ꢦꢛ꣄ꢗꢡꢥ꣄ꢡ꣄ꢬ ꢓꢾꢥꢶꢥ꣄ – ꢒꢷꢱ꣄ꢒꢶꢥ꣄ ꢥꢒ꣄ꢒꢸꢬ꣄ – ꣑

ꢦꢹꢬꢸꢪ꣄ ꢔꢾꢖ꣄ꢔꢵꢥꢾꢣ꣄ꢣꢶ ꢡꢷꢬꢸꢪ꣄ ꢫꣂꢒ꣄ ꢙꢾꢪ꣄ꢨꢸ ꢚꢵꢞ꣄ ꢣꢾꢜ꣄ꢜꢸꢒꢥ꣄ ꢲꣁꢞꢶ ꢲꣁꢣꢾꢱ꣄ ꣎ ꢡ꣄ꢫꢾ ꢚꢵꢞꢸ ꢱꢵꢓꢵꢪ꣄ ꢗꢶꢞꢶ ꢥꢷꢞꣁ ꢩꢥ꣄ꢣꢶꢭꢶ ꢱꣁꢥ꣄ꢡꣂꢰ꣄ꢒꢥ꣄ ꢙꢶꢮ꣄ꢭꢶ ꢲꣁꢣꢾꢱ꣄ ꣎ ꢔ꣄ꢬꢷꢰ꣄ꢪꢬꢸꢡꢸꢪ꣄ ꢡꢾꢭ꣄ꢫꣁ ꢙꢾꢪ꣄ꢨꢸ ꢚꢵꢞꢸꢪ꣄ ꢙꢾꢪ꣄ꢨꢸꢳꣁ ꢦꢶꢒ꣄ꢒꢾꢱ꣄ ꣎ ꢄꢫꢾ ꢙꢾꢪ꣄ꢨꢸꢳꣁ ꢓꢵꢡ꣄ꢡꣁ ꢗꢶꢞꢶ,ꢬꢪꣁ,ꢒꣃꢳꣁ ꢧꣀꢭꢵꢣꢶꢶ ꢦꢒ꣄‍ꢰꢶꢥ꣄ꢒꢶꢥ꣄ ꢗꢶꢒ꣄ꢭꣁ,ꢒꢷꢱ꣄ ꢂꢖ꣄ꢔꢸꢥ꣄ ꢂꢥꢿꢒ ꢪꢹꢔꢸꢥ꣄ ꢂꢮꢶ ꢦꣁꢳ꣄ꢳꣁ ꢓꣀꢡꢶ ꢙꢶꢫꢾꢱ꣄ ꣎ ꢌꢪꢵꢪ꣄ ꢫꣂꢒ꣄ ꢒꢷꢱꢸ ꢦꢬꢶꢮꢵꢬ꣄ ꢪꢵꢡ꣄ꢬꢪ꣄ ꢙꢾꢪ꣄ꢨꢸꢳꣁ ꢓꣀꢡꢶ ꢚꢵꢞꢸ ꢱꢵꢒꢵꢥꢸꢱ꣄ ꢂꢦꢸꢭ꣄ ꢬꢴꢮꢵꢱ꣄ꢒꢥ꣄ ꢒꢾꢬ꣄ꢭꢶ ꢦꢸꢰ꣄ꢜꢶꢒꢥ꣄ ꢙꢶꢮ꣄ꢭꢶ ꢂꢮꢾꢱ꣄ ꣎ ꢏꢠ꣄ꢜꢾꢣꢶ ꢔꢾꢖ꣄ꢔꢵ ꢥꢾꢣ꣄ꢣꢶꢪ꣄ ꢙꢶꢮ꣄ꢭꢶ ꢂꢮꢬꢶꢫꣁ ꢥꢒ꣄ꢒꢸꢬ꣄ ꢡꢷꢬꢸꢒ꣄ ꢂꢮꢾꢱ꣄ ꣎  ꢡꢿꢜ꣄ ꢙꢾꢪ꣄ꢨꢸ ꢚꢵꢞ꣄ ꢓꢵꢭ꣄ ꢭꢭꢶ ꢦꣁꢞ꣄ꢬꢶꢫꣁ ꢙꢾꢪ꣄ꢨꢸꢳꣁ ꢓꢫꢾꢱ꣄ ꢥꢒ꣄ꢒꢸꢬ꣄ ꣎ ꢙꢾꢪ꣄ꢨꢸꢳꢵ ꢬꢸꢗ꣄ꢗꢶ ꢣꢾꢒ꣄ꢒꢾ ꢥꢒ꣄ꢒꢸꢬ꣄ ꢥꢶꢗ꣄ꢗꢸ ꢡꢷꢬꢸꢒ꣄ ꢂꢮꢶ ꢭꢭꢶ ꢦꣁꢞꢶꢬꢶꢫꢾ ꢙꢾꢪ꣄ꢨꢸꢳꣁ ꢓꣀꢡꢶ ꢂꢮ꣄ꢭꢶ ꢙꢷꢭꢶ ꢲꣁꢣꢾꢱ꣄ ꣎

ꢄꢫꢾ ꢂꢱ꣄ꢒꢶ ꢚꢵꢞ꣄ ꢆꢛ꣄ꢗꣁ ꢱꢵꢓꢵꢪ꣄ ꢨꢶꢱꢶꢭꢶ ꢫꣂꢒ꣄ ꢡꢥ꣄ꢡꢸꢬ꣄ ꢒꢷꢱ꣄ ꢱꢶꢭꢿꢡ꣄ ꢂꢮꢾꢱ꣄ ꣎ ꢏꢠ꣄ꢜꢾꢣꢶ ꢌꢭ꣄ꢭꢾ ꢡꢥ꣄ꢡꢸꢬ꣄ ꢒꢷꢱ꣄ ꢥꢒ꣄ꢒꢸꢬ꣄ ꢙꣁꢮꢳ꣄ ꢱꢶꢖ꣄ꢔꢣꢶꢦ꣄ꢦꢥ꣄ ꢒꢾꢬ꣄ꢭꢸꢥꣁ ꢪꢾꢥ꣄ꢡꢶ ꢥꢒ꣄ꢒꢸꢬ꣄ ꢡꢷꢬꢸꢒ꣄ ꢂꢮꢾ ꢱꢪꢫꢪꢸ ꢮꢡ꣄ꢡꣁꢣꢶꢫꢾꢱ꣄ ꣎ “ ꢲꢿ ꢪꢒꢬꢵ ! ꢡꢹ ꢥꢶꢗ꣄ꢗꢸ ꢍ ꢡꢷꢬꢸꢒ꣄ ꢂꢮꢬꢱ꣄ ꢌꢝꢵꢪ꣄ ꢭꢭꢶ ꢦꣁꢞ꣄ꢬꢶꢫꣁ ꢙꢾꢪ꣄ꢨꢸꢳꣁ ꢓꢵꢬꢶꢫꣁ ꢪꢷ ꢱꢶꢭꢿꢡ꣄ ꢯꢾꢡ꣄ꢡꢾ. ꣎ ꢪꢷ ꢒꢶꢥ꣄ ꢡꢹ ꢱꢶꢖ꣄ꢔꣀꢡ꣄ ꢲꣁꢫ꣄ꢫꢾꢥ꣄ ꢥꢶꢗ꣄ꢗꢸ ꢪꢷ ꢡꣁꢒꣁ ꢧꢸꢜ꣄ꢜꢸ ꢥꢵꢡ꣄ꢡ ꢔꢸꢳ꣄ꢳꢾ ꢦꣁꢳ꣄ꢳꢵꢥ꣄ ꢡꣁꢞꢶ ꢣꢾꢮꢸꢱ꣄ ꢪꢾꢥꢶ ꢒꢷꢱ꣄ ꢥꢒ꣄ꢒꢸꢬ꣄ ꢙꣁꢮꢳ꣄ ꢪꢾꢥꢾꢱ꣄ ꣎ ꢒꢷꢱ꣄ꢒꢶꢥ꣄ ꢥꢒ꣄ꢒꢸꢬ꣄ ꢪꢶꢡ꣄ꢬꢸꢥ꣄ ꢲꣁꢫ꣄ꢫꢵ ꣎ ꢥꢶꢗ꣄ꢗꢸ ꢚꢵꢞꢸꢪ꣄ ꢬꢴꢷ ꢦꣁꢳ꣄ꢳꢵꢥ꣄ ꢡꣁꢞꢶ ꢥꢒ꣄ꢒꢸꢬꢸꢒ꣄ ꢣꢶꢫꢾꢱ꣄ ꢒꢷꢱ꣄ ꣎ 

ꢏꢠ꣄ꢜꢾꢣꢶ ꢒꢷꢱ꣄ ꢣꢶꢫꢾ ꢦꣁꢳ꣄ꢳꢵꢥ꣄ ꢥꢒ꣄ꢒꢸꢬ꣄ ꢓꢳ꣄ꢳꢶ ꢂꢦꢸꢭ꣄ ꢩꢵꢬ꣄ꢫꣁ ꢙꣁꢮꢳ꣄ ꢣꢶꢫꢾꢱ꣄ ꣎ ꢣꢭ꣄ꢭꣁ ꢣꢶꢫꢾ ꢦꣁꢳ꣄ꢳꣁ ꢓꢫꢾ ꢨꣀꢭ꣄ ꢥꢒ꣄ꢒꢸꢬ꣄ “ ꢌꢭ꣄ꢭꢾ ꢦꣁꢳ꣄ꢳꣁ ꢡꢸꢪ꣄ꢒꣁ ꢒꢶꢖ꣄ꢒꢾ ? ꢒꣂꢜ꣄ ꢬꢴꢷ ꢓꢳ꣄ꢳꢶ ꢂꢮꢾꢫꣁ ? ꢒꣂꢥ꣄ ꢣꢶꢫꢾꢫꣁ ? “ ꢪꢾꢥꢶꢦꢸꢱꢶꢱ꣄ ꢨꣀꢭ꣄ ꢥꢒ꣄ꢒꢸꢬ꣄ ꣎ “ ꢪꣁꢒꣁ ꢌꢭ꣄ꢭꢾ ꢥꢾꢣ꣄ꢣꢶ ꢡꢷꢬꢸꢬ꣄ ꢫꣂꢒ꣄ ꢒꢷꢱ꣄ ꢱꢶꢖ꣄ꢔꣀꢡ꣄ ꢯꢾꢡ꣄ꢡꢿ ꣎ ꢡꢾꢥꣂꢱ꣄ ꢣꢶꢫꢾꢫꣁ ꢌꢭ꣄ꢭꢾ ꢦꣁꢳ꣄ꢳꣁ” ꢪꢾꢥꢶ ꢥꢒ꣄ꢒꢸꢬ꣄ ꢱꢖ꣄ꢔꢾꢱ꣄ ꣎ ꢱꢾꢬ꣄ꢒꢱ꣄ ꢌꢭ꣄ꢭꢾ ꢦꣁꢳ꣄ꢳꣁ ꢗꣁꢒ꣄ꢒꢜ꣄ ꢔꢸꢳ꣄ꢳꢾꢒꢥ꣄ ꢯꢿ ꣎ ꢌꢭ꣄ꢭꢾ ꢦꣁꢳ꣄ꢳꣁ ꢄꢡ꣄ꢒ ꢔꢸꢳ꣄ꢳꢾ ꢬꢴꢶꢫꢾꢡ꣄ ꢌꢭ꣄ꢭꢾ ꢦꣁꢳ꣄ꢳꣁ ꢥꢶꢗ꣄ꢗꢸ ꢓꢵꢬꢶꢫꣁ ꢡꢾꢭ꣄ꢭꢾ ꢒꢷꢱꢸ ꢒꢙꢳꢶꢒꢶꢥ꣄ ꢡꢶꢳ꣄ꢗꢶ ꢄꢡ꣄ꢒ ꢬꢸꢗ꣄ꢗꢶꢒꢥ꣄ ꢬꢴꢵꢫ꣄ ! ꢲꢮ꣄ꢞꢶ ꢱꢶꢫꢾꢡꢷꢱ꣄ ꢡꣂꢠꢸꢪ꣄ ꢦꢥꢶ ꢔꢾꢭꢬꢱ꣄ ! ꢍꢜ꣄ꢱꢮꣁꢒꢵꢫ꣄ ! ꢡꢸꢪꢶ ꢒꢵꢫ꣄ꢒꢾꢬꢥ꣄ꢒꢶ ꢒꢶꢱꣁ ꢒꢾꢬꢥ꣄ꢒꢷ ꢪꣁꢒꣁ ꢒꢳꢵꢥꢵ ! ꢡꢾꢭ꣄ꢭꢾ ꢒꢷꢱꢸ ꢒꢙꢳꢶꢒꢶꢥ꣄ ꢡꢶꢳ꣄ꢗꢶ ꢪꣁꢬ꣄ꢙꣁꢮꢳ꣄ ꢂꢥꢶ ꢣꢿꢬꢶꢫꣁ ! ꢪꢾꢥꢶ ꢃꢙ꣄ꢛꣁꢡꢔꢶꢱ꣄ ꣎ ꢡꢾꢭ꣄ꢭꢾꢒꣁ ꢣꢭ꣄ꢭ ꢥꢒ꣄ꢒꢸꢬ꣄ “ ꢪꣁꢬ꣄ ꢱꢶꢖ꣄ꢔꣀꢡꢸꢒ꣄ ꢪꢷ ꢒꢶꢱꣁ ꢣꢸꢬꣂꢒ꣄ ꢒꢾꢬꢡ꣄ꢡ ꢪꢸꢱꣀ ꢍ ꢤꢾꢬꢸꢪ꣄ ꢥꢴꢵ “ ꢪꢾꢥꢶ ꢱꢖ꣄ꢔꢾꢱ꣄ ꣎ ꢡꢿ ꢂꢱ꣄ꢒꢶ ꢪꣁꢒꣁ ꢒꢳꢵꢥꢵ ꢪꣁꢒꣁ ꢡꢾꢭ꣄ꢭꢾ ꢒꢷꢱꢸ ꢒꢙꢳꢶꢒꢶꢥ꣄ ꢡꢶꢳ꣄ꢗꢶꢦꢙꢾ ! ꢪꢾꢥꢶ ꢣꢭ꣄ꢭ ꢥꢒ꣄ꢒꢸꢬꢸꢒ꣄ ꢤꢞ꣄ꢞꢶꢱ꣄ ꣎ 

ꢂꢖ꣄ꢔꢸꢥ꣄ ꢂꢮ꣄ꢫ꣄…