ꢗꢵꢡꢸꢬ꣄ꢫ ꢭꢿꢦꢒꣁ

ꢦꢹꢬꢸꢪ꣄ ꢱꣃꢬꢣꢿꢯꢶꢒꢸ ꢣꢾꢒ꣄ꢰꢠꢸ ꢦꣂꢒꢸꢪꢸ ꢫꣂꢒ꣄ ꢬꢙꣁ ꢲꣁꢡꢾꢱꢶ ꣎ ꢡꢾꢒ ꢬꢵꢙ꣄ꢙꢶꢪ꣄ ꢙꢥꢸꢥ꣄ ꢂꢱ꣄ꢒꢶ ꢩꢾꢳꢶ ꢒꢾꢰ꣄ꢜꢪ꣄ ꢨꢵꢣꢵꢪ꣄ ꢦꣁꢥ꣄ꢣꢶꢭꢿꢡꢸ ꢲꣁꢡꢵꢱꢶ ꣎ ꢬꢙꣁ ꢱꢾꢬ꣄ꢒꣁꢒꢥꢶ ꢬꢵꢙ꣄ꢙꢶ ꢗꢭ꣄ꢡꣁ ꢒꢾꢬ꣄ꢥꢵꢱ꣄ꢡꢾ ꢲꢵꢭꢶ ꢬꢙꣁ ꢲꣂꢬ꣄ ꢙꢥꢸꢥꢱ꣄ꢒꢶ ꢩꢾꢳꢶ ꢬꢵꢒ꣄ꢒꢥꢶ ꢲꣁꢡꢵꢱ꣄ ꣏

ꢏꢠ꣄ꢜꢾꢣꢶ ꢡ꣄ꢫꢾ ꢔꢵꢪ꣄ꢪꢸ ꢬꢙꣁ ꢂꢦꢸꢭ꣄ ꢬꢾꢡ꣄ꢡꢸꢪ꣄ ꢲꢶꢖ꣄ꢔꢶꢭꢶ ꢔꢵꢪ꣄ ꢩꢶꢡ꣄ꢡꢬ꣄ ꢑꢭꢿꢡꢸ ꢲꣁꢡꢾꢱ꣄ ꣎ ꢢꢾꢨ꣄ꢨꣁ ꢮꢵꢜꢸꢪ꣄ ꢫꣂꢒ꣄  ꢫꢸꢮꢡꢶ ꢂꢦꢸꢭ꣄ ꢯꢶꢬꢱ꣄ ꢆꢛ꣄ꢗꣁ ꢭꢔꢸꢞꢵ ꢩꢬꣁ ꢮꢲꢶꢭꢶ ꢙꢶꢭꢿꢡ꣄ ꢲꣁꢡꢾꢫꣁ ꢬꢙꣁ ꢱꢶꢫꢾꢱ꣄ ꣎ ꢡꢶꢥꣁ ꢂꢡꢶꢉꢦ ꢫꢸꢮꢡꢶꢒꢥꢶ ꢲꣁꢡꢶꢱ꣄ ꣎ ꢬꢙꣁ ꢡꢶꢒꣁ ꢲꣁꢬꢵꢜ꣄ ꢒꢾꢬ꣄ꢭꢸꢞꢸꢥꣁ ꢪꢾꢥꢶ ꢲꢜ꣄ꢮꢾꢱ꣄ ꣎ ꢧꢭ꣄ꢗꣁ ꢬꢙꣁ ꢂꢦꢸꢭ꣄ ꢬꢾꢡ꣄ꢡꢸꢪ꣄ ꢬꢴꢷꢥꢸ ꢲꢸꢡ꣄ꢡꢶꢬꢶ ꢡ꣄ꢫꢿ ꢫꢸꢮꢡꢶ ꢙꣁꢮꢳ꣄ ꢂꢮꢶ “ꢡꢹ ꢒꣂꢥ꣄ ? ꢒꣁꢖ꣄ꢒ ꢕꣁꢪ꣄ꢪꢵ ꢨꢾꢜ꣄ꢒꢶ ? ꢡꢹ ꢒꣂꢜ꣄ ꢮꢱꢶꢭꢶ ꢯꢿꢡꢿ ? ꢡꢸꢬꢾ ꢨꣂ ꢒꢵꢫ꣄ ꢒꢾꢬꢬꢶꢫꣁ ? ꢪꢾꢥꢶ ꢦꢸꢱꢾꢱ꣄ ꢬꢙꣁ ꣎ ꢌꢭ꣄ꢫꢾꢒꣁ ꢡ꣄ꢫꢾ ꢫꢸꢮꢡꢶ “ ꢲꣂ ꢬꢙꢵꢥꢸ ! ꢪꣁꢬꣁ ꢥꢵꢮꢸ ꢱꣃꢪꢶꢥꢶ ! ꢪꢷ ꢒꣁꢠ꣄ꢞꢵꢥ꣄ ꢨꢾꢜ꣄ꢒꢶ ! ꢂꢪꢶ ꢱꣃꢬꢦꢸꢬꢶꢪ꣄ ꢮꢱꢶꢭꢿꢡꢸ ꢯꢿꢡꢾ ! ꢂꢮ꣄ꢬꢾ ꢨꣂ ꢫꣂꢒ꣄ ꢬꢵꢙ ꢭꢿꢦꢒꣁꢒꢥꢶ ꢒꢵꢪ꣄ ꢒꢾꢬꢬꢶꢫꣁ ꢪꢾꢥꢶ ꢙꢾꢮꢵꢦ꣄ ꢒꢾꢬꢶꢱ꣄ ꣎

ꢱꢾꢬ꣄ꢒꢱ꣄ ꢩꢾꢳꢶ ꢱꣁꢥ꣄ꢡꣂꢰ꣄ ꢡꢹ ꢡꢸꢪ꣄ꢬꢾ ꢕꢿꢬ꣄ ꢙꢮ꣄ꢮꢵꢫ꣄ ꢪꢾꢥꢶ ꢬꢙꣁ ꢡ꣄ꢫꢾ ꢫꢸꢮꢡꢶꢒꢸ ꢯꢾꢫ꣄ꢥꢸ ꢱꢖ꣄ꢔꢶꢡꢶ ꢥꢶꢒꢶꢳꢶ ꢂꢦꢸꢭ꣄ ꢬꢮꢸꢳꢸꢒꢸ ꢂꢮꢶ ꢭꢥ꣄ꢣꢾꢱ꣄ ꣎ ꢧꢭ꣄ꢗꣁ ꢩꢜꢸꢥꢸꢒꢸ ꢨꣁꢮꢶ “ꢱꣃꢬꢦꢸꢬꢶꢪꢸ ꢫꣂꢒ꣄ ꢬꢵꢙ ꢭꢿꢦꢒꣁ ꢯꢿꢡ꣄ꢡꢾ ꢪꢾꢥꢵ ! ꢡꢾꢒꣁ ꢣꢾꢒ꣄ꢒꢶꢥꢸ ꢪꢷ ꢨꣁꢭ꣄ꢭꢶꢫꢵꢮ꣄ ꢪꢾꢥꢾꢱ꣄ ꢪꢾꢥꢶ ꢱꢖ꣄ꢔꢶ ꢨꣁꢭ꣄ꢭꢶ ꢂꢮꢾ ꢪꢾꢥꢶ ꢃꢣꢿꢯ꣄ ꢡꢔꢾꢱ꣄  ꢬꢙꣁ !  ꢧꢬꢵꢡꢸ ꢗꢵꢬ꣄ ꢩꢜꢸꢥ꣄ ꢱꣃꢬꢦꢸꢬꢶꢒꢸ ꢙꢷꢒꢶꢥ꣄ ꢬꢵꢙꢭꢿꢦꢒꢵꢒꢸ ꢬꢙꣁ ꢙꣁꢮꢳ꣄ ꢨꣁꢭ꣄ꢭꢶ ꢑꢫꢵꢱ꣄ ꣎ ꢭꢿꢦꢒꣁ ꢂꢮꢾꢡꢶꢡ꣄ꢒꢵꢪ꣄ ꢡꢾꢒ ꢙꣁꢮꢳ꣄ “ ꢪꢷ ꢡꣁꢬꣁ ꢨꢾꢜꢶꢒꢸ ꢲꣁꢬꢵꢜ꣄ ꢒꢾꢬ꣄ꢭꢶꢫꢾꢥ꣄ ꢪꢾꢥꢶ ꢲꢜ꣄ꢮꢬꢶꢫꣁ ꣎ ꢡꣁꢬꣁ ꢂꢨꢶꢦ꣄ꢬꢵꢫꢪ꣄ ꢒꢵꢫꣁ ꢪꢾꢥꢶ ꢱꢖ꣄ꢔꢶ ꢪꢾꢥꢶ ꢬꢙꣁ ꢦꢸꢱꢾꢱ꣄ ꣎  ꢭꢿꢦꢒꣁ ꢬꢙꢵꢒꢸ ꢯꢾꢫ꣄ꢥꢸ “ ꢲꣂ ꢩꢹꢦꢵ ! ꢪꣁꢬꣁ ꢨꢾꢜꢶ ꢲꣁꢬꢵꢜ꣄ ꢒꢾꢬꢾꢡꢶ ꢫꣂꢒ꣄ ꢦ꣄ꢬꢵꢙ꣄ꢛꢵꢒꢸꢱ꣄ ꢲꣁꢬꢵꢜ꣄ ꢒꢾꢬꢶ ꢣꢾꢥꣁ ꢪꢾꢥꢶ ꢪꢷ ꢲꢜ꣄ꢮꢬꢶꢫꣁ ! ꢡꢸꢪꢶ ꢡꢶꢱꢵꢥ꣄ ꢡꢾꢥꢸ ꢲꢵ ?” ꢪꢾꢥꢶ ꢭꢿꢦꢒꣁ ꢦꢸꢱꢾꢱ꣄ ꣎  ꢄꢫꢾ ꢎꢒꢾ ꢩꢹꢦꣁ, “ꢡꢶꢱꣁ ꢪꢾꢥꢾꢡꢶ ꢪꣁꢒꣁ ꢪꢴꢸꢞꣁ ꢪꢾꢥꢶ ꢪꢾꢥꢬꢶꢫꣁ ꢲꢵ” ꢪꢾꢥꢶ ꢦꢸꢱꢾꢱ꣄ ꣎ ꢡꢾꢭ꣄ꢭꢾꢒꣁ ꢡ꣄ꢫꢿ ꢭꢿꢦꢒꣁ, “ ꢲꣂ ꢩꢹꢦꢡꢶ ! ꢪꢷ ꢦꢸꢱꢥ꣄ ꢦꢸꢱ꣄ꢥꢶꢥꢸꢒꢸ ꢡꢸꢪꢶ ꢱꢾꢬ꣄ꢒꣁ ꢲꣁꢫꢾ ꢙꢾꢮꢵꢦꢸꢥ꣄ ꢱꢖ꣄ꢔꢾꢡꢶ ꢪꣁꢬꣁ ꢨꢾꢜꢶꢒꢸ ꢡꢸꢪꢶ ꢲꣁꢬꢵꢜ꣄ ꢒꢾꢬ꣄ꢭꢸꢮꢵꢫ꣄” ꢪꢾꢥꢶ ꢭꢿꢦꢒꣁ ꢱꢖ꣄ꢔꢾꢱ꣄ ꣎ ꢬꢙꣁ ꢱꢾꢬ꣄ꢒꢱ꣄ ꢡꣁꢬꣁ ꢦꢸꢱ꣄ꢥꢶꢥ꣄ ꢦꢹꢱꢶ ꢪꢾꢥꢶ ꢱꢖ꣄ꢔꢾꢱ꣄ ꣎

ꢧꢬꢵꢡꢸ ꢭꢿꢦꢒꣁ ꢬꢙꢵꢒꢸ ꢯꢾꢫ꣄ꢥꢸ “ ꢭꣂꢒꢸꢪ꣄ꢒꣂꢥꢾ ꢩꢾꢳꢶ ꢯꢒ꣄ꢡꢶ ꢲꣁꢫꢾꢫꣁ ?” ꢪꢾꢥꢶ ꢦ꣄ꢬꢯ꣄ꢥꣁ ꢦꢸꢱꢾꢱ꣄ ꣎ ꢄꢭ꣄ꢫꢾꢒꣁ ꢬꢙꣁ “ꢪꢷ ꢥꢶꢗ꣄ꢗꢸ ꢦꢵꢛ꣄ꢪ꣄ ꢦꣁꢞꢬꢶꢫꣁ ꢱꢸꢬꢶꢡꢸꢱ꣄ ꢭꣂꢒꢸꢪ꣄ ꢩꢾꢳꢶ ꢯꢒ꣄ꢡꢶ ꢲꣁꢫꢾꢫꣁ” ꢪꢾꢥꢶ ꢙꢾꢮꢵꢦ꣄ ꢒꢾꢬꢾꢱ꣄ ꣎ ꢬꢙꣁ ꢱꢖ꣄ꢔꢾ ꢱꢾꢮꢵꢦ꣄ ꢎꢒꢾ ꢭꢿꢦꢒꣁ, “ ꢡꢸꢪꢶ ꢱꢖ꣄ꢔꢬꢶꢫꣁ ꢱꢾꢬ꣄ꢒꣁ ꢥꢴꢵ ! ꢂꢮꣁ ꢂꢪꢶ ꢬꢮꢶ ꢱꣁꢮꢳꢸꢱ꣄ ꢙꢷꢒꢶꢥ꣄ ꢦꢸꢱꢾꢱ꣄” ꢪꢾꢥꢶ ꢱꢖ꣄ꢔꢾꢱ꣄ ꣎

ꢭꢿꢦꢒꣁꢒꢶꢥ꣄ ꢬꢙꣁ ꢩꢵꢠꢸ ꢙꣁꢮꢳ꣄ ꢙꢷꢒꢶꢥ꣄ ꢄꢫꢾ ꢦ꣄ꢬꢯ꣄ꢥꣁ ꢤꢾꢬꢶ ꢦꢸꢱ꣄ꢫꢵꢱ꣄ ꣎ ꢡꢾꢭ꣄ꢭꢾꢒꣁ ꢱꢸꢬꢶꢡꢸ, “ ꢪꢷ ꢯꢒ꣄ꢡꢶ ꢲꣁꢫꢾꢡ꣄ꢡꢾꢥꣂꢱ꣄, ꢲꣁꢫꢾꢡꢶ ꢪꣁꢬꣁ ꢱꣁꢪ꣄ꢪꢬ꣄ ꢩꢾꢳꢶ ꢯꢒ꣄ꢡꢶ ꢲꣁꢫꢾꢡ꣄ꢡꢾꢥꣁꢒꢥ꣄ ꢪꢿꢕꢸꢥ꣄ ꢯꢿ ! ꢢꢾꢨ꣄ꢨꣁ ꢢꢾꢨ꣄ꢨꣁ ꢪꣁꢒꣂꢱ꣄ ꢚꢔꢶ ꢢꣁꢮ꣄ꢭꢸꢞꢥ꣄” ꢪꢾꢥꢶ ꢱꢸꢬꢶꢡ꣄ ꢪꢾꢥ꣄ꢡꣁ… ꢬꢙꣁꢒꢶꢥ꣄ ꢭꢿꢦꢒꣁ ꢪꢿꢕꢸ ꢙꣁꢮꢳ꣄ ꢙꢷꢒꢶꢥ꣄ ꢗꢬ꣄ꢗꣁ ꢒꢾꢬ꣄ꢫꢵꢱ꣄, ꢡꢾꢭ꣄ꢭꢾꢒꣁ ꢡ꣄ꢫꢾ ꢪꢿꢕꢸ “ꢬꢮꢶ ꢱꣁꢪ꣄ꢪꢬ꣄ ꢪꢷ ꢯꢒ꣄ꢡꢶ ꢲꣁꢫꢾꢱ꣄ꢡꢾꢥꣂꢱꢶ ! ꢲꣁꢫꢾꢡꢶ ꢪꣁꢒꣂꢱ꣄ ꢡꢾꢖ꣄ꢔꢸꢜ꣄ ꢌꢖ꣄ꢔꢸꢜ꣄ ꢪꢾꢥꢶ ꢂꢱ꣄ꢒꢶ ꢦꣂꢒꢸꢪ꣄ ꢲꢶꢠ꣄ꢞꢞꢥ꣄ ꢯꢸꢰꢶꢭꣁ ꢪꢾꢥꢶ ꢏꢙꢥꣁ ꢯꢿ ! ꢡ꣄ꢫꢾ ꢪꣁꢬꣁ ꢱꣁꢪ꣄ꢪꢬ꣄ ꢯꢒ꣄ꢡꢶ ꢲꣁꢫꢾꢫꣁ” ꢪꢾꢥꢶ ꢪꢿꢕꢸ ꢱꢖ꣄ꢔꢸꢡꣁ…  ꢩꢹꢦꣁꢒꢶꢥ꣄ ꢭꢮ꣄ꢬꢶ ꢯꢸꢰꢶꢭꣁ ꢪꢾꢥꢥ꣄ ꢮꢬꣁ ꢙꣁꢮꢳ꣄ ꢙꢷꢒꢶꢥ꣄ ꢗꢬ꣄ꢗꣁ ꢒꢾꢬ꣄ꢫꢵꢱ꣄ ꣎ ꢡꢾꢭ꣄ꢫꢾꢒꣁ ꢮꢵꢫꢸ “ꢪꢷ ꢪꣁꢬꣁ ꢯꢒ꣄ꢡꢶ ꢲꢵꢭꢶ ꢪꢿꢕꢸꢥꢸꢒꢸ ꢣꣁꢨ꣄ꢨꢶ ꢱꣁꢞꢬꢶꢫꣁ ꢬꢴꢡ꣄ꢡ ꢮꢡ꣄ꢡꣂꢱꢶ, ꢲꣁꢫꢾꢡꢶ ꢪꣁꢬꣁ ꢲꢵꢭꢶ ꢌꢭ꣄ꢭꢾ ꢣꣁꢖ꣄ꢔꢬꢸꢒꢸ ꢣꣁꢨ꣄ꢨꢶ ꢱꣁꢞꢥ꣄ ꢪꢸꢱꢬꢥꢶ ! ꢪꣁꢬꣁ ꢱꣁꢪ꣄ꢪꢬ꣄ ꢯꢒ꣄ꢡꢶ ꢲꣁꢫꢾꢫꣁ ꢌꢭ꣄ꢭꢾ ꢣꣁꢖ꣄ꢔꢬꢸꢱ꣄” ꢪꢾꢥꢶ ꢮꢵꢫꢸ ꢱꢖ꣄ꢔꢸꢡꣁ…. ꢡꢿꢜ꣄ꢬꢴꢷ ꢥꢶꢒꢶꢳꢶ ꢬꢙꣁꢒꢶꢥ꣄ ꢭꢿꢦꢒꣁ ꢣꣁꢖ꣄ꢔꢬ꣄ ꢙꣁꢮꢳ꣄ ꢂꢮꢶ ꢗꢬ꣄ꢗꣁ ꢒꢾꢬ꣄ꢫꢵꢱ꣄ ! ꢌꢭ꣄ꢭꢾꢒꣁ ꢡ꣄ꢫꢾ ꢣꣁꢖ꣄ꢔꢬ꣄ “ꢮꢬꣁ ꢱꣁꢪ꣄ꢪꢬꢸ ꢪꢷ ꢯꢒ꣄ꢡꢶ ꢲꣁꢫꢾꢱ꣄ ꢡꢾꢥꣂꢱꢶ ꢲꣁꢫꢾꢡꢶ ꢪꣁꢒꣂꢱ꣄ ꢗꢮꢶ ꢨꣁꢥ꣄ꢣꣁ ꢒꢾꢬꢥ꣄ ꢡꢾꢭ꣄ꢭꢾ ꢲꢸꢥ꣄ꢣꢶꢬꢸꢱ꣄ ꢪꣁꢬꣁ ꢱꣁꢪ꣄ꢪꢬ꣄ ꢯꢒ꣄ꢡꢶ ꢲꣁꢫꢾꢫꣁ ꢪꢾꢥꢶ ꢱꢖ꣄ꢔꢸꢡꣁ.. ꢩꢹꢦꣁꢒꢶꢥ꣄ ꢭꢿꢦꢒꣁ ꢲꢸꢥ꣄ꢣꢶꢬ꣄ ꢙꣁꢮꢳ꣄ ꢂꢮꢶꢒꢶꢥ꣄  ꢗꢬ꣄ꢗꣁ ꢒꢾꢬ꣄ꢫꢵꢱ꣄, ꢌꢭ꣄ꢭꢾꢒꣁ ꢡ꣄ꢫꢿ ꢲꢸꢥ꣄ꢣꢶꢬ꣄ “ ꢪꢴꣁꢜꣁ ꢪꢴꣁꢜꣁ ꢣꣁꢖ꣄ꢔꢬ꣄ ꢗꢮꢶ ꢨꣁꢥ꣄ꢣꣁ ꢒꢾꢬꢬꢶꢫꣁ ꢬꢴꢡ꣄ꢡ ꢮꢡ꣄ꢡꣂꢱꢶ ! ꢣꣁꢖ꣄ꢔꢬ꣄ ꢱꣁꢪ꣄ꢪꢬ꣄ ꢂꢪ꣄ꢒꣁ ꢯꢒ꣄ꢡꢶ ꢯꢿꢡ꣄ꢡꢿꢱꢶ ꢲꣁꢫꢾꢡꢶ ꢌꢝꢵꢪ꣄ ꢮꢱꢶꢭꢿꢡꢸ ꢯꢿꢡꢿ ꢭꢿꢦꢒꢵꢥ꣄ ꢂꢪ꣄ꢒꣁ ꢂꢱꣁꢒꢾꢬꢶ ꢤꢾꢬꢶ ꢲꢥꢶ ꢪꢬꢶꢡꣀꢡꢱꢸꢥ꣄ ꢂꢮ꣄ꢬꢾ ꢱꣁꢪ꣄ꢪꢬ꣄ ꢡꢾꢥꢸꢱ꣄ ꢯꢒ꣄ꢡꢶ ꢲꣁꢫꢵꢱ꣄ ꢡꢾꢥꢸ ꢪꢾꢥꢶ ꢲꢸꢥ꣄ꢣꢶꢬ꣄ ꢱꢖ꣄ꢔꢾꢱ꣄” ꣎ ꢲꢸꢥ꣄ꢣꢶꢬ꣄ ꢱꢖ꣄ꢔꢾ ꢮꢡ꣄ꢡꣁ ꢎꢒꢶꢥꢸ ꢬꢙꣁ ꢩꢾꢳꢶ ꢃꢯ꣄ꢗꢬ꣄ꢫꢪ꣄ ꢦꣁꢞꢾꢱ꣄ ꣎ ꢭꢿꢦꢒꢵꢒꢸ ꢯꢾꢫ꣄ꢥꢸ ꢬꢙꣁ “ ꢲꢿ ꢭꢿꢦꢒꢵ ! ꢌꢭ꣄ꢭꢾ ꢭꣂꢒꢸꢪ꣄ ꢡꢹꢱꢶ ꢯꢒ꣄ꢡꢶ ꢲꣁꢫꢾꢱ꣄ꢡꢾꢥꣁ ! ꢲꢶꢥ꣄ꢣꣁ ꢬꢴꢷꢒꢶꢥ꣄ ꢡꢹ ꢪꣁꢬꣁ ꢬꢵꢙꢵꢖ꣄ꢔꢸꢪ꣄ ꢕꢿꢬ꣄ ꢩꢥ꣄ꢣꢥ꣄ ꢮꢶꢩꢵꢔꢸꢪ꣄ ꢡꢹ ꢂꢪꢵꢡ꣄ꢫꣁꢒꢥꢶ ꢬꢴꢷꢒꢶꢥ꣄ ꢱꢲꢵꢮ꣄ ꢒꢾꢬ꣄ꢥꣁ” ꢪꢾꢥꢶ ꢪꢾꢥ꣄ꢡꣁ.. ꢄꢫꢾ ꢎꢒꢾ ꢭꢿꢦꢒꣁ ꢩꢾꢳꢶ ꢱꢥ꣄ꢡꢸꢰ꣄ꢜꢶꢭꢶꢫꢾꢱ꣄ ꣎ ꢡꢾꢥ꣄ꢣꢸꢱ꣄ ꢬꢴꢷꢒꢶꢥ꣄ ꢡ꣄ꢫꢿ ꢭꢿꢦꢒꣁ ꢬꢙꢵꢒꢸ ꢗꣁꢒ꣄ꢒꢜ꣄ ꢯꢸꢩꢵꢰꢶꢡꢪꢸꢥ꣄ ꢱꢖ꣄ꢔꢶ ꢣꢾꢒ꣄ꢒꢞꢾꢱ꣄ ꢬꢙꣁ ꢡ꣄ꢫꢾ ꢂꢱ꣄ꢒꢶ ꢎꢒꢶꢭꢶ ꢬꢵꢙ꣄ꢙꢶ ꢗꣁꢒ꣄ꢒꢜ꣄ ꢤꢵꢥꢸ ꢗꢭ꣄ꢡꣁ ꢒꢾꢬꢾꢱ꣄ ꢙꢥꢸꢥ꣄ ꢂꢱ꣄ꢒꢶ ꢱꣁꢥ꣄ꢡꣂꢰ꣄ꢒꢥꢶ ꢙꢶꢮ꣄ꢫꢵꢱ꣄ ꣎ ꢱꢾꢡ꣄ꢭꣁꢒꢥꢶ ꢡ꣄ꢫꢾ ꢭꢿꢦꢒꣁ ꢂꢦꢸꢭ꣄ ꢨꢾꢜꢶꢒ꣄ꢒꢶꢥ꣄ ꢬꢙꢵꢒꢸ ꢲꣁꢬꢵꢜ꣄ ꢒꢾꢬꢶ ꢢꣁꢮꢾꢱ꣄ ꣎ ꢂꢱ꣄ꢒꢶ ꢡꢾꢥꢸ ꢱꣁꢥ꣄ꢡꢸꢒꢥꢶ ꢙꢶꢮ꣄ꢭꢶ ꢂꢮ꣄ꢫꢵꢱ꣄ ꣏

ꢭꢿꢦꢒꣁ = ꢭꢮ꣄ꢬꢶ (ꢒꣁꢡ꣄ꢡꣁ/ꢒꣁꢡ꣄ꢡꢥꢵꢬ꣄) ; ꢗꢵꢡꢸꢬ꣄ꢫꢪ꣄ = ꢨꢸꢣ꣄ꢣꢶꢱꢵꢳꢶ ; ꢦꢹꢬꢸꢪ꣄ = ꢪꢸꢣꢸꢭ꣄, ꢪꢸꢭ꣄ꢭꢵꢒꢵꢭꢸꢪ꣄ ; ꢒꢵꢰ꣄ꢜꢸ = ꢒꢾꢜ꣄ꢜꢾ, ꢭꢔꢸꢞꣁ ; ꢗꢬ꣄ꢗꣁ = ꢮꢶꢱꢵꢬꢠꣁ ; ꢯꢸꢰꢶꢭꣁ = ꢮꢬꣁ, ꢮꢵꢫꢸ ꣏