ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢱꣁꢮ꣄ꢮꣁ ꢣꢶꢥ꣄ꢥꢸ ꢱꢾꢥ꣄ꢥꢸ ꣎
ꢪꢤꢸꢬꢾꢪ꣄ ꢡꢶꢥ꣄ꢥꢵꢳ꣄ ꢲꢬꢸꢪ꣄ꢨꢪ꣄ ꢲꣁꢫ꣄ꢫꣁ ꢪꢾꢥꢾꢡ꣄ ꢲꢹꢥꢸ ꢒꢵꢭꢪ꣄ ꢪꢾꢳ꣄ꢳꢶ ꢦꣁꢮ꣄ꢱꢸ ꢒꢵꢭꢪ꣄ ꢲꣁꢫ꣄ꢫꢵꢬꢱ꣄ ꣎ ꢔꢵꢪ꣄ ꢱꢶꢳ꣄ꢳꣁ ꢲꣁꢫꢶꢒꢶꢥ꣄ ꢙꢥꢸꢥ꣄ ꢪꣁꢥ꣄ꢥꢸꢪ꣄ ꢱꣁꢥ꣄ꢡꢸ ꢆꢡ꣄ꢱꢵꢲ꣄ ꢪꢾꢥꢥ꣄ ꢧꢹꢭ꣄ ꢧꢸꢭꢬꢱ꣄ | ꢥꢴꢸꢬꢸꢥꢸꢒ꣄ ꢲꢹꢥꢸꢪ꣄ ꢩꢬꢵꢜ꣄ ꢤꢞ꣄ꢞꢸꢥꢵꢥ꣄ ꢪꢵꢫ꣄ ꢨꢵꢦꢸꢥ꣄ ꢡ꣄ꢫꢿ ꢱꣁꢒꢥꢸꢱ꣄ ꢪꢷꢥꢵꢒ꣄ꢰꢶꢒꢶꢥ꣄ ꢱꢸꢥ꣄ꢣꢬꢿꢯꣁ ꢂꢪ꣄ꢒꣁ ꢪꢵꢫ꣄ ꢨꢵꢦ꣄ꢒꢥꢶ ꢬꢴꢷꢭꢶ ꢡꢾꢖ꣄ꢒ ꢣꢬ꣄ꢱꢥꣁ ꢒꢾꢬꢡ꣄ꢡꢒ꣄ ꢂꢮꢥ꣄ ꢥꢴꢸꢬꢸꢥ꣄ ꢲꢹꢥꢸꢪ꣄ ꢒꢾꢰ꣄ꢜꢪ꣄ ꢦꣁꢞꢥ꣄ ꢲꣂꢥꢵ ꢪꢾꢥ꣄ꢡꢶ ꢪꢿꢕ꣄ ꢪꢾꢥꢥ꣄ ꢒꢳ ꢱꢡꢶ ꢲꣂꢬ꣄ ꢱꢸꢬꢶꢡꢸꢒ꣄ ꢚꢔꢶꢭ꣄ꢭꢶ ꢲꢸꢥꢳꢵ ꢡꢵꢦꢸꢪ꣄ ꢬꢴꢷ ꢂꢪ꣄ꢒꣁ ꢬꢒ꣄ꢰꢬꢶꢫꣁ ꢣꣁꢳꢲꣂꢬ꣄ ꢱꢷꢒꢶꢥ꣄ ꢙꢥ꣄ꢭꢸꢮꢵꢬꢱ꣄ |
ꢱꣁꢮ꣄ꢮꣁ ꢣꢶꢥ꣄ꢥꢸ ꢱꢾꢥ꣄ꢥꢸꢒ꣄ ꢱꣁꢪ꣄ꢦꢸꢒꢥ꣄ ꢙꢶꢫꢾꢥ꣄ ꢂꢮꣁ ꣎ ꢱꣁꢳꣁ ꢲꣁꢫꢾꢱ꣄ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢏꢬꢵꢡꢵ ꢂꢮꢡ꣄ꢡꢒ꣄ ꢂꢱ꣄ꢒꢶ ꢎꢡꣁ ꢲꣁꢫ꣄ꢭꢿꢡ꣄ ꢲꣁꢡꢾꢱ꣄ ꣎ ꢪꢖ꣄ꢔꢭ ꢮꢵꢡ꣄ꢫꢪꢸꢥ꣄ ꢮꣃꢙꢶꢭꢿꢡ꣄ ꢔꢵꢫ꣄ ꢔꢙꢸꢥ꣄ ꢱꣁꢪ꣄ꢪꢬ꣄ ꢂꢮ꣄ꢡꣁ ꢦꢱ꣄ꢒꢜ꣄ ꢱꣁꢥ꣄ꢥꢵ ꢬꢾꢡ꣄ꢡꢸꢪ꣄ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢙꢥꢸꢥꢸꢒ꣄ ꢂꢥꢸꢔ꣄ꢬꢲꢸ ꢒꢾꢬꢡ꣄ꢡ ꢥꢶꢔꢶꢳꢶꢫꢵꢱ꣄ | ꢒꣃꢠꢱ꣄ ꢣꢾꢒ꣄ꢰꢠ꣄ ꢏꢱ꣄ꢱꣁ ꢆꢡ꣄ꢡꢬ꣄ ꢪꢵꢱꢶ ꢮꢷꢡꢸꢪ꣄ ꢏꢬꢵꢡ꣄ ꢂꢮ꣄ꢫꢵꢱ꣄ |
ꢮꢷꢡ꣄ꢒꢷ ꢙꢥꢱꢪꢸꢣ꣄ꢬꢸꢒꢷ ꢪꢾꢥꢶ ꢲꢜ꣄ꢮꢵꢡ꣄ꢡꢶꢱꣁ ꢣꢿꢮꢸꢒ꣄ ꢱꢵꢡ꣄ꢡꣁ ꢙꢥꢸꢥ꣄ ꢪꢶꢳꢶ ꢲꣁꢣ꣄ꢫꢵꢱ꣄ ꣎ ꢥꢴꢥ꣄ꢥ ꢥꢴꢥ꣄ꢥ ꢥꢴꢸꢬꢸꢥꢸꢒ꣄ ꢪꢷꢥꢵꢰꢶ ꢂꢪ꣄ꢪꣁ ꢱꣁꢒꢥ꣄ ꢂꢭꢖ꣄ꢒꢵꢬ꣄ ꢒꢾꢬꢶꢒꢶꢥ꣄ ꢡꢶꢥ꣄ꢥꢵꢳꢸꢒ꣄ ꢨꣁꢳ꣄ꢳꢶ ꢂꢮꢶ ꢲꣁꢣ꣄ꢫꢵꢱ꣄ | ꢄꢱꣁꢒꢥꢶ ꢱꣁꢳꢧꢵꢬ꣄ ꢗꢸꢜ꣄ꢜꢸ ꢪꢸꢱꢳ꣄ꢳꢶ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢤꣃꢬ ꢨꢶꢡ꣄ꢡꢬ꣄ ꢙꢶꢫꢵꢱꢶ | ꢲꢹꢥꢶ ꢏꢱ꣄ꢡꢵꢪ꣄ ꢂꢮꢾ ꢧꢭ꣄ꢗꣁ ꢧꢷꢬ꣄ ꢔꢵꢪꢸ ꢪꢾꢥ꣄ꢒ꣄ꢫꢵꢥ꣄ ꢱꢾꢥ꣄ꢡ ꢩꢬꢵꢜ꣄ ꢔꢵꢪꢸ ꢬꢴꢷ ꢂꢮꢾ ꢙꢥꢸꢥ꣄ ꢪꢾꢳ꣄ꢳꣁ ꢪꢶꢳꢶꢫꢵꢱ꣄ ꣎ ꢙꢿ ꢙꢿ ꢒꢾꢬꢶ ꢪꢹꢔꣁ ꢆꢒ꣄ꢒꢸ ꢓꢵꢪ꣄ꢨꢸ ꢪꣃꢞꢓꢵꢭ꣄ ꢏꢬ꣄ꢱꢸ ꢲꣁꢫꢵꢡ꣄ꢡꢾꢥꢸ ꢂꢱ꣄ꢒꢶ ꢨꢶꢱꢶꢭꢶ ꢣꢿꢮ꣄ ꢂꢮꢬꢶꢫꣁ ꢱꢶꢳꢿꢡ꣄ ꢦꢵꢛ꣄ꢪ꣄ ꢦꣁꢞ ꢲꣁꢣ꣄ꢫꢵꢱ꣄ |
ꢂꢪꢶ ꢲꢶꢥ꣄ꢣꣁ ꢬꢵꢪꢥꢮꢪꢶ ꢲꢵꢭꢶꢥ꣄ ꢆꢡ꣄ꢡꢬ꣄ ꢪꢵꢱꢶ ꢮꢷꢡꢸꢪ꣄ ꢯꢿꢡ꣄ꢡꢾ ꢬꢵꢪꢵꢫꢠ ꢗꢵꢮꢞꢶ ꢪꢾꢥꢥ꣄ ꢪꣁꢠ꣄ꢞꢮꢸꢒ꣄ ꢙꢷꢒꢶꢥ꣄ ꢣꢿꢮ꣄ ꢱꢶꢫꢾꢫꣁ ꣎ꢃꢲꢵ ꢃꢲꢵ ꢒꢵꢫ꣄ ꢱꢶꢖ꣄ꢔꢵꢬ꣄ ꢒꢵꢫ꣄ ꢱꢶꢖ꣄ꢔꢵꢬ꣄ ꢂꢮ꣄ꢬꢾ ꢪꢾꢥ꣄ꢒ꣄ꢫꢵꢥ꣄ ꢮꢶꢥꢾ ꢲꢳ꣄ꢞꢸꢥꢵꢮꢥꢶ ꢦꢰꢸꢡꢸ ꢱꣃꢭꣁ ꢧꢶꢬ꣄ꢭꢶ ꢱꣁꢥ꣄ꢥꢵ ꢂꢞ꣄ꢔꢾꢭ꣄ ꢮꢙ꣄ꢙꢶꢬꢸ ꢪꢸꢒ꣄ꢒꢸꢬ꣄ ꢧꣀꢭꢵꢡꢶ ꢩꢹꢰꢸꢥ꣄ ꢕꢭ꣄ꢭꢶ ꢪꢸꢔꢸꢳ꣄ꢲꢱꣁ ꢲꢱꢶꢭꢶ ꢱꢶꢔꢥ꣄ꢣ ꢱꢶꢳ꣄ꢳꣁ ꢮꢬꣁ ꢲꢥ꣄ꢭꢿꢡ꣄ꢒꢥ꣄ ꢤꢾꢬꢸꢪꢸ ꢉꢦ꣄ꢒꢥꢶ ꢯꢿꢡ꣄ꢡꢾ ꢱ꣄ꢮꢿꢡ ꢈꢰꢩꣁ (ꢬꢸꢦ꣄ꢦꢵ ꢈꢰꢩꣁ) ꢲꣂꢬ꣄ ꢬꢵꢙ ꢔꢪ꣄ꢨꢷꢬꢪ꣄ꢒꢥ꣄ ꢨꢶꢱꢶꢭꢶ ꢂꢪ꣄ꢒꣁ ꢂꢱ꣄ꢒꢶ ꢪꢔꢾ ꢮꢬꢸꢥ꣄ ꢣꢶꢭꢿꢡ꣄ ꢪꢷꢥꢵꢒ꣄ꢰꢶ ꢂꢪ꣄ꢨꣁ ꢪꢖ꣄ꢔꢭ ꢦꢯꢸꢥ꣄ ꢱꢾꢥ꣄ꢡꣁ ꢏꢬꢵꢡ꣄ ꢂꢮ꣄ꢡꣁ ꢲꢶꢬꢠ꣄ꢫ ꢈꢰꢩꣁ ꢲꣂꢬ꣄ ꢦꢹꢬ꣄ꢠ ꢗꢥ꣄ꢣ꣄ꢬ ꢒꢵꢥ꣄ꢡꢶ ꢱꢾꢥ꣄ꢡꣁ ꢬꢙꣁꢒꢥꢶ ꢂꢫ꣄ꢫꣁꢒꢶꢥ꣄ ꢂꢜ꣄ꢦꢶ (ꢦ꣄ꢬꢶꢫꢵ ꢮꢶꢞꣀ ꢂꢪ꣄ꢪꣁ) ꢨꢶꢱꢶꢭꢶ ꢭꣂꢒꢱ꣄ꢒꢵꢒꢸ ꢂꢥꢸꢔ꣄ꢬꢲꢸ ꢣꢷꢭꢿꢡ꣄ ꢗꢬꢸ ꢪꢵꢱꢶ ꢮꢷꢡꢸꢪ꣄ ꢏꢬꢵꢡ꣄ ꢂꢮ꣄ꢫꢵꢱꢶ ꣎
ꢣꢿꢮꢸꢒ꣄ ꢱꢡꣁ ꢱꢡꣁ ꢂꢪ꣄ꢒꣁ ꢏꢠ꣄ꢜꢾ ꢆꢡ꣄ꢱꢵꢲ꣄ ꢱꣁꢥ꣄ꢡꢸ ꢙꢸꢞꢾꢱꢶ | ꢣꢿꢮꢸꢒ꣄ ꢱꢷꢡꢶ ꢂꢮꢥ꣄ ꢮꢵꢜꢸꢪ꣄ ꢡꣂꢫꢪ꣄ꢒꢶꢥ꣄ ꢮꢶꢙꢥꣁ ꢣꢵꢥ꣄ ꢒꢾꢬ꣄ꢭꢿꢡ꣄ ꢲꣁꢣ꣄ꢫꢵꢱꢶ ꣎ ꢡꢿꢜ꣄ ꢙꢷꢒꢶꢥ꣄ ꢦꢥ꣄ꢒꢾꢪ꣄ꢦꢥꢶ ꢦꢷꢡꢶ ꢮꢶꢙꢥꣁ ꢓꢳ꣄ꢳꢶ ꢂꢪ꣄ꢪꢵꢒ꣄ꢒꢶꢥ꣄ ꢂꢫ꣄ꢫꢵꢒ꣄ ꢲꢜ꣄ꢮꢶꢭꢿꢡ꣄ ꢩꢾꢳꢶ ꢱꢥ꣄ꢡꢸꢰ꣄ꢜꢶꢭꢶ ꢕꢿꢬ꣄ ꢂꢮ꣄ꢫꢵꢱꢶ ||
Leave a Reply
You must be logged in to post a comment.