ꢏꢠ꣄ꢜꢾ ꢬꢵꢠꢸꢪ꣄ ꢚꢸꢒꢸ ꢲꢬꢶꢠ꣄ ꢙꢾꢡꣁ ꢙꢾꢡꣁꢒꢥꢶ ꢙꢶꢮ꣄ꢭꢶꢫꢮꢾꢱ꣄ ꣎ ꢬꢵꢠꢸꢪꢸ ꢲꢬꢶꢠꢸꢒꢸ ꢓꢵꢡ꣄ꢡꢾ ꢓꢥꢶꢥ꣄ ꢂꢱ꣄ꢒꢶ ꢡꢺꢦ꣄ꢡꢶꢒꢥꢶ ꢂꢨ꣄ꢨꢶ ꢱꣁꢥ꣄ꢡꢸꢒꢥꢶ ꢙꢶꢮ꣄ꢭꢶꢫꢮꢾꢱ꣄ ꣎ ꢏꢠ꣄ꢜꢾꢣꢶ ꢏꢠ꣄ꢜꢾ ꢲꢬꢶꢠ꣄ ꢂꢦꢸꢭ꣄ ꢙꢾꢡꢵꢪ꣄ ꢬꢴꢷ ꢱꢸꢜ꣄ꢜꢶ ꢮꢵꢜ꣄ꢡꣁꢦ꣄ꢦꢶ ꢌꢖ꣄ꢔꢸꢜ꣄ ꢡꢾꢖ꣄ꢔꢸꢜ꣄ ꢲꢶꢠ꣄ꢞꢶꢭꢿꢡ꣄ ꢲꣁꢡꢾꢱ꣄ ꣎ ꢂꢦꢸꢭ꣄ ꢙꢾꢡꣁ ꢱꢾꢥ꣄ꢡꣁ ꢪꢶꢳꢥ꣄ ꢪꢸꢱꢸꢥꢵꢡ꣄ꢡꢒꢸ ꢮꢶꢗꢵꢬ꣄ ꢦꣁꢞꢾꢱ꣄ ꣎
ꢚꢸꢒꢸ ꢕꢾꢞꢶ ꢲꢶꢠ꣄ꢞꢾ ꢲꢵꢭꢶ ꢲꢬꢶꢠꢸꢒꢸ ꢩꢾꢳ꣄ꢳꢶ ꢱꣂꢒ꣄ ꢂꢮꢾꢱ꣄ ꣎ ꢱꢾꢙ꣄ꢙꢵꢪ꣄ ꢫꣂꢒ꣄ ꢡꢳꣁ ꢱꢶꢫꢾꢱ꣄ ꣎ ꢡꢿꢜ꣄ ꢙꢷꢒꢶꢥ꣄ ꢏꢖ꣄ꢔꢶ ꢦꢥꢶ ꢦꢶꢫꢾꢱ꣄ ꣎ ꢦꢥꢶꢪꢸ ꢂꢦꢸꢭ꣄ ꢉꢦ꣄ ꢱꢶꢫꢾꢱ꣄ ꣎ ꢃꢲꢵ ꢪꣁꢬꣁ ꢯꢶꢖ꣄ꢔꢸꢥ꣄ ꢒꢵꢫ꣄ ꢱꢶꢖ꣄ꢔꢵꢬ꣄ꢒꢥꢶ ꢯꢿ ꢥꢵ ! ꢌꢒ ꢲꢵꢭ꣄ ꢪꣁꢒꣁ ꢄꢡ꣄ꢒ ꢕꢾꢥꢪ꣄ ! ꢪꢾꢥꢶ ꢔꢾꢬꢸꢮ꣄ꢒꢥꢶ ꢲꢜ꣄ꢮꢶꢭꢶꢭꢿꢡ꣄ ꢂꢦꢸꢭ꣄ ꢦꢵꢛꢶꢥꢸꢒ꣄ ꢯꢾꢫ꣄ꢥꢸ ꢌꢭ꣄ꢭꢾ ꢦꢵꢛ꣄ ꢱꢵ ꢮꢳ꣄ꢜꢶ ꢓꢜ꣄ꢜꢶ ꢱꣁꢒꢥ꣄ ꢥꢴꢵꢥ꣄ꢒꢥꢶ ꢯꢿ ꢌꢒ ꢲꢵꢭꢶ ꢂꢪ꣄ꢒꣁ ꢒꢵꢫ꣄ ꢧꣂꢳ꣄ ꢙꢸꢞꢛ꣄ꢙꢵꢱ꣄ ꢪꢾꢥꢶ ꢓꢵꢭ꣄ꢒꢥꢶ ꢲꢜ꣄ꢮꢾꢱ꣄ ꣎
ꢢꢾꢨ꣄ꢨꣁ ꢒꢶꢬꢵꢡꢸꢥ꣄ ꢂꢮꢬꢶꢫꣁ ꢱꢾꢣ꣄ꢣꢸ ꢎꢒꢫꢾꢱ꣄ ꣎ ꢒꢶꢬꢵꢡꢸꢥꢸꢒꢸ ꢱꢶꢫꢾ ꢒ꣄ꢰꢠꢪꢸ ꢲꢬꢶꢠ꣄ ꢆꢱꢶꢳꢶ ꢦꣁꢞ꣄ꢭꢶ ꢤꢵꢪ꣄ ꢤꢾꢬꢶ ꢤꢪꢾꢱ꣄ ꣎ ꢒꢶꢬꢵꢡꢸꢥ꣄ ꢙꣁꢮꢳ꣄ ꢂꢨ꣄ꢨꢶꢥꢶ ꢦꣁꢠ꣄ꢠꢵꢡ꣄ꢡꢒꢸ ꢚꢸꢒꢸ ꢣꢹꢬ꣄ ꢤꢪꢶ ꢙꢷꢒꢶꢥ꣄ ꢚꢵꢞꢸꢥ꣄ ꢲꣁꢞ꣄ꢬꢶꢫꣁ ꢕꢹꢮꢵꢪ꣄ ꢡꢸꢬꢾꢱ꣄ ꣎ ꢧꢷꢬ꣄ ꢒꢶꢬꢵꢡꢸꢥ꣄ ꢂꢮꢬꢶꢫꣁ ꢱꢾꢣ꣄ꢣꢸ ꢎꢒꢶ ꢲꢬꢶꢠ꣄ ꢤꢒ꣄ꢒꢶ ꢒꢪ꣄ꢦꢾꢱ꣄ ꣎ ꢡꢿꢜ꣄ ꢬꢴꢷ ꢤꢵꢪ꣄ ꢤꢾꢬꢱ꣄ꢡꢒꢸ ꢲꢬꢶꢥ꣄ ꢥꢶꢒꢸꢳ꣄ꢡꣁ ꢯꢶꢖ꣄ꢔꢸꢥ꣄ ꢚꢵꢞꢸ ꢯꢵꢓꢵꢪ꣄ ꢱꢪ꣄ꢜꢶ ꢤꢪꢱ꣄ꢡꢒꢸ ꢪꢸꢱꢾꢥꢶ ꢗꣁꢒ꣄ꢒꢜ꣄ ꢱꢪ꣄ꢜꢶꢥꢶ ꢦꣁꢞ꣄ꢳꢶꢞꢶꢫꣁ ꣎
ꢡꢿꢜ꣄ ꢂꢮꢾ ꢒꢶꢬꢵꢜꢸꢥ꣄ ꢲꢬꢶꢠꢸꢒ꣄ ꢯꢾꢫ꣄ꢥꢸ ꢮꢖ꣄ꢒ꣄ꢳꢵꢪ꣄ ꢱꢬꣁ ꢱꢥ꣄ꢣꢶ ꢆꢜ꣄ꢗꢶ ꢱꣁꢞꢶꢥꢸ ꢲꢬꢶꢠꢸꢒꢸ ꢤꢾꢬ꣄ꢫꢵꢱ꣄ ꣎ ꢂꢦꢸꢭ꣄ ꢙꢷꢮ꣄ ꢱꣁꢞꢱ꣄ꢡꢮꢿꢳꣁ ꢲꢬꢶꢠ꣄ ꢂꢦꢸꢭ꣄ ꢪꣁꢥ꣄ꢥꢸꢪ꣄ “ ꢪꣁꢬꣁ ꢦꢵꢛꢶꢥꢸꢒ꣄ ꢪꢷ ꢓꢵꢭ꣄ꢒꢥꢶ ꢲꢜ꣄ꢮꢾꢫꣁ ꢲꣁꢫꢾꢡꢶ ꢒꢶꢬꢵꢡꢸꢥ꣄ ꢙꣁꢮꢳ꣄ ꢱꢪ꣄ꢜꢶꢥꢶ ꢦꣁꢠ꣄ꢠꢵꢱ꣄ꢡ ꢬꢴꢵꢡ꣄ꢡꢒꢸ ꢡ꣄ꢫꢿꢱ꣄ ꢪꣁꢬꣁ ꢒꢸꢬ꣄ꢗꢶ ꢤꢪꢶ ꢂꢮꢾꢱ꣄ ! ꢌꢭ꣄ꢭꢾ ꢯꢶꢖ꣄ꢔꢸꢥꢸꢒꢸ ꢪꢷ ꢕꢾꢥꢪ꣄ꢒꢥꢶ ꢲꢜ꣄ꢮꢾꢫꣁ ꢡ꣄ꢫꢾ ꢪꣁꢒꣁ ꢄꢱꣁ ꢱꢪ꣄ꢜꢞꢶ ꢱꣁꢞ꣄ꢞꢶꢫꣁ ꢥꢵ ꢪꢾꢥꢶ ꢣꣁꢳꢵꢪ꣄ ꢦꢥꢶ ꢓꢞ꣄ꢭꢿꢡ꣄ ꢙꢷꢮ꣄ ꢱꣁꢞꢾꢱ꣄ ꣏
ꢲꢺꢰ꣄ꢜꢶ = ꢔꢾꢬꢸꢮ꣄
Leave a Reply
You must be logged in to post a comment.