ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢂꢜ꣄ꢮꣁ ꢣꢶꢥ꣄ꢥꢸ ꣎
ꢂꢒꢵꢱ꣄ꢬꢴꢾꢫ꣄ ꢍꢭꣂꢒꢸꢒ꣄ ꢗꢭꢶꢫꢮꢥ꣄ ꢲꢵꢭ꣄ꢡꢿꢪꢲꢵꢪꢺꢡꢸ ꢪꢾꢥ꣄ꢙꢥ꣄ꢭꢥ꣄ ꢪꢵꢬ꣄ꢔꢸ ꢪꢾꢥꢶ ꢪꢵꢤꢵꢥꢸꢨꢖ꣄ꢔꢶ ꢩꢮꣁ ꢯ꣄ꢬꢷꢣ꣄ꢮꢶꢥꢸꢪ꣄ ꢮꢶꢱ꣄ꢡꢵꢬ꣄ ꢲꣁꢫꢾ ꢮꢶꢰꢫꢸ ꢥꢴꢥ꣄ꢥꢒꢥꢶ ꢱꢖ꣄ꢔꢶꢬꢵꢱ꣄ | ꢦꣁꢮ꣄ꢱꢸ ꢂꢪ꣄ꢒꣁ ꢂꢪꢺꢡꢸ ꢡ꣄ꢫꢿ ꢪꢲꢵꢑꢰꢤꢸ ꢱꣁꢒꢥ꣄ ꢂꢒꣁ ꢱꢬ꣄ꢮꢡ꣄ꢬ ꢬꣂꢔꢸꢥ꣄ ꢨꢬꣁ ꢒꢾꢬꢫ꣄ |
ꢒꢵꢫꢶ ꢡꢶꢥ꣄ꢥꢵꢳꢸ ꢮꢶꢰꢫꢪ꣄ ꢱꢖ꣄ꢔꢸꢥꢵꢡ꣄ꢡꣁ ꢓꢾꢥꢶ ꢔꣃꢭꢿꢡ꣄ ꢯꢿ ! ꢬꢴꢮꣁ ꢬꢴꢮꣁ ꢍꢜ꣄ ꢪꢤꢸꢬꢾꢪ꣄ ꢡꢶꢥ꣄ꢥꢵꢳ꣄ ꢲꢬꢸꢪ꣄ꢨꢪ꣄ ꢲꣁꢫꢾꢮꢿꢳ꣄ ꢬꢴꢷ ꢦꣁꢮ꣄ꢱ꣄ ꢦꣁꢮ꣄ꢱ꣄ ꢦꣁꢮ꣄ꢱ꣄ ꢪꢾꢥꢶ ꢦꣁꢮ꣄ꢱ꣄ ꢭꢸꢗ꣄ꢗꢶ ꢂꢱ꣄ꢒꢶꢥꢵꢒ꣄ ꢱꣁꢥ꣄ꢡꣂꢰ꣄ ꢣꢿꢬꢱ꣄ ꢄꢫꢾ ꢱꣁꢥ꣄ꢡꢸ ꢂꢱ꣄ꢒꢶ ꢪꢷꢥꢵꢒ꣄ꢰꢶ ꢂꢪ꣄ꢪꢵ ꢒꢺꢦꣁ ꢲꢵꢭꢶꢱ꣄ ꢂꢪ꣄ꢒꣁ ꢂꢨ꣄ꢨꢶꢭꢿꢡ꣄ ꢯꢿꢡ꣄ꢡꢾ ꢡꢾꢒ ꢲꢵꢭꢶꢱ꣄ ꢬꢸꢮ꣄ꢮꣁ ꢦꣁꢮ꣄ꢱ꣄ ꢤꢾꢬꢶ ꢱꢖ꣄ꢔꢾꢫꣁ || ꢲꢵꢭꢵꢱ꣄ꢫ ꢒ꣄ꢰꢿꢡ꣄ꢬꢸ ꢬꢵꢙ꣄ꢙꢭꢡ꣄ꢡꢒ꣄ ꢲꢶꢥ꣄ꢣꣁ ꢪꢷꢥꢵꢒ꣄ꢰꢶ ꢂꢪ꣄ꢨꢵꢒ꣄ ꢦꢜ꣄ꢜꢵꢨꢶꢰꢿꢒ꣄ |
ꢲꢶꢥ꣄ꢣꣁ ꢬꢴꢷ ꢱꣂ ꢪꢴꢞꣁ ꢂꢪ꣄ꢪꣁꢒꢶꢥ꣄ ꢧꢭ꣄ꢗꣁ ꢱꣂ ꢪꢴꢞꣁ ꢂꢫ꣄ꢫꣁ ꢂꢪ꣄ꢒꣁ ꢬꢵꢙ꣄ꢙꢭꢬꢶꢫꣁ | ꢲꢵꢭꢵꢱ꣄ꢫ ꢒ꣄ꢰꢿꢡ꣄ꢬꢸ, ꢣ꣄ꢮꢵꢣꢵꢱꢥ꣄ꢡ ꢒ꣄ꢰꢿꢡ꣄ꢬꢸ, ꢒꢣꢪ꣄ꢨꢮꢥꢪ꣄ ꢪꢾꢥꢾꢡ꣄ ꢪꢤꢸꢬꣀ ꢪꢾꢥꢶ ꢂꢬ꣄ꢢꢸ | ꢲꢶꢥ꣄ꢣꣁ ꢱꣁꢳꢧꢵꢬ꣄ ꢒꣁꢪ꣄ꢨ꣄ꢳꣁ ꢲꢹꢥ꣄ ꢱꢶꢳ꣄ꢳꣁ ꢮꢬꣁ ꢲꢥ꣄ꢭꢿꢡ꣄ ꢬꢴꢡꣁ ꢥꢴꢥ꣄ ꢬꢢꢸꢪ꣄ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢪꢵꢱꢶ ꢮꢷꢡꢸꢥꢸꢪ꣄ ꢏꢬꢵꢡ꣄ ꢂꢮ꣄ꢫꢵꢱꢶ | ꢮꢷꢳ꣄ꢜꣁ ꢬꢸꢮ꣄ꢮꣁ ꢕꢾꢞꢶ ꢦꣁꢮ꣄ꢱ꣄ ꢦꣁꢞꢾꢱ꣄ ꢪꢵꢡꢖ꣄ꢔꢶ ꢪꢵꢫꢶꢒ꣄ ꢦꢜ꣄ꢜꢵꢨꢶꢰꢿꢒ꣄ ꢥꢴꢥ꣄ꢥꢵꢥ꣄ ꢬꢴꢷ ꢪꢴꣁꢜ꣄ꢜꢵꢥ꣄ ꢭꢾꢥ꣄ꢡꢸ ꢦꢜ꣄ꢜꢵꢨꢶꢰꢿꢒ꣄ ꢱꢵꢡ꣄ꢡꢒ꣄ ꢙꢿ ꢙꢿ ꢒꢾꢬꢶ ꢤꣃꢬꢵꢪ꣄ ꢪꢶꢳ꣄ꢫꢵꢱꢶ |
ꢪꢷꢥꢭꣂꢗꢶꢥꢶ ꢪꢵꢫꢶ ꢭꢷꢪ꣄ꢧꢹꢭ꣄ ꢲꢵꢬ꣄ ꢕꢭ꣄ꢭꢶ ꢱꣂꢦꢵꢛ꣄ ꢦꢷꢝꢪꢸ ꢱꢶꢖ꣄ꢔꢵꢬ꣄ꢒꢥꢶ ꢨꢶꢱꢶ ꢲꣁꢣꢶꢱ꣄ ꢪꢵꢫꢶꢒ꣄ ꢦꣁꢪ꣄ꢨ꣄ꢳꢵ ꢒ꣄ꢬꢶꢞꢶ ꢕꢭꢶ ꢲꢵꢡꢸꢪ꣄ ꢔꢵꢪ꣄ ꢦꢬꢶꢦꢵꢭꢥꣁ ꢒꢬꢱ꣄ꢡꢒ꣄ ꢬꢵꢙ꣄ꢫ ꢣꢠ꣄ꢞꢸ ꢣꢷꢒꢶꢥ꣄ ꢮꢿꢣ ꢪꢥ꣄ꢡ꣄ꢬ ꢆꢗ꣄ꢗꢵꢞꢥꢵꢥ꣄ ꢒꢾꢬꢶꢥ꣄ ꢱꢲꢱ꣄ꢬꢧꢹꢭꢸ ꢂꢬ꣄ꢗꢥꢵꢥ꣄ ꢒꢾꢬꢶ ꢮꢶꢰꢿꢱ꣄ꢒꢥꢶ ꢦꢜ꣄ꢜꢵꢨꢶꢰꢿꢒ꣄ ꢲꣁꢫꢾꢱꢶ ꢲꢶꢥ꣄ꢣꣁ ꢬꢴꢷ ꢱꣂ ꢪꢴꢞꣁ ꢂꢪ꣄ꢨꢵ ꢬꢙ꣄ꢙꢶꢱ꣄ | ꢥꢴꢸꢬꢸꢒ꣄ ꢦꢙꢾ ꢲꣁꢫꢾꢫꣁ ꢂꢱ꣄ꢒꢶ ꢙꢾꢥꢾ ꢪꢵꢫ꣄ ꢒꢾꢬꢬꢶꢫꣁ ꢱꣁꢒꢥ꣄ ꢂꢮ꣄ꢬꢾ ꢪꢷꢥꢵꢒ꣄ꢰꢶ ꢪꢵꢫꢶ ꢥꢴꢸꢬꢸꢥ꣄ ꢲꣁꢫꢾ ꢂꢪ꣄ꢒꣁ ꢦꢙꢾ ꢲꣁꢫꢾꢫꣁ ꢂꢱ꣄ꢒꢶ ꢣꢷꢒꢶꢥ꣄ ꢬꢒ꣄ꢰꢥꣁ ꢒꢾꢬꢛ꣄ꢙꢵꢱ꣄ | ꢪꢬꢒꢡ ꢯ꣄ꢫꢵꢪ ꢮꢬ꣄ꢠꢸꢪ꣄ ꢯꢿꢡ꣄ꢡꢾ ꢪꢵꢡꢖ꣄ꢔꢶ ꢪꢵꢫꢶ ꢒꢣꢪ꣄ꢨꢮꢥ ꢮꢵꢱꢶꢥꢶ ꢒꢭ꣄ꢫꢵꢠꢶ ꢂꢪ꣄ꢒꣁ ꢬꢒ꣄ꢰꢶ ꢂꢪ꣄ꢨꢵ ꢪꢾꢥꢶ ꢪꢲꢵꢒꢮꢶ ꢒꢵꢳꢶꢣꢵꢱꢸ ꢪꢷꢥꢵꢒ꣄ꢰꢶ ꢪꢵꢫꢶꢒ꣄ ꢥꢸꢣꢶꢬꢵꢱ꣄ |
ꢦꢜ꣄ꢜꢵꢨꢶꢰꢿꢒ꣄ ꢲꣁꢫꢾ ꢕꢾꢞꢶ ꢂꢒꢵꢱꢸꢪ꣄ ꢬꢴꢷ ꢄꢥ꣄ꢣ꣄ꢬꢸ ꢧꢹꢭ꣄ ꢭꢸꢗ꣄ꢗꢬꢶꢫꣁ ꢱꣁꢒꢥ꣄ ꢦꣁꢮ꣄ꢱ꣄ ꢭꢸꢗ꣄ꢗꢶ ꢔꢵꢪꢸꢬ꣄ ꢪꢖ꣄ꢔꢭꢸꢥ꣄ ꢙꢸꢞꢛ꣄ꢙꢵꢱ꣄ ꢪꢾꢥꢶ ꢒꢳꢞ꣄ꢫꢵꢱ꣄ | ꢧꢭ꣄ꢗꣁ ꢬꢸꢮ꣄ꢮ ꢕꢾꢞꢶꢪ꣄ ꢦꣁꢮ꣄ꢱ꣄ꢱꢸꢜ꣄ꢜꢾꢱ꣄ ꢂꢮ꣄ꢬꢾ ꢦꢜ꣄ꢜꢪꢲꢶꢰꢶꢒꢥ꣄ ꢯꢿꢡ꣄ꢡꢾ ꢪꢷꢥꢵꢒ꣄ꢰꢶꢫꢪ꣄ꢨꣁ ꢱ꣄ꢮꢿꢡ ꢱꢶꢪ꣄ꢲ ꢮꢵꢲꢥꢵꢪ꣄ ꢲꢶꢖ꣄ꢔꢶ ꢂꢦꢸꢭ꣄ ꢔꢵꢪꢸ ꢙꢥꢸꢥꢸꢒ꣄ ꢣꢾꢒ꣄ꢒꢶ ꢡꢾꢖ꣄ꢒ ꢡꢾꢖ꣄ꢒ ꢒꢰ꣄ꢜꢸꢥ꣄ ꢥꢶꢮꢬ꣄ꢡꢶ ꢒꢾꢬ꣄ꢭꢿꢡ꣄ ꢱꣁꢥ꣄ꢡꣂꢰ꣄ꢒꢥꢶ ꢪꢵꢱꢶ ꢮꢷꢡꢸꢥꢸꢪ꣄ ꢏꢬꢵꢡ꣄ ꢂꢮꢶꢱꢶ |
ꢙꢥꢸꢥ꣄ ꢏꢒ꣄ꢒꣁꢒ꣄ꢒꣁ ꢡꢾꢥꢸ ꢡꢾꢖ꣄ꢒ ꢡꢾꢖ꣄ꢒ ꢪꣁꢥ꣄ꢥꢸꢪ꣄ ꢯꢿꢡ꣄ꢡꢾ ꢪꢵꢫ꣄ ꢙꣁꢮꢳ꣄ ꢱꢖ꣄ꢔꢶ ꢩꢵꢬ꣄ ꢲꢸꢡ꣄ꢬꢭ꣄ꢭꢶꢫꢵꢱꢶ |
ꢂꢪꢶ ꢦꢜ꣄ꢜꢵꢨꢶꢰꢿꢒ꣄ ꢱꢷꢡꢶꢒꢶꢥ꣄ ꢪꢵꢡꢖ꣄ꢔꢶ ꢪꢵꢫ꣄ ꢙꣁꢮꢳ꣄ ꢂꢮ꣄ꢬꢾ ꢱꣃꢬꢵꢰ꣄ꢜ꣄ꢬ ꢱꢪꢹꢲ ꢱ꣄ꢡꢶꢢꢶ ꢱꢖ꣄ꢔꢶꢡꢶ ꢱꣃꢬꢵꢰ꣄ꢜ꣄ꢬ ꢩꢵꢰꣁ ꢲꣂꢬ꣄ ꢲꣂꢬꢸ ꢗꢾꢞꢶꢫꢮꢱ꣄ꢡꣁ ꢮꢵꢜ꣄ ꢣꢾꢒ꣄ꢒꢵꢞ꣄ ꢪꢵꢫꢶ ꢪꢾꢥꢶ ꢱꢖ꣄ꢔꢸꢣꣁ ꢡꢡꢵꢱ꣄ꢡꢸ ꢡꢡꢵꢱ꣄ꢡꢸ ꢪꢾꢥꢶ ꢪꢵꢡꢖ꣄ꢔꢶ ꢪꢵꢫꢶ ꢂꢪ꣄ꢒꣁ ꢃꢱꢶꢥ꣄ꢣꢷꢒꢶꢥ꣄ ꢬꢒ꣄ꢰꢶꢱꢶ ꢂꢪꢶ ꢱꣁꢥ꣄ꢡꢸꢒꢥꢶ ꢕꢿꢬꢮ꣄ꢫꢵꢱꢶ ||
Leave a Reply
You must be logged in to post a comment.