ꢦꢒ꣄ꢰꢶꢥ꣄

ꢦꢒ꣄ꢰꢶꢙꢵꢡꢶꢥꢸꢪꢸ ꢗꢶꢞꢶ ꢪꢾꢳ꣄ꢳꢶ ꢔꢵꢪꢸꢥꢸꢪ꣄ ꢮꢱꢡ꣄ꢡꢾ ꢦꢒ꣄ꢰꢶ ꣎ ꢌꢭ꣄ꢫꣁ ꢣꢪ꣄ꢦꢡꢶꢥ꣄ꢱꢬꢵꢦꢵꢜꢶ ꢙꢶꢮꢡ꣄ꢡꢶꢱꢵꢥꢸꢒꢾ ꣎ ꢱꢣꢵ ꢲꢷꢬꢸꢥꢸꢪ꣄ ꢒꢶꢥꢶ ꢕꢿꢬꢸ ꢏꢳꢾꢥꢸꢪ꣄ ꢥꢷꢞꣁ ꢩꢥ꣄ꢣꢶꢭꢶ ꢌꢪꣁ ꢮꢱꢥ꣄ ꢒꢾꢬꢱꢸ ꣎ ꢌꢪꣂꢱꢶ ꢂꢠ꣄ꢞꣁ ꢢꣁꢮꢶꢥꢸ ꢗꣁꢬꢵꢡꢶꢙꢡꢫꢾꢒꢬꢸ ꢨꢶꢱꢶ ꢨꢶꢱꢶ ꢓꢠ ꢓꢠꢞꢶꢥ꣄ ꢙꢷꢮꢸ ꢕꢭꢱꢸ ꣎ ꢌꢫꣁ ꢏꢠ꣄ꢜꣁ ꢪꢠ꣄ꢞꢭꢸ ꢲꣁꢫꢾꢡ꣄ꢡꢒꢬꢸ ꢂꢠ꣄ꢞꣁ ꢧꢹꢒ꣄ꢭꢶꢥꢸ ꢣꢪ꣄ꢦꢡꢶꢲꣁꢫꢶꢬꢴꢶꢫꢾ ꢣꢷ ꢦꢶꢭ꣄ꢭꢵꢥꢸ ꢩꢬꢵꢞꢮꢫꢶ ꣎ ꢌꢒꣁ ꢦꢶꢖ꣄ꢒꢸꢥ꣄ ꢬꢴꢵꢥ ꢲꢵꢭꢶꢪ꣄ ꢲꢸꢞꢸꢮꢾꢥ꣄ꢪꢾꢭ꣄ꢭꢶ ꢱꢾꢒ꣄ꢒꢸꢥ ꣎ ꢮꢵꢙꢶꢥ꣄ ꢓꢜ꣄ꢜꢶꢥ꣄ꢲꢵꢭ꣄ꢒꢶꢥꢶ ꢦꢵꢥꢴꢵꢭꢶ ꢂꢦꢸꢭꢵꢥꢸ ꢥꢷꢞꢵꢥꢸ ꢩꢥ꣄ꢣꢸꢭꢱꢸ ꣎ ꢥꢷꢞꣁ ꢩꢷꢡ꣄ꢡꢬꢸ ꢒꢦꢸꢱꢸ ꢡꢵꢒꢸ ꢨꢸꢱ꣄ꢒꣁ ꢧꣀꢭꢵꢡꢶꢥ꣄ ꢪꢸꢱ꣄ꢒꢸꢳꢶ ꢲꣂꢬꢥꢶ ꢢꣁꢮꢶꢥꢸ ꢪꢾꢡ꣄ꢡꢥ꣄ ꢒꢶꢥꢶ ꢱꢶꢳ꣄ꢳꣁꢲꢶꢪꢸꢱꢸꢥ꣄ ꢭꢔꢸꢥꢵꢡ꣄ꢡꣁ ꢒꢾꢬꢸꢭꢫꢶ ꣎ ꢥꢴꢥ꣄ꢥ ꢡꢶꢭ꣄ꢭꢵꢥꢸ ꢲꢸꢞꢸꢮꢾꢥ꣄ ꢱꢾꢒ꣄ꢒꢾꢭꢾꢖ꣄ꢔꢸ ꢬꢴꢵꢡ꣄ꢡꢾꢒ ꢤꢾꢬꢶ ꢦꢙꢾ ꢲꣁꢡ꣄ꢡꢾ ꣎ ꢢꢾꢮ꣄ꢞꣁ ꢒꢵꢭꢸ ꢦꢭ꣄ꢗꣁ ꢦꢶꢭ꣄ꢭꢵꢥꢸꢒꢸ  ꢦꢶꢖ꣄ꢒꢸꢥ꣄ ꢲꣁꢞꢫꢶ ꣎ ꢢꢾꢨ꣄ꢨꣁ ꢪꢴꣁꢜꢦꢒ꣄ꢰꢶꢥ꣄ ꢌꢒꣁ ꢲꢸꢞꢥ꣄ꢱꢶꢒ꣄ꢒꢞꢶꢥꢸ ꢱꣁꢞꢫꢶ ꣎ ꢌꢒ ꢣꢭ꣄ꢭ ꢗꢶꢞꢶ ꢗꢖ꣄ꢔꢸꢭ ꢔꢮꢫꢶ ꣎

ꢂꢥꢿꢒ ꢦꢒ꣄ꢰꢶꢥ꣄ ꢓꢾꢮ꣄ꢞꣁ ꢗꣁꢖ꣄ꢔꢸ ꢔꢮꢫꢶꢥꢵ ! ꢡ꣄ꢫꣂ ꢲꢾꢮ꣄ꢞꣁꢱꢸꢜꢪ꣄ ꢎꢒꢵꢱ꣄ꢥꢵ ! ꢢꢾꢮ꣄ꢞꣁ ꢡꢸꢠ꣄ꢜ ꢥꢴꢸꢬꢸꢥ꣄ ꢦꢒ꣄ꢰꢶꢥ꣄ ꢲꣁꢬꢸ ꢔꢸꢠ꣄ꢞꣁ ꢧꢶꢒꢱꢸꢥ꣄ ꣎ ꢫꢿ ꢩꢾꢳꢶ ꢣꢸꢰ꣄ꢳꣁ ꣎ ꢦꢒ꣄ꢰꢶꢥ꣄ ꢒꣁꢖ꣄ꢒꢒꢸ ꢒꢵꢫꢶ ꢲꢶꢪ꣄ꢱꣁ ꢒꢾꢬꢱꢶ ꣎ ꢦꢒ꣄ꢰꢶꢥ꣄ ꢔꢷꢡꢸ ꢔꢮꢶꢥꢸ ꢂꢪ꣄ꢒꣁ ꢡꢸꢰ꣄ꢜꢶ ꢒꢾꢬꢱꢸ ꣎ ꢡꢾꢒꢙꣂꢳꢸ ꢦ꣄ꢬꢿꢪꣁ ꢢꣁꢮꢸꢥꣁ ꣎ ꢡꢾꢒ꣄ꢒꣁꢥ꣄ꢥꢶ ꢥꢵꢱ꣄ꢡꢶ ꢒꢾꢬꢸꢮꢵꢥ ꣎

ꢦꢒ꣄ꢰꢶꢥ꣄ ꢂꢒꢵꢱꢸꢬꢸ ꢲꢞꢱꢸ ꣎ ꢍ ꢲꢸꢞꢡ꣄ꢡꢾꢨ꣄ꢨꣁ ꢦꢶꢖ꣄ꢒꢸꢥ꣄ ꢪꢸꢒꢸꢳ ꢬꢴꢵꢱꢸ ꣎ ꢔꣂꢬꢴꢡ ꢤꢸꢪ꣄ꢱꢶꢭꢶ ꢃꢖ꣄ꢔꢸꢱꢾꢥ꣄ꢡ꣄ꢣꢾ ꢱꢶꢭꢶꢥ꣄ꢬꢴꢵꢱꢸ ꣎ ꢦꢶꢖ꣄ꢒꢸꢥ꣄ꢲꢵꢭꢷꢱꢶ ꢦꢒ꣄ꢰꢶꢥ꣄ ꢲꢸꢞꢡ꣄ꢡꢾ ꣎ ꢃꢖ꣄ꢔꢸ ꢓꢠꢓꢠꣀꢭꢶꢬꢴꢡ ꢦꢶꢖ꣄ꢒꢸꢥ꣄ꢬꢴꢵꢱꢸ ꣎ ꢨꣀꢭ꣄ꢗꢶꢞꢶꢒꢸ ꢣꣂꢱꢸ ꢒꢳꢬꢴꢵꢥ ꣎ ꢣꢭ꣄ꢭ ꢗꢶꢞꢶꢒꢸ ꢒꢭꢬꢴꢵꢫꢶ ꣎

ꢬꢵꢠꢸꢦꢒ꣄ꢰꢶꢥ꣄ ꢂꢦ꣄ꢳꢵꢥꢸ ꢥꢷꢞꢵꢥꢸ ꢚꢵꢞꢸꢱꢵꢓꢬꢸ ꢩꢾꢳꢶ ꢥꢶꢦꢸꢥꢸꢬꢸ ꢤꢷꢦꢸꢥ꣄ꢱꢾꢥ꣄ꢡꢾ ꢩꢥ꣄ꢣꢸꢭꢱꢸ ꣎ ꢌꢭ꣄ꢫꣁ ꢱꢵꢓꢵꢥꢸꢪ꣄ ꢭꣁꢪ꣄ꢨꢶꢭꢿꢡꢸ ꢬꢴꢵꢱꢸ ꣎ ꢂꢖ꣄ꢔꢸꢥ꣄ ꢢꢾꢮ꣄ꢞꢦꢒ꣄ꢰꢶꢥ꣄ ꢤꣃꢬꢵꢔꢸꢪ꣄ꢦꢸꢬꢸꢪ꣄ ꢒꢶꢥꢶ ꢣꣁꢖ꣄ꢔꢬꢸꢪ꣄ ꢒꢶꢥꢶ ꢥꢷꢞꢵꢪ꣄ ꢩꢥ꣄ꢣꢶꢭꢶ ꢒꢸꢜꢸꢪ꣄ꢨꢸ ꢱꢾꢖ꣄ꢔꢦꢵꢜꢶ ꢱꣃꢒꢵꢱꢸꢬꢸ ꢙꢶꢮꢡꢸ ꢬꢴꢵꢱꢸ ꣎

ꢦꢸꢱꢶꢥꢶꢥ꣄

ꢗꢶꢞꢶ ꢥꢶꢞꣁ ꢒꢶꢱꣁ ꢨꢥ꣄ꢣꢸꢭꢡ꣄ꢡꢾ ꣎ ꢌꢒ ꢂꢠ꣄ꢞꣁ ꢒꣂꢥꢒꢸ ꢧꢸꢭ꣄ꢒꢡ꣄ꢡꢾ ꣎ ꢏꢠ꣄ꢜꢡꢣꢶꢒꢸ ꢒꢶꢡ꣄ꢒꣁ ꢂꢠ꣄ꢞꢵꢥꢸ ꢕꢭꢡ꣄ꢡꢾ ꣎ ꢔꣂꢬꢴꢡ ꢦꢶꢖ꣄ꢒꢸꢥ꣄ ꢒꢶꢱꣁ ꢬꢴꢵꢡ꣄ꢡꢾ ꣎ ꢦꢒ꣄ꢰꢶ ꢂꢦꢸꢥ꣄ ꢥꢷꢞꣁ ꢒꢾꢒꢲꢵꢭꢶ ꢩꢥ꣄ꢣꢸꢭꢡ꣄ꢡꢾ ꣎

ꢯꢨ꣄ꢣꢸꢥ꣄

ꢘꣂꢱꢸ ꢡꢸꢰ꣄ꢜꢶ  ꢪꢸꢒꢸꢭꣁ ꢮꢵꢙꢶꢥ꣄