ꢱꣃꢬꢵꢰ꣄ꢜ꣄ꢬ ꢣꢶꢮꣁ ꢦꢸꢱ꣄ꢡꢮꢸ – ꢡꢶꢱ꣄ꢮꣁ ꢦꢝꢥ꣄ – ꢣꢿꢮꢸ – ꣒

ꢣꢿꢮꢸꢒꢸ ꢲꣁꢖ꣄ꢔꢸ ꢪꢾꢥꢾꢡ꣄ꢡꢾ ꢱꢣꢵ ꢙꢸꢠ꣄ꢥ ꣎ ꢂꢪꢶ ꢒꢾꢬꢡ꣄ꢡꢾ ꢒꢵꢪꢱ꣄ꢒꢶ ꢣꢿꢮꢸ ꢱꢾꢫꢶꢭꢿꢡꢸꢥ꣄ ꢬꢴꢷꢫꢾꢱꢶ ꣎ ꢥꢶꢪ꣄ꢦꢥꢶꢪ꣄ꢨꢸꢞꢶ ꢬꢴꢶꢫꢶꢡꢶ ꢪꢾꢳꢷꢥ꣄ ꢣꢿꢮꢸ ꢣꣁꢳꢵꢒꢸ ꢣꢾꢒ꣄ꢒꢵꢫꢶ ꣎ ꢂꢪꢶ  ꢒꢾꢬꢡ꣄ꢡꢾ ꢥꢙ꣄ꢙꢒꢵꢪꢸꢥ꣄ ꢣꢸꢱꢡꢾꢖ꣄ꢒꣁ ꢒꢳꢵꢥꢵꢡꢥ꣄ ꢬꢴꢶꢫꢶꢡꢶꢪꢾꢳꣁ ꢣꢾꢮꢸꢒ꣄ꢒꢳꢵꢫꢶ ꣎

ꢣꢿꢮꢸ ꢂꢮ꣄ꢬꢲꣂꢬꢸ ꢦꢶꢬꢿꢮꢸ ꢱꢾꢥ꣄ꢡꣁ ꢱꢿ ꣎ ꢂꢪ꣄ꢒꣁ ꢦ꣄ꢬꢿꢪ ꢱꢬ ꢬꢒ꣄ꢰꢶꢭꢿꢡꢮꢱꢶ ꣎ ꢙꢷꢮꢸꢒꢶꢥꢶ ꢓꣃꢠꢪ꣄ ꢣꢷꢥꢸ ꢧꢷꢬ꣄ꢪꢾꢳꢶ ꢦꢙꢾꢱꢿꢡ꣄ꢡꢾ ꢱꢪꢱ꣄ꢡꢮꢱ꣄ꢡꢸꢥ꣄ ꢣꢿꢡꢸꢥ꣄ ꢬꢴꢷꢫꢾꢱꢶ ꣎ ꢂꢪꢶ ꢗꣁꢒꢞ꣄ꢡꢾꢥꢸ ꢲꣁꢫꢶꢥ꣄ꢒꢶꢥ꣄ ꢱꢸꢓꢮꢵꢱꢶꢥꢸ ꢲꣁꢫꢶ ꢬꢴꢥꣁꢱꢿ ꢪꢾꢥꢶ ꢪꢾꢥꢡ꣄ꢡꢿꢱꢶ ꢣꢿꢮꢸꢒꢸ ꢱꢿꢡ꣄ꢡꢾ ꢭꣃꢒꢵꢱꢸ ꣎

ꢣꢿꢮꢸꢒꢸ ꢒꣂꢥ꣄ ꢱꢷꢫꢵꢱꢶ ? ꢡꢾꢒꣁ ꢡꢹ ꢱꢶꢫꢾꢱꢵ ? ꢡꢾꢒ ꢬꢹꢦꢸ ꢒꢶꢱꣁ ꢬꢴꢵꢫꢶ ? ꢣꢿꢮꢸ ꢱꢬ ꢮꢡ꣄ꢡꣁ ꢒꣂꢥ꣄ ꢒꢾꢬꢶꢥ꣄ ꢬꢴꢶꢫꢵꢱꢶ ? ꢮꢶꢮꢬꢠꣁ ꢱꢖ꣄ꢔꢸꢱꣀꢒꣁ , ꢮꢬꣁ ꢒꢶꢥ꣄ ꢲꢸꢥ꣄ꢥꣁ ꢒꣂꢥ꣄ ꢣꢾꢒ꣄ꢒꢫꢵꢱꢶ ꣎ ꢡꢾ ꢣꢾꢒ꣄ꢒꢵꢫꢵ ? ꢣꢶꢮꢵꢲꢸꢙꢵꢳꢸꢒꢸ ꢣꢾꢒ꣄ꢒꢸꢮꢵꢫꢶ  ꢣꢶꢮꢵꢪ꣄ꢱꢿꢡ꣄ꢡꢾ ꢲꢸꢥ꣄ꢥꢵꢒꢸ ꢪꢾꢳ꣄ꢳꢶ ꢣꢾꢒ꣄ꢒꢸꢮꢵꢫꢵ ? ꢣꣁꢒꢞ꣄ ꢤꢶꢭ꣄ꢭꣁ ꢪꢾꢥꢡ꣄ꢡꢾ ꢔꢸꢠ꣄ꢠꢸꢥ꣄ ꢒꢶꢱꣁ ꢒꢳꣀꢭꢱꢸꢥ꣄ꢒꢷ ꢡꢶꢱꣁ ꢦ꣄ꢬꢙ꣄ꢛꢲꢵꢭꢶꢙꢥꢸꢭꢸꢥꣁ ꣎ ꢍꢤꢵꢥꢸꢒ꣄ꢒꢶꢥꢷꢱꢶ ꢣꢿꢮꢸ ꢱꢪꢰ꣄ꢜꢶꢪ꣄ ꢱꢿꢪꢾꢥꢶ ꢩꢸꢛꢶꢒꢶꢥ꣄ ꢂꢒꢵꢱꢸ ꢱꢖ꣄ꢔꢶꢭꢿꢡꢸꢥ꣄ ꢬꢴꢶꢫꢾꢱꢶ  ꣎

ꢪꢡꢱꢶꢣ꣄ꢤꢵꢥ꣄ꢡꢸ ꢪꢾꢥ꣄ꢡ ꢪꢡꢸꢥ꣄ ꢱ꣄ꢢꢵꢦꢥꣁ ꢒꢾꢬꢶꢥ꣄ꢬꢴꢶꢫꢵꢡꢾꢥꢸ ꢂꢦ꣄ꢭꢵꢥꢦ꣄ꢭꢵꢥꢸ ꢪꣁꢥ꣄ꢥꢸꢒꢸ ꢣꢿꢮꢸ ꢄꢱꣁ ꢬꢴꢮꢵꢫꢶ ꢡꢶꢱꣁ ꢬꢴꢮꢵꢫꢶ ꢪꢾꢥꢶ ꢲꢜ꣄ꢮꢾꢤꢵꢥꢸꢒꢸ ꢭꢶꢒ꣄ꢒꢶ ꢢꣁꢮꢶꢥ꣄ ꢬꢴꢶꢫꢡ꣄ꢡꢶꢱꢵꢥ꣄ ꢐꢠ꣄ꢜꣁ ꢣꣀꢮꢥꢶꢬ꣄ꢠꢫꢯꢵꢱꢥꣁ ꣎ ꢱꢒꢭ ꢪꢡꢱꢶꢣ꣄ꢤꢵꢥ꣄ꢡꢸꢥꢸꢪꢸ ꢣ꣄ꢫꣁ, ꢱꢾꢡ꣄ꢡꢸ , ꢱꣃꢗꢸ ꢌ ꢢꢶꢥꢸ ꢥꢷꢡꢶꢥ꣄ ꢱꣁꢠ꣄ꢥꢵꢡ꣄ꢡꣁ ꢗꢭ꣄ꢭꢸꢥꢵꢬꢸ ꢪꣂꢒ꣄ꢰꢶ ꢣꢸꢪ꣄ꢦꢥ꣄ ꢪꢾꢥ꣄ꢡ꣄ꢡꢾ ꢮꢡ꣄ꢡꣁ ꢱꢵꢪꢥ꣄ꢫꢮꢗꢥ꣄ ꢲꣂꢫꢶ ꢬꢴꢶꢫꢾꢱꢶ ꣎ ꢒꣂꢥ꣄ ꢪꢡꢱ꣄ꢡꢸ ꢲꣁꢫꢾꢡꢶ ꢪꢾꢳꢵꢡꢸꢥ꣄ ꢱꢾꢡ꣄ꢡꢸ ꢤꢵꢥꢸꢒꢸ ꢗ꣄ꢭ꣄ꢭꢸꢥꢵꢡ꣄ꢡꣁ ꢬꢴꢶꢫꢾꢡꢶ ꢪꣂꢒ꣄ꢰꢶ ꢪꢶꢳ꣄ꢥ ꢪꢾꢥꢶ ꢱꢪꢱ꣄ꢡ ꢪꢡꢱꢶꢣ꣄ꢤꢵꢥ꣄ꢡꢸꢥꢸꢪ꣄ ꢱꢖ꣄ꢔꢶꢥ꣄ ꢬꢴꢶꢫꢾꢱꢶ ꣎ ꢣꢿꢮꢸ ꢥꢵꢮꢸ ꢒꢵꢫꢶ ꢒꢳꢵꢫꢵ ? ꢡꢾꢒꢥꢵꢮꢸ ꢱꢥꢵꢡꢥꣁ ,  ꢱꢬ꣄ꢮꢪ꣄ꢩꢬꢶ , ꢥꢶꢬꢵꢪꢫꢶ , ꢱꢬ꣄ꢮꢵꢤꢶꢒꢵꢬꢶ ꢧꣀꢭꢵꢡꢶ ꢮꢶꢯꢿꢰꢠꢤꢵꢥꢸꢒꢸ ꢥꢵꢪꢬꢹꢦꢶ ꣎ ꢧꢷꢬꢥꢥ꣄ꢡꣁ ꢥꢵꢮꢸꢥ꣄ ꢱꢿꢡ꣄ꢡꢾꢥꣁ ꣎

ꢑꢬꢣꢿꢯꢶꢲꣁꢫꢿ ꢫꢿ ꢲꢶꢥ꣄ꢣꢸꢣꢿꢱꢶꢪꢸ ꢦꢬꢨ꣄ꢬꢪ꣄ꢲ ꢬꢹꢦꢶ ꢲꣂꢫꢿ ꢯ꣄ꢬꢷꢪꢥ꣄ꢥꢵꢬꢵꢫꢠꢵꢪ꣄ꢱꢱꢾꢥ꣄ꢡꢾ ꢣꢯꢮꢵꢡꢬꢸꢥꢸꢪꢸ ꢩꢾꢭꢶꢯꢶꢣ꣄ꢤꢬꢹꢦꢸ ꢱꢬ ꢯ꣄ꢬꢷꢒꢺꢰ꣄ꢠꢣꢿꢮꢸ ꢥꢶꢙꢵꢮꢡꢵꢬꢸ ꢓꢳ꣄ꢳꢷ ꢩꢒ꣄ꢡꢸꢥꢸꢒꢸ ꢥꢶꢡ꣄ꢫꢵꢥꢥ꣄ꢣ ꢪꣂꢒ꣄ꢰꢶ ꢣꢷꢥꢸ ꢣꢹꢰ꣄ꢜꢸꢥꢸꢒꢸ  ꢥꢶꢔ꣄ꢬꢲꢶꢥꢸ ꢯꢶꢰ꣄ꢜꢸꢥꢸꢒꢸ ꢦꢬꢶꢦꢵꢭꢥ ꢒꢾꢬꢾꢱꢶ ꣎