ꢲꢜꢪ꣄ꢢꣁꢮꢾ ꢒꢷꢱ꣄ – ꣒

ꢂꢪ꣄ꢦꢸꢬꢶꢪ꣄ ꢲꣁꢣꢾ ꢂꢮ꣄ꢬꢾ ꢒꢷꢱꢸ ꢒꢸꢭꢪ꣄ ꢲꢵꢥꢶ ꢲꣁꢫ꣄ꢬꢶꢫꣁ ꢎꢒꢶꢥꢶ ꢦꣁꢞꢾ ꢡꢿ ꢣꣁꢮ꣄ꢬꢒꢷꢱ꣄ ꢡꢿ ꢬꢙꣁ ꢲꣂꢬ꣄ ꢲꢜꢥ꣄ ꢢꣁꢮꢾꢱ꣄ ꣎ ꢡꢿ ꢣꣁꢮ꣄ꢬꣁ ꢒꢷꢱ꣄ ꢲꣁꢣꢾ ꢪꢴꣁꢜ꣄ꢜ ꢮꢥꢪꢸ ꢏꢠ꣄ꢜꢾ ꢒꣃꢬꢶ ꢲꣁꢣꢾꢱꢶ ꣎ ꢡꢾꢭ꣄ꢭꢾ ꢓꣃꢬꢶꢪ꣄ ꢬꢵꢒ꣄ꢰꢱ ꢔꢸꢠ꣄ꢠꢸ ꢩꣁꢬꢾ ꢏꢠ꣄ꢜꢾ ꢩꢹꢡ꣄ ꢲꣁꢣꢾꢱ꣄ ꣎ ꢡꢾꢭ꣄ꢭꢾ ꢓꣃꢬꢶꢪ꣄ ꢣꣁꢮ꣄ꢬꢒꢷꢱ꣄ ꢲꢸꢡ꣄ꢡꢶꢬꢶ ꢣꢪꢬ꣄ꢤꢾꢔꢸꢳꣁ ꢦꢵꢥ꣄ ꢱꢾꢥ꣄ꢡꣁ ꢪꣁꢞꢶ ꢡꢾꢪꢵꢪ꣄ ꢦꢥꢶ ꢪꢶꢛ꣄ꢙꢶ ꢦꢶꢫꢾꢱ꣄ ꣎ ꢡꢾꢮꢳ꣄ ꢡꢿ ꢓꣃꢬꢶꢪ꣄ ꢲꣁꢣꢾ ꢩꢹꢡ꣄ ꢡꢾꢒꣁ ꢣꣁꢳꢵꢒ꣄ ꢒꢵꢒ꣄ꢰꢶ ꢣꢶꢫꢾꢱ꣄ ꣎ ꢡꢹ ꢯ꣄ꢬꢿꢰ꣄ꢝꢸ ꢲꣁꢫꢾꢱ꣄ꢡꢾꢥꣁ ꢪꢾꢥꢶ ꢙꢥꢷꢱ꣄ ꢪꢷ ꢡꣁꢬ꣄ ꢣꣁꢳꢵꢒ꣄ ꢒꢵꢒ꣄ꢰꢶ ꢣꢷꢬꢶꢫꣁ ꢪꢾꢥꢶ ꢩꢹꢡ꣄ ꢱꢖ꣄ꢔꢶꢡꢶ ꢤꢿꢬ꣄ ꢌꢭ꣄ꢭꢾ ꢭꢴꣂꢖ꣄ꢔꢸ ꢲꢵꢬꢪ꣄ ꢓꢳ꣄ꢳꢾ ꢪꢾꢥꢶ ꢱꢖ꣄ꢔꢶ ꢡꢾꢭ꣄ꢭꢾ ꢩꢹꢡ꣄ ꢂꢦꢸꢭ꣄ ꢔꢾꢳꢬ꣄ ꢕꢭ꣄ꢭꢶ ꢲꣁꢣꢾ ꢲꢵꢬꢪ꣄ ꢲꢾꢞꢶ ꢒꢷꢱꢸ ꢲꢵꢡꢸꢪ꣄ ꢣꢶꢫꢾꢱ꣄ ꣎꣎

ꢣꣁꢮ꣄ꢬꢒꢷꢱ꣄ ꢡꢿ ꢩꢹꢡꢸꢒ꣄ ꢱꢷ  “ꢍ ꢦꢥꢶꢪ꣄ ꢡꣁꢬ꣄ ꢯꢒ꣄ꢡꢶ ꢒꢶꢡ꣄ꢒꣁ ?” ꢪꢾꢥꢶ ꢦꢸꢱꢾꢱ꣄ ꣏ ꢲꢿ ꢒꢷꢱꢸ ! ꢱꢱꢬ꣄ ꢡꢾꢥꢸ ꢂꢮꢾꢡ꣄ꢒꢵꢫ꣄ ꢪꢾꢳ꣄ꢳꢶ ꢂꢱ꣄ꢒꢶ ꢡꢾꢖ꣄ꢒꣁ ꢏꢠ꣄ꢜꢵꢳꢸꢪ꣄ ꢆꢜ꣄ꢗꢶ ꢤꢾꢬꢶ ꢓꢵꢡ꣄ꢡꢶꢱꢵ ꢯꢒ꣄ꢡꢶ ꢪꣁꢬ꣄ ꢙꣁꢮꢳ꣄ ꢯꢿꢱ꣄ꢡꢾ ꢪꢾꢥꢶ ꢩꢹꢡ꣄ ꢙꢾꢮꢵꢦ꣄ ꢒꢾꢬꢱ꣄ ꣎꣎ ꢡꢶꢱꣁ ꢪꢾꢥꢾꢡ꣄ ꢪꢷ ꢡꣁꢒꣁ ꢗꣁꢒ꣄ꢒꢜ꣄ ꢏꢠ꣄ꢜꢾ ꢓꣃꢠꢪꢸꢥ꣄ ꢓꢳ꣄ꢳꢶ ꢂꢮꢸꢱꢶ ꢪꢾꢥꢶ ꢱꢖ꣄ꢔꢶꢡꢶ ꢡꢿꢜ꣄ꢬꢴꢷ ꢥꢶꢔꢶꢳꢾꢱ꣄ ꢣꣁꢮ꣄ꢬꢒꢷꢱ꣄ ꣎꣎ ꢩꢹꢡ꣄ ꢣꢶꢫꢾ ꢲꢵꢬꢪ꣄ ꢕꢾꢳꢬ꣄ ꢕꢭ꣄ꢭꢶ  ꢒꢷꢱ꣄ ꢂꢪ꣄ꢦꢸꢬꢶ ꢬꢙꣁ ꢂꢱ꣄ꢮꢶꢒ꣄ ꢙꣁꢮꢳ꣄ ꢂꢮꢾꢱ꣄ ꣎ ꢒꢷꢱ꣄ ꢕꢭ꣄ꢬꢶꢫꣁ ꢭꢴꣂꢖ꣄ꢔꢸ ꢲꢵꢬꢪ꣄ ꢱꢷꢡꢶ ꢬꢙꣁ ꢃꢱ꣄ꢗꢬ꣄ꢫꢸ ꢦꣁꢞꢾꢱ꣄ ꣎ ꢲꢿ ꢩꢥ꣄ꢣꢬꢸ.. ꢌꢭ꣄ꢭꢾ ꢱꢶꢖ꣄ꢔꢵꢬ꣄ ꢲꣁꢫꢾ ꢲꢵꢬꢪ꣄ ꢡꣁꢒꣁ ꢒꢶꢥ꣄ꢒꢾ | ꢡꣁꢒꣁ ꢒꣂꢥꣁ ꢂꢨ꣄ꢨꢾꢱ꣄ ꢪꢾꢥꢶ ꢦꢸꢱꢾꢱ꣄ ꣎꣎

ꢲꣂ ꢬꢙꢵ ! ꢱꢾꢙ꣄ꢙ ꢔꢵꢪ꣄ꢪꢸ ꢏꢠ꣄ꢜꢾ ꢮꢥꢪ꣄ ꢯꢿ | ꢡꢿ ꢮꢥꢪꢸ ꢏꢠ꣄ꢜꢾ ꢓꣃꢬꢶ ꢯꢿ | ꢡꢿ ꢓꣃꢬꢶꢪ꣄ ꢧꢭ꣄ꢡꢶꢧꢵꢬꢸꢪ꣄ ꢒꣂꢥ꣄ ꢦ꣄ꢬꢢꢪꢸꢒꢥ꣄ ꢲꢸꢡ꣄ꢬꢬꢵꢱ꣄ꢒꢶ ꢡꢾꢖ꣄ꢒꣁ ꢂꢱ꣄ꢒꢶ ꢄꢱꢵꢥ꣄ ꢭꢴꣂꢖ꣄ꢔꢸ ꢲꢵꢬꢪ꣄ ꢂꢨ꣄ꢨꣀ ꢪꢾꢥꢶ ꢣꣁꢮ꣄ꢬꢒꢷꢱ꣄ ꢱꢖ꣄ꢔꢾꢱ꣄ ꣎꣎ ꢡꢶꢱꣁ ꢪꢾꢥꢾꢡ꣄ ꢪꢷꢪꢾꢳ꣄ꢳꢶ ꢡꢿꢜ꣄ꢙꢷ ꢦ꣄ꢬꢒꢵꢱ꣄ ꢲꣁꢫꢾ ꢄꢱꢵꢥ꣄ ꢲꢵꢬꢪꢸꢥ꣄ ꢂꢨ꣄ꢨꢳ꣄ꢳꢸꢱ꣄ ꢪꢾꢥ꣄ꢡꢶ ꢬꢙꣁ ꢂꢦꢸꢭ꣄ ꢦꢳꣁ ꢱꢾꢥ꣄ꢡꣁ ꢒꢷꢱ꣄ ꢱꢖ꣄ꢔꢾ ꢮꢥꢪꢸꢒ꣄ ꢥꢶꢔꢶꢳꢾꢱ꣄ ꣎꣎ ꢣꣁꢮ꣄ꢬꢒꢷꢱ꣄ ꢬꢙꢵꢒ꣄ ꢨꣁꢭ꣄ꢭꢶ ꢮꢥꢪꢸ ꢯꢿꢱ꣄ꢡꢾ ꢓꣃꢬꢶ ꢭꢾꢒ꣄ꢡ ꢂꢮꢾꢱ꣄ ꣎

ꢡꢾꢮꢳ꣄ ꢡꢿ ꢒꢷꢱ꣄ ꢬꢙꢵ ꢦ꣄ꢬꢢꢪꢸꢒꢥ꣄ ꢡꣁꢬ꣄ ꢦꢳꣁ ꢂꢱ꣄ꢒꢶ ꢌꢭ꣄ꢭꢾ ꢓꣃꢬꢶꢪ꣄ ꢲꢸꢡ꣄ꢡꢶꢬꢶ ꢡꢾꢖ꣄ꢒ ꢡꢾꢖ꣄ꢒꣁ ꢲꢵꢡꢸꢪ꣄ ꢂꢨ꣄ꢨꢬꢶꢫꣁ ꢓꢳ꣄ꢳꢶ ꢂꢮꢥ꣄ꢣꢒ꣄ | ꢱꢾꢡ꣄ꢭꣁ ꢂꢪꢶ ꢣꢷꢡꢾꢥꢸ ꢓꣃꢬꢶꢥ꣄ ꢲꢸꢡ꣄ꢡꢶꢬꢶ ꢂꢪ꣄ꢒꣁ ꢲꣁꢫꢾ ꢲꢵꢬꢪꢸꢥ꣄ ꢓꢳ꣄ꢳꢶ ꢂꢮꢾꢥ꣄ ꢪꢾꢥꢾꢱ꣄ ꢒꢷꢱ꣄ ꣎꣎ ꢒꢷꢱ꣄ ꢱꢖ꣄ꢔꢾ ꢮꢡ꣄ꢡꣁ ꢎꢒꢾ ꢬꢙꣁ ꢡꢶꢱꣂꢱ꣄ ꢲꣂꢥ꣄ꢣꢔꢸ ꢪꢾꢥ꣄ꢡꢶ ꢂꢦꢸꢭ꣄ ꢦꢳꢵꢥꢸꢒꢱ꣄ꢒꢶ ꢓꣃꢬꢶꢪ꣄ ꢲꢸꢡ꣄ꢡꢸꢬꢸꢮꣁ ꢪꢾꢥꢶ ꢲꢸꢔꢾꢱ꣄ ꣎ ꢂꢱ꣄ꢒꢶ ꢡꢾꢥꢸ ꢓꣃꢬꢶꢪ꣄ ꢤꢸꢪ꣄ꢒꢶꢫꢵꢱ꣄ | ꢓꣃꢬꢶꢪ꣄ ꢲꣁꢣꢾ ꢩꢹꢡ꣄ ꢂꢱ꣄ꢒꢶꢥꢵꢒ꣄ ꢤꢾꢬꢶ ꢓꢫꢾꢱ꣄ ꣎꣎ ꢚꢸꢒꢸ ꢕꢾꢜꢶ ꢲꣁꢫꢶ ꢪꢾꢳ꣄ꢳꢶ ꢓꣃꢬꢶꢪ꣄ ꢲꢸꢡ꣄ꢡꢶꢬꢾꢱ꣄ꢡꢾꢥꢸ ꢆꢛ꣄ꢗꣁ ꢂꢮ꣄ꢫꢵꢥꢶ ꣎ ꢬꢙꣁ ꢒꢷꢱꢸꢒ꣄ ꢱꢷ ꢂꢖ꣄ꢔꢸꢥ꣄ ꢒꢵꢫꢶ ꢌꢥꢸ ꢂꢱ꣄ꢒꢶ ꢆꢛ꣄ꢗꣁ ꢂꢮꢬꢵꢥꢶ ? ꢪꢾꢥꢶ ꢦꢸꢱꢾꢱ꣄ ꣎꣎

ꢣꣁꢮ꣄ꢬꣁ ꢒꢷꢱ꣄ ꢭꢾꢒ꣄ꢡꣁ ꢲꣁꢣꢾ ꢏꢠ꣄ꢜꢾ ꢚꢵꢞꢸꢪ꣄ ꢆꢱꢶꢭꢶ ꢲꢶꢨ꣄ꢨꢶꢭꢶꢒꢶꢥ꣄ ꢲꢿ ꢬꢙꢵ ꢡꢹ ꢪꣁꢬ꣄ ꢒꢷꢱꢸ ꢮꢪ꣄ꢱꢸ ꢂꢱ꣄ꢒꢵꢒꢸ ꢲꢵꢥꢶ ꢒꢾꢬ꣄ꢡ꣄ꢡꢶꢫꣁ | ꢡꢾꢒ ꢲꢵꢭꢶꢱ꣄ ꢡꣁꢬ꣄ ꢲꣂꢬ꣄ ꢪꢷ ꢲꢜꢥ꣄ ꢢꣁꢮꢾꢫꣁ ꣎ ꢪꣁꢬ꣄ ꢃꢱ꣄ꢡꣁ ꢦꢹꢬ꣄ꢡꢶ ꢲꣁꢫ꣄ꢫꣁ ꣎ ꢡꣁꢬ꣄ ꢲꢡꢬꣁ ꢪꢷ ꢩꢵꢡ꣄ ꢓꣀꢬꢱ꣄ | ꢡꢾꢭ꣄ꢭꢾ ꢮꢶꢱ꣄ꢮꢵꢱꢸꢪ꣄ ꢡꣁꢒꣁ ꢲꢵꢥꢶ ꢒꢬꢱ꣄ꢡꢾ ꢣꢸꢬꣂꢒ꣄ ꢪꢾꢥꢶ ꢪꢷ ꢲꢜ꣄ꢮꢶ ꢡꣁꢒꣁ ꢙꢷꢮ꣄ ꢱꢾꢖ꣄ꢒꣁ ꢱꣁꢞꢬꢶꢫꣁ ꢪꢾꢥꢶ ꢒꢷꢱ꣄ ꢱꢖ꣄ꢔꢶꢡꢶ ꢯꢵꢒꣁ ꢱꣁꢞ꣄ꢞꢶ ꢯꢵꢒꣁ ꢤꢸꢪ꣄ꢒꢶ ꢆꢱꢶꢳꢶ ꢙꢶꢫꢾꢱ꣄ ꣎꣎

ꢂꢪ꣄ꢦꢸꢬꢶ ꢬꢙꣁ ꢂꢱ꣄ꢮꢶꢒ꣄ ꢪꣁꢥ꣄ꢥꢸ ꢨꢵꢣꣁ ꢱꢾꢥ꣄ꢡꣁ ꢂꢦꢸꢭ꣄ ꢔꢵꢪꢸꢒ꣄ ꢧꢶꢬꢶ ꢂꢮꢾꢱ꣄ ꣎

ꢦꢛ꣄ꢗꢡꢥ꣄ꢡ꣄ꢬꢪ꣄ ꢡꣁꢒꢥ꣄ ꢲꢜꢪ꣄ꢢꣁꢮꢾ ꢒꢷꢱꢸ ꢓꢾꢥꢶ ꢪꢸꢱꢾꢱꢶ