ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢮ꣄ꢫꢬ꣄ꢮꣁ ꢣꢶꢥ꣄ꢥꢸ ꣎
ꢂꢪ꣄ꢪꢵ ꢭꢾꢔꢶꢥꢸꢪ꣄ ꢮꢜꣁ ꢓꢳ꣄ꢳꢶ ꢔꢵꢪ꣄ ꢲꢶꢠ꣄ꢞꢶꢣꢶ ꢂꢮꢾ ꢱꢷꢥꢸꢪ꣄ ꢧꢭ꣄ꢡꢶꢧꢵꢬꢸꢪ꣄ ꢲꢸꢞꢡ꣄ꢡꢒ꣄ ꢪꢸꢱꢾꢥꢶ ꣎ ꢱꣃꢒꢵꢱ꣄ꢒꢥꢶ ꢱꣂ ꢕꢾꢠ꣄ꢜꢵꢒ꣄ ꢲꢸꢞꢫꢾꢱ꣄ ꣎ ꢬꢾꢡ꣄ꢡꢸ ꢥꢶꢔꢸꢳ꣄ꢞꣀꢥꢵ ꢪꢾꢥꢶ ꢲꢜ꣄ꢮꢶ ꢑꢱꢵꢑꢱꢬ꣄ꢒꢥ꣄ ꢱꣁꢳꢧꢵꢬ꣄ ꢒ꣄ꢬꢶꢫꢵꢥꢱ꣄ꢒꢶ ꢪꢸꢱꢳ꣄ꢳꢶ 4H ꢔꢸꢰ꣄ꢜꢶꢪ꣄ ꢲꢶꢖ꣄ꢔꢶ ꢓꣃꢠꢤꢞꣁ ꢙꣁꢮꢳ꣄ꢙꢷꢒꢶꢥ꣄ ꢲꢸꢡ꣄ꢬꢶꢭ꣄ꢞꢶꢫꣁ ꣎ ꢲꢸꢪ꣄ ꢲꢸꢪ꣄ ꢒꢾꢬꢶ ꢆꢱ꣄ꢮꢵꢱꣁ ꢱꣁꢳ꣄ꢳꢶ ꢂꢦ꣄ꢦꢵꢞꢵ ! ꢂꢡ꣄ꢡꣂꢱ꣄ ꢙꢷꢮ꣄ ꢂꢮꢾꢱ꣄ ꣎ꢬꢾꢡ꣄ꢡꢸ ꢂꢖ꣄ꢔꢸꢥ꣄ ꢥꢶꢔꢶꢳ꣄ꢬꢥꢶ |
ꢓꣃꢠꢤꢞꣁ ꢙꣁꢮꢳ꣄ ꢬꢴꢷ ꢏꢱ꣄ꢡꣁ ꢗꢶꢡ꣄ꢡꢶꢬꣀ ꢮꢷꢡꢸꢒ꣄ ꢏꢠ꣄ꢜꢾ ꢤꢵꢪ꣄ꢒꢥ꣄ ꢤꢪꢶ ꢂꢮꢾꢱ꣄ ꢪꢷ ꣎ ꢒꢒꣁ ꢪꢾꢥꢾꢡꢶ ꢗꢶꢡ꣄ꢡꢶꢬꣀ ꢮꢷꢡꢸꢪ꣄ ꢱꣁꢳꢧꢵꢬ꣄ ꢂꢪ꣄ꢪꢵꢒ꣄ ꢪ꣄ꢫꢵꢬꣁ ꢱꢶꢔ꣄ꢔꢶꢬꢪ꣄ ꢣꢿꢬꢶꢫꣁ ꢥꢴꢥ꣄ ꢔꢸꢰ꣄ꢜꢶ ꢂꢮꣀ ꢪꢾꢥꢵ ꣎ ꢡꢾꢮꢳ꣄ ꢪꢷ ꢮꢶꢥꢾ ꢱꣃꢳꣁ ꢪꢷꢥꢵꢒ꣄ꢰꢶ ꢂꢪ꣄ꢪꢵꢒ꣄ ꢣꢿꢛ꣄ꢙꢵꢬꢶꢫꣁ ꢪꢾꢥꢶ ꢪꣁꢣ꣄ꢬꢳꢶꢥ꣄ ꢱꢖ꣄ꢔꢾꢫꣁ ꣎ ꢡꢾꢭ꣄ꢭꢾ ꢱꢵꢡ꣄ꢡꢒ꣄ ꢒꢸꢬ꣄ꢗ꣄ꢗꢶ ꢪꢷ ꢨꢶꢱ꣄ꢱꣁ ꢂꢮꢾꢫꣁ ꣎ꢏꢠ꣄ꢜꢾ ꢮꢵꢜ꣄ꢒꢥ꣄ ꢪꢷ ꢮꢶꢥꢾ ꢱꣃꢳꣁ ꢪꢷꢥꢵꢒ꣄ꢰꢶ ꢪꢵꢫ꣄ ꢙꣁꢮꢳ꣄ ꢯꢿ ꢪꢾꢥꢶ ꢏꢠ꣄ꢜꢾ ꢕꢾꢥꢪ꣄ ꢱꢾꢥ꣄ꢡꣁ ꢱꣁꢥ꣄ꢡꣂꢰ꣄ |
ꢌꢭ꣄ꢭꢾ ꢱꣁꢥ꣄ꢡꣂꢰ꣄ ꢱꢾꢥ꣄ꢡꣁ ꢣꢒ꣄ꢰꢶꢠ ꢪꢵꢱꢶꢮꢷꢡ꣄ ꢭꢾꢥ꣄ꢡꢸ ꢗꢭꢶ ꢂꢮꢶ ꢮꢾꢜꢤꣃꢬꢵꢒ꣄ ꢙꢵꢬꢶꢫꣁ ꢮꢷꢡ꣄ ꢭꢾꢒ꣄ꢡꣁ ꢲꢶꢨ꣄ꢨꢶꢬꢴꢷꢞꢶꢫꣁ ꢬꢾꢡ꣄ꢡꢸꢪ꣄ ꢂꢪ꣄ꢨꣁꢒꢶꢥ꣄ ꢂꢫ꣄ꢫꣁ ꢂꢮꢬꢶꢫꣁ ꢱꢵꢡ꣄ꢡꢒ꣄ | ꢒꣀꢭꢵꢱꢮꢵꢡ꣄ꢫꢪꢸꢥ꣄ ꢮꣃꢙꢸꢡꣁ ꢱꢖ꣄ꢓꢸꢥ꣄ ꢧꢸꢔꢸꢡꣁ ꢱꢸꢔꢥ꣄ꢣ ꢤꢹꢦꢸꢥ꣄ ꢡꢔꢶꢭꢶ ꢯꣂꢪ ꢱꢸꢥ꣄ꢣꢬ ꢪꢲꢵꢣꢿꢮꢵ ꢪꢷꢥꢵꢒ꣄ꢰꢶ ꢱꢸꢥ꣄ꢣꢬ ꢪꢲꢵꢣꢿꢮꢵ ꢒꢭ꣄ꢫꢵꢠ ꢱꢸꢥ꣄ꢣꢬ ꢪꢲꢵꢣꢿꢮ ꢪꢾꢥꢶ ꢕꣂꢰꢪꢸꢥ꣄ ꢒꢾꢬ꣄ꢭꢶ ꢪꢲꢵꢙꢥ ꢱꢪꢸꢣ꣄ꢬꢸ ꢪꢴꢙꢵꢬ꣄ ꢆꢛ꣄ꢗꢒꢥ꣄ ꢱꢶꢖ꣄ꢔꢵꢬ꣄ꢒꢥ꣄ ꢯꢿꢡ꣄ꢡꢾ ꢪꢴꣁꢜꣁ ꢬꢾꢡ꣄ꢡꢸꢪ꣄ ꢦ꣄ꢬꢶꢫꢵꢮꢶꢞꣀ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢨꢶꢱꢶꢭꢶ ꢙꢥꢸꢥꢸꢒ꣄ ꢮꢬꢸꢥ꣄ ꢣꢶꢭꢿꢡ꣄ ꢂꢮ꣄ꢡꣁ ꢂꢖ꣄ꢔꣁꢠ꣄ꢜꢾ ꢬꢾꢡ꣄ꢡꢸꢪ꣄ ꢂꢮ꣄ꢬꢾ ꢪꢵꢫ꣄ ꢪꢷꢥꢵꢒ꣄ꢰꢶ ꢒꣂꢜꢶꢱꢹꢬ꣄ꢫ ꢒꢵꢥ꣄ꢡꢶ ꢱꢾꢥ꣄ꢡꣁ ꢬꢵꢙꢔꢪ꣄ꢨꢷꢬꢪ꣄ꢒꢥ꣄ ꢨꢶꢱꢶꢭꢶ ꢱꢪ꣄ꢱꢵꢬ ꢱꢵꢔꢬꢸꢪ꣄ ꢬꢴꢷ ꢩꢬꢵꢜꢮꢡ꣄ꢡꣁ ꢂꢪ꣄ꢒꣁ ꢂꢩ꣄ꢫꢪ꣄ ꢣꢶꢭꢿꢡ꣄ꢒꢥ꣄ ꢂꢮꢶꢱ꣄ |
ꢣꢷ ꢏꢬ꣄ꢱꢸ ꢧꢬꢵꢡꢸ ꢡꢶꢥ꣄ꢥꢵꢳ꣄ ꢗꢭꢬꢶꢫꣁ ꢲꢵꢭꢶ ꢙꢥꢸꢥꢸ ꢪꣁꢥ꣄ꢥꢸ ꢩꢾꢳꢶ ꢱꣁꢥ꣄ꢡꣂꢰ꣄ꢒꢥ꣄ ꢯꢿꢡ꣄ꢡꢾ | ꢗꢬꢹ ꢪꢵꢱꢶ ꢮꢷꢡꢸꢥꢸꢪ꣄ ꢬꢾꢡ꣄ꢡꢸ ꢂꢮꢾꢱꢶ | ꢄꢱꣁ ꢌꢖ꣄ꢔꢸꢜ꣄ ꢬꢾꢡ꣄ꢡꢸ ꢡꢶꢥ꣄ꢥꢵꢳ꣄ ꢗꢭ꣄ꢭꢿꢡ꣄ ꢬꢴꢡꣁ ꢲꢳ꣄ꢒꢾ ꢤꣃꢬꢵꢪ꣄ ꢬꢴꢷ ꢔꢬꢸꢞ ꢲꢥꢸꢪꢡ꣄ ꢤ꣄ꢮꢙꢪ꣄ ꢱꢾꢥ꣄ꢡꣁ ꢂꢮ꣄ꢬꢾ ꢒꢬꢸꢠꢵꢪꢹꢬ꣄ꢡꢶ ꢱꢸꢥ꣄ꢣꢬꢬꢙꣁ ꢩꢒ꣄ꢡꢸꢥꢸ ꢦ꣄ꢬꢮꢵꢲꢸꢪ꣄ ꢪꢶꢳꢶ ꢩꢒ꣄ꢡꢸꢥ꣄ ꢱꢾꢬꣁ ꢩꢒ꣄ꢡꢸꢒꢥꢶ ꢪꢶꢳꢶ ꢔꣂꢮꢶꢥ꣄ꢣꢵ ꢔꣂꢮꢶꢥ꣄ꢣꢵ ꢪꢾꢥꢥ꣄ ꢥꢵꢪꢪ꣄ ꢱꢾꢥ꣄ꢡꣁ ꢃꢬꢮꢵꢬꢪ꣄ꢒꢥ꣄ ꢪꢤꢸꢬꢾ ꢡꢭ꣄ꢭꢵꢒꢸꢳꢪꢸ ꢯꢿꢡ꣄ꢡꢾ ꢦ꣄ꢬꢱꢥ꣄ꢥ ꢮꢿꢖ꣄ꢒꢜꢿꢱ ꢦꢾꢬꢸꢪꢵꢳ꣄ ꢤꣃꢬꢵꢒ꣄ ꢂꢮꢾꢱꢶ |
ꢪꢷꢥꢵꢒ꣄ꢰꢶ ꢂꢪ꣄ꢪꢵ ꢬꢾꢡ꣄ꢡꢸ ꢡꢶꢬꢸꢪꢭꣀ ꢥꢵꢫꢒ꣄ꢒꢬ꣄ ꢬꢙꢵ ꢒꢵꢭꢪꢸ ꢉꢦ꣄ ꢤꢾꢬ꣄ꢬꢶꢫꣁ ꣎ ꢌꢪꢵꢪ꣄ ꢂꢪ꣄ꢪꢵ ꢭꢾꢔꢶꢥꢸ ꢤꢾꢬꢾ ꢮꢶꢰꢫꢪꢸꢥ꣄ ꢯꢶꢮ ꢱꢿꢰ꣄ꢜꢵꢥ꣄ ꣖꣔ ꢫꣁ ꢬꢾꢡ꣄ꢡꢸꢪ꣄ ꢬꢹꢦ꣄ꢒꢥ꣄ ꢜꢖ꣄ꢔꢶꢥꢶ ꢲꣁꢫ꣄ꢬꢶꢫꣁ | ꢄꢡ꣄ꢒ ꢮꢶꢰꢿꢱ꣄ꢫꣁ ꢬꢾꢡ꣄ꢡꢸꢒꢾ ꢣꢪꣁ ꢤꢾꢬꢶ ꢆꢜ꣄ꢗꢶ ꢗꢸꢜ꣄ꢜꢸ ꢧꢶꢬꢡ꣄ꢡꢒ꣄ ꢂꢪꢶ ꢣꢷꢢꣁꢮ꣄ꢬꢥꣁ |
Leave a Reply
You must be logged in to post a comment.