ꣄ ꢦ꣄ꢬꢱ꣄ꢥꣁ ꢦꢸꢱꢶꢱ꣄ ꣎ ꢨꢵ ꢮꢶꢣ꣄ꢫꣁ ꢱꢶꢒ꣄ꢒꢾ ꢲꢵꢭ꣄ ꢂꢪ꣄ꢒꣁ ꢒꢵꢫ꣄ ꢧꣂꢳ꣄ ꢯꢿ ꣎ ꢡꢾꢭ꣄ꢫꢒꣁ ꢡꢶꢒ ꢨꢵꢦ꣄ ꢙꢾꢮꢵꢦ꣄ ꢒꢬꢱ꣄ ꢄꢱꣁ ꣎ ꢂꢬꢾ ꢪꣁꢬ꣄ ꢦ꣄ꢬꢿꢮꢸ ꢨꢾꢜꢷ ꢗꣁꢒ꣄ꢒꢜ꣄ ꢦ꣄ꢬꢱ꣄ꢥꣁ ꢦꢸꢱꢶꢱ꣄ ꣎ ꢆꢡ꣄ꢡꢬ꣄ ꢱꢖ꣄ꢔꢸꢱ꣄ ꢎꢒꢶꢭꢿ ꣎
ꢏꢙꢥꢵꢒ꣄ ꢡꢾꢥ꣄ ꢱꢶꢒ꣄ꢒꢾ ꢮꢶꢣ꣄ꢫꣂꢱ꣄ ꢬꢴꢡ꣄ꢡ ꢣꣁꢳꣁ ꢱꣁꢒꢥ꣄ ꢨꢾꢜꢷ ꣎ ꢦꣁꢬꣁ ꢥꢴꢷꢱ꣄ꢡꢒ꣄ ꢮꢶꢣ꣄ꢫꣁ ꢱꢶꢒ꣄ꢒꢾ ꢏꢙꢥꣁ ꢮꢶꢣꢿꢱꢦ꣄ꢬꢮꢿꢱ꣄ ꢒꢬꢱ꣄ ꢢꢾꢨ꣄ꢨꣁ ꢡꢾꢥꣁ ꢱꢶꢒ꣄ꢒꢾ ꢮꢶꢣ꣄ꢫꣂꢱ꣄ ꢡꢾꢒꣁ ꢙꢾꢥꢾ ꢪꢵꢫ꣄ ꢨꢵꢦ꣄ ꢱꣁꢒꣁ ꢃꢣꢬꣁꢣꢷꢒꢶꢥ꣄ ꢬꢒ꣄ꢰꣀ ꢨꢾꢜꢷ, ꢱ꣄ꢮꢨꢥ꣄ꢤꢸꢥ꣄ ꢪꢶꢡꢺꢥ꣄ ꢱꣁꢒꣁ ꢱꢲꢵꢮ꣄ ꢒꢬꣀ ꢨꢾꢜꢷ ꣎ ꢮꢶꢣ꣄ꢫꢵꢮꢶ ꢙꣁꢮꢳ꣄ ꢬꢴꢵꢥ꣄ ꢮꢶꢣ꣄ꢫꣁ ꢪꢾꢥꢥ꣄ ꢘꢾꢞꢵꢮ꣄ ꢬꢾꢡ꣄ꢡꢥ꣄ ꢦꢬꢸꢥ꣄ ꢲꢵꢭ꣄ ꢗꣁꢬꢥ꣄ ꢪꢸꢱꢸꢥꢵ ꣎ ꢦꢬꢸꢥꢸꢒ꣄ ꢮꢶꢣ꣄ꢫꣁ ꢱꢶꢒ꣄ꢒꢞꢶ ꢣꢶꢫꢾꢡꢶ ꢆꢥ꣄ꢥꣁ ꢦꣁꢠ꣄ꢠꢵꢱ꣄ꢡꣁ ꢲꣂꢬ꣄ ꢲꣂꢬꢸ ꢗꢾꢞ꣄ꢭꢿꢡ꣄ ꢬꢴꢵꢫ꣄ ꣎
ꢮꢶꢣ꣄ꢫꢵꢮꢶꢒꢸ ꢮꢶꢣꢿꢯ꣄ ꢪꢾꢳ꣄ꢳꣁ ꢱ꣄ꢮꢫ ꢣꢿꢯ꣄ ꢲꣂꢱ꣄ ꢨꢾꢜꢷ ꣎ ꢮꢶꢣ꣄ꢫꢵꢮꢶꢒ꣄ ꢂꢱ꣄ꢒꢶ ꢡꢿꢜ꣄ ꢕꢾꢥꢪ꣄ ꢱꢾꢥ꣄ꢡꣁ ꢫꢯꢯ꣄ ꢂꢨ꣄ꢨꣀ ꢨꢾꢜꢷ ꣎ ꢮꢶꢣ꣄ꢫꢵꢮꢶꢒꢸ ꢡꢾꢥ꣄ ꢱꢶꢒ꣄ꢒꢾ ꢮꢶꢣ꣄ꢫꣁ ꢒꢵꢪꢤꢿꢥ꣄ ꢱꣁꢒꣁ ꢦꢙꢾ ꢲꣂꢬꢶꢫꣁ ꢗꣁꢒ꣄ꢧꣂꢳꢱ꣄ꢒꢶ ꢣꢶꢭꢿꢡ꣄ ꢬꢴꢵꢫ꣄ ꢨꢾꢜꢷ ꣎ ꢏꢙꢥꢵꢒꢸ ꢱꢶꢖ꣄ꢔꢵꢬ꣄ ꢣꢿꢬꢶꢫꣁ ꢩꢹꢰꢠꣁ ꢒꢵꢫꣁ ꢪꢾꢥꢾꢡꢶ ꢡꢾꢥꣁ ꢱꢶꢒ꣄ꢒꢾ ꢮꢶꢣ꣄ꢫꣂꢱ꣄ ꣎ ꢡꢾꢒ ꢲꢵꢭꢶꢪ꣄ ꢡꢹ ꢓꣁꢨ꣄ꢨꢶꢪ꣄ ꢱꣁꢠ꣄ꢠꢵꢱ꣄ꢡꣁ ꢂꢩ꣄ꢫꢵꢱ꣄ ꢒꢬ꣄ꢭꢿꢡ꣄ (ꢮꢶꢣ꣄ꢫꣁ ꢱꢶꢒ꣄ꢒꢶꢭꢿꢡ꣄) ꢬꢴꢥꣁ ꢨꢾꢜꢷ ꣎ ꢮꢶꢣ꣄ꢫꣁ ꢪꢾꢥꢥ꣄ ꢱꣁꢥ꣄ꢥꢵ ꢱ꣄ꢬꢿꢠꢶ ꢤꢶꢜꣃꢒꢥꢶ ꢤꢾꢬ꣄ꢭꢶ ꢲꢶꢖ꣄ꢔꢶ ꢡꢹ ꢆꢛ꣄ꢗꢵꢪ꣄ ꢂꢮꢶ ꢂꢱ꣄ꢒꢶꢥꢵꢒ꣄ ꢮꢵꢜ꣄ ꢣꢾꢒ꣄ꢒꢞ꣄ꢥꣁ ꢨꢾꢜꢷ ꣏
ꢣ꣄ꢱꣁꢠ꣄ꢠꢵꢱ꣄ꢡꣁ – ꢌꢪꢵꢪ꣄ ꢣ꣄ ꢲꢾꢜ꣄ꢜꢸꢥꣁ ꣎
O.S.Subramanian.
ꢱꢾꢬ꣄ꢒꣁ ꢒꢾꢬ꣄ꢡꢶꢬꢶꢫꣁ ꣎ ꢤꢥ꣄ꢥꢸ ꣎