ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢣꢾꢱ꣄ꢮꣁ ꢣꢶꢥ꣄ꢥꢸ ꣎
ꢂꢮ꣄ꢬꢾ ꢕꣁꢪ꣄ꢪꢵꢥꢸꢪ꣄ ꢲꣁꢬꢵꢜ꣄ ꢪꢾꢥꢾꢡꢶ ꢏꢠ꣄ꢜꢿ ꢒꣂꢭꢵꢔꢭꢪ꣄ꢒꢥꢶ ꢬꢴꢵꢫ꣄ ꢄꢫꢿꢱ꣄ ꢂꢮ꣄ꢬꢾ ꢦꢜ꣄ꢜꢡ꣄ꢡꢸꢬꢵꢠꢶ ꢂꢖ꣄ꢔꢫꢬ꣄ꢒꢥ꣄ꢥꢶ ꢪꢵꢡꢖ꣄ꢔꢶ ꢪꢵꢫꢶꢒ꣄ ꢲꣁꢬꢵꢜ꣄ ꢪꢾꢥꢾꢡ꣄ ꢒꣂꢥꢵꢒ꣄ ꢬꢴꢵꢫ꣄ ꢪꢾꢥꢶ ꢮꢶꢮꢬꢠꣁ ꢒꢾꢬꢱ꣄ꢡꢒ꣄ ꢂꢮ꣄ꢬꢾ ꢲꢵꢭ꣄ ꢪꢸꢱꣀꢒ꣄ꢫꢵ !
ꢪꢬꢒꢡ ꢯ꣄ꢫꢵꢪ ꢮꢬ꣄ꢠ ꢪꢵꢡꢖ꣄ꢔꢶ ꢪꢵꢫꢶꢒ꣄ ꢱꢸꢥ꣄ꢣꢬꢿꢯ꣄ꢮꢬ ꢱ꣄ꢮꢵꢪꢶ ꢱꢾꢥ꣄ꢡꣁ ꢲꣁꢬꢵꢜ꣄ ꢥꣁꢮ꣄ꢬꢵ ꢕꣁꢪ꣄ꢪꢵ ꢪꢾꢥ꣄ꢒ꣄ꢫꢵꢥ꣄ ꢥꣁꢮ꣄ꢬꢶ ꢕꣁꢪ꣄ꢪꢵ ꢪꢾꢥ꣄ꢒ꣄ꢫꢵꢥ꣄ ꢪꢾꢥꢶ ꢩꢿꢣ꣄ ꢥꢴꢷ ꢒꢒꣁ ꢪꢾꢥꢾꢡ꣄ ꢍꢜ꣄ ꢪꢵꢫ꣄ ꢨꢵꢦꢸꢒ꣄ ꢥꢴꢸꢬꢸꢥ꣄ ꢂꢪꢶ ꢲꣁꢬꢵꢜ꣄ ꢒꢾꢬꢛ꣄ꢙꢵꢬꢶꢫꣁ |
ꢱꣁꢳꣁꢧꢵꢬꢸꢪ꣄ ꢤꣃꢬꣁ ꢗꢸꢜ꣄ꢜꢸ ꢂꢪ꣄ꢪꣁ ꢂꢫ꣄ꢫꣁ ꢏꢬꢵꢡ꣄ ꢂꢮꢶ ꢤꣃꢬꣁ ꢩꢶꢡ꣄ꢡꢬ꣄ ꢯꢿꢡ꣄ꢡꢾ ꢮꢶꢮꢵꢲ ꢪꢠ꣄ꢞꢦꢸꢪ꣄ ꢂꢮ꣄ꢫꢵꢱꢶ | ꢪꣃꢞꢵꢪꢸ ꢗꢡꢸꢬ꣄ꢮꢿꢣꢶꢥ꣄, ꢮꢶꢥꢵꢫ꣄, ꢱ꣄ꢒꢥ꣄ꢣꢥꢸ, ꢥꢮꢔ꣄ꢬꢲꢸꢥ꣄,ꢄꢥ꣄ꢣ꣄ꢬꢸ ꢪꢾꢥꢶ ꢱꢓꢭ ꢣꢿꢮꢡꢵꢥ꣄ꢒꢶꢥ꣄ ꢙꢥꢸꢥ꣄ ꢪꢶꢳꢶ ꢬꢴꢡꣁ ꢦꣁꢪ꣄ꢨ꣄ꢳꢵ ꢲꣂꢜꢸ ꢮꢾꢜꢭ꣄ ꢗꢶꢥ꣄ꢥꢪꢭꢾꢪ꣄ ꢬꢴꢷ ꢂꢦꢸꢭ꣄ ꢩꢾꢫ꣄ꢥꢸꢒ꣄ ꢦꢵꢠꢶꢔ꣄ꢬꢲꢥꢸ ꢒꢾꢬꢶ ꢢꣁꢮꢡ꣄ꢡꢒ꣄ ꢂꢮꢾꢱꢶ | ꢱꣃꢬꢵꢰ꣄ꢜ꣄ꢬ ꢮꢶꢦ꣄ꢬ ꢱꢪꢹꢲꢪꢸ ꢬꢴꢷ ꢬꢵꢪꢶꢫꢵ ꢒꢸꢜꢸꢪ꣄ꢨꢪ꣄ ꢒꢾꢬꢶꢥ꣄ ꢙꣁꢮꢳ꣄ ꢬꢴꢷ ꢂꢪ꣄ꢪꢵꢒꢸ ꢪꢖ꣄ꢔꢭꢱꢹꢡ꣄ꢬꢸ (ꢣꣁꢬꢶꢪ꣄ꢨꣁꢜ꣄ꢜꢸ) ꢣꢷꢒꢶꢥ꣄ ꢤꢞ꣄ꢞꢾꢬꢶꢫꣁ ꢒꢵꢭꢵꢒꢭꢪ꣄ꢒꢥꢶ ꢗꢭꢬꢶꢫꣁ ꢮꢶꢰꢫꢪ꣄ ꢪꢾꢥꢶ ꢪꢴꣁꢜ꣄ꢜꢵꢥ꣄ ꢪꢾꢥꢬꢶꢫꣁ |
ꢱꣁꢥ꣄ꢥꢵꢧꢹꢭꢸ ꢪꣃꢞꢵꢪ꣄ ꢯꢸꢒꣁ ꢤꢾꢬ꣄ꢭꢶꢫꢾ ꢪꢵꢫꢶ ꢔꢾꢳꢵꢪ꣄ ꢱꢸꢥ꣄ꢣꢬꢿꢯ꣄ꢮꢬꣁ ꢩꢥ꣄ꢣꢾꢱ꣄ ꢪꢖ꣄ꢔꢭ ꢱꢹꢡ꣄ꢬꢸ | ꢔꢵꢪꢵꢱ꣄ꢒꣁ ꢲꣁꢬꢵꢜ꣄ ꢱꣁꢒꢥ꣄ ꢂꢱ꣄ꢒꢶ ꢗꢶꢬꢠ꣄ꢞꢶꢥ꣄ ꢂꢦꢸꢭ꣄ ꢪꢖ꣄ꢔꢭ ꢱꢹꢡ꣄ꢬꢸ ꢪꢬ꣄ꢗꢶꢭꢶ ꢂꢪ꣄ꢪꢵ ꢂꢫ꣄ꢫꢵ ꢃꢱꢶꢥ꣄ ꢓꢳ꣄ꢳꢶꢫꢵꢱꢶ | ꢂꢮ꣄ꢬꢾ ꢕꣁꢪ꣄ꢪꢵ ꢲꣁꢬꢵꢜꢸ ꢙꣁꢪꢥꢸꢱ꣄ ꢂꢪꢶ ꢚꢸꢒꢸ ꢮꢶꢣꢸꢬꢪ꣄ ꢓꢵꢡ꣄ꢡꢾꢫꣁ ꢕꢭꢾꢡ꣄ ꢬꢙꢵ ꢨꢾꢜꢶ ꢦꢜ꣄ꢜꢪꢲꢶꢰꢶ ꢲꣁꢬꢵꢜꢸ ꢙꣁꢪꢥ꣄ ꢒꣂꢥꢒ꣄ ꢬꢵꢫ꣄ ꢱꣂꢮꢶꢡ ꢬꢸꢗꢶꢥ꣄ ꢪꢶꢳꢾ ꢥꢳꢨꢵꢔꢸꢱ꣄ |
ꢔꢸꢳ꣄ꢳꢾ ꢦꢸꢬꢶꢒꢵꢫ꣄, ꢪꢤꢸꢪ꣄ ꢨꢶꢙ꣄ꢙꢾ ꢗꢶꢦ꣄ꢜꣁ ꢒꢵꢫ꣄, ꢨꢹꢥ꣄ꢣꢶꢒꢵꢫ꣄, ꢭꢞ꣄ꢞꢸꢒꢵꢫ꣄, ꢗꢶꢖ꣄ꢒ꣄ꢳꢵ ꢦꢱꢾꢪ꣄ ꢒꢵꢫ꣄, ꢗꢾꢥ꣄ꢥꢵ ꢆꢠ꣄ꢞꣁ ꢒꢵꢫ꣄, ꢭꢵꢙꢸꢠ꣄ꢞꣁ ꢒꢵꢫ꣄, ꢱꢾꢮꢶ ꢒꢵꢫ꣄, ꢄꢒ꣄ꢰꢸꢬꢱꢸꢪ꣄ ꢒꢾꢬꢾ ꢪꢴꢶꢜꢵꢫ꣄ ꢪꢾꢥꢶ ꢔꢸꢳ꣄ꢳꢾꢫꣁ ꢡꣁꢬꢠ꣄ꢒꢥ꣄ ꢂꢮꢾꢱ꣄ ꢧꢭ꣄ꢗꣁ ꢮꢖ꣄ꢔꢶ,ꢨꣁꢥ꣄ꢣꢾ,ꢯꢾꢮ꣄ꢒꢵꢒꢫ꣄ꢭꣁ,ꢱꢷꢪꢸꢮꢖ꣄ꢔꢶ ꢪꢾꢥꢶ ꢩꣁꢮꢾ ꢧꣂꢜꢸꢥ꣄ ꢡꢔꢶ ꢒꢾꢬꢾ ꢱꢪ꣄ꢨꢵꢬ꣄ ꢒꢵꢫ꣄, ꢨꢸꢳ꣄ꢳꢵ ꢂꢪ꣄ꢨꢜ꣄ ꢒꢵꢫ꣄, ꢒꢗ꣄ꢗꢥ꣄ꢥꢵ ꢨꢾꢳꢵ ꢒꢸꢜ꣄ꢒꢶꢬꢶ ꢒꢵꢫ꣄, ꢂꢦ꣄ꢦꢸꢞꢵꢳ꣄ ꢒꢵꢫ꣄ …. ꢂꢪ꣄ꢪꢵ ꢭꢾꢔꢶꢥꢸꢪ꣄ ꢙꣁꢪꢾ ꢙꣁꢪꢥ꣄ ꢮꢶꢱ꣄ꢡꢵꢬ꣄ꢒꢥ꣄ ꢙꢵꢬꢱ꣄…
ꢌꢭ꣄ꢭꢾ ꢱꢖ꣄ꢔꢡ꣄ꢡꢮꢿꢳꢸꢱ꣄ ꢡꢶꢬꢸꢮꢶꢳꢫꢵꢞꢳ꣄ ꢦꢸꢬꢵꢠꢪꢸꢒꢾ ꢲꢜ꣄ꢮꢥ꣄ ꢂꢮꢬꢱ꣄ ꢩꢸꢛ꣄ꢙꢾꢫꣁ ꢱꢶꢮ꣄ꢙꢾꢫꣁ ꢂꢱ꣄ꢒꢶ ꢓꣀꢪꢾꢳ꣄ꢳꢶ ꢩꢹꢒ꣄ ꢙꢵꢥꢵꢡ꣄ꢡꢾ ꢲꢵꢭꢶ ꢪꢴꣁꢜ꣄ꢜ ꢓꣃꢬꢶꢪ꣄ ꢤꢾꢛ꣄ꢩꢵꢡ꣄ ꢕꢭꢶ ꢡꢶꢫꢾ ꢓꢫꢾ ꢧꢭ꣄ꢗꣁ ꢙꢷꢬ꣄ꢠꢸ ꢲꣂꢱ꣄ꢡꢒ꣄ ꢦꢿꢡ꣄ꢡꢒ꣄ ꢦꢥꢶ ꢦꢙꢾ ꢪꢾꢥꢶ ꢂꢭ꣄ꢭꢞꢾ ꢔꢥ꣄ꢣꢬ꣄ꢮꢸꢥꢸꢒ꣄ ꢂꢦꢸꢭ꣄ ꢚꣁꢞꢵꢪ꣄ ꢩꢥ꣄ꢣꢶꢭꢶ ꢯꢿꢡ꣄ꢡꢾ ꢔꢾꢖ꣄ꢔꢵꢒ꣄ ꢱꣁꢮ꣄ꢞꢶ ꢱꣁꢞꢾꢱ꣄ ꢱꣁꢒ꣄ꢒꢫ꣄ꢫꣁ ꢡ꣄ꢫꢿ ꢮꢿꢣꢮꢡꢶ ꢪꢾꢥꢥ꣄ ꢮꣀꢔꣀ |
ꢂꢪ꣄ꢪꢵ ꢭꢾꢔꢶꢥꢶꢭꢸ ꢂꢱ꣄ꢒꢶ ꢡꢾꢥꢸ ꢱꢵꢡ꣄ꢡ ꢒꢸꢬ꣄ꢗ꣄ꢗꢶ ꢗꢶꢡ꣄ꢡꢶꢬꣀ ꢮꢷꢡꢸꢪ꣄ ꢂꢱ꣄ꢒꢶ ꢪꢴꣁꢜꣁ ꢪꢴꣁꢜꣁ ꢣꢹꢬ꣄ꢱꢥꢶꢥ꣄ ꢢꣁꢮꢶ ꢲꣁꢣ꣄ꢫꢵꢱꢶ | ꢤꣃꢬꣁ ꢩꢶꢡ꣄ꢡꢬ꣄ ꢙꢵꢡ꣄ꢡ ꢪꢸꢱꢸꢥꢵꢡ꣄ꢡꢾꢥꢸ ꢡ꣄ꢫꢿ ꢮꢵꢜ꣄ ꢭꢾꢔꢶꢥ꣄ ꢱꢶꢫꢵꢱꢶ | ꢮꢷꢳ꣄ꢜꣁ ꢥꣁꢮ꣄ꢬꣁꢒꢶꢥ꣄ ꢥꣁꢮ꣄ꢬꢶ ꢱꣁꢥ꣄ꢥꢵ ꢣꢠ꣄ꢞꢶꢪ꣄ꢒꢶꢥ꣄ ꢧꢹꢭꢸ ꢣꢠ꣄ꢞꢶꢪ꣄ ꢲꢶꢖ꣄ꢔꢶ ꢙꢥꢱꢸꢥ꣄ꢣꢸꢬꢸ ꢪꢴꢙꢵꢬ꣄ ꢗꢬꢸ ꢪꢵꢱꢶꢮꢷꢡꢸꢥꢸꢪ꣄ ꢏꢬꢵꢡ꣄ ꢂꢮ꣄ꢫꢵꢱꢶ | ꢍꢜ꣄ ꢪꢤꢸꢬꢾꢪ꣄ ꢂꢪ꣄ꢪꢵ ꢭꢾꢔꢶꢥ꣄ ꢪꢸꢱꢾꢡ꣄ꢡꢾꢬ꣄ ꢡꢿꢜ꣄ ꢲꢳ꣄ꢒꢾꢤꣃꢬꢵꢪ꣄ ꢱꢸꢥ꣄ꢣꢬꢬꢵꢙ ꢦꢾꢬꢸꢪꢵꢳ꣄ ꢤꣃꢬꢵꢪ꣄ꢬꢴꢷ ꢗꣁꢞ꣄ꢞꢵꢬꢹꢦꢸꢪ꣄ ꢂꢮꢶ ꢂꢮ꣄ꢬꢾ ꢪꣁꢥ꣄ꢥꢸ ꢗꣁꢬꢡ꣄ꢡꢒ꣄ ꢂꢮꢬꢶꢫꣁ ꢦꢾꢬꢸꢪꢵꢳ꣄ ꢣꢠ꣄ꢞꢶꢪ꣄ ꢲꢶꢖ꣄ꢔꢶ ꢔꣂꢮꢶꢥ꣄ꢣꢵ ꢔꣂꢮꢶꢥ꣄ꢣꢵ ꢪꢾꢥꢥ꣄ ꢥꢵꢪꢪ꣄ ꢩꢒ꣄ꢡꢸꢞꢸꢥ꣄ ꢪꢾꢥ꣄ꢭꢿꢡ꣄ ꢂꢮ꣄ꢡꣁ ꢪꢤꢸꢬꢾꢒ꣄ ꢥꢶꢔꢶꢳꢾꢱꢶ |
ꢪꢤꢸꢬꢾ ꢙꢡꣁ ꢦꢬꢪꢒ꣄ꢒꢸꢞꢶꢪ꣄, ꢦꢸꢣꢸꢒ꣄ꢒꣂꢜ꣄ꢜꣀ, ꢡꢛ꣄ꢙꢵꢮꢸꢬꢸꢪ꣄ ꢯꢿꢡ꣄ꢡꢾ ꢂꢮ꣄ꢬꢾ ꢡꢾꢖ꣄ꢒ ꢤꣃꢬꢵꢥꢸꢪ꣄ ꢡꢶꢥ꣄ꢥꢵꢳ꣄ ꢗꢭꢬꢱꢶ ||
Leave a Reply
You must be logged in to post a comment.