ꢱꣃꢬꢵꢰ꣄ꢜ꣄ꢬ ꢡꢪꢶꢭ꣄ ꢱꢖ꣄ꢔꢪꢪ꣄ – ꣒

ꢪꢵꢫ꣄ ꢨꢾꢜꣁ ꢱꢪ꣄ꢩꢵꢰꢠꣁ – ꢣꢶꢮꣁ ꢩꢵꢔꢸ

ꢨꢾꢜꣁ ꢒꢵꢬ꣄ꢫꢵꢭꢫꢸ ꢡꣁꢒꢥ꣄ ꢱꣁꢥ꣄ꢡꣂꢰ꣄ꢒꢥꢶ ꢨꢶꢱ꣄ꢱꣁ ꢕꢿꢬꢮꢾꢱ꣄ ꢂꢪ꣄ꢨꢵ ! ꢂꢪ꣄ꢨꢵ ! ꢪꢾꢥꢶ ꢨꣁꢮ꣄ꢭꢿꢡ꣄ꢒꢥꢶ ꣎

ꢨꢾꢜꣁ : ꢂꢪ꣄ꢨꢵ ! ꢪꢷ ꢱꣃꢬꢵꢰ꣄ꢜ꣄ꢬꢵ ꢡꢪꢶꢭ꣄ ꢱꢖ꣄ꢔꢪꢪꢸꢒꢸ ꢦꢛ꣄ꢗꢶ ꢒꢾꢬꢾꢫꣁ ꢥꢴꢫꢵ ! ꢪꣁꢒꣁ ꢨꣁꢮꢥ꣄ ꢤꢞ꣄ꢞꢷꢬꢵꢱ꣄ ꢂꢪ꣄ꢨꢵ! ꢪꢷ ꢦꢹꢬꢸꢪ꣄ ꢂꢮ꣄ꢬꢾ ꢏꢳ꣄ꢞ꣄ꢫꢵꢥ꣄  ꢲꣁꢡꢾ ꢱꣃꢬꢵꢰ꣄ꢜ꣄ꢬ ꢣꢿꢯꢸꢒꢸ ꢂꢮ꣄ꢮꢵꢫ꣄ ꢪꢾꢥꢶ ꢲꢵꢡꢸꢮꢣꢶꢥꢶꢪ꣄ꢒꢶꢥ꣄ ꢮꢶꢣ꣄ꢫꢸꢡ꣄ꢭꢿꢒꢸꢪ꣄  ꢭꢶꢒ꣄ꢒꢶꢥ꣄ ꢤꢞ꣄ꢞꢷꢬꢵꢱ꣄ ꢱꢵꢪ꣄ꢨꢵ !

ꢂꢪ꣄ꢨꣁ : ꢂꢬꢾ ꢩꢾꢳꢶ ꢱꣁꢥ꣄ꢡꣂꢰ꣄ ꢨꢵ ! ꢲꢵꢫꢶ ꢨꢵ ꢥꢵꢮ꣄ꢒꢶꢥ꣄ ꢪꣁꢬꢾ ꢥꢵꢮ꣄ ꢂꢮꢾꢱ꣄ ꢫꢵ ? ꢡꣁꢒꣁ ꢪꢵꢡ꣄ꢬꢪ꣄ ꢒꣂꢥꢒꢮꢾꢱ꣄ ?

ꢨꢾꢜꣁ : ꢂꢪ꣄ꢨꢵ ! ꢡꢸꢬꢾ ꢥꢵꢮ꣄ ꢂꢮ꣄ꢬꢾꢥꢶꢪ꣄ꢨꢵ ! ꢡꢾꢥꢸ ꢱꢱꢬꢸꢪ꣄ ꢏꢠ꣄ꢜꢾꢒꣁ ꢮꢾꢒ꣄ꢒꢶ ꢲꢾꢞꢾ ꢱꣁꢒꢥ꣄ ꢨꢡ꣄ꢡꢸꢒꢥ꣄ ꢢꢷꢥ꣄ ꢱꢱꢬ꣄ ꢪꢾꢥ꣄ꢒ꣄ꢫꢵꢥꢸꢒꢸ ꢪꢵꢡ꣄ꢬꢪ꣄ ꢨꣁꢭ꣄ꢭꢶ ꢙꢵꢬꢶꢫꣁ ! ꢡꢾꢪꢵꢪ꣄ ꢪꢷ ꢏꢙꢥꣁ ꣎

ꢂꢪ꣄ꢨꣁ : ꢱꢾꢬ꣄ꢒꣁ ꢨꢵ ! ꢒꣂꢥꢾꢡꢶ ꢂꢮ꣄ꢬꢾ ꢱꣃꢬꢵꢰ꣄ꢜ꣄ꢬ ꢣꢿꢯꢸꢒꢸ ꢙꢵꢡ꣄ꢡꢒꢸ ꢣꢷ ꢢꣁꢮ꣄ꢬꢥꣁ ! ꢡꢹ ꢩꣁꢣ꣄ꢬꢪ꣄ꢒꢥꢶ ꢙꢷꢭꢶ ꢃꢮꢶ ! ꢪꣁꢬ꣄ ꢥꢵꢮ꣄ ꢂꢮ꣄ꢬꢶꢫꢾꢡ꣄ ꢪꢾꢳ꣄ꢳꢶ ꢪꣁꢬꣁ ꢲꢵꢭ꣄ ꢒꣂꢥꢒꢸ ꢂꢮꢵꢫ꣄ ꢌꢭ꣄ꢭꢾ ꢔꢸꢞ꣄ꢔꢵ ꢣꢸꢥꣁ ꢢꣁꢮꢶꢭꢶ… ꢪ꣄ꢪ꣄ꢪ꣄ ! ꢡꢹ ꢙꢷꢭꢶ ꢃꢮ꣄ ꢨꢵ ꢡ꣄ꢫꢾ ꢂꢪ꣄ꢒꣁ ꢱꣁꢥ꣄ꢡꣂꢰꢸꢱ꣄ ꣎ ꢲꢵꢫꢵ ꢓꣁꢨ꣄ꢨꣁ ꢡꣁꢬꢠꢸꢫꢵꢥꢸ ꢂꢮꢬꢶꢫꣁ ?

ꢨꢾꢜꣁ : ꢱꣁꢥ꣄ꢣꣁ ꢮꢷꢳ꣄ꢜꣁ ꢗꢵꢬ꣄ ꢕꢾꢠ꣄ꢜꢵꢒꢸ ꢂꢮꢬꢶꢫꣁ ꢂꢪ꣄ꢨꢵ ꣎d

ꢂꢪ꣄ꢨꣁ : ꢱꢾꢬ꣄ꢒꢱ꣄ ! ꢪꢾꢫ꣄ ꢒꢵꢫꢶ ꢂꢪ꣄ꢨꢜ꣄ ꢩꢵꢡ꣄ꢒꢶꢥ꣄ ꢒꢗ꣄ꢗꢥ꣄ꢥꣁ ꢗꢾꢡ꣄ꢡꢶ ꢩꢥ꣄ꢣꢶ ꢣꢾꢮꢸ ꢫꢵ ꢣꢷ ꢦꢹꢜꢸꢒꢸ ꢆꢦꢫꣂꢒ꣄ ꢒꢾꢬ꣄ꢭꢸꢮꢵꢫ꣄ ꣎

ꢨꢾꢜꣁ : ꢂꢪ꣄ꢨꢵ… ꢓꢵꢡ꣄ꢡꢫꣁ ꢂꢱ꣄ꢒꢶ ꢡꢹ ꢒꢾꢬ꣄ꢥꢒꣁ ! ꢂꢪꢶ ꢕꣁꢪ꣄ꢪꣁ ꢒꣂꢥꢒꢸ ꢓꣀꢭꢶ ꢦꢷꢭꢶ ꢬꢴꢮ꣄ꢮꢾꢒꢶ ꢡꢶꢱꢥꢶ ꢡꢾꢥꢸ ꢂꢪ꣄ꢒꣁ ꢔꣃꢛ꣄ꢗꢸꢭꢥ꣄ ꢱꢾꢬ꣄ꢒꢱ꣄ ꢫꢵ !

ꢂꢪ꣄ꢨꣁ : ꢮꢾꢫ꣄ ꢨꢵ ! ꢒꢵꢫ꣄ ꢒꢵꢫ꣄ ꢨꣁꢜ꣄ꢜꢭ꣄ ꢦꢙꢾꢒꢷ ꢡ꣄ꢫꢾ ꢂꢱ꣄ꢒꢶ ꢓꢞꢶ ꢱꣁꢪ꣄ꢪꢬ꣄ ꢢꣁꢮ꣄ꢭꢾ ꢌꢭꢵ ꢡꢸꢬꢾ ꢨꣂ ꢲꣁꢬꢵꢜꢸ ꢮꢿꢭ꣄ ꢪꣁꢒꣁ ꢣꢶꢫꢾ ꢱꢪ꣄ꢗꢸꢭꢵ ꢦꢾꢜꢶ ꢦꣁꢱꢶ ꢢꣁꢮꢸꢱ꣄ ꢂꢱ꣄ꢒꢶ ꢡꢾꢪꢵꢪ꣄ ꢢꣁꢮꢶꢭꢶ ꢓꢭ꣄ꢭꢶ ꢙꢮ꣄ꢮꢵꢫ꣄ ! ꢮꢲꢶꢭꢷꢱ꣄(ꢡꢸꢒ꣄ꢒꢶꢭꢷꢱ꣄) ꢙꢥꣁ ꢪꢾꢥ꣄ꢥꢴꢷ ꢆꢜ꣄ꢗꢶꢭꢶ ꢪꢾꢭ꣄ꢭꢶ ꢙꢮ꣄ꢮꢵꢫ꣄ ꢡꢶꢱꢵꢥ꣄ ꢦꢾꢜꢶ ꢌꢭ꣄ꢭꢾ ꣎

ꢨꢾꢜꣁ : ꢮꢿꢫ꣄ ꢂꢪ꣄ꢨꢵ ꢦꣁꢱꢶ ꢢꣂꢮ꣄ ꢪꢷ ꢪꣁꢒꣁ ꢦꢙꢾ ꢲꣂꢬꢶꢫꣁ ꢣꢵꢡ꣄ꢪꢛ꣄ꢙꢡ꣄ꢡ ꢒꢸꢛ꣄ꢗꢶ, ꢣꢵꢡꢸ ꢩꢸꢬ꣄ꢒꣁ, ꢲꢬꢸꢞꣁ, ꢣꣃꢠꣁ ꢧꣀꢭꢵꢡꢶ ꢮꢱ꣄ꢡꢸꢥ꣄ ꢓꢞꢶ ꢢꣁꢮ꣄ꢭꢸꢱ꣄ ꣎

ꢂꢪ꣄ꢨꣁ : ꢱꢾꢬ꣄ꢒꢱ꣄ ꢨꢵ ! ꢲꢵꢡꢸꢪ꣄ ꢬꢸꢮ꣄ꢮꣁ ꢬꢸꢦꢵꢫ꣄ ꢢꣁꢮ꣄ꢭꢾ ! ꢮꢶꢡ꣄ꢡꢒꣂꢯꢸꢪ꣄ ꢬꢸꢦꢵꢫ꣄ ꢯꢿꢡ꣄ꢡꢾ ꢥꢴꢫꢵ ꢡꢾꢭ꣄ꢭꢾ ꢬꢸꢦꢵꢫꢶ ꢦꢡ꣄ꢬꢪ꣄ ꢢꣁꢮꢶꢭꢾ ꢑꢱꢬꢸꢒꢸ ꢬꢸꢦꢵꢫ꣄ ꢦꢙꢾ ꢪꢾꢥꢾꢡꢶ ꢬꢸꢦꢵꢫꢶ ꢥꢿꢭꢸꢪ꣄ ꢬꢴꢷ ꢒꢵꢱ꣄ ꢓꢳ꣄ꢳꢸꢮꢵꢫ꣄ ꣎

ꢨꢾꢜꣁ : ꢱꢾꢬ꣄ꢒꢪ꣄ꢨꢵ !

ꢮꢷꢳ꣄ ꢲꣁꢫꢾꢱ꣄ ꢡꣁꢬꢠꢸꢔꢸꢰ꣄ꢜꢶꢪ꣄ ꢙꢵꢡ꣄ꢡꢒ꣄ ꢲꣁꢫꢾ ꢃꢤꢵꢬꢸ ꢦꢡ꣄ꢬꢪ꣄ ꢓꢳ꣄ꢳꢶꢥꢸ ꢔꢸꢰ꣄ꢜꢶꢪ꣄ ꢲꢶꢖ꣄ꢔꢶ ꢂꢦꢸꢭ꣄ ꢢꢵꢪ꣄ꢪꢸ ꢨꢶꢱꢶ ꢥꢶꢒꢶꢳꢾꢱ꣄ ꣎ ꢡꣁꢬꢠꢸꢫꢵꢥꢸꢪ꣄ ꢙꢵꢡ꣄ꢡꢮꢿꢳ꣄ ꢥꢷꢡꢶꢯꢪ꣄ꢨꢸ ꢦꢸꢱ꣄ꢡꢮꢸ ꢮꢶꢥꢶꢫꣂꢒ꣄ ꢒꢾꢬ꣄ꢭꢿꢡ꣄ ꢙꢶꢫꢾꢱ꣄..

ꢆꢬꢵꢮ꣄ ꢓꢾꢥꢶ ꢢꢶꢥ꣄ꢮꣁ ꢩꢵꢔꢸꢪ꣄ ꢱꢶꢫꢾꢥ꣄……