ꢨꣂꢤꢥꣁ

ꢱꣃꢬꢔꢸꢬꢸ ꢍꢒꢸ ꢮꢶꢣ꣄ꢫꢵꢱꢵꢭꣁ ꢗꢭ꣄ꢡꣁ ꢒꢾꢬ꣄ꢭꢶ ꢑꢫꢵꢱ꣄ ꣎ ꢡ꣄ꢫꢾ ꢮꢶꢣ꣄ꢫꢵꢭꢫꢸꢪꢸ ꢮꢿꢣꢯꢵꢱ꣄ꢡꢬ꣄ꢥꢸ ꢂꢖ꣄ꢔꢸꢥ꣄ ꢂꢥꢿꢒ ꢮꢶꢣ꣄ꢫꢵꢥ꣄ ꢱꢶꢒ꣄ꢒꢡ꣄ꢡꢒꢸ ꢮꢶꢤꢦ꣄ꢬꢣꢿꢯꢶꢥꢸꢪ꣄ ꢬꢴꢷ ꢙꣃꢠꢵꢥ꣄ ꢂꢮꢶ ꢲꣁꢣ꣄ꢫꢵꢱ꣄ ꣎ ꢡꢾꢪꢵꢪ꣄ ꢬꢵꢙꢒꢸꢪꢵꢬꢸꢥ꣄ ꢪꢾꢳ꣄ꢳꢶ ꢲꣁꢣ꣄ꢫꢵꢱ꣄ ꣎

ꢏꢣꢶ ꢱꣃꢬꢔꢸꢬꢸ ꢂꢦꢸꢭ꣄ ꢯꢶꢰ꣄ꢫꢵꢥ꣄ ꢱꢾꢥ꣄ꢡꣁ ꢫꢵꢙꢸ ꢗꢭ꣄ꢮꢱ꣄ꢡꢒꢸ ꢦꢙꢾ ꢲꣁꢫꢾ ꢒꢵꢰ꣄ꢜꢸꢥ꣄ ꢓꢳ꣄ꢳꢶ ꢂꢮꢱ꣄ꢡꢒꢸ ꢮꢥꢪꢸ ꢗꢭꢶ ꢙꢶꢭꢿꢡꢸ ꢬꢴꢡꣁ ꢱꣃꢬꢔꢸꢬꢸ ꢲꢵꢡꢸꢪ꣄ ꢲꣁꢣꢾ ꢲꢵꢡꢸ ꢫꢰ꣄ꢜꢶ ꢓꢵꢭ꣄ ꢦꣁꢞꢾꢱ꣄ ꣎ ꢢꢾꢨ꣄ꢨꣁ ꢱꣃꢬꢔꢸꢬꢸ ꢭꢾꢒ꣄ꢡꣁ ꢲꢶꢨ꣄ꢨꢶ ꢲꣁꢣꢾ ꢪꢔꢤꢬꢵꢙ ꢒꢸꢪꢵꢬꣁ ꢓꢵꢭ꣄ ꢦꣁꢞꢾ ꢒꢬꢫꢰ꣄ꢜꢶ ꢮꢶꢥꢫꢪ꣄ꢒꢥꢶ ꢓꢭ꣄ꢭꢶ ꢂꢦꢸꢭ꣄ ꢃꢗꢵꢬ꣄ꢫꣁ ꢱꣃꢬꢔꢸꢬꢸ ꢙꣁꢮꢳ꣄ ꢣꢶꢫꢾꢱ꣄ ꣎ ꢱꣃꢬꢔꢸꢬꢸ ꢡ꣄ꢫꢾ ꢒꢬꢣꢠ꣄ꢞꢸ ꢓꢭ꣄ꢭꢶꢥꢸ ꢪꢔꢤꢬꢵꢙ ꢒꢸꢪꢵꢬꢸ ꢡꢳꢲꢵꢡꢸꢪ꣄ ꢨꣁꢭꢪ꣄ꢒꢥꢶ ꢲꢥꢾꢱ꣄ ! ꢬꢵꢙꢒꢸꢪꢵꢬꣁ ꢂꢦꢸꢭ꣄ ꢔꢸꢬꢸꢒꢸ ꢯꢾꢫ꣄ꢥꢸ “ ꢒꢵꢬꢠꣁ ꢥꢴꢷꢱ꣄ꢡꢒꢸ ꢪꣁꢒꣁ ꢒꢔꣁ ꢲꢥꢬꢶꢫꣁ ?” ꢪꢾꢥꢶ ꢦꢸꢱꢾꢱ꣄ ꣎ ꢦꢸꢱꢾ ꢕꢾꢞꢶꢪ꣄ ꢧꢷꢬ꣄ ꢨꣁꢭꢪ꣄ꢒꢥꢶ ꢲꢥꢾꢱ꣄ ꢱꣃꢬꢔꢸꢬꢸ ꣎ ꢬꢵꢙꢒꢸꢪꢵꢬꣁ ꢲꢵꢡꢸ ꢣꢸꢥꣁ ꢱꢾꢥ꣄ꢡꣁ ꢔꢸꢬꢸ ꢙꣁꢮꢳ꣄ ꢧꢷꢬ꣄ ꢦꢸꢱꢾꢱ꣄ ꢒꢔꣁ ꢪꣁꢒꣁ ꢲꢥꢬꢶꢫꣁ ꢪꢾꢥꢶ ꣎ ꢱꣃꢬꢔꢸꢬꢸ ꢬꢵꢙꢒꢸꢪꢵꢬꢸꢒꢸ ꢯꢾꢫ꣄ꢥꢸ ꢪꢷ ꢡꣁꢒꣁ ꢲꢥꢾꢱ꣄ꢡꢾꢒꣁ ꢒꢵꢬꢠꣁ ꢂꢡ꣄ꢡꣁ ꢡꣁꢒꣁ ꢒꢳꢵꢥꢵ ꢣꢶꢥ꣄ꢥꢸ ꢙꢡꣁ ꢙꢡꣁ ꢡꢹꢱ꣄ ꢙꢥ꣄ꢭꢫꢶ ꢪꢾꢥꢶ ꢔꢸꢬꢸ ꢱꢖ꣄ꢔꢾꢱ꣄ !

ꢬꢵꢙꢒꢸꢪꢵꢬꣁ ꢔꢸꢬꢸ ꢮꢡ꣄ꢡꣁ ꢎꢒꢶꢭꢶ ꢮꢶꢥꢫꢪ꣄ꢒꢥꢶ ꢲꣁꢣꢾꢱ꣄ ꣎ ꢮꢬ꣄ꢰꢸꢥ꣄ ꢣꢶꢫ꣄ꢫꣁ ꢤꢪꢾꢱ꣄ ꢪꢔꢤꢣꢿꢯꢶ ꢬꢵꢙꢒꢸꢪꢵꢬꣁ ꢂꢦꢸꢭ꣄ ꢱꢶꢪ꣄ꢲꢵꢱꢥꢪꢸ ꢨꢶꢱꢶ ꢬꢵꢙ꣄ꢙꢶ ꢗꢭ꣄ꢮꢶꢭꢿꢡ꣄ ꢲꣁꢣꢾꢱ꣄ ꣎ ꢏꢣꢶ ꢱꣃꢬꢔꢸꢬꢸ ꢪꢔꢤꢬꢵꢙ꣄ꢫ ꢱꢩꢵꢒꢸ ꢂꢮꢶ ꢂꢦꢸꢭ꣄ ꢯꢶꢰ꣄ꢫꢵꢒꢸ (ꢪꢔꢤꢣꢿꢯꢶ ꢬꢙꣁ) ꢣꢾꢒ꣄ꢒꢶ ꢮꢡ꣄ꢡꣁ ꢒꢾꢬꢶꢥꢸ ꢃꢯꢶꢥ꣄ ꢣꢶꢫꢾꢱ꣄ ꣎

ꢢꢾꢨ꣄ꢨꣁ ꢬꢙꣁ ꢂꢦꢸꢭ꣄ ꢔꢸꢬꢸꢒꢸ ꢯꢾꢫ꣄ꢥꢸ “ꢡꢸꢪ꣄ꢬꢾ ꢙꣁꢮꢳ꣄ ꢫꣂꢒ꣄ ꢮꢶꢰꢫꢸ ꢦꢸꢱꢸꢥꣁ ꢪꢾꢥꢶ ꢲꢮ꣄ꢞꢬꢶꢫꣁ”  ꢪꢾꢥꢶ ꢱꢖ꣄ꢔꢾꢱ꣄ ꣎ ꢔꢸꢬꢸ ꢦꢹꢱ꣄ ꢨꢵ ꢪꢾꢥꢶ ꢱꢖ꣄ꢔꢾꢱ꣄ ꣎ ꢧꢭ꣄ꢗꣁ ꢬꢙꣁ “ ꢱ꣄ꢮꢵꢪꢶꢥꢸ ꢪꢷ ꢡꢸꢪ꣄ꢬꢾ ꢮꢶꢣ꣄ꢫꢵꢱꢵꢭꢵꢪ꣄ ꢮꢶꢣ꣄ꢫꣁ ꢱꢶꢒ꣄ꢒꢡ꣄ꢡꢮꢿꢳ꣄ ꢏꢠ꣄ꢜꢵꢳ꣄ ꢪꣁꢬ꣄ ꢡꢳꢲꢵꢡꢸꢪ꣄ ꢲꢥ꣄ꢫꢵꢱ꣄ ꢡꢾꢭ꣄ꢫꢒꣁ ꢒꢵꢬꢠꣁ ꢒꢵꢫꣁ ꢪꢾꢥꢶ ꢪꣁꢬꣁ ꢲꢵꢭꢶ ꢂꢖ꣄ꢔꢸꢥ꣄ ꢙꢥ꣄ꢭꢸꢮꢵꢬꢥꢶ ꢡꢸꢪꢶ ꢡꢾꢭ꣄ꢭꢾ ꢥꢶꢮꢬ꣄ꢡꢶ ꢒꢾꢬ꣄ꢥꣁ ꢪꢾꢥꢶ ꢮꢶꢥꢫꢪ꣄ꢒꢥꢶ ꢪꢾꢭ꣄ꢭꢶꢫꢾꢱ꣄ ꣎

ꢱꣃꢬꢔꢸꢬꢸ ꢬꢙꢵꢒꢸ ꢯꢾꢫ꣄ꢥꢸ ꢲꢱꢶꢭꢿꢡꢸ ꢡꢾꢥ꣄ꢣꢹꢱ꣄ ꢪꢷ ꢡꣁꢒꣁ ꢲꢥ꣄ꢬꢶꢫꣁ ꢥꢴꢵ ꢨꣂꢤꢥꣁ ꢒꢾꢬ꣄ꢬꢶꢫꣁ ! ꢗꢹꢒꢸꢥ꣄ ꢒꢾꢬ꣄ꢥꢵꢱ꣄ꢡꢾ ꢏꢙꢥꢵꢒꢸ ꢥꢶꢔ꣄ꢬꢔꢸ ꢒꢾꢬꢾꢡꢶ ꢡꢾꢥꣁ ꢒꣂꢥꢒꢸ ꢣꢸꢒ꣄ꢓꢸ ꢦꣁꢥ꣄ꢣꣀ ꢪꢾꢥꢱ꣄ꢡꢿꢱꢶ ꢪꢷ ꢡꣁꢒꣁ ꢨꣂꢤꢥꣁ ꢒꢾꢬꢾꢫꣁ ꣎ ꢡꢹ ꢬꢵꢙ꣄ꢙꢶ ꢗꢭ꣄ꢡꣁ ꢒꢾꢬꢬꢶꢫꣁ ꢬꢙꣁ ꢒꣂꢥ꣄ ꢗꢹꢒ꣄ꢮꢵꢥ꣄ ꢒꣂꢥ꣄ ꢗꣁꢒ꣄ꢮꢵꢥ꣄ ꢪꢾꢥꢶ ꢙꢔꢬꢪ꣄ꢒꢥꢶ ꢱꢷꢒꢶꢥ꣄ ꢥꢶꢔ꣄ꢬꢔꢸ ꢣꢾꢥꣁ ꣎ ꢌꢭ꣄ꢡꢾ ꢙꢥꢞꢱ꣄ꢡꢒꢸ ꢡꢾꢥ꣄ꢣꢹꢱ꣄ ꢡꣁꢒꣁ ꢲꢥꢶ ꢨꣂꢤꢥꣁ ꢒꢾꢬꢾꢫꣁ ꢪꢾꢥꢶ ꢱꣃꢬꢔꢸꢬꢸ ꢱꢖ꣄ꢔꢾꢱ꣄ ꣎ ꢡꢸꢪꢶ ꢱꢖ꣄ꢔꢾ ꢮꢶꢰꢫꢸ ꢪꢷ ꢗꣁꢒ꣄ꢒꢜ꣄ ꢙꢥ꣄ꢭꢶꢞꢶꢫꣁ ꣎ ꢪꣁꢬꣁ ꢙꢶꢮ꣄ꢥꢪꢱ꣄ꢒꢶ ꢡꢸꢪꢶ ꢱꢖ꣄ꢔꢬꢶꢫꣁ ꢆꢦꢣꢿꢱ꣄ꢤꢵꢥꢸꢒꢸ ꢬꢴꢮꢸꢱꢶ ꢪꢾꢥꢶ ꢪꢔꢤꢣꢿꢯꢶ ꢬꢙꣁ ꢮꢶꢥꢫꢪ꣄ꢒꢥꢶ ꢂꢦꢸꢭ꣄ ꢔꢸꢬꢸ ꢙꣁꢮꢳ꣄ ꢪꢾꢥꢾꢱ꣄ ꣏