ꢗꢶꢡ꣄ꢬꢦꢸꢬꢪ꣄ ꢪꢾꢥꢥ꣄ ꢔꢵꢪ꣄ ꢙꢾꢙ꣄ꢙꣁꢒꢥꢶ ꢯ꣄ꢬꢷꢔꢶꢬꢶ ꢪꢾꢥꢶ ꢫꣂꢒ꣄ ꢦꢬ꣄ꢮꢡꢸ ꢲꣁꢡꢾꢱꢶ ꣎ ꢡ꣄ꢫꢿ ꢦꢬ꣄ꢮꢡꢸꢪ꣄ ꢑꢰꢤꢸ ꢚꢵꢞꢸꢥ꣄ ꢦꣁꢳ꣄ꢳꢵ ꢚꢵꢞꢸꢥ꣄ ꢒꢷꢱꢸꢥꢱ꣄ꢒꢶ ꢲꣁꢡꢾꢱ꣄ ꣎ ꢗꢶꢡ꣄ꢬꢦꢸꢬꢶ ꢔꢵꢪꢸ ꢙꢥꢸꢥ꣄ ꢡ꣄ꢫꢿ ꢦꢬ꣄ꢮꢡꢸ ꢆꢛ꣄ꢗꣁ ꢕꢠ꣄ꢜꢒꢬ꣄ꢠꣁ ꢪꢾꢥꢶ ꢫꣂꢒ꣄ ꢂꢱꢸꢬꢸ ꢯꢿꢡꢿ ꢪꢾꢥꢶ ꢂꢱ꣄ꢒꢶ ꢡꢾꢖ꣄ꢒ ꢙꣁꢮꢳ꣄ ꢪꢾꢭ꣄ꢭꢿꢡ꣄ ꢬꢴꢶꢫꢵꢱ꣄ ꣎
ꢏꢠ꣄ꢜꢾꢣꢶ ꢗꢶꢡ꣄ꢬꢦꢸꢬꢪꢸ ꢯꢿꢡ꣄ꢡꢾ ꢒꢷꢰ꣄ꢜꢸ ꢤꣃꢬꢵꢪꢸ ꢩꢾꢳꢶ ꢱꢶꢖ꣄ꢔꢵꢬ꣄ꢒꢥꢶ ꢏꢠ꣄ꢜꢾ ꢕꢵꢜꢸ ꢭꣁꢪ꣄ꢨꢶꢭꢿꢡ꣄ ꢲꣁꢡꢾꢱꢶ ꣎ ꢡ꣄ꢫꢿ ꢏꢠ꣄ꢜꢾ ꢗꣁꢞ꣄ꢞꣁ ꢗꣁꢬ꣄ꢭꢶꢒꢶꢥ꣄ ꢯ꣄ꢬꢷꢔꢶꢬꢶ ꢣꣁꢖ꣄ꢔꢬ꣄ ꢆꢛ꣄ꢗꣁ ꢓꢳ꣄ꢳꢶ ꢙꢶꢫꢾꢱ꣄ | ꢢꢾꢨ꣄ꢨꣁ ꢆꢛ꣄ꢗꣁ ꢬꢴꢷ ꢓꢵꢭ꣄ ꢦꣁꢞꢶ ꢗꣁꢞ꣄ꢞꣁ ꢪꣁꢬꢾꢱ꣄ ꣎ ꢧꢬꢵꢡꢸ ꢗꣁꢞ꣄ꢞꣁ ꢓꢳ꣄ꢳꢶ ꢂꢮꢾ ꢕꢵꢜꢸ ꢡꢿꢜ꣄ ꢯꢿꢡꢿ ꢒꢷꢱꢸꢥꢸ ꢲꢵꢡꢸꢪ꣄ ꢂꢨ꣄ꢨꢶꢥꢶ ꢦꣁꢞꢾꢱ꣄ ! ꢡꢿ ꢕꢵꢜꢸ ꢓꢳ꣄ꢳꢶ ꢒꢷꢱꢸꢥ꣄ ꢲꣃꢭꢶꢭꢿꢡ꣄ ꢲꣁꢡ꣄ꢫꢵꢱ꣄ !
ꢣꣁꢖ꣄ꢔꢬ꣄ ꢆꢛ꣄ꢗꣁ ꢬꢴꢷ ꢕꢵꢜꢸ ꢥꢵꢣꢸ ꢎꢒꢾ ꢙꢥꢸꢒꢸ ꢤꢵꢒ꣄ ꢂꢮꢶ ꢭꢔꢾꢱ꣄ ꣎ “ ꢣꣁꢖ꣄ꢔꢬ꣄ ꢆꢛ꣄ꢗꣁ ꢯꢿꢡꢿ ꢕꢠ꣄ꢜꢒꢬ꣄ꢠꣁ ꢙꢥꢸꢥꢸꢒ꣄ ꢲꢥꢶ ꢪꣁꢬꢞꢶ ꢓꣀꢡꢬꢱ꣄” ꢪꢾꢥꢶ ꢲꢜ꣄ꢮꢶ ꢔꢵꢪ꣄ ꢱꣁꢞ꣄ꢞꢶ ꢩꢬꢵꢜ꣄ ꢙꢵꢡ꣄ꢡ ꢥꢶꢒꢶꢳꢶꢫꢵꢱ꣄ ꢗꢶꢡ꣄ꢬꢦꢸꢬꢶ ꢙꢥꢸꢥ꣄ ꣎ ꢄꢫꢾ ꢯꢶꢫꢾ ꢗꢶꢡ꣄ꢬꢦꢸꢬꢶ ꢬꢙꣁ ‘ꢕꢠ꣄ꢜꢒꢬ꣄ꢠꢥꢸꢒ꣄ ꢪꣁꢬꢞꢬꢶꢫꣁ ꢡꢾꢖ꣄ꢒꣁ ꢗꢵꢬ꣄ ꢱꢱꢬ꣄ ꢱꣁꢥ꣄ꢥꢵ ꢥꢵꢠꢒꢸꢥ꣄ ꢣꢾꢮꢸꢱꢶ ’ ꢪꢾꢥꢶ ꢕꣂꢰꢥꣁ ꢒꢾꢬꢾꢱ꣄ ꣎
ꢄꢫꢾ ꢎꢒꢾ ꢗꢵꢡꢸꢬ꣄ꢫꢪ꣄ ꢲꣁꢫꢾ ꢫꣂꢒ꣄ ꢣꣁꢮ꣄ꢬꢶ ꢣꣁꢖ꣄ꢔꢬꢸꢪ꣄ ꢒꢵꢫ꣄ ꢯꢿꢡꢿ ꢪꢾꢥꢶ ꢯꢵꢡ꣄ꢡꢒꢸ ꢙꢷꢱ꣄ ! ꢡꢿꢜꢸ ꢯꢿꢡꢿ ꢒꢷꢱꢸꢥ꣄ ꢲꢵꢡꢸꢪ꣄ ꢕꢵꢜꢸ ꢓꢳ꣄ꢳꢶ ꢲꣃꢭꢬꢶꢫꣁ ꢯꢾꢫ꣄ꢭꢶ ꢒꢷꢱꢸꢥꢸꢒ꣄ ꢔꢸꢳ꣄ꢳꢾ ꢒꢾꢳꣁ, ꢄꢪ꣄ꢨ꣄ꢳꣁ, ꢆꢪ꣄ꢨ꣄ꢳꣁ ꢧꣀꢭꢵꢣꢶ ꢦꣁꢳ꣄ꢳꢵꢥ꣄ ꢣꢷꢒꢶꢥ꣄ ꢒꢷꢱꢸ ꢲꢵꢡꢸꢪ꣄ ꢯꢿꢡꢿ ꢕꢵꢜ꣄ ꢓꢳ꣄ꢳꢶꢱ꣄ ꣎ ꢨꢶꢱ꣄ꢱꣁ ꢗꢶꢡ꣄ꢬꢦꢸꢬꢶ ꢬꢙꣁ ꢙꣁꢮꢳꢮꢶ ꢲꣂ ꢩꢹꢦꢵꢭꢵ ! ꢪꢷ ꢯ꣄ꢬꢷꢔꢶꢬꢶꢪ꣄ ꢲꣁꢡꢾ ꢕꢠ꣄ꢜꢒꢬ꣄ꢠꢥꢸꢒ꣄ ꢲꢥꢶ ꢪꣁꢬꢞꢶ ꢡꢾꢒ ꢙꣁꢮꢳ꣄ ꢲꣁꢡꢾ ꢕꢵꢜꢸ ꢓꢳ꣄ꢳꢶ ꢂꢮ꣄ꢞꢶꢒꢶ ꢪꢾꢥꢶ ꢕꢵꢜ꣄ ꢣꢾꢒ꣄ꢒꢞꢶꢱ꣄ ꣎
ꢬꢙꣁ ꢕꣂꢰꢥꣁ ꢒꢾꢬꢾ ꢤꢵꢥꢸꢒꢸ ꢣꣁꢮ꣄ꢬꢶꢒꢸ ꢗꢵꢬ꣄ ꢱꢱꢬ꣄ ꢱꣁꢥ꣄ꢥꢵ ꢥꢵꢠꢒꢸꢥ꣄ ꢱꢪ꣄ꢪꢵꢥ꣄ꢒꢥꢶ ꢣꢶꢫꢾꢱ꣄ ꣎ ꢗꢶꢡ꣄ꢬꢦꢸꢬꢶ ꢙꢥꢸꢥ꣄ ꢤꢵꢒ꣄ ꢥꢴꢷꢱ꣄ꢡꢒꢸ ꢔꢵꢪ꣄ꢪꢸ ꢙꢶꢮ꣄ꢭꢶ ꢂꢮ꣄ꢫꢵꢱ꣄ ! ꢬꢸꢮ꣄ꢮꣁ ꢣꢶꢥ꣄ꢥꢸꢪ꣄ ꢯ꣄ꢬꢷꢔꢶꢬꢶ ꢣꣁꢖ꣄ꢔꢬꢸꢪ꣄ ꢱꢸꢨ꣄ꢬꢪꢠ꣄ꢥꢾꢥ꣄ ꢤꣃꢬꣁ ꢩꢥ꣄ꢣꢶꢫꢵꢱ꣄ ꣎ ꢂꢱ꣄ꢒꢶ ꢡꢾꢥꢸ ꢱꢥ꣄ꢡꢸꢰ꣄ꢜꢶꢒꢥꢶ ꢙꢶꢮ꣄ꢫꢵꢱ꣄ ꣏
Leave a Reply
You must be logged in to post a comment.