ꢗꢶꢡ꣄ꢡ ꢡꢶꢥ꣄ꢥꢵꢥ꣄ ꢗꢬ꣄ꢮꣁ ꢣꢶꢥ꣄ꢥꢸ ꣎
ꢂꢪ꣄ꢨꢵ ꢪꢷꢥꢵꢒ꣄ꢰꢶ ꢪꣁꢒꣁ ꢡꢹ ꢬꢒ꣄ꢰꢶ ꢪꢾꢥ꣄ꢭꢿꢡ꣄ ꢱꢾꢙ꣄ꢙ ꢕꣁꢪ꣄ꢪꢵ ꢩꢮꢶ ꢂꢮ꣄ꢬꢾ ꢕꣁꢪ꣄ꢪꣁ ꢂꢮ꣄ꢫꢵꢱ꣄ | ꢂꢮꣁ ꢩꢮꢶ ꢒꢵꢫ꣄ ꢩꢮꢶ ꢩꢵꢡ꣄ ꢙꣁꢪ꣄ꢡꢶꢫꢵꢱ꣄ ꢔꢵ? ꢒꢵꢫ꣄ ꢗꣀꢥꢵꢒ꣄ ꢒꢾꢬ꣄ꢫꢵꢱꢶ ? ꢪꢾꢥꢶ ꢪꢷ ꢦꢸꢱ꣄ꢡꣁ.. ꢲꢶꢥ꣄ꢣꣁ ꢒꢭ꣄ꢭꣁ ꢒꢾꢥ꣄ꢥꢸ ꢂꢪ꣄ꢜꢶ ꢒꢾꢬꢶ ꢗꢾꢥ꣄ꢥꢵ ꢣꢵꢳ꣄ ꢮꢜ꣄ꢜꢶ ꢪꢾꢥꢶ ꢱꢾꢙ꣄ꢙ ꢕꣁꢪ꣄ꢪꢵ ꢩꢮꢶ ꢱꢖ꣄ꢔ꣄ꢫꢵꢱ꣄ ꣎ ꢱꢾꢬ꣄ꢒꣁ ꢩꢮꢶ ꢲꢶꢥ꣄ꢣꣁ ꢮꢷꢳ꣄ꢜꣁ ꢄꢡ꣄ꢒ ꢕꢾꢠ꣄ꢜꢵꢒ꣄ ꢣꢿꢮꢸꢒ꣄ ꢱꢵꢡ꣄ꢡ ꢙꢵꢡ꣄ꢡꢾ? ꢒꣂꢜ꣄ ꢙꢶꢫꢾꢡ꣄ ꢣꣁꢨ꣄ꢨꢵ ꢣꣁꢨ꣄ꢨꢶꢥꢶ ꢥꢴꢷꢡ꣄ꢡꢒ꣄ ꢣꢿꢮꢸꢒ꣄ ꢣꢬ꣄ꢱꢥꣁ ꢒꢾꢬꢸꢮꢵꢫ꣄ ꢪꢾꢥꢶ ꢪꢷ ꢦꢸꢱ꣄ꢡꣁ ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢗꢬ꣄ꢮꢣꢶꢥ꣄ꢥꢸ ꢮꢶꢯꢿꢰ꣄ ꢱꢪ꣄ꢒ꣄ꢰꢿꢦꢸꢒꢥꢶ ꢱꢖ꣄ꢔꢥ꣄ ꢥꢶꢔꢶꢳ꣄ꢫꢵꢱ꣄ ꢭꢾꢔꢸꢡ꣄ꢡꢵ ꢕꣁꢪ꣄ꢪꢵ ꢩꢮꢶ…
ꢪꢷꢥꢵꢒ꣄ꢰꢶ ꢂꢪ꣄ꢪꢵꢒ꣄ ꢲꢜ꣄ꢮꢾꢡꢶ
ꢪꢵꢫꢶꢒ꣄ ꢱꢪꢵꢥ꣄ ꢒꣂꢥꢣ꣄ꢭꢥ꣄ ꢪꢵꢫꢶꢒ꣄ ꢱꢪꢵꢥꢸ ꢒꣂꢥ꣄ ꢬꢴꢒꢥ꣄ ꢪꢵꢫꢶꢒ꣄ ꢱꢪꢵꢥꢸ ꢒꣂꢥꢴꣁꢞ꣄ꢮꢥ꣄ ꢪꢵꢫꢶꢒ꣄ ꢱꢪꢵꢥꢸ ꢒꣂꢥꢴꢶꢡꣃ
ꢪꢾꢥꢾꢥ꣄ ꢥꢷꢡꢶꢯꢪ꣄ꢨꢸ ꢱ꣄ꢭꣂꢒ꣄ ꢲ꣄ꢜ꣄ꢮꢥ꣄ ꢂꢮꢱ꣄ ꢪꣁꢒꣁ ꣎ ꢂꢮ꣄ꢬꢾ ꢪꢷꢥꢵꢒ꣄ꢰꢶ ꢂꢪ꣄ꢪꣁ ꢱꣁꢒꢥ꣄ ꢒꣂꢥꢮꢥ꣄ ! ꢂꢪ꣄ꢒꣁ ꢱꢬ꣄ꢮꢡ꣄ꢬ ꢲꢷꢥꢸꢪ꣄ ꢬꢴꢷ ꢬꢒ꣄ꢰꢶ ꢂꢱ꣄ꢒꢶ ꢙꢥꢥꢸꢒ꣄ ꢒꢺꢦꣁ ꢒꢾꢬ꣄ꢭꢿꢡ꣄ ꢯꢿ | ꢪꢷꢥꢵꢒ꣄ꢰꢶ ꢦꢜ꣄ꢠꢪꢸ ꢩꢵꢰꢵꢒꢸꢬ꣄ꢗ꣄ꢗꢶ ꢱꢩꣁ ꢢꣁꢮꢶ ꢮꢺꢣ꣄ꢤꢶ ꢒꢾꢬ꣄ꢬꢵꢱ꣄ ꣎ ꢂꢪ꣄ꢬꢾ ꢩꢵꢰꣁ ꢪꢾꢳ꣄ꢳꢶ ꢂꢪ꣄ꢪꢵ ꢒꢺꢦꣁ ꢲꢵꢭꢶꢪ꣄ ꢱꢱꢬ꣄ꢥꢸ ꢏꢬ꣄ꢱꢸ ꢒꣁꢣ꣄ꢣꢶ ꢙꢶꢮ꣄ꢭꢶ ꢂꢮꢬꢱ꣄ ꢭꢪ꣄ꢨꢸꢬꢸꢪ꣄ ꢬꢴꢵꢫ꣄ | ꢪꢷ ꢡꢶꢥ꣄ꢥꢵꢳꢸ ꢮꢶꢰꢫꢸꢒ꣄ ꢂꢮꢸꢱ꣄ ꣎ ꢲꢶꢥ꣄ꢣꣁ ꢱꣁꢳꢧꢵꢬ꣄ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢒꣃꢠꢱ꣄ ꢪꢵꢱꢶ ꢮꢷꢡꢶ ꢮꢵꢜ꣄ ꢬꢴꢷ ꢱꣁꢥ꣄ꢥꢵ ꢣꢠ꣄ꢞꢶꢪ꣄ ꢬꢵꢙ ꢔꢪ꣄ꢨꢷꢬꢪ꣄ꢒꢥꢶ ꢨꢶꢱꢶꢭꢶ ꢨꢶꢭ꣄ꢭꢵꢦꢸꢬꢪꢸ (ꢮꢶꢭ꣄ꢭꢵꢦꢸꢬꢪ꣄) ꢯꢿꢡ꣄ꢡꢾ ꢒꢭ꣄ꢭꢵ ꢪꣁꢠ꣄ꢞꢮꢸꢒ꣄ ꢂꢮꢶ ꢬꢴꢷꢭꢶꢥ꣄ ꢱꢬ꣄ꢮꢡ꣄ꢬ ꢙꢷꢮꢬꢵꢱꢶꢥꢸꢒ꣄ ꢃꢱꢶꢥ꣄ ꢣꢶꢭꢿꢡ꣄ ꢬꢴꢡꣁ ꢔꢵꢪꢱ꣄ꢒꣁ ꢱꢶꢳ꣄ꢳꣁ ꢲꣁꢫꢾꢱꢶ | ꢒꢵꢫꣁ ꢂꢪ꣄ꢪꢵ ꢤꣃꢬꢵꢪ꣄ ꢬꢴꢷ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢨꢶꢭ꣄ꢭꢵꢦꢸꢬꢪ꣄ ꢂꢮꢥ꣄ ꢲꢵ ? ꢒꣂꢥꢒꢸ ?
ꢦꢹꢬꢸꢪ꣄ ꢂꢪ꣄ꢪꢵ ꢤꣃꢬꢵꢒꢸꢬ꣄ꢗ꣄ꢗꢶ ꢬꢙꢵꢥ꣄ꢒꢶꢥ꣄ ꢙꢥꢸꢥ꣄ ꢚꢸꢒ꣄ꢒꢸ ꢒꣀꢖ꣄ꢒꢬ꣄ꢫꢪ꣄ ꢒꢾꢬ꣄ꢭꢿꢡ꣄ ꢬꢴꢡꣁ ꢨꢶꢭ꣄ꢭꢵꢦꢸꢬꢪꢸ ꢲꣁꢣꢾ ꢣꢵꢥꢦ꣄ꢦꢦꢶꢳ꣄ꢳꣀ, ꢂꢳꢔꢦ꣄ꢦꢦꢶꢳ꣄ꢳꣀ ꢪꢾꢥꢥ꣄ ꢣꢣꣁ ꢩꣀꢫꢶꢥ꣄ ꢂꢦꢸꢭ꣄ ꢢꢵꢪꢸꢥ꣄ ꢕꢿꢬꢸꢥ꣄ ꢎꢱ꣄ꢮꢬ꣄ꢫꢸꢥꢒꢶ ꢂꢪ꣄ꢪꢵ ꢤꣃꢬꢵ ꢦꢸꢥꢬꢸꢤꢵꢬꢥꢵ ꢒꢸꢬ꣄ꢗ꣄ꢗꢶ ꢣꢶꢫꢵꢱ꣄ ꣎ ꢌꢖ꣄ꢒ ꢗꣁꢒ꣄ꢒꢜ꣄ ꢪꣁꢥ꣄ꢥꢸ ꢒꢳꣀꢭꢶꢫꢾ ꢬꢙꣁ ꢣꢷ ꢡꢾꢖ꣄ꢒꣁ ꢨꣁꢮꢥ꣄ ꢤꢞ꣄ꢞꢶ ꢡꢸꢪ꣄ꢒꣁ ꢂꢪꢶ ꢕꢾꢥꢪ꣄ ꢒꢾꢬ꣄ꢥꣁ ꢪꢾꢥꢶ ꢲꢮ꣄ꢞꢬꢵꢱ꣄ ꢡꢸꢪ꣄ꢒꣁ ꢒꢵꢫ꣄ ꢦꢙꢾ ꢪꢾꢥꢶ ꢬꢙꣁ ꢦꢸꢱ꣄ꢡꣁ ” ꢏꢬ꣄ꢱꢸ ꢏꢬ꣄ꢱꢸ ꢡꢶꢥ꣄ꢥꢵꢳ꣄ ꢮꢿꢳꣁ ꢗꢬ꣄ꢮꢥ꣄ꢣꢶ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢂꢮ꣄ꢬꢾ ꢨꢶꢭ꣄ꢭꢵꢦꢸꢬꢪ꣄ ꢔꢵꢪꢸꢒ꣄ ꢂꢮ꣄ꢥꣁ ” ꢪꢾꢥꢶ ꢱꢖ꣄ꢔꢸꢡꣁ ꢡꢶꢱꣂꢱ꣄ ꢭꢪ꣄ꢨꢸꢬꢸꢪ꣄ ꢗꢭ꣄ꢡꢲꣂꢫꢶ ꢪꢾꢥꢶ ꢬꢙꣁ ꢤꢶꢜꢮꢵꢒ꣄ ꢣꢶꢫꢾꢱ꣄ ꣎
ꢡꢾꢮꢳ꣄ ꢬꢴꢷꢒꢶꢥ꣄ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢗꢬ꣄ꢮꢣꢶꢥ꣄ꢥꢸ ꢆꢡ꣄ꢱꢮꢸꢪ꣄ ꢨꢶꢭ꣄ꢭꢵꢦꢸꢬꢪꢸꢒ꣄ ꢂꢮꢬꢶꢫꣁ ! ꢱꣁꢳꢧꢵꢬꢸꢪ꣄ ꢨꢶꢭ꣄ꢭꢵꢦꢸꢬꢪꢸꢒ꣄ ꢂꢮꢶꢥ꣄ ꢮꢷꢳ꣄ꢜꣁ ꢗꢶꢡ꣄ꢡꢶꢬꣀ ꢮꢷꢡꢸꢥꢸꢪ꣄ ꢔꢵꢫ꣄ ꢔꢙꢵꢣꢶꢥ꣄ ꢱꢾꢥ꣄ꢡꣁ ꢏꢬꢵꢡ꣄ ꢂꢮꢶꢥ꣄ ꢒꢵꢒ꣄ꢰꢶ ꢣꢿꢥ꣄ | ꢂꢮꣁ ꢏꢱ꣄ꢡꣁ ꢗꢶꢡ꣄ꢡꢶꢬꣀ ꢮꢷꢡꢶꢪ꣄ ꢂꢮ꣄ꢬꢾ ꢡꢾꢖ꣄ꢒ ꢱꣃꢭꢵ ꢂꢖ꣄ꢔꢶꢞꢶꢥ꣄ ꢯꢿꢡ꣄ꢡꢾ ꢡꢿꢜ꣄ꢙꢷꢒꢶꢥ꣄ ꢂꢪꢶ ꢬꢴꢶꢫꢾꢡꢶ ꢪꢹꢔꢵꢪ꣄ ꢥꢾꢱ꣄ꢒꢶꢥꢶ ꢥꢴꢷꢡ꣄ꢡ ꢣꢿꢮꢸꢒ꣄ ꢱꢷꢡꢶ ꢂꢮꢾꢥ꣄ ꣎ ꢗꢬ꣄ꢮꢥ꣄ꢣꢶ ꢆꢡ꣄ꢱꢮꢸꢪ꣄ ꢱꣁꢥ꣄ꢥꢵ ꢣꢠ꣄ꢞꢶꢪ꣄ ꢂꢮꢾ ꢱꣁꢒ꣄ꢒꢫ꣄ꢫ ꢪꢷꢥꢵꢒ꣄ꢰꢶꢒ꣄ ꢣꢬ꣄ꢱꢥꣁ ꢒꢾꢬ꣄ꢡꢶ ꢕꢿꢬ꣄ꢱꢡꣁ ꢂꢮ꣄ꢫꢵꢱ꣄ ꢂꢪꢶ ꣎
Leave a Reply
You must be logged in to post a comment.