ꢨꢵꢭ ꢬꢵꢪꢵꢫꢠꢸ – ꣑

ꢂꢮ꣄ꢬꢾ ꢩꢵꢬꢡ ꢣꢿꢱꢸꢪ꣄ ꢯ꣄ꢬꢷ ꢮꢵꢭ꣄ꢪꢷꢒꢶ ꢪꢾꢥ꣄ ꢪꢲꢵꢈꢰꢶ ꢲꣁꢣ꣄ꢫ`ꢱꢶ  | ꢡꢾꢥꢸ ꢯ꣄ꢬꢷ ꢮꣀꢒꢸꢠ꣄ꢜꢥꢵꢢꢸ ꢲꣁꢫꢾ ꢪꢲꢵꢮꢶꢰ꣄ꢠꢸ ꢯ꣄ꢬꢷ ꢬꢵꢪꢒꢥ꣄ ꢑꢡꢵꢬ꣄ꢭꢶꢫꢾ ꢗꢬꢶꢡꢺ ꢂꢡ꣄ꢩꢸꢡ ꢒꢵꢮ꣄ꢫꢸꢒꢥ꣄ ꢬꢗꢶ ꢡ꣄ꢫꢾ ꢭꢮ ꢒꢸꢰ ꢪꢾꢥꢥ꣄ ꢣꢷ ꢥꢴꢥ꣄ꢥ ꢨꢵꢳꢸꢥꢸꢒꢸ ꢦꢹꢬ꣄ꢠꢸꢒꢥ꣄ ꢨꣂꢣꢥꣁ ꢕꢭꢵꢱꢶ ꣎ ꢭꢮ ꢒꢸꢰ ꢪꢾꢥꢱ꣄ꢡꢾ ꢩꣀꢥꢸ ꢣꢷꢱꢸ ꢒꢸꢭꢪꢸ ꢆꢙ꣄ꢫꢵꢱ꣄ꢡꢾꢥꢸ, ꢣꢱꢬꢢ ꢪꢲꢵꢬꢙꢵꢒꢸ ꢥꢡ꣄ꢫꢵꢥꢸ, ꢣꢱꢬꢢꢸꢒ꣄ ꢨꢾꢜꢒꢥ꣄ ꢑꢡꢵꢬ꣄ꢭꢶꢫꢾ ꢯ꣄ꢬꢷ ꢬꢵꢪꢗꢥ꣄ꢣ꣄ꢬꢸ ꢨꢾꢜꢵꢥꢸ ꣎

ꢣꢷꢱꢸ ꢒꢸꢭꢪꢸꢙꢾ ꢭꢮ ꢒꢸꢰ ꢩꣀꢥꢸ ꢯ꣄ꢬꢷꢬꢵꢪ꣄ꢪꢹꢬ꣄ꢡꢶ ꢱꢥ꣄ꢥꢶꢤꢵꢥꢸꢪ꣄ ꢯ꣄ꢬꢷꢬꢵꢪ ꢗꢬꢶꢡꢸ ꢡꢸꢪ꣄ꢨꢸꢬ꣄ ꢮꣃꢙꢶꢭꢿꢡꢸ ꢱꢶꢖ꣄ꢔꢵꢬ꣄ꢒꢥ꣄ ꢒꢬ꣄ꢠꢵꢪꢺꢡꢸꢒꢥ꣄ ꢔꢮ`ꢱꢶ ꣎ ꢂꢦꢸꢭ꣄ ꢨꢵꢦ꣄ ꢙꣂꢳꢹꢱ꣄ ꢡꢾꢒ ꢗꢬꢶꢡꢸ ꢱꢖ꣄ꢔ`ꢱꢶ ꣎ ꢡ꣄ꢫꣂꢱ꣄ ꢯ꣄ꢬꢷꢪꢣ꣄ꢬꢵꢪꢵꢫꢠꢸ ꣎ ꢭꣂꢒꢸꢬ꣄ ꢒꣃꢬꢶꢥ꣄ ꢲꢶꢪ꣄ꢱꣁ ꢱꢲꢥ꣄ ꢱꢾꢒ꣄ꢒꢥꢵꢙ꣄ꢙꢶꢫꢾꢱ꣄ ꢪꢾꢥꢶ ꢡ꣄ꢫꢾ ꢲꢶꢪ꣄ꢱꣁ ꢒꢾꢰ꣄ꢜꢪꢸꢥ꣄ ꢥꢶꢮꢬ꣄ꢡꢶ ꢒꢾꢬꢶ ꢤꢬ꣄ꢪꢱ꣄ꢣꢵꢦꢥꢵꢒꢸ ꢤꢾꢬꢶ ꢙꢷꢮꢬꢵꢱꢶꢥ꣄ ꢣꢿꢮꢵꢣꢶꢣꢿꢮꢸꢥ꣄ ꢥꢬꢸꢥ꣄ ꢧꣀꢭꢵꢡꢶꢥ꣄ ꢥꢶꢪ꣄ꢪꢳ꣄ ꢙꢶꢮꢥ꣄ ꢤꢾꢬꢶ ꢩꢸꢭꣂꢒꢸꢬ꣄ ꢑꢡꢵꢬ꣄ꢭꢸꢥꣁ ꢪꢾꢥꢶ ꢣꢿꢮꢵꢣꢶꢣꢿꢮꢸꢥ꣄ ꢯ꣄ꢬꢷꢪꢲꢵꢮꢶꢰ꣄ꢠꢸꢒꢸ ꢦ꣄ꢬꢵꢬ꣄ꢢꢥꣁ ꢒꢾꢬ`ꢱꢶ ꣎ ꢥꢬꢸꢥ꣄ꢒꢶꢥ꣄ ꢱꢸꢬꢸꢥ꣄ ꢪꢔꢶꢭꢾꢤꢵꢥꢸꢒꢸ ꢯ꣄ꢬꢷ ꢪꢲꢵꢮꢶꢰ꣄ꢠꢸ ꢂꢫꣂꢤ꣄ꢫꢵꢪꢸ ꢯ꣄ꢬꢷ ꢣꢱꢬꢢ ꢪꢲꢵꢬꢵꢜꢸꢒ꣄ ꢨꢾꢜꣁꢒꢥ꣄ ꢑꢡꢵꢬ꣄ꢭꢶꢫꢵꢱ꣄ ꣎ ꢣꢱꢬꢢꢸꢒꢸ ꢢꢷꢥ꣄ ꢩꢵꢬ꣄ꢫꢵꢥ꣄ ꢒꣃꢱꢭ꣄ꢫꣁ, ꢱꢸꢪꢶꢡ꣄ꢬꣁ, ꢒꣀꢒꢿꢫꢶ ꢪꢾꢥ꣄ ꢡꢶꢖ꣄ꢒꣁ ꢥꢵꢮꢸ ꣎ ꢒꣃꢱꢭ꣄ꢫꢵ ꢦꣂꢜꢸꢪ꣄ ꢯ꣄ꢬꢷꢬꢵꢪꣁꢒꢶꢥ꣄,ꢒꣀꢒꢿꢫꢶ ꢦꣂꢜꢸꢪ꣄ ꢩꢬꢡꢸꢒꢶꢥ꣄,ꢱꢸꢪꢶꢡ꣄ꢬꢵ ꢦꣂꢜꢸꢪ꣄ ꢭꢾꢒ꣄ꢰ꣄ꢪꢠꣁꢒꢶꢥ꣄ ꢱꢡꢺꢕ꣄ꢥꣁ ꢪꢾꢥꢶ ꢗꢵꢬ꣄ ꢥꢴꢸꢬꢸꢥ꣄ ꢆꢙ꣄ꢫꢵꢱꢶ ꣎  ꢯ꣄ꢬꢷꢬꢵꢪ ꢑꢡꢵꢬꢸꢒ꣄ ꢱꢲꢵꢮ꣄ꢒꢥ꣄ ꢬꢴꢵꢡ꣄ꢡ ꢱꣁꢒꢥ꣄ ꢯ꣄ꢬꢷ ꢱꢸꢔ꣄ꢬꢷꢮꢸ, ꢃꢛ꣄ꢙꢥꢿꢫꢸ, ꢮꢶꢩꢷꢰꢠꢸ ꢃꢣꢶꢡꢾꢥꢸ ꢂꢥꢿꢒ ꢢꢵꢪꢸꢥꢸꢪ꣄ ꢆꢡ꣄ꢦꢡ꣄ꢡꢶ ꢲꣁꢫꢶ ꢙꢶꢮ꣄ꢭꢶ ꢑꢫꢵꢱ꣄ ꣎ ꢯ꣄ꢬꢷ ꢬꢵꢪ꣄ꢪꢹꢬ꣄ꢡꢶꢒꢶꢥ꣄ ꢭꢒ꣄ꢰ꣄ꢪꢠꣁ  ꢡꢥꢸꢒꢶꢥ꣄ ꢘꢵꢫꢵ ꢱꣁꢒꣁ ꢗꢾꢬꢶ ꢲꣁꢣ`ꢱꢶ ꣎ ꢡꢶꢱꣂꢱ꣄ ꢩꢬꢡꣁꢒꢶꢥ꣄ ꢱꢡꢺꢕ꣄ꢥꣁ ꢱꢾꢖ꣄ꢔꢸ ꢱꢸꢜ꣄ꢜꢸꢥꢵꢱ꣄ꢡꢒ꣄ ꢦꢹꢜꢸꢪ꣄ ꢦꣁꢞꢾ ꢡꢵꢒ꣄ ꢱꣁꢒꢥ꣄ ꢏꢠ꣄ꢜꢿꢱ꣄ꢒꢥ꣄ ꢬꢴꢶꢫꢵꢱꢶ ꣎  ꢍ ꢗꢬꢸ ꢩꣀꢫꢶꢥ꣄ ꢂꢥꢿꢒ ꢒꢭꢵꢥꢸꢪ꣄ ꢦꢵꢠ꣄ꢞꢶꢡ꣄ꢫꢪ꣄ ꢦꣁꢥ꣄ꢣꢶ ꢥꢴꢥ꣄ꢥ ꢏꢬ꣄ꢱꢸꢪꢸ ꢥꢶꢦꢸꢠꢸ ꢲꣁꢫꢵꢱꢶ ꣎ ꢏꢣꢶ ꢯ꣄ꢬꢷ ꢮꢶꢱ꣄ꢮꢵꢪꢶꢡꢺ ꢪꢲꢈꢰꢶ ꢣꢱꢬꢢ ꢬꢙꣁ ꢙꣁꢮꢳꢮ`ꢱꢶ ꣎ ꢂꢦꢸꢭ꣄ ꢗꢭ꣄ꢮꢾꢥ꣄ ꢫꢵꢔꢸꢒꢸ  ꢮꢶꢕ꣄ꢥꢸꢥ꣄ ꢲꣂꢥꢵꢡ꣄ꢡꢶꢱꣁ ꢬꢒ꣄ꢰꢥꣁ ꢒꢬꢱ꣄ꢡꢒꢸ ꢯ꣄ꢬꢷ   ꢬꢵꢪ꣄ꢪꢹꢬ꣄ꢡꢶꢒ꣄ꢒꢶꢥ꣄ ꢭꢒ꣄ꢰ꣄ꢪꢠꢵꢒꢸ ꢪꣁꢬ꣄ ꢱꢾꢥ꣄ꢡ ꢤꢞ꣄ꢞꢿ ꢪꢾꢥ꣄ ꢪꢔꢶꢭꢶꢫꢵꢱꢷ ꣎ ꢨꢵꢦ꣄ ꢃꢔ꣄ꢛꣁ ꢱꢶꢬꢯ꣄ ꢲꣂꢬ꣄ ꢓꢳ꣄ꢳꢶ ꢯ꣄ꢬꢷ ꢮꢶꢱ꣄ꢮꢵꢪꢶꢡꢺ ꢪꢲꢈꢰꢶ ꢱꢾꢥ꣄ꢡ ꢔꢾꢫꢾ ꢯ꣄ꢬꢷ ꢬꢵꢪ ꢭꢒ꣄ꢰ꣄ꢪꢠꢵꢥꢸ ꢡꢵꢜꢒ, ꢱꢸꢦꢵꢲꢸ ꢃꢣꢶ ꢂꢖ꣄ꢔꢸꢥ꣄ ꢂꢥꢿꢒ ꢬꢵꢒ꣄ꢰꢱ ꢒꣃꢬꢶꢥꢸꢒꢸ ꢮꢤꢪ꣄ ꢒꢬꢶ ꢫꢵꢔꢸ ꢗꣁꢒ꣄ꢒꢜ꣄ ꢮꢶꢤꢸꢪ꣄ ꢦꢹꢬ꣄ꢡꢶ ꢲꣂꢱ꣄ꢡꢲꢿꢡꢸ ꢒꢬ꣄ꢫꢵꢱꢶ ꣎ ꢧꢬꢵꢡꢸ ꢯ꣄ꢬꢷ ꢮꢶꢱ꣄ꢮꢵꢪꢶꢡꢺ ꢯꢾꢬ ꢪꢶꢢꢶꢭꢵ ꢥꢔꢬꢶꢒꢸ ꢙꢶꢫꢵꢱꢶ ꣎ ꢮꢵꢜꢸꢪ꣄ ꢣꢾꢔꢸꢞꣁꢒꢥ꣄ ꢦꣁꢞꢶ ꢬꢴꢶꢫꢾ ꢂꢲꢭ꣄ꢫꢵ ꢬꢵꢪ꣄ꢪꢹꢬ꣄ꢡꢶ ꢭꢾꢖ꣄ꢒꢵꢭ꣄ ꢱꢵꢦ ꢮꢶꢪꣂꢒ꣄ꢰꢸ ꢲꣁꢫꢶꢱꢶ ꣎ ꢪꢶꢢꢶꢭꢵꢒꢸ ꢔꢾꢫꢾ  ꢮꢿꢳꢸ ꢙꢥꢒ ꢪꢲꢵꢬꢙꣁ ꢯ꣄ꢬꢷꢭꢒ꣄ꢰ꣄ꢪꢶ ꢂꢪ꣄ꢱꢸ ꢲꣁꢫꢾ ꢱꢷꢡꢵꢣꢿꢮꢶꢒꢸ ꢲꣁꢬꢵꢜ꣄ ꢒꢾꢬꢱ꣄ꢡ ꢫꢡ꣄ꢡꢥ꣄ ꢒꢾꢬ꣄ꢭꢶ ꢬꢴꢶꢫꢾꢱꢶ ꣎ ꢂꢦꢸꢭ꣄ ꢙꣁꢮꢳ꣄ ꢯꢿꢡ꣄ꢡꢾ ꢯꢶꢮ ꢤꢥꢸꢱ꣄ ꢒꣂꢥ꣄ ꢪꣁꢜꢥ꣄ꢒꢷ ꢡꢾꢒꣂꢱ꣄ ꢱꢷꢡꢵꢒꢸ ꢲꣁꢬꢵꢜ꣄ ꢒꢾꢬ꣄ ꢢꣁꢮꢱ꣄ꢡꢾ ꢪꢾꢥꢶ ꢮꢶꢣꢶ ꢕꢭꢶ ꢬꢴꢶꢫꢾꢱꢶ ꣎ ꢯꢶꢮꢤꢥꢸꢪ꣄ ꢪꣁꢜꢶ ꢙꢾꢫꢪ꣄ ꢦꣁꢥ꣄ꢣꢶ ꢯ꣄ꢬꢷ ꢬꢵꢪꣁ ꢱꢷꢡꢵꢒꢸ ꢲꣁꢬꢵꢜ꣄ ꢒꢬ꣄ꢭꢶꢫꢾꢱꢶ ꣎

ꢱꢖ꣄ꢔꢥ꣄ ꢙꢶꢫꢾꢡ꣄ ꢡ꣄ꢫꢾ ꢪꢸꢲꢹꢬ꣄ꢡꢸꢪꢸꢱ꣄ ꢗꢬꢹ ꢩꣀꢥꢸ ꢲꣁꢬꢵꢜꢸꢥ꣄ ꢏꢠ꣄ꢜꢿ ꢭꢾꢔ꣄ꢥꢸꢪ꣄ ꢗꢭꢾꢱꢶ ꣎ ꢡꢿꢜ꣄ ꢬꢴꢷ ꢂꢫꣂꢤ꣄ꢫꢵꢒꢸ ꢧꢶꢬꢶ ꢑꢭꢿꢡ꣄ ꢬꢴꢡ ꢮꢵꢜꢸꢪ꣄ ꢯ꣄ꢬꢷ ꢦꢬꢱꢸꢬꢵꢪꢸꢒꢸ ꢔꢾꢬꢸꢮ꣄ ꢩꢖ꣄ꢔꢥ ꢒꢬꢶ ꢆꢡ꣄ꢔꢞꢾꢱ꣄ ꢬꢵꢪꣁ ꣎  ꢂꢫꣂꢤ꣄ꢫꢵꢒ꣄ ꢂꢮꢶ ꢱꣁꢥ꣄ꢡꢸꢒꢥ꣄ ꢙꢶꢮ꣄ꢭꢿꢡ꣄ ꢬꢴꢡ ꢯ꣄ꢬꢷ ꢣꢱꢬꢢ ꢬꢵꢜꢸ ꢬꢵꢪ꣄ꢪꢹꢬ꣄ꢡꢶꢒꢸ ꢦꢜ꣄ꢜꢵꢩꢶꢰꢿꢒ꣄ ꢒꢾꢬꢶ ꢦꣁꢜ꣄ꢜꢪ꣄ ꢩꢥ꣄ꢣꢱ꣄ꢡꢒꢸ ꢲꣃꢱꢾꢱ꣄ ꣎