ꢗꢒꢶ

ꢌꢭ꣄ꢫꣁ ꢭꢿꢪꢸ ꢒꢵꢫꢶ ꢒꢾꢬꢡ꣄ ꢬꢴꢷꢱꢶ ? ꢡꢾꢥꣁ ꢣꢾꢳ꣄ꢳꢿꢡꢸ ꢬꢴꢷꢱꢶ ꣎ ꢒꢶꢱꣁ ꢣꢾꢳꢡꢸ ꢬꢴꢷꢱꢶ ? ꢡꢥ꣄ꢣꢸ ꢗꢒꢶꢪ꣄ꢡꢒꢶ ꢗꢒꢶꢨꢾꢳꣁ ꢧꢶꢬ꣄ꢮꢱꢸ ꣎ ꢗꢔꢶ ꢣꢷ ꢨꢾꢳꢵꢥ꣄ ꢲꣁꢫꢶꢥꢸ ꢬꢴꢵꢡ꣄ꢡꢾꢪꢾꢥꢶ ꢱꢣꢵꢙꢥꢸꢭꢸꢥꣁ ꣎ ꢏꢠ꣄ꢜꣁꢠ꣄ꢜꣁ ꢨꢾꢳꣁ ꢗꢾꢒ꣄ꢒꢸꢬꢸ ꢱꣁꢒꣁ ꢆꢳ꣄ꢞ ꢬꢴꢵꢱꢸ ꣎

ꢍ ꢣꢾꢔꢸꢞꢵꢒꢾ ꢲꣁꢭ꣄ꢭꢵ ꢨꢾꢳꣁ ꢏꢒꢿꢱꢶ ꢧꢶꢬꢡ꣄ꢡꢾ ꢓꢭ꣄ꢭꢵ ꢨꢾꢭꣁ ꢧꢶꢬ꣄ꢥ ꣎ ꢲꣁꢭ꣄ꢭꢵ ꢣꢾꢔꢸꢞꢵꢪ꣄ ꢏꢠ꣄ꢜꣁ ꢓꢸꢜꣁ ꢔꢞꢶꢥ꣄ ꢬꢴꢵꢡ꣄ꢡꢾ ꣎ ꢡ꣄ꢫꣂ ꢙꢾꢔꢸꢥꢲꢵꢡꢸꢪ꣄ ꢓꢸꢜꣁ ꢤꢾꢬꢶꢭꢶ ꢧꢶꢬꢸꢮꢡ꣄ꢡꢾ ꣎ ꢲꣁꢭ꣄ꢭꢵ ꢣꢾꢔꢸꢞꢵ ꢪꢴꣁꢙꢵꢬꢸ ꢏꢠ꣄ꢜꣁ ꢓꣂꢭ꣄ ꢱꢿ ꣎ ꢡ꣄ꢫꣂ ꢓꣂꢭꢸꢮꢵꢜ꣄ꢜꣁꢒꢥꢸ ꢡꢥ꣄ꢣꢸꢡꢔꢡ꣄ꢡꢾ ꣎ ꢡꢥ꣄ꢣꢸꢥ꣄ ꢣꢷ ꢨꢾꢳꢵ ꢪꢴꣁꢣ꣄ꢣꢶ ꢱꢪ꣄ꢜꢶꢭꢶꢥ꣄ ꢩꢶꢬꢸꢞꣀꢭꢶꢥꢸ ꢦꢷꢝꣂꢱꢶ ꣎ ꢣꢾꢳ꣄ꢜ ꢣꢾꢳ꣄ꢜ ꢦꢷꢜꢸ ꢩꢬꢵꢞꢮꢫꢶ ꣎ ꢌꢭ꣄ꢫꣁ ꢓꣁꢨ꣄ꢩꢶꢒꢸ ꢲꢸꢙꢵꢳ꣄ ꢲꣁꢫꢶ ꢬꢴꢵꢱꢸ ꣎ ꢄꢜꢬꢸ ꢱꢿꢡ꣄ꢡꢾꢱꢷꢭꢸꢮꣁ ꣎

ꢡꢥ꣄ꢣꢸ ꢦꢷꢜꢶꢮ꣄ꢳꢶꢥꢸ ꢥꢾꢔꢸꢭꣁ ꢲꢥ꣄ꢣꢡ꣄ꢡꢾ ꣎ ꢥꢾꢔ꣄ꢔꢸꢥ꣄ ꢬꢸꢗ꣄ꢗꢶ ꢬꢴꢵꢫꢶ ꣎ ꢍ ꢓꢵꢫꢾꢡꢶ ꢡꢶꢰ꣄ꢜꢶꢬꢸ ꢃꢖ꣄ꢔꢸ ꢨꣁꢭꢪ꣄ ꢒꢾꢬꢫꢶ ꣎ ꢌꢪꣁ ꢡꢥ꣄ꢣꢸ ꢪꣃꢡ꣄ꢬꢪ꣄ ꢣꢾꢳꢵꢡ꣄ꢡꢾ ꢥꢴꢵ ꣎ ꢒꢾꢥ꣄ꢥꢸꢥꢱ꣄ꢒꢶ ꢗꢒꢶꢪ꣄ꢣꢾꢳ꣄ꢮꢵꢫꢶ ꣎ ꢬꢴꢔꢶ ꢣꢾꢳ꣄ꢮꢵꢫꢶ ꣎ ꢕꣁꢪꢸ , ꢢꣂꢬꢸ , ꢆꢞꢶꢡꢸꢧꣀꢭꢵꢡꢶ ꢒꢾꢥ꣄ꢥꢸꢥ꣄ ꢪꢾꢳꢵꢡꢸꢥ꣄ ꢣꢾꢳꢸꢮꢵꢫꢶ ꣎

ꢗꢒꢶꢒꢸ ꢨꣁꢣꢸꢭ꣄ ꢲꢹꢠ ꢣꢿꢱꢶꢡꣁꢒ꣄ꢒꢶꢥꢶ ꢂꢪꢾꢬꢶꢒ꣄ꢒꢣꢿꢱꢶꢪ꣄ꢬꢴꢷꢥꢸ ꢥꢵꢥꢵ ꢬꢷꢡꢶꢥꢿꢳꢸꢥ꣄ ꢑꢬꢣꢿꢱꢶꢥꢸꢒꢸ ꢭꢿꢡꢥ꣄ꢞꢶꢥꢸ ꢒꢵꢪꢸꢥ꣄ ꢗꢭꢡ꣄ ꢬꢴꢷꢫꢾꢱꢶ ꣎ ꢒꢦꢸꢱꢸꢥꢿꢭꢸ , ꢮꢶꢥꢡ꣄ꢡꢶꢱꢵꢥꢿꢭꢸ , ꢒꢠꢡ꣄ꢡꢾ ꢥꢿꢭꢸ , ꢅꢬꢸ ꢥꢿꢭꢸ , ꢣꢾꢳꢡ꣄ꢡꢾꢥꢿꢭꢸ , ꢦꢶꢛ꣄ꢙꢡ꣄ꢡꢾꢥꢿꢭꢸ , ꢒꣁꢨ꣄ꢨꢸ ꢥꢿꢭꢸ , ꢥꢶꢪ꣄ꢦꢡ꣄ꢡꢾꢥꢿꢭꢸ , ꢥꢶꢨꢡ꣄ꢡꢾꢥꢿꢭꢸ , ꢧꣀꢭꢵꢡꢶꢥ꣄ ꢱꢿꢪꢾꢥꢶ ꢙꢥꢶꢭꢶꢥ꣄ ꢱꢾꢫ꣄ꢭꢸꢮꢵꢫꢶ ꣎

ꢦꢸꢱꢶꢥꢶꢥ꣄

ꢗꢒꢶ ꢒꣁꢲꢵꢭꢶ ꢒꢾꢬ꣄ꢥꢶꢦꣁꢞꢡ꣄ꢡꢾ ꣎ ꢗꢒꢶ ꢣꢾꢳꢵꢡꢸꢪ꣄ ꢒꢵꢫꢶ ꢨꢿꢡꢸꢥ꣄ ꢱꢿꢡ꣄ꢡꢾ ꣎ ꢲꣁꢭ꣄ꢭꢵ ꢗꢒꢶꢨꢾꢳꣁ ꢒꣁꢭꢾꢥ꣄ꢡꣁ ꢚꢶꢬ꣄ꢒꢥꢶ ꣎ ꢗꢒꢶꢪꢸ ꢒꣂꢥ꣄ ꢮꢱ꣄ꢡꢸꢥ꣄ ꢣꢾꢳ꣄ꢮꢵꢫꢶ ꣎

ꢯꢨ꣄ꢣꢸꢥ꣄

ꢭꢾꢪꢸ ꢓꣂꢭꢸ ꢔꢿꢭꢸ ꢐꢮꢸ ꢆꢳ꣄ꢞꣁ ꢥꢾꢔꢸꢭꣁ ꢥꢾꢔ꣄ꢔꢸ ꢱꢶꢪ꣄ꢨꢸ ꢨꢸꢱꣁ ꢡꢸꢰ꣄ꢳꣁ ꢥꢶꢨ꣄ꢨꢸ ꢅꢬꢸ ꢥꢶꢪ꣄ꢦꢡ꣄ꢡꢾ ꢱꢷꢱꢸ ꢥꢿꢭꢸ ꣎

ꢡꢸꢰ꣄ꢳꣁ ꢒꣂꢥ꣄ꢭꢶꢖ꣄ꢔꢸ | ꢒꣂꢥ꣄ꢮꢗꢥꣁ ꣎ ꢭꢾꢪ꣄ꢪꢾꢥꢡ꣄ꢡꢾ ꢯꢨ꣄ꢣꢸꢒꢸ ꢱꢦ꣄ꢡꢪ꣄ꢫꢿꢒꢮꢗꢥꣁ ꢒꢶꢱꣁ ꣎ ꢗꢒꢶꢨꢾꢳꣁ ꢪꢾꢥꢡ꣄ꢡꢾꢪꣁ ꢗꢒꢶꢯꢨ꣄ꢣꢸ ꢒꣂꢥ꣄ꢮꢵꢗꢶ ꣎ ꢌꢒꢥꢶꢰ꣄ꢜꢡ꣄ꢡꢶꢒꢶꢱꣁ ꣎