ꢨꢵꢭ ꢬꢵꢪꢵꢫꢠꢸ – ꣔

ꢱꢸꢔ꣄ꢬꢷꢮꢸꢒꢾ ꢮꢵꢥꢬ ꢦꢳꢵꢥꢸ ꢱꢸꢥ꣄ꢣꢸꢬꢸꢒꢹꢱ꣄ ꢂꢳꢩꢥ꣄ꢣꢶ ꢭꢖ꣄ꢒꢵ ꢔꢵꢪ꣄ꢪꢸ ꢡꢸꢬ꣄ꢫꢵꢱ꣄ ꣎ ꢂꢳ ꢩꢥ꣄ꢣꢡ꣄ꢡꢒꢸ ꢥꢴꢥ꣄ꢥ ꢥꢴꢥ꣄ꢥ ꢗꢶꢔ꣄ꢭꣁ ꢪꢾꢳ꣄ꢳꢶ ꢱꢲꢵꢮ꣄ ꢒꢾꢬꢾꢱ꣄ ꣎ ꢡ꣄ꢫꢾ ꢡꢾꢪꢵꢪ꣄ ꢱꣁꢥ꣄ꢡꢸ ꢲꣁꢫ꣄ ꢯ꣄ꢬꢷꢬꢵꢪꣁ ꢡ꣄ꢫꢿ ꢗꢶꢔ꣄ꢭꢵꢒꢸ ꢲꢵꢡꢸꢬ꣄ꢭꢷ ꢦꢵꢜ꣄ꢗꢸꢬꢶ ꢣꢶꢫꢾꢱ꣄ ꣎ ꢲꢶꢥ꣄ꢣꢵꢒꢸ ꢗꢶꢔ꣄ꢭꢵꢥꢸ ꢦꢵꢜ꣄ ꢲꣂꢬ꣄ ꢢꢷꢥ꣄ ꢂꢖ꣄ꢔꢶꢳꢶꢥ꣄ ꢗꢸꢬꢾ ꢱꣁꢒꢥ꣄ ꢬꢿꢓꣁ ꢯꢿꢡ꣄ꢡꢾ ꢣꢾꢒ꣄ꢒꢸꢮꢵꢫ꣄ ꣎   

ꢭꢖ꣄ꢒꢿꢯ꣄ꢦꢸꢬꢸ ꢬꢴꢮꢠꢸꢒꢸ ꢒꢸꢪ꣄ꢩꢒꢬ꣄ꢠꢸ, ꢮꢶꢩꢷꢰꢠꢸ ꢪꢾꢥꢶ ꢣꢷ ꢩꣀꢥ꣄ ꣎ ꢌꢪꣁ ꢬꢴꢮꢠꢸ ꢪꢾꢥꢶꢒꢸꢥ꣄ ꢙꢡ ꢣꢸꢱ꣄ꢬ ꢒꣁꢖ꣄ꢒꢶꢥꢵꢲꢵꢭꢸ ꢂꢦꢸꢭꢸꢒꢸꢂꢥ꣄ꢡꢸ ꢲꣂꢲꣁꢥꢵ ꢪꢾꢥꢶ ꢨ꣄ꢬꢲꢪ ꢣꢿꢮ꣄ ꢙꣁꢮꢳ꣄ ꢮꢬꢸꢥ꣄ ꢓꢳ꣄ꢬꢴꢶꢫꢾꢱ꣄ ꣎ ꢪꢾꢥ꣄ꢒ꣄ꢫꢵꢥ꣄ ꢲꢵꢭ꣄ ꢂꢦꢸꢭꢸꢒ꣄ ꢲꢵꢥꢶ ꢒꢾꢬꢥ꣄ ꢪꢸꢱꢸꢥꢵ ꢪꢾꢥꢶ ꢲꢾꢪ꣄ꢪꢭ꣄ (ꢔꢾꢬꢸꢮ꣄) ꢡꢾꢒꣁ ꣎   ꢒꢸꢪ꣄ꢩꢒꢬ꣄ꢠꢸꢒꢸ ꢣꢿꢮꢸꢥꢸ ꢱꣁꢒꣁ ꢂꢦꢸꢭꢸꢪꢾꢳ꣄ꢳꢶ ꢪꣁꢬꢥ꣄ ꢥꢴꢷꢥꢴꢵꢡ꣄ꢡꢾꢮꢬꢸ ꢦꣁꢥ꣄ꢣꢸꢭ꣄ꢥꣁ ꢪꢾꢥꢶ ꢃꢱ꣄ꢡꣁ ꣎ ꢮꢬꢸꢥ꣄ ꢪꢔꢾꢮꢿꢳ꣄ ꢡꣂꢠ꣄ ꢔꣁꢳꢫꢱ꣄ ꣎ ꢥꢶꢡ꣄ꢫꢡ꣄ꢮꢪ꣄ ꢪꢾꢥꢥ꣄ ꢓꣁꢨ꣄ꢨꢶꢪ꣄ ꢙꢷꢮ ꢮꢥ꣄ꢡꢸꢒꢥ꣄ ꢬꢴꢥꢶ ꢪꢔꢡ꣄ꢡꢾ ꢱꣁꢞ꣄ꢞꢶ ꢥꢶꢡ꣄ꢬꢡ꣄ꢮꢪ꣄ ꢗꣁꢒ꣄ꢒꢞ꣄ ꢲꣂꢖ꣄ꢔꢸꢪ꣄ ꢬꢴꢥꢶ ꢮꢬꢸꢒꢥ꣄ ꢂꢨ꣄ꢨꢳ꣄ꢳꢾꢱ꣄ ꣎ ꢲꢵꢭꢶꢪꢸ ꢓꣁꢨ꣄ꢨꢶꢪ꣄ ꢥꢶꢛ꣄ꢙꢶꢬꢴꢶꢫꢾꢱ꣄ ꣎   ꢮꢶꢩꢷꢰꢠꢸ ꢓꣁꢨ꣄ꢨꢶꢪ꣄ ꢮꢶꢰ꣄ꢠꢸ ꢩꢒ꣄ꢡꢶꢱꢾꢬ ꢬꢴꢶꢫꢾꢡ꣄ꢡꢾꢥꣁ ꣎ ꢥꢿꢒ꣄ ꢔꢸꢠ꣄ꢠꢸꢥ꣄ ꢗꢵꢭꢸꢥ꣄ ꢯꢿꢡ꣄ꢡꢾꢥꣁ ꣎ ꢲꢵꢭꢶꢪꢸ ꢓꣁꢨ꣄ꢨꢶꢪ꣄ ꢩꢒ꣄ꢡꢶꢪꢹꢱ꣄ ꢨꢸꢞꢶ ꢬꢴꢥꣁ ꢤꢾꢬꢸꢪꢸ ꢮꢵꢜ꣄ ꢪꣁꢥ꣄ꢥꢸ ꢗꢭ꣄ꢥꣁ ꢪꢾꢥꢶ ꢮꢬꢸꢥ꣄ ꢓꢳ꣄ꢳꢶꢫꢾꢱ꣄ ꣎   ꢬꢵꢮꢠꣁ ꢱꢷꢡꢵꢒꢸ ꢂꢦꢲꢬꢥꢸ ꢒꢾꢬ꣄ꢭꢶ ꢂꢮꢾꢫꣁ ꢡꢾꢒꣁ ꢡꢷꢳꢶꢡ꣄ꢒꣁ ꢪꢾꢳ꣄ꢳꢶ ꢱꢾꢬ꣄ꢒ ꢭꢔꢾꢥꢶ ꣎ ꢱꢷꢡꢵꢒꢸ ꢬꢵꢪꣁꢙꣂꢳꢸ ꢭꢾꢙ꣄ꢙꢶ ꢣꢷꢞꢾ ꢪꢾꢥꢶ ꢒꢶꢡ꣄ꢒꢫꢷ ꢮꢶꢤꢸꢥꢸꢪ꣄ ꢲꢾꢞꢶ ꢱꢖ꣄ꢔꢾꢱꢶ ꣎  ꢬꢵꢮꢠꣁ ꢎꢒꢸꢥꢵꢙ꣄ꢙꢶꢫꢾꢲꢵꢭ꣄ ꢡꢾꢒ꣄ꢦ꣄ ꢨꢥ꣄ꢤꢸꢡ꣄ꢮꢪ꣄ ꢡꣁꢳ꣄ꢳꢶ ꢯ꣄ꢬꢷꢬꢵꢪꣁ ꢙꣁꢮꢳ꣄ ꢱꢬꢥ꣄ ꢲꣁꢫꢾꢱꢶ ꣎ ꢲꢵꢫ꣄ ꢗꢾꢬꢶ ꢬꢴꢥꣁ ꢯꢿꢡ꣄ꢡꢾ ꢢꢵꢪ꣄ ꢒꢳꣀꢭꢶ ꢗꢾꢬꢶ ꢂꢱ꣄ꢒꢶ ꢗꣁꢒ꣄ꢒꢞꢸꢥ꣄ ꢦꣁꢥ꣄ꢣꢾꢱ꣄ ꣎    ꢭꢖ꣄ꢒꢵꢪꢸ ꢯ꣄ꢬꢷꢬꢵꢪꢵꢒ꣄ꢒꢶꢥ꣄ ꢬꢴꢮꢠꢸꢒꢸ ꢪꢴꢣ꣄ꢣꢶꢪ꣄ ꢩꢾꢳꢶ ꢪꢴꣁꢜꣁ ꢆꢕ꣄ꢡ ꢚꢾꢞꣁ ꢗꢭꢾꢱꢶ ꣎

ꢬꢵꢮꢠꢸ ꢩꣀ ꢒꢸꢪ꣄ꢩꢒꢬ꣄ꢠꢸ ꢨꢾꢜꣁ ꢄꢥ꣄ꢣ꣄ꢬꢙꢶꢡ꣄ꢡꢸ ꢃꢣꢶꢡꢾꢥꢸ ꢪꣁꢬꢵꢱꢶ ꣎ ꢱꢾꢡ꣄ꢭꢵꢪꢸ ꢯ꣄ꢬꢷꢬꢵꢪꢗꢥ꣄ꢣ꣄ꢬꢸ ꢲꢡꢬꣁ ꢬꢴꢮꢠ꣄ ꢪꢾꢳ꣄ꢳꢶ ꢣꢾꢮ꣄ꢔꢾꢱꢶ ꣎  ꢣꢾꢮ꣄ꢔꢾ ꢣꢣꢵꢒꢸ ꢒꢬ꣄ꢥꢯꢿꢡ꣄ꢡꢾ ꢂꢥ꣄ꢡꢶꢪ ꢒ꣄ꢬꢶꢫꢵꢥꢱ꣄ꢒꢶ ꢮꢶꢩꢷꢰꢠꢸ ꢒꢬꢾꢱ꣄ ꣎ ꢯ꣄ꢬꢷꢬꢵꢪꣁ ꢮꢶꢩꢷꢰꢠꢸꢒꢸ ꢪꢒꢸꢜꢵꢩꢶꢰꢿꢒ꣄ ꢲꣁꢮꢞꢶ ꢭꢖ꣄ꢒꢵꢤꢶꢦꣁ ꢒꢬꢵꢱ꣄ ꣎  ꢯ꣄ꢬꢷ ꢱꢷꢡꣁ ꢪꢾꢳ꣄ꢳꢶ ꢂꢔ꣄ꢥꢶ ꢦ꣄ꢬꢮꢿꢱ꣄ ꢲꣁꢫꢶ ꢂꢦꢸꢭ꣄ ꢦꢸꢥꢶꢡꢪ꣄ ꢭꣂꢒ꣄ ꢙꢥꢡ꣄ꢡꢶꢱꣁ ꢒꢬꢶ ꢯ꣄ꢬꢷꢬꢵꢪꣁꢱꢾꢬ ꢗꢾꢬꢶꢱ꣄ ꣎ ꢦꢸꢰ꣄ꢦꢒ ꢮꢶꢪꢵꢥꢸꢪ꣄ ꢱꢷꢡꣁ, ꢭꢒ꣄ꢰ꣄ꢪꢠꣁ, ꢱꢸꢔ꣄ꢬꢷꢮ꣄, ꢮꢶꢩꢷꢰꢠꢸ ꢂꢖ꣄ꢔꢸꢥ꣄ ꢃꢛ꣄ꢙꢥꢿꢫꢸ ꢃꢣꢶꢥ꣄ ꢡꢾꢖ꣄ꢒ ꢱꢾꢥ꣄ꢡ ꢮꢵꢥꢬ ꢦꢳꢵꢥꢸꢒꢸ ꢨꣁꢭ꣄ꢭꢶ ꢯ꣄ꢬꢷꢬꢵꢪꣁ ꢂꢫꣂꢤ꣄ꢫꢵꢒꢸ ꢥꢶꢔꢶꢳꢾꢱ꣄ ꣎ 

ꢩꢬꢡꢸ ꢗꣁꢮ꣄ꢣꢹ ꢏꢬ꣄ꢱꢸꢥꢸꢪ꣄ ꢯ꣄ꢬꢷ ꢬꢵꢪ꣄ꢪꢹꢬ꣄ꢡꢶ ꢲꢜ꣄ꢮꢥꢸ ꢔꣂꢱꢷ ꢬꢵꢙ꣄ꢙꢶ ꢱꣃꢥꢶꢭꢿꢡ꣄ ꢲꣁꢣꢾꢱ꣄ ꣎ ꢂꢖ꣄ꢔꢸꢥ꣄ ꢬꢵꢪ꣄ꢪꢹꢬ꣄ꢡꢶ ꢣꢾꢒ꣄ꢒꢵꢥꢶꢥꢵ ꢪꢾꢥꢶ ꢣꢸꢬ꣄ꢭꢡ꣄ꢡꢥꢒꢥ꣄ ꢲꢸꢳꣁ ꢦꢾꢜ꣄ꢮꢶ ꢡ꣄ꢫꢿ ꢂꢔ꣄ꢥꢶꢒꢸ ꢗꢸꢜ꣄ꢜꢸꢧꢶꢬꢶ ꢡꢾꢪꣁ ꢂꢦꢸꢭꢸꢒꢸ ꢨꣁꢭꢶ ꢣꢷꢭꢡ꣄ꢡꢒꢸ ꢤꢶꢜꢮ꣄ ꢲꣁꢫ꣄ꢭꢾꢱ꣄ ꣎ ꢃꢛ꣄ꢙꢥꢿꢫꢸ ꢧꣀꢭꢵꢪꢸ ꢙꢷ ꢯ꣄ꢬꢷ ꢬꢵꢪ꣄ꢪꢹꢬ꣄ꢡꢶ ꢂꢮꢬꢶꢫ ꢮꢶꢮꢬ꣄ ꢒꢳꢞꢶ ꢡꢾꢒ ꢱꣁꢪ꣄ꢦꢸ ꢱꢸꢥ꣄ꢣꢸꢬꢸꢪꢸ ꢨꢸꢞꢞꢾꢱ꣄ ꣎ ꢩꢬꢡꢸ ꢯ꣄ꢬꢷ ꢬꢵꢪꢵꢒꢸ ꢡꢶꢬꢒꢮꢶ ꢥꢪꢶ ꢦ꣄ꢬꢿꢮꢸꢒꢸ ꢦꣁꢜꢳꢶ ꢩꢥ꣄ꢣꢶꢭꢶ ꢲꣃꢱꢾꢱꢶ ꣎ ꢧꢬ ꢗꣁꢒ꣄ꢒꢜ꣄ ꢣꢶꢥ꣄ꢥꢸꢪꢸ  ꢗꣁꢒ꣄ꢒꢜ꣄ ꢮꢿꢳꢸꢪꢸ ꢂꢥꢿꢒ ꢥꢾꢣ꣄ꢣꢶ ꢡꢷꢬ꣄ꢡꢸꢥ꣄ ꢲꢵꢭ꣄ ꢯ꣄ꢬꢷꢬꢵꢪ꣄ꢪꢹꢬ꣄ꢡꢶꢒꢸ ꢂꢩꢶꢰꢿꢒ꣄ ꢒꢾꢬꢶ ꢨꢸꢞꢞꢶ ꢂꢥꢿꢒ ꢈꢰꢶ ꢪꢸꢥꢶꢥꢸ ꢦ꣄ꢬꢱꢥ꣄ꢥꢸ ꢬꢴꢡ ꢯ꣄ꢬꢷꢬꢵꢪ꣄ꢪꢹꢬ꣄ꢡꢶꢒꢸ ꢦꢜ꣄ꢜꢵꢩꢶꢰꢿꢒꢸ ꢩꢾꢳꢶ ꢮꢶꢱꢿꢰ꣄ꢒꢥ꣄ ꢲꣁꢫꢾꢱꢶ ꣎ ꢬꢾꢡ꣄ꢡꢥꢸ ꢒꢗꢶꢡꢸ ꢲꣁꢫꢾ ꢩꢾꢳꢶ ꢯ꣄ꢬꢿꢰ꣄ꢝ ꢱꢶꢪ꣄ꢪꢵꢱꢥꢸ ꢲꣂꢬ꣄ ꢪꢴꢣ꣄ꢣꢶꢪ꣄ ꢯ꣄ꢬꢷꢬꢵꢪ꣄ꢪꢹꢬ꣄ꢡꢶ ꢨꢶꢱꢶ ꢭꢾꢒ꣄ꢡ ꢱꢷꢡꢵꢒ꣄ ꢨꢶꢱꢳ꣄ꢳꢶ ꢱꢒ꣄ꢰ꣄ꢪꢠꣁ ꢱꢡꢶ ꢤꢾꢬ꣄ꢭꢸꢡ, ꢩꢬꢡꢸ ꢱꢡꢺꢕ꣄ꢥꣁ ꢗꢵꢪꢬꢸ ꢡꢒꢸꢡ, ꢮꢾꢣꢸꢬ꣄ ꢃꢛ꣄ꢙꢥꢿꢫꢸ ꢲꢵꢡ꣄ꢡꢸꢒ꣄ꢒꢶ ꢦꢵꢣꢵꢬꢮꢶꢥ꣄ꢣꢪꢸꢥꢸ ꢥꢪ꣄ꢭꢿꢡ꣄ ꢬꢴꢡ ꢂꢥꢿꢒ ꢈꢰꢶꢥꢸ ꢬꢙꢵꢥꢸ ꢮꣀꢩꢮꢸ ꢣꣁꢳ ꢂꢬꢱ꣄ꢡ ꢣꢾꢒ꣄ꢒꢶ ꢃꢱꢶꢣꢷ ꢥꢪꢷ ꢭꣂꢒꢸꢬ꣄ ꢬꢴꢶꢫꢾ ꢱꢒꢭ ꢙꢷꢮꢬꢵꢱꢶꢥꢸ ꢱꢒꢭ ꢪꢖ꣄ꢔꢳꢸꢥ꣄ ꢦꣁꢥ꣄ꢣꢶ ꢱꣁꢥ꣄ꢡꢸ ꢱꢾꢥ꣄ꢡ ꢙꢶꢮꢡ꣄ꢡꢒꢸ ꢯ꣄ꢬꢷ ꢬꢵꢪ꣄ꢪꢹꢬ꣄ꢡꢶ ꢂꢠꢸꢔ꣄ꢬꢲꢸ ꢒꢬꢵꢱ꣄ ꣎

ꢨꢵꢭ ꢬꢵꢪꢵꢫꢠꢸ ꢱꢪ꣄ꢦꢹꢬ꣄ꢠꢸ