ꢏꢠ꣄ꢜꢾ ꢬꢵꢠꢸꢪ꣄ ꢡꢺꢠꣁꢒꢥꢶ ꢲꣁꢞꢶꢬꢴꢶꢫꢾ ꢢꢵꢪ꣄ꢪꢸ ꢚꢸꢒꢸ ꢱꢱꢵꢥ꣄ ꢙꢶꢮ꣄ꢭꢶꢫꢮꢾꢱ꣄ ꣎ ꢡ꣄ꢫꢾ ꢬꢵꢠꢸꢪ꣄ ꢱꢶꢪ꣄ꢲꢸ, ꢮꢺꢒꣁ, ꢮꢵꢕ꣄ ꢧꣀꢭꢵꢣꢶ ꢪꢹꢔꢸꢥ꣄ ꢚꢸꢒꢸꢫꣁ ꢙꢶꢮ꣄ꢭꢶꢫꢮꢾꢱ꣄ ꣎ ꢡ꣄ꢫꢾ ꢪꢹꢔꢸꢥ꣄ ꢢꢾꢨ꣄ꢨꣁ ꢢꢾꢨ꣄ꢨꣁ ꢱꢱꢵꢥꢸꢒꢸ ꢤꢾꢬꢶ ꢪꣁꢬꢞꢶꢒꢶꢥ꣄ ꢓꣀꢭꢿꢡꢸ ꢂꢮꢾꢱ꣄ ꣎ ꢄꢱꣁ ꢲꢥꢶ ꢓꢵꢬꢶꢫꣁ ꢲꢵꢭꢶ ꢱꢱꢵꢥ꣄ ꢥꢶꢪ꣄ꢪꢳ꣄ ꢥꢴꢷꢱ꣄ꢡꢒꢸ ꢓꣁꢨ꣄ꢨꢶꢪ꣄ ꢩꢷꢡꢶ ꢱꢾꢥ꣄ꢡꣁ ꢡꢿꢜꢸ ꢙꢶꢮ꣄ꢭꢶꢫꢮꢾꢱ꣄ ꣎
ꢏꢠ꣄ꢜꢾꢣꢶ ꢂꢱ꣄ꢒꢶ ꢱꢱꢵꢥ꣄ ꢏꢠ꣄ꢜꢿꢱ꣄ꢒꢥꢶ ꢪꢶꢳꢶ ꢮꢡ꣄ꢡꣁ ꢒꢾꢬ꣄ꢭꢶꢫꢵꢱ꣄ ꣎ ꢡꢾꢪꢵꢪ꣄ ꢫꣂꢒ꣄ ꢮꢺꢣ꣄ꢤ ꢱꢱꣁ ꢣꢸꢱ꣄ꢬꢾ ꢱꢱꢵꢥꢸꢒꢸ ꢯꢾꢫ꣄ꢥꢸ “ ꢂꢪꢶ ꢄꢡ꣄ꢒꢾ ꢣꢶꢥ꣄ꢥꢸ ꢄꢱꢥꢶ ꢥꢶꢪ꣄ꢪꢳ꣄ ꢥꢴꢷꢱ꣄ꢡꣁ ꢩꢷꢡꢶ ꢱꢾꢥ꣄ꢡꣁ ꢙꢶꢮꢱ꣄ꢡꢾ ? ꢂꢮ꣄ꢬꢾ ꢲꢵꢭꢶ ꢬꢸꢮ꣄ꢮꣁ ꢕꢾꢞꢶ ꢪꢾꢳ꣄ꢳꢶ ꢤꢵꢒ꣄ ꢥꢴꢷꢱ꣄ꢡꢒꢸ ꢩꢬꢵꢜ꣄ ꢙꢵꢱ꣄ꢡꢒꢸ ꢪꢸꢱꢬꢥꢶ ! ꢂꢪꢶ ꢄꢱꣁ ꢯꢒ꣄ꢡꢶ ꢥꢴꢷꢱ꣄ꢡꢒꢸ ꢯꢿ ꣎ ꢂꢮ꣄ꢬꢾ ꢄꢫꢾ ꢒꢾꢰ꣄ꢜꢪꢱ꣄ꢒꢶ ꢒꣂꢥꢒꢸ ꢥꢶꢮꢬ꣄ꢡꢶ ꢒꢾꢬꢱ꣄ꢡꢾ ?” ꢪꢾꢥꢶ ꢩꢮꢵꢜ꣄ ꢡꢒꢾꢱ꣄ ꣎
ꢄꢫꢾ ꢎꢒꢾ ꢂꢖ꣄ꢔꣁꢠ꣄ꢜꢾ ꢱꢱꣁ “ ꢂꢪꢶ ꢄꢱꢥꢶ ꢤꢒ꣄ꢒꢶꢭꢶ ꢙꢶꢮꢬꢶꢫꣁ ꢱꣁꢪ꣄ꢪꢬ꣄ ꢪꣁꢬꢶ ꢙꢵꢡ꣄ꢡꢿꢱ꣄ ꢯ꣄ꢬꢿꢰ꣄ꢝꢸ ꢪꢾꢥꢶ ꢪꢾꢥꢾꢱ꣄ ! ꢂꢪꢶ ꢂꢱ꣄ꢒꢶꢡꢾꢥꢸ ꢗꢾꢬꢶꢒꢶꢥ꣄ ꢭꣁꢔꢸꢡ꣄ꢡꣁ ꢯꢿꢡ꣄ꢡꢾ ꢪꢴꣁꢜ꣄ꢜꣁ ꢓꣃꢬꢶꢪꢸ ꢤꢸꢪ꣄ꢒꢶ ꢙꢷꢮ꣄ ꢱꣁꢞ꣄ꢞꢶꢫꢾꢥ꣄ ꢡ꣄ꢫꢿꢱ꣄ ꢗꣁꢒ꣄ꢒꢜ꣄ ꢪꢾꢥꢶ ꢪꢾꢥ꣄ꢡꣁ ꢄꢫꢾ ꢎꢒꢾ ꢂꢱ꣄ꢒꢶ ꢱꢱꢵꢥ꣄ ꢄꢱꣂꢱ꣄ ꢒꢾꢬ꣄ꢡꢶꢫꢾꢥ꣄ ꢪꢾꢥꢶ ꢕꣂꢰꢠꣁ ꢒꢾꢬꢾꢱ꣄ ꣎
ꢣꢸꢱꢸꢬꢥ꣄ꢣꢶ ꢂꢱ꣄ꢒꢶ ꢱꢱꢵꢥ꣄ ꢫꣂꢒ꣄ꢒꢥꢶ ꢥꢶꢒꢶꢳꢶ ꢓꣃꢬꢶꢒꢸ ꢙꢶꢫꢵꢱ꣄ ꣎ ꢡ꣄ꢫꢿ ꢓꣃꢬꢶꢪꢸ ꢩꣂꢬ꣄ ꢦꢥꢶ ꢲꣁꢡꢾꢱ꣄ ꣎ ꢦꢥꢶꢪ꣄ ꢚꢸꢒꢸ ꢩꢿꢭꢶꢥ꣄ ꢩꢾꢬ꣄ꢒꢳꢶꢥ꣄ ꢂꢱ꣄ꢒꢶ ꢤꢸꢪ꣄ꢒꢶ ꢤꢸꢪ꣄ꢒꢶ ꢓꢳ꣄ꢳꢿꢡ꣄ ꢲꣁꢡꢾꢱ꣄ ! ꢱꢱꢵꢥ꣄ ꢂꢱ꣄ꢒꢶ ꢫꣂꢒ꣄ꢒꢥꢶ ꢪꢶꢳꢶ ꢂꢮꢬꢶꢫꣁ ꢱꢶꢫꢾ ꢩꢿꢭꢶꢥ꣄ ꢩꢾꢬ꣄ꢒꢳꢶꢥ꣄ ꢂꢱ꣄ꢒꢶ ꢤꢒ꣄ꢒꢶ ꢏꢠ꣄ꢒꢶ ꢦꢥꢶꢪ꣄ ꢙꢷꢒꢶꢥ꣄ ꢭꢸꢒ꣄ꢒꢶꢭꢶꢞꢶꢫꣁ ꣎ ꢄꢫꢾ ꢂꢱ꣄ꢒꢶ ꢱꢶꢫꢾ ꢫꣂꢒ꣄ ꢱꢱꣁ ꢂꢱ꣄ꢒꢶ ꢱꢱꢵꢥꢸꢒ꣄ ꢬꢴꢮꣁ ꢬꢴꢮꣁ ꢪꢾꢥꢶ ꢲꢶꢨ꣄ꢨꢶꢬꢴꢮꢞꢶꢒꢶꢥ꣄ ꢍꢜ꣄ ꢱꢮꣁ ꢱꢶꢪ꣄ꢲꢸ ꢮꢵꢕ꣄ ꢧꣀꢭꢵꢣꢶ ꢪꢹꢔꢸꢥꢸꢒꢸ ꢯꢾꢫ꣄ꢥꢸ ꢂꢪꢶ ꢤꢒ꣄ꢒꢬꢶꢫꣁ ꢱꣁꢒꢥ꣄ ꢂꢪ꣄ꢒꣁ ꢯꢾꢫ꣄ꢥꢸ ꢄꢫꢾ ꢩꢿꢭꢶ ꢩꢾꢬ꣄ꢒꢳꢶꢥ꣄ ꢂꢱ꣄ꢒꢶ ꢤꢒ꣄ꢒꢬꢱ꣄ ! ꢤꢵꢒ꣄ ꢲꢵꢭꢶ ꢙꢷꢮ꣄ ꢱꣁꢞꢱ꣄ꢡꢾ ꢪꢾꢥꢱ꣄ꢡꢾ ꢱꢾꢬ꣄ꢒꣁ ꢥꢴꢵ ! ꢂꢪꢶ ꢂꢱ꣄ꢒꢶ ꢡꢾꢥꢸ ꢂꢮ꣄ꢬꢾ ꢢꢵꢪꢸꢒꢸ ꢙꢾꢫ꣄ꢥꢸ ꢎꢒ꣄ꢫꢪ꣄ꢒꢥꢶ ꢤꢵꢒ꣄ ꢥꢴꢷꢱ꣄ꢡꢒꢸ ꢱꣁꢥ꣄ꢡꣂꢰ꣄ꢒꢥꢶ ꢙꢶꢮꢾꢥ꣄ ꢂꢮꣁ ꢪꢾꢥꢶ ꢱꢖ꣄ꢔꢸꢡꣁ ꢂꢱ꣄ꢒꢶ ꢱꢱꢵꢥ꣄ ꢂꢦꢸꢭ꣄ ꢢꢵꢪꢸꢒꢸ ꢤꢪꢶ ꢙꢶꢫꢾꢱ꣄ ꣏
ꢡꢺꢠꣁꢒꢥꢶ – What is the meaning?
ꢡꢺꢠꣁꢒꢥꢶ = ꢲꢬꢳꢶꢒꢥꢶ = as grasses
ꢡꢺꢠꣁ = ꢲꢬꢳꢶ = Grass
Dhannu