ꢣꢷ ꢩꢾꢠ꣄ꢞꢸꢥ꣄

ꢦꢳ꣄ꢒꢵꢬ꣄ ꢦꢸꢬꢶꢪ꣄ ꢡꢵꢦꢶ ꢪꢾꢥꢥ꣄ ꢥꢵꢮꢸꢪ꣄ ꢫꣂꢒ꣄ ꢥꢾꢣ꣄ꢣꢶ ꢤꢪꢶꢭꢿꢡꢸ ꢲꣁꢡꢾꢱ꣄ ꣎ ꢡ꣄ꢫꢾ ꢥꢾꢣ꣄ꢣꢶ ꢣꢜꢱ꣄ꢡꢒꢸ ꢚꢵꢞꢸ ꢒꢵꢰ꣄ꢜꢸꢥ꣄ ꢲꢵꢭꢶ ꢫꣂꢒ꣄ ꢱꢿꢡꢸ ꢩꢥ꣄ꢣꢶ ꢲꣁꢡ꣄ꢫꢵꢱ꣄ ꣎ ꢡ꣄ꢫꢾ ꢱꢿꢡꢸꢪ꣄ ꢏꢠ꣄ꢜꢾ ꢡꢾꢥꣁ ꢪꢵꢡ꣄ꢬꢪꢸꢱ꣄ ꢗꢭꢶ ꢙꢵꢡ꣄ꢡꢒꢸ ꢪꢸꢱꣀ ! ꢡꢶꢱꢵꢥ꣄ ꢥꢴꢥ꣄ꢥ ꢱꢿꢡꢸ ꢡ꣄ꢫꢾ ꣎

ꢏꢣꢶ ꢡ꣄ꢫꢾ ꢱꢿꢡꢸꢪꢸ ꢒꢳꣁ ꢲꢸꢙꢵꢳꢸꢪ꣄ ꢣꢷ ꢩꢾꢠ꣄ꢞꢸꢥ꣄ ꢮꢾꢣꢸꢬ꣄ ꢮꢾꢣꢸꢬ꣄ ꢗꢭꢶ ꢂꢮꢾꢱ꣄ ! ꢥꢴꢥ꣄ꢥ ꢱꢿꢡꢸ ꢲꢵꢭꢶ ꢣꢶꢫ꣄ꢫꣁ ꢌꢖ꣄ꢔꢸꢜ꣄ ꢡꢾꢖ꣄ꢔꢸꢜ꣄ ꢙꢵꢡ꣄ꢡꢒꢸ ꢪꢸꢱꢾꢥꢶ ꣎ ꢲꢸꢙꢵꢳ꣄ ꢩꢾꢠ꣄ꢞꢸ ꢒꢳꣁ ꢩꢾꢠ꣄ꢞꢸꢒꢸ ꢯꢾꢫ꣄ꢥꢸ “ꢲꢿ ꢡꢩꢵ ! ꢡꢹ ꢦꢱ꣄ꢒꢜ꣄ ꢧꢶꢬꢶ ꢙꢵ ! ꢪꢷ ꢡ꣄ꢫꢾ ꢡꢷꢬꢸꢒꢸ ꢙꢥꣁ ꢲꣂꢬꢶꢫꣁ ! ꢪꢷ ꢡꢾꢖ꣄ꢔꢸꢜꢸꢪꢸ ꢙꢶꢫ꣄ꢬ꣄ ꢧꢬꢵꢡꢸ ꢡꢹ ꢌꢖ꣄ꢔꢸꢜꢸꢪꢸ ꢙꢮ꣄ꢮꢵꢫꢶ!” ꢪꢾꢥꢶ ꢪꢾꢥꢾꢱ꣄ ꣎

ꢄꢫꢾ ꢎꢒꢾ ꢒꢳꣁ ꢩꢾꢠ꣄ꢞꢸ “ ꢲꢿ ꢯꢸꢩꢵ ꢪꢷꢱ꣄ ꢌꢭ꣄ꢭꢾ ꢱꢿꢡꢸꢪ꣄ ꢧꣀꢭꣁꢒꢥꢶ ꢲꢶꢖ꣄ꢔꢶ ꢂꢮꢾꢫꣁ ! ꢡꢾꢒ ꢲꢵꢭꢶ ꢡꢹꢱ꣄ ꢦꢱ꣄ꢒꢜ꣄ ꢧꢶꢬꢶ ꢙꢷꢒꢶꢥ꣄ ꢪꣁꢒꣁ ꢮꢵꢜ꣄ ꢱꣁꢠ꣄ꢠꣁ” ꢪꢾꢥꢶ ꢪꢾꢥꢾꢱ꣄ ꣎ ꢄꢱꣂꢱ꣄ꢒꢥꢶ ꢣꢷ ꢩꢾꢠ꣄ꢞꢸꢪ꣄ ꢮꢵꢡ꣄ꢡꢵꢪ꣄ ꢫꢸꢣ꣄ꢤꢸ ꢒꢾꢬ꣄ꢭꢿꢡꢸ ꢲꣁꢡꢾꢱ꣄ ꣎ ꢧꢭ꣄ꢗꣁ ꢮꢡ꣄ꢡꢵꢫꢸꢣ꣄ꢤꢸ ꢲꣁꢞꢶꢥꢸ ꢣꣁꢱ꣄ꢒꣁ ꢤꢶꢒ꣄ꢒꢶꢭꢶ ꢫꢸꢣ꣄ꢤꢸ ꢒꢾꢬꢥ꣄ ꢥꢶꢒꢶꢳꢾꢱ꣄ ! ꢣꣁꢱ꣄ꢒꣁ ꢤꢶꢒ꣄ꢒꢶꢭꢶ ꢫꢸꢣ꣄ꢤꢸ ꢒꢾꢬꢾ ꢲꢵꢭꢶ ꢡ꣄ꢫꢾ ꢒꢵꢰ꣄ꢜꢸ ꢱꢿꢡꢸꢪ꣄ ꢲꢶꢨ꣄ꢨꢱ꣄ꢡꢒꢸ ꢯꢾꢒ꣄ꢒꢥꢵꢱ꣄ꢡꢒꢸ ꢣꢷ ꢩꢾꢠ꣄ꢞꢸꢥ꣄ ꢡꢵꢦꢶ ꢥꢣꢶꢪ꣄ ꢦꣁꢞꢶ ꢦ꣄ꢬꢮꢵꢲꢸꢪ꣄ ꢱꢪ꣄ꢜꢶ ꢥꢾꢣ꣄ꢣꢶ ꢙꢶꢫꢾꢦꣂꢒꢸꢪ꣄ ꢙꢷꢒꢶꢥ꣄ ꢙꢷꢮ꣄ ꢱꣁꢞ꣄ꢫꢵꢱ꣄ ꣎ 

ꢢꢾꢮ꣄ꢞꣁ ꢪꢵꢱꢸꢥ꣄ ꢧꢭ꣄ꢗꣁ ꢡꢾꢭ꣄ꢭꢿ ꢢꢵꢪ꣄ꢪꢸ ꢣꢸꢱꢸꢬꢾ ꢣꢷ ꢩꢾꢠ꣄ꢞꢸꢥ꣄ ꢣꢾꢒ꣄ꢒꢶꢭꢶꢫꢾꢱ꣄ ꣎  ꢡ꣄ꢫꢾ ꢏꢙꢥꢵꢒꢸ ꢏꢙꢥꣁ ꢚꢾꢞꣁ ꢪꢭ꣄ꢭꢸꢥꢵꢱ꣄ꢡꢒꢸ ꢡꢾꢖ꣄ꢒꢵꢪ꣄ ꢡꢾꢥꢸ ꢮꢡ꣄ꢡꣁ ꢒꢾꢬ꣄ꢭꢶꢥꢸ ꢥꢾꢣ꣄ꢣꢶ ꢣꢞꢱ꣄ꢡꢒꢸ ꢮꢵꢜ꣄ ꢒꢾꢬ꣄ꢭꢶꢫꢾꢱ꣄ ꣎  ꢌꢪꢵꢪ꣄ ꢣꢷ ꢩꢾꢠ꣄ꢞꢸꢥꢸꢪ꣄ ꢫꣂꢒ꣄ ꢩꢾꢠ꣄ꢞꢸ ꢂꢦꢸꢭ꣄ ꢦꢵꢛ꣄ ꢗꢵꢬꢾ ꢪꣁꢛ꣄ꢗꢶꢭꢶ ꢓꢵꢭ꣄ ꢨꢶꢱꢾꢱ꣄ ! ꢱꢵꢪ꣄ꢪꢸ ꢲꣁꢡꢾ ꢩꢾꢠ꣄ꢞꢸ ꢄꢫꢾ ꢨꢶꢱꢶꢬꢶꢫꣁ ꢩꢾꢠ꣄ꢞꢸ ꢆꢛ꣄ꢗꣁ ꢤꢸꢪ꣄ꢒꢶꢭꢶ ꢣꢞꢶꢒꢶꢥ꣄ ꢡꢷꢬꢸꢒ꣄ ꢙꢶꢫꢾꢱ꣄ ꣎ ꢧꢭ꣄ꢗꣁ ꢂꢖ꣄ꢔꣁꢠ꣄ꢜꢾ ꢩꢾꢠ꣄ꢞꢸ ꢥꢾꢣ꣄ꢣꢶ ꢣꢞꢶꢥꢸ ꢡꢷꢬꢸꢒꢸ ꢙꢶꢫꢾꢱ꣄ ꣎

ꢣꢷ ꢩꢾꢠ꣄ꢞꢸꢥ꣄ ꢗꣁꢒ꣄ꢒꢜ꣄ ꢤꢵꢥꢸꢒꢸ ꢮꢡ꣄ꢡꣁ ꢒꢾꢬ꣄ꢭꢶ ꢱꣁꢞꢶꢣꢷꢭꢶ ꢙꢶꢫꢾ ꢲꢵꢭꢶꢪ꣄ ꢙꢷꢮꢸꢒ꣄ ꢒꣁꢥ꣄ꢥꢶ ꢲꢵꢥꢶ ꢑꢥꢵꢱ꣄ꢡꢒꢸ ꢡꢾꢥ꣄ꢡꢾꢥꢸ ꢡꢾꢖ꣄ꢒ ꢡꢷꢬꢸꢒꢸ ꢱꣁꢥ꣄ꢡꣂꢰ꣄ꢒꢥꢶ ꢙꢶꢫꢿꢱ꣄ ꣏

ꢒꢵꢰ꣄ꢜꢸꢥ꣄ = ꢒꢾꢜ꣄ꢜꢾꢥ꣄, ꢭꣀꢞꢵꢥ꣄ ; ꢡꢩꢵ, ꢯꢸꢩꢵ = ꢨꢾꢠ꣄ꢞꢸ ꣎