ꢲꢜꢪ꣄ꢢꣁꢮꢾ ꢒꢷꢱ꣄ – ꣑

ꢂꢪ꣄ꢦꢸꢬꢶ ꢪꢾꢥꢱ꣄ꢡꢾ ꢣꢿꢱꢸꢪ꣄ ꢂꢱ꣄ꢮꢶꢒ꣄ ꢪꢾꢥꢱ꣄ꢡꢾ ꢬꢙꣁ ꢣꢿꢱ꣄ ꢱꣃꢠꢶꢭꢿꢡ꣄ ꢲꣁꢣꢾꢱꢶ ꣎ ꢡꢾꢥꣁ ꢏꢠ꣄ꢜꢾꢣꢶ ꢮꢷꢡꢸꢪ꣄ ꢏꢠ꣄ꢜꢾ ꢒꢷꢱ꣄ ꢥꢗꢬꢶꢫꣁ ꢃꢱ꣄ꢡꢒꢥ꣄ ꢱꢶꢭꢿꢡ꣄ ꢲꣁꢣꢾꢱ꣄ ꣎ ꢧꢭ꣄ꢗꣁ ꢡ꣄ꢫꢾ ꢬꢙꣁ ꢡꢾꢒ ꢔꢵꢪ꣄ꢪꢸ ꢩꣁꢮꢾ ꢒꢷꢱꢸꢥꢸꢒ꣄ ꢨꣁꢭ꣄ꢭꢶ ꢂꢮꢶ ꢲꣁꢮ꣄ꢞꢶꢭꢶ ꢂꢮꢾꢱ꣄ ꣎  ꢏꢠ꣄ꢜꢾꢣꢶ ꢬꣃꢳꢸ ꢒꢶꢖ꣄ꢒꢶꢬꢬ꣄ꢥꢸꢪ꣄ ꢚꢾꢞꣁ ꢥꢶꢳꢾꢱ꣄ ꣎ ꢡꢿ ꢚꢾꢞꣁ ꢱꢶꢫꢾ ꢏꢠ꣄ꢜꢾ ꢣꣁꢔꢸꢬꢒꢷꢱ꣄ ꢍ ꢚꢾꢞꣁ ꢪꢴꣁꢜꣁ ꢲꣁꢫ꣄ꢫꢾꢡꢶ ꢲꢷꢥꢮꢶ ꢭꢔꣀ ꢥꢵ ꢪꢾꢥꢶ ꢲꢜ꣄ꢮꢶ ꢡꢿꢜ꣄ ꢯꢿꢱ꣄ꢡꢾ ꢒꢷꢱꢸꢥ꣄ ꢙꣁꢮꢳ꣄ ꢂꢪꢶꢥꢱ꣄ꢒꢶ ꢒꣂꢜ꣄ꢜꢶ ꢏꢠ꣄ꢜꢾ ꢮꢥꢪꢸ ꢡꢸꢬ꣄ꢭꢶꢞꢶꢫꢾꢥ꣄ ꢪꢾꢥꢶ ꢱꢖ꣄ꢔꢾꢱ꣄ ꣎꣎

ꢗꣁꢒ꣄ꢒꢜ꣄ꢒꢥ꣄ ꢓꣃꢠꢪ꣄ ꢂꢨ꣄ꢨꢬꢶꢫꣁ ꢢꢵꢪ꣄ ꢱꣁꢞ꣄ꢞꢶ ꢒꣂꢜ꣄ꢜꢶ ꢏꢠ꣄ꢜꢾ ꢮꢥꢪꢸꢒ꣄ ꢙꢶꢫꢾꢖ꣄ꢔꢥ꣄ ꢪꢾꢥꢬꢱ꣄ ꢍ ꢣꣁꢮ꣄ꢬꢒꢷꢱ꣄ ꢪꢾꢥꢶ ꢪꢾꢭ꣄ꢭꢿꢡ꣄ ꢡꢿꢜ꣄ ꢲꣁꢣꢾ ꢙꣃꢠꢒꢷꢱꢸꢥ꣄ ꢒꢾꢳ꣄ꢗꢶ ꢣꢾꢒ꣄ꢒꢞꢾꢱ꣄ ꣎꣎ ꢲꣁꢫꢾꢡꢶ ꢡꢿ ꢣꣁꢮ꣄ꢬꢒꢷꢱ꣄ ꢪꢵꢡ꣄ꢬꢪꢦꢸꢭ꣄ ꢒꢸꢜꢸꢪ꣄ꢨꢪ꣄ ꢱꢾꢥ꣄ꢡꣁ  ꢱꢾꢙ꣄ꢙ ꢔꢵꢪ꣄ꢪꢸ ꢲꣁꢣꢾ ꢏꢠ꣄ꢜꢾ ꢮꢥꢪꢸꢒ꣄ ꢙꢶꢫꢾꢱ꣄ ꣎꣎ ꢲꣁꢭ꣄ꢙꢵꢡꢸ ꢢꢾꢮ꣄ꢞ ꢣꢶꢥ꣄ꢥꢸ ꢧꢬꢵꢡꢸ ꢬꣃꢳꢸ ꢒꢶꢖ꣄ꢒꢶꢬꢬ꣄ꢥꢸ ꢩꢶꢡ꣄ꢡꢬ꣄ ꢗꢭꢾ ꢚꢾꢞꣁ ꢪꢴꣁꢜꣁ ꢲꣁꢫꢾꢱ꣄  | ꢡꢾꢖ꣄ꢒꢵꢪ꣄ ꢏꢠ꣄ꢜꢾ ꢲꢶꢥꣀꢡ꣄ ꢚꢾꢞꣁ ꢪꢭ꣄ꢭꢱ꣄ꢡꢮꢿꢳ꣄ ꢮꢶꢱ꣄ꢡꢮ꣄ ꢓꢜꢶ ꢮꢶꢱꢶꢬꢾꢱ꣄ ꣎ ꢡ꣄ꢫꢾ ꢮꢶꢱ꣄ꢡꢮ꣄ ꢕꣁꢞꢵ ꢒꣂꢰ꣄ꢜꢸ ꢆꢛ꣄ꢗꣁ ꢙꢷ ꢦꣁꢞꢶ ꢕꣁꢞꢵ ꢒꣂꢰ꣄ꢜꢸ ꢲꢸꢳꣁ ꢤꢾꢬꢾꢱ꣄ ꣎ ꢡꢿꢜ꣄ ꢲꢶꢨ꣄ꢨꢶ ꢲꣁꢣꢾ ꢕꣁꢞꢵꢥꢸꢒꢱ꣄ꢒꢶ ꢲꢸꢳꢵ ꢕꢵꢪ꣄ ꢭꢔꢾꢱ꣄ ꢕꣁꢞꢵꢥꢱ꣄ꢒꢶ ꢨꢵꢣꣁ ꢦꣁꢥ꣄ꢣꢾꢱ꣄ ꣎

ꢕꣁꢞꢵꢥꢸꢒ꣄ ꢗꣁꢮ꣄ꢬꢱ꣄ꢡꢾꢥꣁ ꢬꢙꣁ ꢙꣁꢮꢳ꣄ ꢂꢮꢶ ꢗꢭꢾ ꢭꣃꢒꢵꢱ꣄ ꢂꢱ꣄ꢒꢶ ꢒꢳꢞꢾꢱ꣄ | ꢬꢙꣁ ꢕꣁꢞꢵꢥꢸꢒ꣄ ꢏꢫ꣄ꢣꢸꢒꢬꢱ꣄ꢡꢒ꣄ ꢕꣁꢞꢵ ꢏꢫ꣄ꢣꢸꢥꢸꢒ꣄ ꢨꣁꢮꢥ꣄ ꢤꢞ꣄ꢞꢶꢫꢾꢱ꣄ ꣎ ꢬꢙꢵ ꢥ꣄ꢫꢪꢥ꣄ꢡ꣄ꢬꢠꢪ꣄ ꢤꢵꢥꢸ ꢕꣁꢞꢵ ꢏꢫ꣄ꢣꢸ ꢂꢮꢾꢱ꣄ ꣎ ꢕꣁꢞꢵꢥꢸꢒ꣄ ꢲꣁꢫ꣄ꢬꢶꢫꣁ ꢓꢙ꣄ꢙꢸ ꢱꢷ ꢒꢷꢱꢸ ꢡꢹꢦ꣄ ꢬꢴꢶꢫꢾꢡꢷꢱ꣄ ꢍ ꢓꢙ꣄ꢙꢸ ꢨꢬꣁ ꢒꢾꢬꢥ꣄ ꢪꢸꢱꣀꢫꢶ ꢪꢾꢥꢶ ꢏꢫ꣄ꢣꢸ ꢱꢖ꣄ꢔꢾꢱ꣄ ꣎ ꢡ꣄ꢫꢾ ꢕꢾꢜꢶꢪꢸꢱ꣄ ꢬꢙꣁ ꢔꢵꢪꢸꢬ꣄ ꢯꢿꢱ꣄ꢡꢾ ꢒꢷꢱꢸꢥꢸꢒꢱ꣄ꢒꢶ ꢤꢾꢬꢶ ꢪꢬꢶ ꢒꢷꢱꢸ ꢡꢹꢦ꣄ ꢓꢳ꣄ꢳꢸꢮꣁ ꢪꢾꢥꢶ ꢲꢸꢔꢾꢱ꣄ ꣎ ꢡ꣄ꢫꢾ ꢤꢵꢥꢸꢒꢸꢱ꣄ ꢔꢵꢪꢸꢬ꣄ ꢯꢿꢱ꣄ꢡꢾ ꢒꢷꢱꢸꢥꢸꢒꢱ꣄ꢒꢶ ꢤꢾꢬꢶ ꢪꢬꢶ ꢒꢷꢱꢸ ꢡꢹꢦ꣄ ꢲꢾꢞꢶ ꢕꣁꢞꢵꢥꢸꢒ꣄ ꢭꢮꢶ ꢕꣁꢞꢵꢥꢸꢒ꣄ ꢲꣁꢫꢾ ꢓꢙ꣄ꢙꢸ ꢂꢱ꣄ꢒꢶ ꢱꢸꢒ꣄ꢒꢞꢾꢱ꣄ ꣎

ꢂꢖ꣄ꢔꢸꢥꢮꣀ…