ꢱꣃꢬꢵꢰ꣄ꢜ꣄ꢬ ꢡꢪꢶꢳ꣄ ꢱꢖ꣄ꢔꢪꢪ꣄ – ꣑

꣏ ꢪꢵꢫ꣄ ꢨꢾꢜꢵ ꢱꢪ꣄ꢩꢵꢰꢠꣁ ꣏

ꢨꢾꢜꣁ ꢩꢬꢵꢜ꣄ ꢙꢷꢭꢶ ꢨꢶꢱ꣄ꢱꣁ ꢕꣁꢪ꣄ꢪꣁ ꢂꢮꢶꢒꢶꢥ꣄ ꢂꢦꢸꢭ꣄ ꢪꢵꢫꢶꢒ꣄ ꢨꣁꢮꢱ꣄…

ꢂꢪ꣄ꢨꢵ ! ꢂꢪ꣄ꢨꢵ ! ! ꢂꢮ꣄ꢬꢾ ꢪꢤ꣄ꢫ ꢱꢬ꣄ꢒꢵꢬ꣄ꢒꢶꢥ꣄ ꢔꢸꢙꢬꢵꢡꢸ ꢱꢬ꣄ꢒꢵꢬ꣄ ꢫꣂꢒ꣄ꢪꢶꢳꢶꢒꢶꢥ꣄ ꢱꣃꢬꢵꢰ꣄ꢜ꣄ꢬ ꢡꢪꢶꢳ꣄ ꢱꢖ꣄ꢔꢪꢪ꣄ ꢪꢾꢥꢶ ꢫꣂꢒ꣄ ꢪꢴꣁꢜ꣄ꢜꣁ ꢆꢡ꣄ꢱꢮꢸ ꢗꢭ꣄ꢡꣁ ꢒꢾꢬꢛ꣄ꢙꢵꢬꢶꢫꣁ ꢪꢾꢥꢵ ꣎ ꢏꢠ꣄ꢜꢾ ꢏꢭꢵꢱ꣄ꢢꢵꢥ꣄ ꢒꢳꢞ꣄ꢬꢵꢱ꣄ ꢡꢾꢪꢵꢪ꣄ ꢂꢮ꣄ꢬꢾ ꢮꢶꢮꢬꢸꢥ꣄ ꢂꢪꢶ ꢦꢛ꣄ꢙꢶ ꢒꢾꢬ꣄ꢭꢸꢥꣁ ꢪꢾꢥꢵ ! ꢡꢾꢥꢸ ꢢꢷꢥ꣄ ꢱꢱꢬ꣄ ꢡꢾꢖ꣄ꢒꣁ ꢮꢾꢒ꣄ꢒꢶ ꢲꢾꢞꢶꢥꢸ ꢔꢸꢙꢬꢵꢡꢸꢒꢸ ꢨꣁꢭ꣄ꢭꢶꢙꢷꢭꢶ ꢨꣁꢭ꣄ꢭꢶꢫꢥ꣄ ꢱꣁꢞꢥ꣄ ꢪꢾꢥꢵ ꢪꢷ ꢦꢛ꣄ꢙꢶ ꢒꢾꢬ꣄ꢭꢸꢫꢵ ?

ꢪꢵꢫ꣄ : ꢡꢶꢱꣁ ꢫꢵ ! ꢡꢿꢜꢸ ꢨꣁꢭ꣄ꢭꢶ ꢙꢷꢒꢶꢥ꣄ ꢒꢵꢫ꣄ ꢒꢾꢬꢛ꣄ꢙꢵꢬꢶꢫꣁ ꢨꢾꢜ꣄ꢒꢶ ꢣꢷꢒꢶꢥ꣄ ꢲꣁꢬꢵꢜ꣄ ꢒꢾꢬꢥ꣄ ꢒꢷ ?

ꢨꢾꢜꣁ : ꢥꢴꢷꢪ꣄ꢨꢵ ! ꢡꢿꢜꢸ ꢂꢪ꣄ꢒꣁ ꢨꣁꢭ꣄ꢭꢶ ꢙꢷꢒꢶꢥ꣄ ꢂꢮ꣄ꢬꢾ ꢪꢴꣁꢜ꣄ꢜꢵꢥ꣄ ꢲꣁꢣꢾ ꢔꢵꢪꢱ꣄ꢒꢶ ꢗꢸꢜ꣄ꢜꢸ ꢧꢶꢬꢶ ꢣꢾꢒ꣄ꢒꢞꢥ꣄ ꣎ ꢡꢿꢜ꣄ ꢱꢿꢡ꣄ꢡꢾ ꢱꣂꢪ꣄ꢥꢵꢢ꣄ ꢤꣃꢬꢵꢒꢸ , ꢪꢢꢸꢬꢵꢒꢸ ꢂꢖ꣄ꢔꢸꢥ꣄ ꢂꢥꢿꢒꢸ ꢡꢿꢜ꣄ ꢨꣁꢭ꣄ꢭꢶꢙꢷ ꢣꢾꢒ꣄ꢒꢞꢥ꣄ ꣎ ꢂꢮ꣄ꢬꢾ ꢪꢴꣁꢜ꣄ꢜꢵꢥ꣄ ꢒꣂꢥꢒ꣄ ꢲꣁꢡꢶꢬꢵꢱ꣄ ꢪꢾꢥꢱ꣄ꢡꢾ ꢂꢪꢶ ꢙꢥ꣄ꢭꢸꢮꢵꢫ꣄ ꣎

ꢪꢵꢫ꣄ : ꢲꢵꢫꢵ ꢓꢵꢡ꣄ꢡꢾ ꢦꢿꢡ꣄ꢡꢾ ꢂꢖ꣄ꢔꢸꢥ꣄ ꢦ꣄ꢬꢫꢵꢠꢸ ꢮꢿꢱꢱ꣄ꢒꢶ ꢒꣂꢥꢒꢸ ? ꢥꢶꢛ꣄ꢙꢡ꣄ꢡꣁ ꢨꢶꢱꢡ꣄ꢡꣁ ꢢꢵꢪꢱ꣄ꢒꢶ ꢒꣂꢥꢒꢸ ?

ꢨꢾꢜꣁ : ꢂꢪ꣄ꢨꢵ .. ꢓꢵꢡ꣄ꢡꢾ ꢦꢿꢡ꣄ꢡꢾ ꢂꢱ꣄ꢒꢶ ꢡꢾꢥꢸꢱ꣄ ꢣꢷꢞꢥ꣄ ꣎ ꢱꢶꢳ꣄ꢳꣁ ꢡꣁꢬꢠꢸꢫꢵꢥꢸꢪ꣄ ꢂꢪ꣄ꢒꣁ ꢨꣁꢭ꣄ꢭꢶ ꢙꢵꢬꢶꢫꣁ ꢮꢿꢱ꣄ ꢪꢾꢳ꣄ꢳꢶ ꢡꢾꢥꢸꢱ꣄ ꢒꢾꢬ꣄ꢡꢬꢶꢫꣁ ꣎

ꢂꢪ꣄ꢨꣁ : ꢂꢱꣂꢱ꣄ ꢃꢖ꣄ꢔꢸ ꢱꣃꢬꢶꢫꢪ꣄ ꢭꢔꢬꢥꢶ ꢑꢱꢬꢸꢒ꣄ ꢮꣁꢫ꣄ꢣꢸ ꢒꢾꢬ꣄ꢭꢸꢥꣁ ꢪꢾꢥꢡꢶ ꢒꢵꢫ꣄ ꢒꢾꢬꢱ꣄ꢡꢾ ?

ꢨꢾꢜꣁ : ꢂꢪ꣄ꢨꢵ.. ꢡꣁꢬꢠꢸ ꢔꢸꢰ꣄ꢜꢶꢪ꣄ ꢮꣁꢫ꣄ꢣꢸ ꢒꢾꢬ꣄ꢭꢸꢮꢵꢫ꣄ ꢂꢪ꣄ꢨꢵ ꢮꣀꢣ꣄ꢫꢸꢥ꣄ ꢪꢾꢳ꣄ꢳꢶ ꢂꢮꢬꢶꢫꣁ ! ꢙꢡꣁ ꢂꢮ꣄ꢬꢾ ꢪꢣꢸꢬꣀ ꢱꢥ꣄ꢣꢦꢿꢞꣁ ꢭꢾꢒ꣄ꢡꣁ ꢯꢿꢡ꣄ꢡꢾ ꢩꢵꢣꢾ ꢒꢶꢳꢶꢥꢶꢒ꣄ꢒꢸꢪ꣄ ꢂꢮ꣄ꢬꢾ ꢃꢖ꣄ꢔꢸ ꢒꣂꢥꢒ꣄ ꢯꢿ ꢒꢵꢫ꣄ꢡꢶ ꢆꢥ꣄ꢥꣁ ꢆꢦꢶꢬ꣄ ꢬꢴꢶꢫꢾꢡ꣄ ꢱꢾꢬ꣄ꢒꣁ ꢒꢾꢬꢶꢥꢸ ꢲꢵꢡꢸꢪ꣄ ꢢꢾꢮ꣄ꢞꣁ ꢲꣁꢔꢡꢸꢥ꣄ ꢣꢿꢬꢵꢱ꣄ ꢡꢾꢭ꣄ꢭꢾ ꢢꣁꢮꢶ ꢂꢪꢶ ꢣꢶꢥ꣄ꢥꢸ ꢔꢪ꣄ꢜꢸꢡꢸꢮꢵꢫ꣄ ꣎

ꢂꢪ꣄ꢨꣁ : ꢩꢾꢳ꣄ꢳꢶ ꢱꣁꢥ꣄ꢡꣂꢰ꣄ ꢨꢵ ! ꢡꢹ ꢦꢛ꣄ꢙꢶ ꢒꢾꢬꢶ ꢢꣂꢮ꣄ ! ꢲꢵꢡꢸꢪ꣄ ꢡꣁꢬ꣄ ꢙꢡ꣄ꢒꢾꢪ꣄ꢦꢥ꣄ ꢭꢶꢒ꣄ꢒꢾꢫꣁ ꢓꢳ꣄ꢳꢶ ꢙꢵ ! ꢍꢜ꣄ꢡꢶ ꢡꣁꢒꣁ ꢨꢾꢜ꣄ꢒꢶ ꢂꢨ꣄ꢨꢬꢥꢶ ꢡꢿꢜ꣄ꢡꢶ ꢂꢨ꣄ꢨꢱ꣄ꢫꢵ ꢪꢾꢥꢶ ꢱꢶꢫꢾꢥ꣄ !

ꢨꢾꢜꣁ : ꢂꢪ꣄ꢨꢵ ! ꢂꢪ꣄ꢨꢵ ! ꢓꣁꢨ꣄ꢨꢶ ꢱꢶꢫꢾꢡ꣄ ꢒꢵꢫ꣄ ꢲꣁꢬꢵꢜꢸ ꢮꢡ꣄ꢡꣂꢱ꣄ ꢫꢵ !

ꢂꢪ꣄ꢨꣁ : ꢲꢵꢫ꣄ ꢨꢵ ꢡꣁꢒꣁ ꢙꢾꢥꢶ ꢪꢴꣁꢜꣁ ꢲꣁꢮ꣄ꢞꢶꢡꢶꢫꢵ ꢂꢡ꣄ꢡꣁ ꢲꣁꢬꢵꢜ꣄ ꢒꢾꢬ꣄ꢥꣁ ꢥꢴꢫꢵ ! ꢮꢾꢫ꣄ ꢱꢾꢠꢪ꣄ ꢎꢡꣁ ꢒꢾꢬ꣄ꢭꢾ ꢂꢮ꣄ꢬꢾ ꢪꢴꣁꢜ꣄ꢜꢵꢥ꣄ ꢲꣁꢡꢾ ꢔꢵꢪꢸꢒ꣄ ꢙꢷꢭꢶ ꢂꢮꢾ ꢬꢵꢯꢶꢪ꣄ ꢡꣁꢒꣁ ꢱꢾꢠꢪ꣄ ꢲꣁꢬꢵꢜ꣄ ꢲꣁꢫ꣄ꢫꢵꢫ꣄ ꣏

ꢨꢾꢜꣁ : ꢮꢾꢫ꣄ ꢂꢪ꣄ꢨꢵ ꢂꢡ꣄ꢡꣂꢱ꣄ ꢦꢛ꣄ꢙꢶ ꢒꢾꢬ꣄ꢭꢸꢞꢸꢱ꣄ ꣏