ꢩꢵꢭ ꢬꢵꢪꢵꢫꢠꢸ – ꣓

ꢈꢰ꣄ꢫꢪꢹꢔꢸ ꢪꢾꢥꢥ꣄ ꢣꣁꢖ꣄ꢔꢬꢸꢬ꣄ ꢯ꣄ꢬꢷ ꢃꢛ꣄ꢙꢥꢿꢫꢸꢒꢸ  ꢡꢾꢒꢮꢵꢜꢸꢬ꣄ ꢱꢸꢔ꣄ꢬꢷꢮꢸꢒꢸ ꢣꢾꢒ꣄ꢒꢶ ꢱꢶꢖ꣄ꢔꣀꢡ꣄ ꢒꢬ꣄ꢭꢶꢫꢵꢱ꣄ ꣎ ꢮꢵꢭꢶꢒꢶꢥ꣄ ꢱꢸꢔ꣄ꢬꢷꢮꢸ ꢣꢣꣁ ꢩꣀꢥ꣄ ꣎ ꢡꢾꢖ꣄ꢒꢵꢪ꣄ ꢚꢾꢞꣁ ꢲꣁꢫ꣄ꢭꢶ ꢬꢴꢶꢫꢾꢱ꣄ ꣎ ꢡꢾꢪꣁ ꢯ꣄ꢬꢷꢬꢵꢪꣁ ꢱꢸꢔ꣄ꢬꢷꢮꢸꢒ꣄ ꢱꢲꢵꢮ꣄ ꢬꢴꢷ ꢡꢾꢒ ꢲꢵꢭꢸ ꢮꢵꢭꢶ ꢪꣂꢒ꣄ꢰꢶꢒꢸ ꢮꢵꢜ꣄ ꢲꣁꢫꢾꢱ꣄ ꣎ ꢱꢸꢔ꣄ꢬꢷꢮꢸ ꢒꢶꢰ꣄ꢒꢶꢥ꣄ꢤꢵꢒꢸ ꢬꢙꣁ ꢲꣁꢫꢾꢱ꣄ ꣎   ꢃꢛ꣄ꢙꢥꢿꢫꢸ ꢮꢵꢜꢸꢪꢸ ꢂꢦꢸꢭ꣄ ꢣꢾꢒ꣄ꢒꢶ ꢓꢳ꣄ꢳꢶꢫꢾ ꢢꢾꢮ꣄ꢞ ꢩꢹꢰꢠꢵꢥ꣄ ꢬꢵꢪ꣄ꢪꢹꢬ꣄ꢡꢶ ꢙꣁꢮꢳ꣄ ꢣꢾꢒ꣄ꢒꢞꢾꢱ꣄ ꣎ ꢡꢿ ꢱꢷꢡꢵ ꢩꢹꢰꢸꢠ꣄ ꣎ ꢬꢵꢪ꣄ꢪꢹꢬ꣄ꢡꢶ ꢃꢛ꣄ꢙꢥꢿꢫꢸ ꢙꣂꢳꢸ ꢂꢦꢸꢭ꣄ ꢂꢖ꣄ꢔꢶꢳꢶꢥ꣄ ꢕꢭ꣄ꢭꢶ ꢯꢿꢡ꣄ꢡꢾ ꢪꢸꢣ꣄ꢣꢶ ꢲꢾꢞꢶꢣꢷ ꢱꢷꢡꢵ ꢯꢿꢡ꣄ꢡꢾ ꢢꢵꢪ꣄ ꢒꢳꣀꢭꢶ ꢃꢮꢶ ꢪꢾꢥ꣄ ꢲꢸꢒꢾꢱ꣄ ꣎   ꢯ꣄ꢬꢷ ꢃꢛ꣄ꢙꢥꢿꢫꢸ ꢒꣂꢥ꣄ꢫꣁ ꢪꢾꢳ꣄ꢳꢶ ꢱꢶꢫꢾ ꢪꢵꢡ꣄ꢬꢪꢹꢱ꣄ ꢡ꣄ꢫꢾ ꢤꢾꢬꢶ ꢱꢒꢭꢸ ꢙꢥ꣄ꢭꢱ꣄ꢡꢶꢱꢵ ꢨꢸꢣ꣄ꢤꢶꢮꢵꢥ꣄ ꣎ ꢯ꣄ꢬꢿꢰ꣄ꢝ ꢮꢵꢒ꣄ꢤꢥꢶ ꣎ ꢯ꣄ꢬꢷ ꢬꢵꢪꢵꢒꢸ ꢡꢾꢥꣁ ꢣꢾꢫ꣄ꢮꢸꢒꢥ꣄ ꢣꢾꢒ꣄ꢒꢾꢱ꣄ ꣎ ꢡꢾꢒꣁ ꢥꢵꢪꢪꢹꢱ꣄ ꢡꢵꢬꢒ ꢪꢥ꣄ꢡꢸꢬ꣄ ꢒꢬ꣄ꢭꢶꢫꢾꢱ꣄ ꣎ ꢯ꣄ꢬꢷ ꢬꢵꢪ꣄ ꢙꢫ ꢬꢵꢪ꣄ ꢙꢫ ꢙꢫ ꢬꢵꢪ꣄ ꢪꢾꢥꢶ ꢬꢵꢪ ꢥꢵꢪꢪ꣄ ꢪꢾꢭ꣄ꢭꢿꢡ꣄ ꢱꢸꢥ꣄ꢣꢸꢬ꣄ ꢣꢜꢾꢱ꣄ ꣎

ꢭꢖ꣄ꢒꢵꢒꢸ ꢭꢥ꣄ꢣꢾꢱ꣄ ꣎ ꢐꢒꣂꢒꢸ ꢢꢵꢪꢸꢥꢸꢪ꣄ ꢱꢸꢜ꣄ꢜꢸꢥꢵꢱ꣄ꢡꢒꢸ ꢨꣁꢜ꣄ꢜ ꢲꣂꢬ꣄ ꢦꢷꢜ꣄ ꢙꢾꢭꢶꢛ꣄ꢗꢾ ꢱꣁꢒꣁ ꢒꣁꢪ꣄ꢪꢶꢪ꣄ ꢮꢾꢒ꣄ꢒꢾꢱ꣄ ꣎ ꢱꢾꢡ꣄ꢭꢵꢪꢸ ꢯ꣄ꢬꢷ ꢬꢵꢪ꣄ꢗꢾꢥ꣄ꢣꢸꢬ꣄ ꢲꢜ꣄ꢮꢥꢸꢪꢹꢱ꣄ ꢲꣁꢣꢾ ꢱꢷꢡꢵꢒ꣄ ꢂꢯꣂꢒ ꢮꢥꢪꢸ ꢣꢾꢒ꣄ꢒꢾꢱ꣄ ꣎ ꢚꢵꢞ꣄ ꢲꣂꢬ꣄ ꢆꢛ꣄ꢗ ꢨꢶꢱꢶꢭ꣄ꢭꢶ ꢯ꣄ꢬꢷꢬꢵꢪ ꢮꣀꢩꢮꢸꢥ꣄ ꢱꢷꢡꢵ ꢒꢵꢥꢸꢪ꣄ ꢦꣁꢞꢱ꣄ꢡꢶꢱ ꢱꢖ꣄ꢔꢾꢱ꣄ ꣎ ꢣꣁꢱ꣄ꢒꣁ ꢆꢛ꣄ꢗꢳ꣄ꢳꢶ ꢱꢷꢡ ꢱꢷꢱꢶ ꣎ ꢚꢵꢞꢸꢛ꣄ꢗ ꢬꢴꢷ ꢓꢵꢭ꣄ ꢲꢸꢡ꣄ꢡꢶꢬꢶ ꢂꢮꢶ ꢯ꣄ꢬꢷꢬꢵꢪꣁ ꢣꢶꢫꢾ ꢪꢸꢣ꣄ꢣꢶ ꢱꢷꢡ ꢙꣁꢮꢳ꣄ ꢣꢷ ꢂꢦꢸꢭ꣄ ꢂꢮꢾ ꢒꢬꢾ ꢤꢾꢬꢶ ꢱꢖ꣄ꢔꢾꢱ꣄ ꣎ ꢬꢵꢒ꣄ꢰꢱ ꢒꣃꢬꢶꢥꢸꢪ꣄ ꢪꢾꢳ꣄ꢳꢶ ꢗꣁꢒ꣄ꢒꢞ꣄ ꢔꢸꢠ꣄ꢠꢸꢮꢥ꣄ꢡꢸꢥ꣄ ꢬꢴꢷꢱ꣄ ꢬꢴꢵꢥ꣄ꢒꢶ ꢥꢴꢵ ?  ꢱꢷꢡꢵꢒꢸ ꢩꢥ꣄ꢣꢶ ꢬꢒ꣄ꢰꢸꢮꢾꢥ꣄ ꢬꢴꢶꢫꢾ ꢒꣃꢬꢶꢠꢶꢪ꣄ ꢏꢠ꣄ꢜꢾꢥꣁ ꢩꢾꢳꢶ ꢗꣁꢒ꣄ꢒꢞ꣄ ꢡꢶꢥꣁ ꣎ ꢡ꣄ꢬꢶꢙꢜꣁ ꢪꢾꢥ꣄ꢥꢵꢮꢸ ꢂꢦꢸꢭ꣄ ꢣꢾꢒ꣄ꢒꢾ ꢗꣁꢒ꣄ꢒꢞ꣄ ꢱꣁꢦ꣄ꢥꢸꢥ꣄ ꢤꢾꢬꢶ  ꢱꢖ꣄ꢔꢶ ꢡꢶꢒꣁ ꢣꢸꢓꢸ ꢥꢶꢮꢬꢶꢱ꣄ ꣎    ꢯ꣄ꢬꢷ ꢃꢛ꣄ꢙꢥꢿꢫꢸ ꢂꢦꢸꢭ꣄ ꢱꢷꢡꢵꢒꢸ ꢤꢾꢒ꣄ꢒꢶ ꢙꢖ꣄ꢒꢸ ꢤꢾꢬꢶ ꢗꢹꢞꢵꢪꢠꢶ ꢪꢾꢥꢥ꣄ ꢯꢶꢬꣂꢬꢡ꣄ꢡꢥ꣄ ꢓꢳ꣄ꢳꢶ ꢭꢖ꣄ꢒꢵꢤꢶꢦꢵꢒꢸ ꢣꢾꢒ꣄ꢒꢥ꣄ ꢲꣃꢱꢾꢭ꣄ ꢂꢦ꣄ꢭꢵꢥꢸꢒꢥ꣄ ꢙꢵꢥꢵꢡ꣄ꢡꣁ ꢂꢦꢸꢭꢸꢒꢸ ꢩꢥ꣄ꢣꢶꢒꢬ꣄ꢭꢶ ꢙꢵꢡ꣄ꢡꢶꢱꣁ ꢒꢬ꣄ꢭꢾꢱ꣄ ꣎ ꢬꢴꢮꢠꢸ ꢣꢬ꣄ꢨꢵꢬꢸꢒꢸ ꢙꣀꢭꢥ꣄ꢣꢶ ꢯ꣄ꢬꢷꢬꢵꢪ ꢗꢥ꣄ꢣ꣄ꢬꢸ ꢫꢯꢱ꣄, ꢔꢬꢥ꣄ ꢱ꣄ꢬꢿꢫꢱ꣄ ꢤꢾꢬꢶ ꢱꢖ꣄ꢔꢾꢱ꣄ ꣎ ꢡꢾꢒ ꢲꢵꢭꢶ ꢬꢵꢒ꣄ ꢂꢥ꣄ꢭꢶꢫꢾ ꢬꢴꢮꢠ꣄ ꢡꢾꢒꣁ ꢦꢹꢱ꣄ ꢲꣂꢬ꣄ ꢮꢱ꣄ꢡꢬ꣄ꢥꢸ ꢔꢸꢠ꣄ꢮꢶ ꢲꢸꢳꣁ ꢭꢮꢶ ꢱꣁꢞꢡ꣄ꢡꢒꢸ ꢲꢸꢒꢾꢱ꣄ ꣎ ꢡ꣄ꢫꢿ ꢲꢸꢳꣁ ꢭꢮꢾꢫꣁ ꢥꢸꢔꢶꢭꢶ ꢃꢛ꣄ꢙꢥꢿꢫꢸ ꢡꢾꢒꢵ ꢬꢮꢸꢳꢹꢱ꣄ ꢲꢸꢳꢵꢪ꣄ ꢨꢸꢞꢞꢾꢱ꣄ (ꢙꢾꢳꢞꢾꢱ꣄)꣎ ꢧꢬ ꢱꢷꢡꢵꢪꢵꢫꢶꢒꢸ ꢤ꣄ꢫꢵꢥ꣄ ꢒꢬ꣄ꢭꢶꢭꢿꢡ꣄ ꢱꣁꢥ꣄ꢣꢸꢬꢸꢪꢸ ꢦꢹꢱ꣄ ꢨꢶꢙ꣄ꢮꢶ ꢲꢸꢳꣁ ꢪꢴꣃꢳꢳ꣄ꢳꢿꢱ꣄ ꣎ ꢱꢸꢥ꣄ꢣꢸꢬ꣄ ꢭꢖ꣄ꢔꢶ ꢯ꣄ꢬꢷꢬꢵꢪꣁ ꢙꣂꢳ꣄ꢭꢥ꣄ꢣꢶ “ꢣꢾꢒ꣄ꢒꢾꢱꢶ ꢱꢷꢡꢵꢒꢸ” ꢪꢾꢥꢶ ꢱꢖ꣄ꢔꢶ ꢂꢦꢸꢭ꣄ ꢓꢳ꣄ꢳꢶ ꢂꢮꢾ ꢙꢖ꣄ꢒꢸ ꢯꢶꢬꣂꢬꢡ꣄ꢡꢥ꣄ ꢣꢶꢫꢾꢱ꣄ ꣎