ꢦꢳ꣄ꢒꢵꢬ꣄ꢦꢸꢬꢶꢪ꣄ ꢡꢵꢦꢶ ꢪꢾꢥꢥ꣄ ꢥꢵꢮꢸꢪ꣄ ꢫꣂꢒ꣄ ꢥꢾꢣ꣄ꢣꢶ ꢤꢾꢪꢶꢭꢿꢡꢸ ꢲꣁꢡꢾꢱꢶ ꣎ ꢡ꣄ꢫꢾ ꢥꢾꢣ꣄ꢣꢶ ꢣꢜꢱ꣄ꢡꢒꢸ ꢚꢵꢞꢸ ꢒꢵꢰ꣄ꢜꢸꢥ꣄ꢲꢵꢭꢶ ꢫꣂꢒ꣄ ꢱꢿꢡꢸ ꢩꢥ꣄ꢣꢶ ꢲꣁꢡꢶꢫꢵꢱꢶ ꣎ ꢡ꣄ꢫꢾ ꢱꢿꢡꢸꢪꢸ ꢏꢠ꣄ꢜ ꢡꢾꢥꣁ ꢪꢵꢡ꣄ꢬꢪꢹꢱ꣄ ꢗꢭꢶ ꢙꢵꢡ꣄ꢡꢒꢸ ꢪꢸꢱꣀ ꣎ ꢡꢶꢱꢵꢥ꣄ ꢥꢴꢥ꣄ꢥ ꢱꢿꢡꢸ ꢡ꣄ꢫꢾ ꣎
ꢏꢣꢶ ꢡ꣄ꢫꢾ ꢱꢿꢡꢸꢪꢸ ꢒꢳꣁꢲꢸꢙꢵꢳꢸꢪ꣄ ꢣꢷ ꢩ꣄ꢠ꣄ꢞꢸꢥ꣄ ꢡꢶꢬꢒ꣄ꢡꢶꢬꢒꢸ ꢗꢭꢶ ꢂꢮꢾꢱꢶ ꣎ ꢥꢴꢥ꣄ꢥ ꢱꢿꢡꢸ ꢲꢵꢭꢶ ꢣꢶꢫ꣄ꢫꣁ ꢌꢖ꣄ꢔꢸꢜ꣄ ꢡꢾꢖ꣄ꢔꢸꢜ꣄ ꢙꢵꢡ꣄ꢡꢒꢸ ꢪꢸꢱꢾꢥꢶ ꣎ ꢲꢸꢙꢵꢳ꣄ ꢩꢾꢠ꣄ꢞꢸ ꢒꢳꣁ ꢩꢾꢠ꣄ꢞꢹ ꢯꢾꢫ꣄ꢥꢸ “ꢲꢿ ꢡꢩꢵ… ꢡꢸ ꢦꢱ꣄ꢒꢜ꣄ ꢧꢶꢬꢶ ꢙꢵ ꣎ ꢪꢷ ꢡ꣄ꢫꢾ ꢡꢷꢬꢸꢒꢸ ꢙꢥꣁ ꢲꣂꢬꢶꢫꣁ, ꢪꢷ ꢡꢾꢖ꣄ꢔꢸꢜꢸꢪꢸ ꢙꢶꢫ꣄ꢬ ꢧꢬꢵꢡꢸ ꢡꢹ ꢌꢖ꣄ꢔꢸꢜꢸꢪꢸ ꢙꢮ꣄ꢮꢵꢫꢶ ” ꢪꢾꢥꢶ ꢪꢾꢥꢱ꣄ ꣎ ꢄꢫꢾ ꢎꢒꢾ ꢒꢳꣁ ꢩꢾꢠ꣄ꢞꢸ ” ꢲꢿ ꢯꢸꢩꢵ.. ꢪꢷꢱ꣄ ꢌꢭ꣄ꢭꢾ ꢱꢿꢡꢸꢪ꣄ ꢧꣀꢭꣂꢒꢶꢥ꣄ ꢲꢶꢖ꣄ꢔꢶ ꢂꢮꢾꢫꣁ, ꢡꢾꢒ ꢲꢵꢭꢶ ꢡꢹꢱ꣄ ꢦꢱ꣄ꢒꢜ꣄ ꢧꢶꢬꢶ ꢙꢷꢒꢶꢥ꣄ ꢪꣁꢒꣁ ꢮꢵꢜ꣄ ꢱꣁꢠ꣄ꢠꣁ ” ꢪꢾꢥꢶ ꢪꢾꢥꢾꢱꢶ ꣎
ꢄꢱꣂꢱ꣄ꢒꢥꢶ ꢣꢷ ꢩꢾꢠ꣄ꢞꢸꢥ꣄ ꢮꢡ꣄ꢡꢵꢪ꣄ ꢫꢸꢣ꣄ꢤꢸ ꢒꢾꢬ꣄ꢭꢿꢡꢸ ꢲꣁꢡꢾꢱꢶ ꣎ ꢧꢭ꣄ꢗꣁ ꢮꢡ꣄ꢡꢵꢫꢸꢣ꣄ꢤꢸ ꢗꢾꢞꢶꢥꢸ ꢣꣁꢱ꣄ꢒꣁ ꢤꢶꢒ꣄ꢒꢶꢭꢶ ꢫꢸꢣ꣄ꢤꢸ ꢒꢾꢬꢥ꣄ ꢥꢶꢒꢶꢳꢾꢱꢶ ꣎ ꢣꣁꢱ꣄ꢒꣁ ꢤꢶꢒ꣄ꢒꢶ ꢫꢸꢣ꣄ꢤꢸ ꢒꢾꢬꢲꢵꢭꢶ ꢡ꣄ꢫꢾ ꢒꢵꢰ꣄ꢜꢸ ꢱꢿꢡꢸꢪꢸ ꢲꢶꢨ꣄ꢨꢱ꣄ꢡꢒꢸ ꢯꢾꢒ꣄ꢒꢵꢥꢱ꣄ꢡꢒꢸ ꢣꢷ ꢩꢾꢠ꣄ꢞꢸꢥ꣄ ꢡꢵꢦꢶ ꢥꢣꢶꢪ꣄ ꢦꣁꢞꢶ ꢦ꣄ꢬꢮꢵꢲꢸꢪ꣄ ꢱꢪ꣄ꢜꢶ ꢥꢾꢣ꣄ꢣꢶ ꢙꢶꢫꢾꢦꣂꢒꢸꢪ꣄ ꢙꢷꢒꢶꢥ꣄ ꢙꢷꢮ꣄ ꢱꣁꢞꢵꢱꢶ ꣎
ꢢꢾꢮ꣄ꢞꣁ ꢪꢵꢱꢸꢥ꣄ ꢧꢳ꣄ꢗꣁ ꢡꢾꢭ꣄ꢭꢿ ꢢꢵꢪ꣄ꢪꢸ ꢣꢸꢱꢸꢬ ꢣꢷ ꢩꢾꢠ꣄ꢞꢸꢥ꣄ ꢣꢾꢒ꣄ꢒꢶꢭꢶꢫꢾꢱꢶ ꣎ ꢡ꣄ꢫꢾ ꢏꢙꢵꢥꢒꣁꢙꢥꣁ ꢚꢾꢞꣁ ꢪꢭ꣄ꢭꢸꢥꢵꢱ꣄ꢡꢒꢸ ꢡꢾꢖ꣄ꢒꢵꢪ꣄ꢡꢾꢥꢸ ꢮꢡ꣄ꢡꣁ ꢒꢾꢬ꣄ꢭꢶꢥꢸ ꢥꢾꢣ꣄ꢣꢶ ꢣꢜꢱ꣄ꢡꢒꢸ ꢮꢵꢜ꣄ ꢒꢾꢬ꣄ꢭꢶꢫꢾꢱꢶ ꣎
ꢌꢪꢵꢪ꣄ ꢣꢷ ꢩꢾꢠ꣄ꢜꢸꢥꢸꢪ꣄ ꢫꣂꢒ꣄ ꢩꢾꢠ꣄ꢞꢸ ꢂꢦꢸꢭ꣄ ꢦꢵꢛꢶ ꢗꢵꢬꢾ ꢪꣁꢛ꣄ꢗꢶꢭꢶ ꢓꢵꢭ꣄ ꢨꢶꢱꢾꢱꢶ ꣎ ꢱꢵꢪ꣄ꢪꢸ ꢲꣁꢡꢾ ꢩꢾꢠ꣄ꢞꢸ ꢄꢫꢾ ꢨꢶꢱꢶꢬꢶꢫꣁ ꢩꢾꢠ꣄ꢞꢸ ꢆꢛ꣄ꢗꣁ ꢤꢸꢪ꣄ꢒꢶꢭꢶ ꢣꢜꢶꢒꢶꢥ꣄ ꢡꢷꢬꢸꢒꢸ ꢙꢶꢫꢾꢱꢶ ꣎ ꢧꢭ꣄ꢗꣁ ꢂꢖ꣄ꢔꣁꢠ꣄ꢜꢾ ꢩꢾꢠ꣄ꢞꢸ ꢥꢾꢣ꣄ꢣꢶ ꢣꢞꢶꢥꢸ ꢡꢷꢬꢸꢒꢸ ꢙꢶꢫꢾꢱꢶ ꣎ ꢣꢷ ꢩꢾꢠ꣄ꢞꢸꢥ꣄ ꢗꣁꢒ꣄ꢒꢜ꣄ ꢤꢵꢥꢸꢒꢸ ꢮꢡ꣄ꢡꣁ ꢒꢾꢬ꣄ꢭꢶ ꢱꣁꢞꢶꢣꢷꢭꢶ ꢙꢶꢫꢾ ꢲꢵꢭꢶꢪ꣄ ꢙꢷꢮꢸꢒꢸ ꢒꣁꢥ꣄ꢥꢶ ꢲꢵꢥꢶ ꢑꢥꢵꢱ꣄ꢡꢒꢸ ꢡꢾꢥ꣄ꢡꢾꢥꢸ ꢡꢾꢖ꣄ꢒ ꢡꢷꢬꢸꢒꢸ ꢱꣁꢥ꣄ꢡꣂꢰ꣄ꢒꢥꢶ ꢙꢶꢫꢾꢱꢶ ꣎꣎
Leave a Reply
You must be logged in to post a comment.