ꢦꢜꣁ ꢒꢶꢥꢶ ꢏꢦꢸꢭꣁ

ꢏꢥꣂꢱꢸ ꢪꢶꢬꢶꢥ꣄ꢮꢜꢱ꣄ꢱꢮꣁ ꣎ ꢡꢾꢥ ꢩꢸꢛꢶꢬꢸꢲꢶꢨꢶꢬꢴꢷꢱꢶ ꣎ ꢡꢾꢒꢡꣂꢔ꣄ ꢣꢷ ꢣꢾꢔꢸꢞꢵꢥ꣄ ꢱꢿ ꣎ ꢓꢵꢭꢸꢣꢾꢔꢸꢞꣁ ꢪꢴꣁꢜꢲꣁꢫꢶꢒꢶꢥꢶ ꢩꢵꢬꢴꣁꢫꢶꢒꢶꢥꢶ ꢱꢪꢲꣁꢫꢶꢒꢶꢥꢶ ꢬꢴꢶꢫꢾꢱꢶ ꣎ ꢡꢶꢫꢾ ꢣꢾꢔꢸꢞꢵꢒꢸ  ꢦꢞꣁ ꢪꢾꢥ꣄ꢥꢵꢮꢸ ꣎ ꢲꣁꢬꢸꢣꢾꢔꢸꢞꣁ ꢭꢪ꣄ꢩꢸꢬꢸ ꢱꢿꢡ꣄ꢡꢿ ꣎ ꢌꢒꣁ ꢆꢦ꣄ꢭꣁ ꢪꢾꢥ꣄ꢥꢵꢮꢸ ꣎

ꢡꢾꢭ꣄ꢫꣁ ꢮꢵꢪꢸ ꢒꢵꢫꢶ ꢮꢜꢶꢭꢿꢡꢸꢥ꣄ ꢬꢴꢷꢡ꣄ꢡꢾ ? ꢡ꣄ꢫꣂ ꢡꣁꢒ꣄ ꢒꢳꢵꢱꢵ ? ꢦꢜꢲꣁꢬꢸ ꢱꢿꢡ꣄ꢡꢶꢱꢵꢥ꣄ꢫꣁ ꢒꢵꢫꢶ ꢬꢱ꣄ꢡꢸꢥ꣄ ꢯꢿ ꣎ ꢮꢶꢮꢬꢠ ꢒꢾꢬꢶ ꢱꢖ꣄ꢔꣁ ꣎ ꢌꢭ ꢱꢖ꣄ꢔꢸꢱꣀꢒꣁ ꣎ ꢡꢶꢒ꣄ꢒꢥ꣄, ꢪꢶꢬꢶ ꢧꢹꢪ꣄ꢗꢸ , ꢭꣁꢯꢥꢸꢒꢥ꣄ꢣꢶꢳꢶ ꣎ ꢭꢾꢔꢸꢡ꣄ꢡꢱꢶꢨ꣄ꢞꢵꢪ꣄ ꢒꢵꢫꢶ ꢯꢿ ꢯꢾꢫꢶꢥꢸ ꢱꢖ꣄ꢔ꣄ꢥꣁ ꣎  ꢒꢥ꣄ꢣꣁ , ꢪꢶꢡ꣄ꢡꢶ , ꢲꢶꢖ꣄ꢔꢸ , ꢲꢳꢡꢸ , ꢤꢵꢫꢶ , ꢪꢴꢸꢬꢶ , ꢙꢶꢬꣁ , ꢡꢾꢭ꣄ꢫꣁ ꢲꢸꢪ꣄ꢨ꣄ꢬꢵꢪ꣄ ꢒꢵꢫꢶ ꢯꢿ ꣎ ꢲꢸꢙꢵꢭ꣄ꢫꣂ  ꢒꣁꢥ꣄ꢫꣁꢪꢾꢥꢾꢡꢶ ꢥꢬꢳ꣄ꢳꢸꢛ꣄ꢗꢥꢸ ꢱꢿꢡ꣄ꢡꢶꢱꢵꢥ꣄ꢫꣁ ꣎ ꢗꢷꢱꢸꢒꢶꢥ꣄ꢪꢷꢜꢸ ꢬꢱ ꢮꢬ꣄ꢔꢸꢥꢸꢪ꣄ ꢪꢸꢓ꣄ꢫꢬꢱꢸꢥꢸꢥ꣄ ꣎ ꢍ ꢬꢱ꣄ꢡꢸꢥ꣄ ꢪꢶꢳ꣄ꢥꢵꢡꢥ꣄ ꢂꢪ꣄ꢜꢶ  ꢡꢶꢪ꣄ꢜꢶ , ꢡꢿꢪꢸ , ꢒꣁꢞꢸꢮꢸ ꢧꣀꢭꢵꢡꢶꢬꢱꣁꢫꢶꢥ꣄ ꢒꢾꢬ꣄ꢮꢥ꣄ꢪꢸꢱꢸꢥ ꣎

ꢧꣀꢭꢸꢪꢸ ꢌꢭ꣄ꢫꣁ ꢭꢿꢥ꣄ꢡꢶꢒ꣄ꢒꢥ꣄ ꢩꢸꢬ꣄ꢒ ꢒꢾꢬ꣄ꢭꢫꢶ ꣎ ꢡꢾꢒ ꢧꢬꢵꢡꢸꢪ꣄ ꢨꢣ꣄ꢣꢸꢪꢶꢳ꣄ꢮꢶꢥꢸ ꢮꢜꢫꢶ ꣎ ꢡꢾꢡ꣄ꢡꢾꢮꢿꢳꢸꢪꢸ ꢏꢳ꣄ꢜꣂꢒꣁꢳ꣄ꢜꣂꢒꢸ ꢦꢥ꣄ꢱꣁꢞꢶꢮꢜꢶ ꢆꢥ꣄ꢜꣁ ꢒꢾꢬꢫꢶ ꣎ ꢭꢾꢔꢸꢡ꣄ꢡ ꢏꢠ꣄ꢜ ꢓꣁꢮꢶꢞꢶꢪ꣄ ꢦꢥꢶ ꢢꣁꢮꢶꢭꢶ ꢬꢴꢷꢱꢶ ꢱꢮꣁ ꣎

ꢮꢜꢾ ꢪꢶꢬꢶꢥꢸꢠ꣄ꢜꣁ ꢏꢠ꣄ꢜꣁ ꢲꢠ꣄ꢞꢶꢪ꣄ ꢡꢒꢶꢥꢸ ꢦꢥꢶꢱꣁꢞꢶ ꢂꢪ꣄ꢜꢶ ꢪꢾꢭ꣄ꢒꢶꢥꢸ ꢗꢸꢭ꣄ꢭꢬꢸꢢꣁꢮꢶ ꢧꣁꢥ꣄ꢠꢶ ꢣꢿꢫꢶ ꣎ ꢓꢾꢞꢮꢾ ꢧꢭ꣄ꢗ ꢮꢖ꣄ꢔꢶꢡꢷ ꢒꢭ꣄ꢭꣁꢡꢷ ꢒꢜ꣄ꢜꢒꢫꢶ ꣎ ꢧꣂꢞꢸ ꢱꢶꢙ꣄ꢙꢾꢧꢬꢵꢡꢸꢪ꣄ ꢲꢸꢡ꣄ꢡꢬꢞꢶ ꢡꢶꢪ꣄ꢜꢶ ꢗꢸꢭ꣄ꢭꢬꢥꢶ ꢓꢾꢞꢡꢸ ꢭꢾꢖ꣄ꢔꢸ ꢢꣁꢮꢶ ꢧꣂꢮꢸ ꢥꢶꢒꢶꢭꢾꢮꢿꢖ꣄ꢔꢸ ꢓꢵꢭ꣄ꢲꢸꢡ꣄ꢬꢞꢫꢶ ꣎ ꢡꢾꢒꢧꢭ꣄ꢗ ꢩꢙ꣄ꢙꢶꢡꣂꢪꢸꢢꣁꢮꢶ ꢩꢙ꣄ꢙꢶꢱꢶꢙ꣄ꢙꢾꢡ꣄ꢡꢾꢒꢬꢸ ꢲꢸꢡ꣄ꢬꢞꢫꢶ ꣎ ꢄꢱꣂꢱꢶ ꢗꢒꢸꢥꣁ ꢲꢥ꣄ꢣꢡ꣄ꢡꢶꢱꢵꢥꢸ ꢱꢵꢤꢥꣁ ꣎

ꢂꢪꢶ ꢗꢒꢸꢥꣁ ꢪꢵꢡ꣄ꢬꢪ꣄ꢓꢵꢡ꣄ꢡꢾ ꢥꢴꢵ ꣎ ꢩꢵꢡꢸ ꢧꢷꢬꣁꢠ꣄ꢜ ꢩꣁꢥ꣄ꢥꢵꢪ꣄ ꢲꢥ꣄ꢣꢶꢥꢸ ꢮꢾꢳ꣄ꢝꣁꢮꢶꢥꢸ ꢬꢴꢵꢱꢸ ꣎ ꢡꢿꢕꢭ꣄ꢭꢶ ꢗꢔꢸꢥꢱꢾꢥ꣄ꢡꣁ ꢙꢾꢪꢡ꣄ꢡꢾ ꣎ ꢥꢶꢱ꣄ꢡꢩꢵꢡ꣄ ꢪꢵꢡ꣄ꢬꢪ꣄ ꢬꢸꢗ꣄ꢗꢶ ꢭꢔꢸꢥ ꣎

ꢩꢵꢡꢸꢪꢸ ꢒꢵꢫꢶ ꢒꢵꢫꢶ ꢱꣁꢞꢶꢭꢶ ꢗꢔꢸꢥꣁꢗꢔꢶꢭꢶ ꢓꢥꣁ ꣎ ꢩꢵꢡꢸ ꢕꢭ꣄ꢣꢶꢫ ꢧꢭ꣄ꢗ ꢣꢵꢳꢸꢱꢬ ꢡꢹꢦꢸ ꢡꢾꢒꢧꢬ ꢂꢪ꣄ꢜꢶ ꢡꢾꢖ꣄ꢔꢸꢞꢸ ꢡꢶꢪ꣄ꢜꢶ ꢡꢾꢒꢧꢭ ꢩꢙ꣄ꢙꢶꢡꢿꢪꢸ ꢩꣁꢮꢿꢮꢶꢡꢸꢥꢸ ꢧꣂꢞꢸꢥ꣄ ꢓꣁꢮꢸꢳꣁꢧꣀꢭꢵꢡꢶ ꢬꣀꢡꢵꢥꢸ ꢭꣁꢰ꣄ꢜꢵꢥꢸꢪꢸ ꢂꢪ꣄ꢨ꣄ꢳꢵꢒꢾ ꢂꢭ꣄ꢭꢵꢒꢾ ꢮꢷꢞꢸꢒꢾ ꢭꢶꢪ꣄ꢩꢸꢒꢾ ꢥꢵꢬꢶꢥ꣄ꢣꢶꢒꢾ ꢲꢬꢸꢞꢵꢒꢾ ꢒꢞꢮꢾꢭꢸꢒꢾ ꢱꢾꢡ꣄ꢭꣁ ꢦꢱꢾꢥ꣄ ꢡꢾꢒꢲꣁꢬꢸ ꢤꢾꢛꢶꢡꢷ ꢡꢵꢒꢸꢡꢷꢱꢬ ꢙꢾꢪꢥ꣄ꢕꢭꢶꢥꢸꢙꢾꢪꢶꢥꢸ ꢧꢸꢬꢡ꣄ꢡꢶꢱꣁ ꢲꣁꢡ꣄ꢡꢾ ꢪꢾꢥꢶ ꢒꢳꣀꢭꣁꢥꣁ ꣎

ꢦꢸꢱꢶꢥꢶꢥ꣄

ꢪꢶꢬꢶꢥ꣄ꢮꢜꢡ꣄ꢡꢶꢱꣃ ꢣꢾꢔꢸꢞꢵꢥꢸꢒꢸ ꢥꢵꢮꢸꢥ꣄ ꢒꢵꢫꢶ ꣎ ꢒꣁꢒꢭꢾꢥ꣄ꢡꣁ ꢏꢠ꣄ꢜ꣄ꢫꣁ ꢱꢪꢸꢭꣁꢒꢶꢥꢶ ꢂꢖ꣄ꢔꣁꢒ꣄ꢒꢾ ꢆꢡꢸꢭꣁ ꢬꢴꢵꢡ꣄ꢡꢾ ꣎ ꢱꢸꢨ꣄ꢞꢵꢪ꣄ ꢒꢶꢥꢶ ꢦꢜꢬꢸ ꢱꢿꢡ꣄ꢡꢶꢱꢵ ꢮꢱ꣄ꢡꢸꢥꢸꢥꢵꢮꢸꢥ꣄ ꢱꢖ꣄ꢔꣁ ꣎ ꢪꢶꢬꢶꢥꢸꢠ꣄ꢜꣁ ꢒꢵꢫꢶꢒꢾꢬ꣄ꢮꢾꢥ꣄ ꢱꢿꢡ꣄ꢡꢾ ꣎ ꢩꢵꢡꢸ ꢱꢾꢥ꣄ꢡꣁ ꢗꢔꢸꢥꣁ ꢒꣁꢒꣁ ꢦꢙꢾꢱꢿꢡ꣄ꢡꢾ ꣎

ꢮꢣꢶꢥ꣄

ꢡꢶꢪ꣄ꢜꢶ ꢡꢿꢪꢸ ꢆꢡꢸꢭꣁ ꢱꢪꢶꢭꣁ ꢩꣁꢞꢶꢡꢸ ꢒꢶꢥ꣄ꢣꢸꢭꣁ ꢩꢸꢡꢸꢭꣁ ꢩꢸꢳ꣄ꢳꣁ   ꢱꢵꢤꢥꣁ

ꢪꢶꢬꢶ ꢪꢾꢥꢡ꣄ꢡꢾ ꢯꢨ꣄ꢣꢸ ꢒꣂꢥ꣄ ꢮꢗꢥꢵꢥ꣄ꢡꢸ ꣎ ꢩꢸꢡꢸꢭꣁ ꢩꢸꢳ꣄ꢳꣁ  ꢍꢣꢶꢫꢾꢒꣁ ꢮꢶꢡ꣄ꢡꢾꢱꢸꢥ꣄ ꢯꢿꢲꢵ ꣎ ꢮꢶꢮꢬꣁ ꢱꢖ꣄ꢔꣁ ꣎ ꢒꢶꢥ꣄ꢣꢸꢭꣁ ꢪꢾꢥꢡ꣄ꢡꢾ ꢮꢡ꣄ꢡꢵꢒꢸ ꢧꢸꢳ꣄ꢳꢬꢹꢦꢸ ꢱꢖ꣄ꢔꣁ ꣏