ꢨꢵꢭ ꢬꢵꢪꢵꢫꢠꢸ – ꣒

ꢈꢰꢶ ꢱꢵꢦꢥ ꢲꢵꢭ꣄ꢒꢶꢥ꣄, ꢧꢸꢳ꣄ꢳꣁ ꢣꢱꢬꢡꢸ ꢂꢦꢸꢭꢸꢒꢸ ꢣꢾꢮꢸꢱ꣄ꢪꢾꢥꢶ ꢲꣁꢣꢾ ꢮꢬꢸꢥ꣄ ꢣꢶꢫꢾꢡꢷꢱ꣄ ꢲꣂꢫ꣄ꢪꢾꢥꢶ ꢒꣀꢒꢿꢫꢶ ꢂꢨ꣄ꢨꢳ꣄ꢳꢶꢡ꣄ꢡꢶꢥꣁ ꢲꣁꢫꢾ ꢲꢵꢭꢸ ꢦꢜ꣄ꢜꢵꢩꢶꢰꢿꢒ꣄ ꢗꢭꢾꢥꢶ ꣎ ꢬꢵꢪ꣄ꢪꢹꢬ꣄ꢡꢶ ꢬꢵꢠꢸꢒ꣄ ꢙꢵꢡ꣄ꢡꢶꢱꣁ ꢲꣁꢫꢾꢱꢶ ꣎ ꢡꢾꢒ ꢱꢾꢥ꣄ꢡ ꢭꢒ꣄ꢰ꣄ꢪꢠꣁꢒꢶꢥ꣄ ꢱꢷꢡꣁ ꢪꢾꢳ꣄ꢳꢶ ꢬꢵꢠꢸꢒ꣄ ꢥꢶꢒꢶꢳꢵꢱꢶ ꣎ ꢒꣀꢒꢿꢫꢶ ꢃꢱ꣄ꢡꣁ ꢪꢾꢳ꣄ꢳꢶ ꢥꢶꢬꢵꢰꣁ ꢲꣁꢫꢾꢱꢶ ꣎ ꢡꢶꢥꣁ ꢬꢵꢪ꣄ꢪꢹꢬ꣄ꢡꢶ ꢗꣃꢣꢸ ꢏꢬ꣄ꢱꢸꢥ꣄ ꢬꢵꢠꢸꢒꢸ ꢤꢞ꣄ꢞꢷꢞꢶ ꢂꢦꢸꢭ꣄ ꢨꢾꢜꣁ ꢩꢬꢡꢸꢒꢸ ꢬꢵꢙ꣄ꢙꢶ ꢦꣁꢜ꣄ꢜꢪ꣄ ꢓꢞꢶ ꢣꢿꢥ꣄ ꢫꢡ꣄ꢡꢥ꣄ ꢒꢬ꣄ꢭꢶ ꢬꢴꢷꢡ꣄ꢡꢾ ꣎ ꢨꢾꢜꢵꢥ꣄ ꢭꢾꢔꢸꢡ꣄ꢡꣁ ꢬꢴꢵꢥꢵꢱ꣄ꢡ ꢱꢪꢫꢪꢸ ꢡꢹ ꢡꣁꢬ꣄ ꢙꢷꢮ꣄ ꢱꣁꢞꣀꢫꢷ ꢪꢾꢥꢶ ꢏꢠ꣄ꢜꢾ ꢈꢰꢶ ꢣꢱꢬꢢꢸꢒ꣄ ꢱꢵꢦꢥꣁ ꢣꢷ ꢲꣁꢣ꣄ꢫꢵꢱ꣄ ꣎ ꢬꢵꢪꣁꢒꢶꢥ꣄ ꢭꢒ꣄ꢰ꣄ꢪꢠꣁ ꢃꢬꢠ꣄ꢫ ꢮꢵꢱꢸꢒ꣄ ꢔꢾꢫꢾ ꢱꢪꢫꢪꢸ ꢩꢬꢡꣁꢒꢶꢥ꣄ ꢱꢡꢺꢕ꣄ꢠꣁ ꢒꢿꢒꢫꣁ ꢣꢿꢱꢸꢪ꣄ ꢂꢦꢸꢭ꣄ ꢂꢫꢶꢥ꣄ ꢕꣁꢪ꣄ꢪꣁ ꢲꣁꢣ꣄ꢫꢵꢱ꣄ ꣎ ꢈꢰꢶ ꢱꣁꢞꢾ ꢱꢵꢦꢥꣁ ꢤꢵꢥꢸꢒ꣄ ꢨꢾꢜꢵꢥꢸꢒ꣄ ꢱꣁꢞ꣄ꢞꢶ ꢂꢭꢔ꣄ꢔ ꢬꢴꢡ ꢣꢱꢬꢢ ꢬꢙꣁ ꢣꢾꢮ꣄ꢔꢾꢱꢶ(ꢙꢷꢮ꣄ ꢱꣁꢞꢾꢱꢶ) ꣎  

ꢱꣃꢬ ꢒꢸꢭꢪꢸꢙꢾ ꢬꢵꢪꣁ ꢔꢸꢲꢥ꣄ ꢪꢾꢥꢱ꣄ꢡꢾ ꢥꣃꢒꢵ ꢗꢭ꣄ꢮꢸꢥꢵꢬꢸ ꢱꢲꢵꢮ꣄ ꢭꢾꢥ꣄ꢡ ꢱꢬꢫꢸ ꢥꢾꢣ꣄ꢣꢶ ꢣꢜꢾꢱ꣄ ꣎ ꢯ꣄ꢬꢷ ꢨꢬꢤ꣄ꢮꢵꢙ꣄ ꢃꢱ꣄ꢬꢪꢵꢒꢸ ꢭꢥ꣄ꢣꢾꢱ꣄ ꣎ ꢂꢫꣂꢤ꣄ꢫꢵꢒꢸ ꢧꢶꢬꢶ ꢂꢮꢾ ꢬꢵꢪ꣄ꢪꢹꢬ꣄ꢡꢶ ꢩꣀ ꢩꢬꢡꢸ ꢨꢵꢦꢸꢒꢸ ꢒꢬ꣄ꢥ ꢯꢿꢡ꣄ꢡꢾ ꢒꢬ꣄ꢪꢸꢥꢱ꣄ꢒꢶ ꢒꢬꢶꢪꢸꢱꢜ꣄ꢜꢶ ꢂꢦꢸꢭ꣄ ꢣꢣꣁ ꢲꣁꢫꢾ ꢬꢵꢪꢵꢒ꣄ ꢧꢶꢬꢶ ꢂꢫꣂꢤ꣄ꢫꢵꢒ꣄ ꢨꣁꢭ꣄ꢭꢶ ꢂꢮꢸꢱ꣄ ꢪꢾꢥ꣄ꢡꢶ ꢩꢬꢡꣁ ꢥꢶꢒꢶꢳꢾꢱ꣄ ꣎ ꢨꢵꢦ꣄ ꢱꣁꢬ꣄ꢔꢸꢒ꣄ ꢔꢾꢔꢾ ꢮꢶꢰꢫꢪ꣄ ꢒꢳꣀꢭꢶꢫꢾ ꢬꢵꢪꣁ ꢨꢵꢦꢸꢒꢸ ꢨꢾꢜꣁ ꢒꢾꢬ꣄ꢥ ꢯꢿꢡ꣄ꢡꢶꢱꢵ ꢒꢵꢪꢸꢥꢱ꣄ꢒꢶ ꢒꢬꢾ ꢧꢭ꣄ꢗ ꢩꢬꢡꢵꢒ꣄ ꢱꢪꢤꢵꢥꢸꢥ꣄ ꢱꢖ꣄ꢔꢶ “ꢦꢶꢡ꣄ꢬꢸ ꢮꢵꢒꢸꢒ꣄ ꢪꢶꢛ꣄ꢗꢾ ꢪꢥ꣄ꢡꢸꢬ꣄ ꢥꢴꢷ” ꢪꢾꢥꢶ ꢲꢜ꣄ꢮꢥ꣄ ꢕꢭꢾꢱ꣄ ꣎ ꢲꢵꢭꢶꢪꢸ ꢩꢬꢡꢸ ꢬꢵꢪꣁ ꢕꢭ꣄ꢭꢶ ꢯꢿꢡ꣄ꢡꢾ ꢣꢷ ꢦꣃꢔꢳ꣄ꢥꢸ ꢪꢔꢶ ꢓꢳ꣄ꢳꢶ ꢮꢶꢞꣁ ꢓꢳ꣄ꢫꢾꢱ꣄ ꣎

 ꢬꢵꢪ꣄ꢪꢹꢬ꣄ꢡꢶ ꢣꢶꢫꢾ ꢃꢔ꣄ꢛꣁ ꢣꣁꢱ꣄ꢒꢬ꣄ ꢮꢲꢶꢭꢶ ꢥꢥ꣄ꢣꢶ ꢪꢾꢥꢱ꣄ꢡꢾ ꢦꢭ꣄ꢭꢪꢸꢒ꣄ ꢙꢶꢫꢾꢱ꣄ ꢩꢬꢡꣁ ꣎ ꢬꢵꢪꣁ ꢕꢳ꣄ꢳꢶ ꢲꣁꢣꢾ ꢦꣃꢒꢳꢸꢥ꣄ ꢗꣁꢒ꣄ꢒꢜ꣄ ꢱꣁꢠ꣄ꢠꢵ ꢱꢶꢪ꣄ꢲꢵꢱꢥꢪ꣄ ꢲꣂꢬ꣄ ꢢꣁꢮꢶ ꢡꢾꢒ ꢦ꣄ꢬꢡꢶꢥꢶꢤꢶꢒꢥ꣄ ꢬꢵꢙꢦꢬꢶꢦꢵꢭꢥꣁ ꢗꢭ꣄ꢮꢾꢱ꣄ ꢩꢬꢡ꣄ ꣎ ꢯ꣄ꢬꢷꢬꢵꢪ꣄ꢪꢹꢬ꣄ꢡꢶ ꢱꢷꢡꣁ ꢭꢒ꣄ꢰ꣄ꢪꢠ ꢱꢒꢶꢡꢪ꣄ ꢂꢥꢿꢒ ꢦꢸꢠ꣄ꢫ ꢥꢾꢣ꣄ꢣꢶꢥꢸꢪ꣄ ꢨꢸꢞꢶ ꢦꢵꢮꢥꢱ꣄ꢢꢥꢸꢥ꣄ ꢣꢬ꣄ꢱꢥ ꢒꢬ꣄ꢭꢶ ꢦꢛ꣄ꢗꢮꢜꢶꢒ꣄ ꢂꢮꢶ ꢭꢾꢥ꣄ꢣꢾꢱꢶ ꣎ ꢡꢿꢜꢸꢱ꣄ ꢢꢾꢮ꣄ꢞ ꢣꢶꢥ꣄ꢥꢸ ꢬꢴꢵꢡ꣄ꢡꢒꢸ ꢥꢶꢱ꣄ꢗꢫꢸ ꢒꢬ꣄ꢭꢶꢫꢾꢱ꣄ ꣎  ꢡ꣄ꢫꢿ ꢱꢪꢫꢪ꣄ꢪꢸ ꢭꢖ꣄ꢒꢵ ꢦꢸꢬꢶꢪ꣄ ꢬꢴꢮꢠ꣄ ꢪꢾꢥꢥ꣄ ꢒꣃꢬꢶ ꢬꢵꢙ꣄ꢙꢶ ꢱꣃꢥꢶꢭꢿꢡ꣄ ꢲꣁꢣꢾꢱꢶ ꣎ ꢡꢾꢥꣁ ꢔꢸꢠ꣄ꢠꢸꢪ꣄ ꢬꢵꢒ꣄ꢰꢱꢸ ꢙꢡ ꢩꢾꢳꢶ ꢯ꣄ꢬꢿꢰ꣄ꢝ ꢯꢶꢮꢩꢒ꣄ꢡꢸ ꣎ ꢱꢵꢪꢮꢿꢣ꣄ ꢄꢔꢾ ꢩꢮꢠ꣄ ꢬꢴꢮꢠ꣄ ꣎ ꢡꢾꢥꣁ ꢩꢹꢭꣂꢒꢸꢪ꣄ ꢂꢖ꣄ꢔꢸꢥ꣄ ꢣꢿꢮꢭꣂꢒꢸꢪ꣄ ꢬꢴꢶꢫꢾꢡ꣄ꢡꢾꢖ꣄ꢒꣁ ꢨꢵꢣꢵꢥ꣄ ꢣꢸꢬ꣄ꢣꢸꢥ꣄ ꢣꢶꢭꢿꢡ꣄ ꢲꣁꢣꢾꢱꢶ ꣎

ꢡꢾꢒ ꢏꢠ꣄ꢜꢾ ꢩꢾꢫ꣄ꢥꢸ ꢡꢶꢒꣁ ꢱꢹꢬ꣄ꢦꢠꢓꣁ ꢪꢾꢥ꣄ ꢥꢵꢮꢸ ꣎ ꢡꢶꢥꣁ ꢫꣂꢒ꣄ ꢣꢶꢥ꣄ꢥꢸ ꢬꢵꢪ꣄ꢪꢹꢬ꣄ꢡꢶꢒ꣄ ꢣꢾꢒ꣄ꢒꢶꢱꢶ ꣎ ꢡꢾꢒ ꢉꢦ ꢭꢵꢮꢠ꣄ꢫꢸ ꢱꢷ ꢪꣂꢲꢶꢡ ꢲꣁꢫꢶꢥꢸ ꢡꢾꢒ ꢩꢬ꣄ꢡꢒꢥ꣄ ꢒꢬ꣄ꢭꢸꢥꣁ ꢪꢾꢥꢶ ꢲꢜ꣄ꢮꢶ ꢒꢬꢾ ꢒꢾꢬꢷꢱ꣄ ꣎ ꢭꢒ꣄ꢰ꣄ꢪꢠ ꢲꢵꢭꢶ ꢥꢵꢒ꣄ ꢒꢜꢶꢥꢶ ꢦꣁꢞꢡ꣄ꢡꢶꢱꢵ ꢧꣂꢳ꣄ ꢦꣁꢥ꣄ꢣꢶꢱ꣄ ꣎  ꢡ꣄ꢫꢿ ꢬꢵꢒꢸꢬꢸ ꢣꢣꣁ ꢲꣁꢫꢾ ꢬꢴꢮꢠ꣄ ꢙꣂꢳꢮꢶ  ꢬꢵꢪ ꢭꢒ꣄ꢰ꣄ꢪꢠꢵꢥꢸꢒꢸ ꢤꢾꢬꢶ  ꢥꢴꢵꢡ꣄ꢡꢾ ꢨꣂꢭꢸꢥ꣄ ꢱꢖ꣄ꢔꢶ ꢣꢸꢬ꣄ꢭꢶꢱ꣄ ꣎ ꢪꢴꢣ꣄ꢣꢶꢪ꣄ ꢱꢷꢡꢵꢒꢾ ꢂꢖ꣄ꢔꢭꢵꢮꢠ꣄ꢫꢸꢥꢸ ꢱꢶꢖ꣄ꢔꢵꢬ꣄ ꢤꢾꢬꢶ ꢩꢾꢳꢶ ꢘꢾꢞꢵꢮ꣄ꢒꢥ꣄ ꢮꢬ꣄ꢠꢥꣁ ꢒꢾꢬꢷꢱ꣄ ꣎ ꢡ꣄ꢫꢾ ꢎꢒꢾ ꢬꢴꢮꢠ꣄ ꢪꣁꢥ꣄ꢥꢸꢪ꣄ ꢒꣂꢥꢒ꣄ꢡꢶ ꢱꢷꢡꢵꢒꢸ ꢲꢵꢡꢭ꣄ꢭꢸꢞ꣄ꢥꣁ ꢪꢾꢥꢶ ꢥꢙ꣄ꢙꢾ ꢲꢜ꣄ꢮꢥ꣄ ꢂꢩꢶꢭꢵꢰꣁ ꢆꢙꢾꢱ꣄ ꣎ ꢡꢾꢒ ꢤꢾꢬꢶ ꢪꢵꢬꢷꢗꢸꢒꢾ ꢲꢿꢡꢸ ꢮꢾꢒ꣄ꢒꢶꢭ꣄ꢫꢾꢱ꣄ ꣎  ꢒꣃꢬꢶ ꢪꢵꢬꢷꢗꢸ ꢲꢶꢬꢠ꣄ꢲꢬꢶꢥ꣄ ꢮꢿꢰꢪ꣄ ꢕꢭ꣄ꢭꢶ ꢱꢷꢡꣁ ꢯꢿꢡ꣄ꢡꢾ ꢮꢥꢪꢸꢒ꣄ ꢂꢮꢶ ꢡꢶꢒ ꢣꣁꢳꢬ꣄ ꢦꣁꢞꢱ꣄ꢡꢶꢱꣁ ꢓꢳꢾꢱ꣄ ꣎

ꢲꢶꢬꢠ꣄ꢲꢬꢶꢥꢸ ꢪꢥꣂꢲꢬꢸꢥ꣄ ꢣꢾꢒ꣄ꢒꢶ ꢱꢷꢡꣁ ꢬꢵꢪ꣄ꢪꢹꢬ꣄ꢡꢶ ꢙꣁꢮꢳ꣄ ꢡ꣄ꢫꢿ ꢲꢬꢶꢥꢸꢒ꣄ ꢤꢾꢬꢶ ꢣꢾꢥꣁ ꢪꢾꢥꢶ ꢪꢔꢶꢭꢶꢱ꣄ ꣎ ꢬꢵꢪ꣄ꢪꢹꢬ꣄ꢡꢶ ꢲꢬꢶꢥꢸꢒ꣄ ꢤꢾꢬꢡ꣄ꢡꢒꢸ ꢤꢾꢬꢶ ꢡꢾꢬ꣄ꢪꢶꢭꢶ ꢚꢸꢒꢸ ꢣꢹꢬ꣄ ꢙꢿꢞꢶꢫꣁ ꣎ ꢪꢵꢬꢷꢗꢸ ꢡ꣄ꢫꢿꢱ꣄ ꢗꣁꢒ꣄ꢒꢜ꣄ ꢱꢪꢫꢪ꣄ ꢪꢾꢥꢶ ꢒꣁꢡꢸꢒꢥ꣄ ꢬꢵꢪ꣄ꢪꢹꢬ꣄ꢡꢶ ꢕꢞꢶ ꢱꣁꢒꢥ꣄ ꢂꢦꢸꢭ꣄ ꢕꢞꢶ ꢮꢮꢶꢭꢶ, “ꢲꢵ, ꢱꢷꢡꢵ ! ꢲꢵ, ꢭꢒ꣄ꢰ꣄ꢪꢠꢵ !” ꢪꢾꢥꢶ ꢩꢮꢵꢜ꣄ ꢡꢔꢾꢱ꣄ ꣎  ꢡꢿ ꢕꢞꢶ ꢱꢾꢣ꣄ꢣꢸ ꢎꢒꢾ ꢱꢷꢡꣁ ꢬꢴꢡ꣄ꢡ ꢤꢵꢥꢸꢒꢸ ꢬꢵꢪ꣄ꢪꢹꢬ꣄ꢡꢶꢒ꣄ ꢒꣀꢒꢷ ꢲꢷꢜꢮꢶ ꢭꢔꢶꢬꢱ꣄ ꢪꢾꢥ꣄ ꢲꢜ꣄ꢮꢶ ꢣꢾꢮꢬ꣄ ꢭꢒ꣄ꢰ꣄ꢪꢠꢵꢒ꣄ ꢨꣁꢮꢶ ꢡꢸꢬ꣄ ꢣꢣꢵꢒ꣄ ꢙꢷ ꢱꢷꢭꢶ ꢃꢮꢷ ꢪꢾꢥꢶ ꢤꢞ꣄ꢞꢶꢱ꣄ ꣎  

ꢏꢠ꣄ꢜꢶꢒ ꢬꢴꢶꢫꢾ ꢱꢷꢡꢵꢒꢸ ꢬꢴꢮꢠ꣄ ꢨꢭ꣄ꢮꢥ꣄ꢡꢸꢔ ꢦꢸꢰ꣄ꢦꢒ ꢮꢷꢪꢵꢥꢸꢪ꣄ ꢲꢶꢖ꣄ꢔꢳ꣄ꢳꢶ ꢭꢖ꣄ꢒꢵꢒꢸ ꢨꣁꢭ꣄ꢙꢶꢫꢿꢱꢶ ꣎ ꢮꢵꢜꢸꢪ꣄ ꢙꢜꢵꢫꢸ ꢪꢾꢥꢥ꣄ ꢦꢒ꣄ꢰꢶꢬꢙꣁ ꢄꢫꢾ ꢱꢶꢫꢾꢱꢶ ꣎ ꢬꢴꢮꢠ꣄ ꢱꢾꢬ ꢚꢾꢞꣁ ꢪꢭ꣄ꢭꢶ ꢱꢷꢡꢵꢒꢸ ꢩꢥ꣄ꢣꢶ ꢡꣁꢞꢥ꣄ ꢱꢶꢫꢾꢱ꣄ ꣎ ꢲꣁꢫꢾꢡ꣄ ꢂꢦꢸꢭ꣄ ꢦꢶꢖ꣄ꢓꢸꢥ꣄ ꢒꢜꢫꢶ ꢙꢷꢮꢸꢜ꣄ꢗꢫꢶ ꢓꢵꢭ꣄ ꢦꣁꢞꢾꢱ꣄ | ꢱꢷꢡꣁ ꢂꢦꢸꢭ꣄ ꢩꢹꢰꢠꢸꢥꢸꢪ꣄ ꢢꢾꢮ꣄ꢞꢫꣁ ꢬꢴꢮꢠꢸꢒꢸ ꢒꢳꢥꢵꢱ꣄ꢡꢶꢱꣁ ꢭꢖ꣄ꢒꢵꢒ꣄ ꢙꢵꢡ꣄ꢡꢾ ꢮꢵꢜꢸꢪ꣄ ꢲꢾꢞꢶ ꢡꢔꢶꢱ꣄ ꣎ ꢃꢱ꣄ꢬꢪꢪꢸꢒ꣄ ꢧꢶꢬꢶ ꢂꢮꢾ ꢬꢵꢪ꣄ꢪꢹꢬ꣄ꢡꢶꢒꢶꢥ꣄ ꢭꢒ꣄ꢰ꣄ꢪꢠꣁ ꢃꢱ꣄ꢬꢪꢪ꣄ꢪꢸ ꢱꢷꢡꣁ ꢣꢾꢒ꣄ꢒꢵꢥꢵꢙ꣄ꢙꢶꢫꢾ ꢲꢵꢭ꣄ ꢦꢵꢛꢶꢥ꣄ ꢙꢶꢫꢾ ꢦꣂꢒꢸꢪ꣄ ꢡꢶꢒꣁ ꢮꢾꢒ꣄ꢒꢶꢭꢿꢡ꣄ ꢙꢶꢫꢵꢱ꣄ ꣎  ꢮꢵꢜꢸꢪ꣄ ꢦꢶꢖ꣄ꢓꢸꢥ꣄ ꢪꢸꢜ꣄ꢜꢶ ꢙꢷꢮꢸꢜ꣄ꢗꢫꢶ ꢦꣁꢞꢶ ꢬꢴꢶꢫꢾ ꢦꢒ꣄ꢰꢶꢬꢵꢜ꣄ ꢮꢶꢮꢬ꣄ꢥꢸ ꢱꢖ꣄ꢔꢾꢱ꣄ ꣎  ꢌꢒ ꢤꢾꢬꢷꢱ꣄ ꢙꢷꢮ꣄ ꢤꢾꢬ꣄ꢭꢶ ꢬꢴꢶꢫꢾ ꢱꣁꢒꣁ  ꢧꢭ꣄ꢭ ꢒ꣄ꢰꢠꢪꢸꢪꢸꢱ꣄ ꢡꢾꢒ ꢙꢷꢮ꣄ ꢙꢶꢫꢾꢱ꣄ ꣎ ꢡꢾꢒ ꢂꢥ꣄ꢡꢶꢪ ꢒꢬ꣄ꢪꢵꢥꢱ꣄ꢒꢶ ꢒꢬꢶ ꢪꢸꢱꢜ꣄ꢜꢶ ꢂꢥꢿꢒ ꢬꢵꢒ꣄ꢰꢱꢸꢥꢸꢒ꣄ ꢮꢵꢜꢸꢪ꣄ ꢥꢵꢱꢥꢒꢬ꣄ꢭꢿꢡ꣄ ꢱꢨꢬꢶꢒꢾ ꢃꢱ꣄ꢬꢪꢵꢒꢸ ꢂꢮ꣄ꢫꢵꢱ꣄ ꣎ ꢱꢨꢬꢶ ꢒꢶꢬꢵꢡꢸ ꢙꢵꢡꢸ ꣎ ꢡꢶꢥꣁ ꢏꢬ꣄ꢱꢸ ꢲꣁꢫꢾ ꢦꣁꢳ꣄ꢳꢵ ꢣꣁꢮ꣄ꢬꢶ ꣎ ꢡꢶꢥꣁ ꢦ꣄ꢬꢿꢮ꣄ꢒꢥ꣄ ꢣꢶꢫꢾ ꢦꣁꢳ꣄ꢳꢵꢥ꣄ ꢓꣀꢡꢶ ꢡꢶꢒꣁ ꢪꢾꢳ꣄ꢳꢶ ꢪꣂꢒ꣄ꢰꢶ ꢣꢷꢞꢶ ꢂꢦ꣄ꢭꢵꢥ꣄ ꢮꢵꢜꢸ ꢦꢾꢫ꣄ꢥꣁ ꢲꣁꢫꢵꢱ꣄ ꣎