ꢗꢵꢬ꣄ ꢡꢾꢥꢸ ꢪꢶꢳꢾꢡꢶ ꢗꢵꢬ꣄ ꢮꢶꢤꢪ꣄ꢒꢥꢶ ꢮꢡ꣄ꢡꣁ ꢒꢾꢬꢥ꣄ ! ꢡꢾꢭ꣄ꢭꢾ ꢗꢵꢬ꣄ ꢮꢶꢤꢪꢸ ꢮꢡ꣄ꢡꣁ ꢗꢵꢬ꣄ ꢣꢶꢒ꣄ꢒꢸꢥꢸꢪ꣄ ꢣꣁꢳꣁ ꢪꢶꢱ꣄ꢒꢬꢶꢫꣁ ꢒ꣄ꢰꢠꢪꢸ ꢬꢸꢥ꣄ꢣꣀ ꢡ꣄ꢫꢾ ꢡꢸꢪ꣄ꢒꣁ ꢒꢳꢵꢫ꣄ ꢥꢴꢫꢵ ! ꢪꢾꢔꢶ ꢂꢡ꣄ꢡꣁ ꢍꢜ꣄ ꢒꢵꢫ꣄ ꢮꢡ꣄ꢡꣁ ꢨꢵ ꢡꢹ ꢱꢖ꣄ꢔꢡ꣄ꢡꣁ ꢂꢮꢬꢶꢫꣁ ꢪꢾꢥꢶ ꢪꣁꢥ꣄ꢥꢸꢪ꣄ ꢪꢾꢥ꣄ꢭꢬꢵꢥ꣄ ꢥꢴꢫꢵ ! ꢬꢴꢮꣁ ꢱꢖ꣄ꢔꢸꢡꢸꢱ꣄.. ꢂꢪꢶ ꢗꢵꢬ꣄ ꢪꢾꢥꢱ꣄ꢡꢾ ꢮꢡ꣄ꢡꢵꢪ꣄ ꢬꢴꢷ ꢲꢬꢸꢪ꣄ꢨꢪ꣄ ꢒꢾꢬꢾꢫꣁ ꢥꢴꢫꢵ ꢡꢾꢭ꣄ꢭꢾ “ꢗꢵꢬ꣄” ꢪꢾꢥꢱ꣄ꢡꢾ ꢮꢡ꣄ꢡꣁ ꢒꣂꢥꢒ꣄ ꢒꣂꢥꣁ ꢆꢦꢫꣂꢒ꣄ ꢒꢾꢬꢱ꣄ꢡꢾ, ꢒꣂꢥꢾ ꢒꣂꢜ꣄ ꢥꢸꢔꢱ꣄ꢡꢾ ꢪꢾꢥꢶ ꢱꢶꢫꢾꢥ꣄ ꣎
ꢫꣂꢒꢸ, ꢣꢷ, ꢢꢷꢥ꣄, ꢗꢵꢬꢸ, ꢦꢵꢛ꣄ꢗꢸ, ꢱꣂ … ꢪꢾꢥꢶ ꢱꢖ꣄ꢓ꣄ꢫꣁ ꢱꢖ꣄ꢔꢱ꣄ꢡꢾ ꢮꢿꢳ꣄ ꢬꢸꢦꢵꢫ꣄ ꢪꣁꢮꢱ꣄ꢡꢾ ꢮꢿꢳꣁ ꢗꢵꢬꢸ ꢪꢾꢥꢶ ꢪꢾꢥ꣄ꢥꣁ ꣎
ꢧꣀꢭꣁ, ꢣꢶꢮ꣄ꢮꣁ, ꢢꢶꢥ꣄ꢮꣁ, ꢗꢬ꣄ꢮꣁ, ꢦꢛ꣄ꢗ꣄ꢮꣁ, ꢱꣁꢮꣁ ꢪꢾꢥꢶ ꢮꢬ꣄ꢔꢸ ꢂꢢꢮꢵ ꢮꢳꢶꢒꢥꢶ ꢱꢖ꣄ꢔꢡ꣄ꢢꢾꢨ꣄ꢨꣁ ꢗꢬ꣄ꢮꣁ ꢪꢾꢥꢱ꣄ꢡꢾ ꢦꢣꢪ꣄ ꢆꢦꢫꣂꢒ꣄ ꢒꢾꢬ꣄ꢥꣁ ꣎ (ꢆꢣꢵꢲꢬꢠꣁ) :- ꢢꢶꢥ꣄ꢮꣁ ꢮꢬ꣄ꢔꢸꢪ꣄ ꢧꣀꢭꣁ ꢮꢳꢶꢪ꣄ ꢨꢶꢱꢶꢬꢶꢫꣁ ꢗꢬ꣄ꢮꣁ ꢪꢵꢠꢮꢸ ꢪꢷ ꣎ ꢧꣀꢭꣁ ꢬꢿꢒꢸꢪ꣄ ꢯꢿꢡ꣄ꢡꢾ ꢗꢬ꣄ꢮꣁ ꢦꢸꢱ꣄ꢡꢮꢸ ꢓꢳ꣄ꢳꢶ ꢃꢮ꣄ ꢪꢾꢥꢶ ꢮꢣ꣄ꢫꢵꢬ꣄ ꢱꢖ꣄ꢔꢶꢫꢵꢱ꣄ ꣎
ꢧꣀꢭꢫꣁ, ꢣꢶꢮꢫꣁ, ꢢꢶꢥ꣄ꢮꢫꣁ, ꢗꢬ꣄ꢮꢫꣁ, ꢦꢛ꣄ꢗ꣄ꢮꢫꣁ… ꢦ꣄ꢬꢵꢠꢶꢥ꣄ ꢙꢥ꣄ꢡꢸꢥꢸꢒꢸ ꢤꢾꢬꢶ ꢱꢖ꣄ꢔꢡ꣄ꢢꢾꢨ꣄ꢨꣁ ꢂꢪꢶ ꢆꢦꢫꣂꢒ꣄ ꢒꢾꢬ꣄ꢥꣁ ꢲꣂꢬꢶꢫꣁ ꢱꢨ꣄ꢣꢸ. (ꢆꢣꢵꢬꢠꣁ) ꢤꢪꢬꢶꢫꣁ ꢕꣁꢞꢵꢥꢸꢪ꣄ ꢗꢬ꣄ꢮꢫꣁ ꢨꢶꢱ꣄ꢱꣁ ꢤꢪꢬꢿꢱ꣄ ꣎
ꢏꢠ꣄ꢜꢾ ꢢꢵꢪ꣄ꢪꢸ ꢯꢿꢡ꣄ꢡꢾ ꢮꢱ꣄ꢡꢸ ꢂꢢꢮꢵ ꢦ꣄ꢬꢵꢠꢶꢥ꣄ ꢙꢥ꣄ꢡꢸꢥꢸ ꢤꢾꢬꢶ ꢱꢖ꣄ꢓ꣄ꢫꣁꢒꢥꢶ ꢱꢖ꣄ꢔꢥ꣄ꢮꢿꢳꣁ ꢗꢵꢬ꣄ ꢪꢾꢥꢱ꣄ꢡꢾ ꢗꢵꢬ꣄ꢫꣁ ꢪꢾꢥꢶ ꢆꢦꢫꣂꢒ꣄ ꢒꢾꢬ꣄ꢥꣁ ꣎ ꢔꢵꢫꢶ ꢒꣂꢰ꣄ꢜꢸꢪ꣄ ꢒꢶꢡ꣄ꢒ ꢔꢵꢫꢶꢥ꣄ ꢯꢿ ? ꢗꢵꢬ꣄ꢫꣁ ꢲꢶꢨ꣄ꢨꢶꢬꢿꢱ꣄ ꣎ ꢒꢗ꣄ꢗꢪ꣄ꢨꣁ ꢗꢵꢬ꣄ꢫꣁ ꢓꢳ꣄ꢳꢶ ꢑꢬꢵꢱꢶ ꢪꢾꢥꢶ ꢱꢖ꣄ꢔꢸꢥꣁ ꣎
Leave a Reply
You must be logged in to post a comment.