ꢎꢱ꣄ꢡꢸꢥ꣄ ꢱꢱꢬꢾ ꢱꢾꢬꣁ ꢦ꣄ꢬꢣꢒ꣄ꢰꢶꢠꢪ꣄ ꢒꢾꢬ꣄ꢭꢶ
ꢯ꣄ꢬꢷꢪꢥ꣄ ꢥꢵꢬꢵꢫꢠ꣄ ꢗꢭꢬꢱꢶ ꢪꢾꢥꢶ ꢮꢾꢣꢸꢬ꣄
ꢦꢹꢬ꣄ꢠ ꢱ꣄ꢮꢬ꣄ꢠ ꢓꢸꢪ꣄ꢨꢪ꣄ ꢢꣁꢮꢶ ꢂꢞꢶꢮꢷꢣ꣄ ꢂꢱ꣄ꢒꢶ
ꢪꢮ꣄ꢞꢵꢥ꣄ ꢕꢭꢡ꣄ꢡꢶꢱꣁ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣑)
ꢱꣁꢥ꣄ꢣꣁ ꢲꣁꢬꢵꢜ꣄ ꢪꢾꢥꢶ ꢪꢸꢲꢹꢬ꣄ꢡꢸ ꢕꢭ꣄ꢭꢶꢒꢶꢥ꣄
ꢦꢵꢳꣀ ꢒꢪꢸꢒꢸꢥ꣄ ꢲꢵꢭ꣄ ꢱꢶꢖ꣄ꢔꢬꢾ ꢪꢮ꣄ꢞꢵꢪꢸ
ꢱꢶꢪ꣄ꢲꢪ꣄ ꢱꣂꢥ꣄ ꢪꢵꢤꢮꢥ꣄ ꢔꣂꢮꢶꢥ꣄ꢣꢥ꣄ ꢪꢾꢥꢥ꣄
ꢈꢰꢩꢪ꣄ ꢡꢸꢬꢶꢫꢮꢾ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣒)
ꢄꢥ꣄ꢣ꣄ꢬꢸ ꢭꣂꢦꢸꢭꣁ ꢣꢿꢮꢵꢣꢶ ꢣꢿꢮꢸꢥꢱ꣄ꢒꢶ
ꢂꢮꢶ ꢬꢴꢷ ꢪꣁꢒꣁ ꢥꣁꢮ꣄ꢬꢶ ꢪꢾꢥꢶꢒꢶꢥ꣄ ꢱꣁꢪ꣄ꢦꢸ ꢒꢾꢬꢶ
ꢥꣁꢮ꣄ꢮꣁ ꢮꢱ꣄ꢡꢬ꣄ꢥꢸ ꢧꢶꢭ꣄ꢭꢶ ꢲꣁꢬꢵꢞ꣄ ꢪꢵꢭꣁ
ꢥꢿꢥ꣄ꢣꢸ ꢕꢭꢡ꣄ꢡꢶꢱꣁ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣓) .
ꢗꢬꢸ ꢣꢶꢱꢵꢥꢸꢪ꣄ ꢬꢴꢷ ꢡꢷꢬ꣄ꢡ꣄ꢡꢸꢥ꣄ ꢓꢳ꣄ꢳꢶ ꢂꢮꢶ
ꢩꢮꢳ꣄ꢥꢸ ꢂꢱ꣄ꢒꢶ ꢪꢶꢳꢶ ꢮꢿꢣ ꢕꣂꢰꢪꢸꢥ꣄ ꢒꢾꢬ꣄ꢡ꣄ꢡ
ꢦꢸꢰ꣄ꢦ ꢪꢵꢭꢵꢥ꣄ ꢕꢭ꣄ꢭꢾ ꢦꢸꢠ꣄ꢫ ꢪꢹꢬ꣄ꢡ꣄ꢡꢶ ꢱꢾꢬ
ꢒꢾꢖ꣄ꢔꢥ꣄ ꢩꢥ꣄ꢣꢡ꣄ꢡꢶꢱ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣔)
ꢦ꣄ꢬꢒꢵꢰ꣄ ꢲꣁꢫꢾ ꢣꢶꢮꢵꢥꢸꢪ꣄ ꢒꢭꢱꢪ꣄ ꢱꢾꢬꢓꢳ꣄ꢳꢶ
ꢱꣃꢥ꣄ꢣꢬ꣄ꢫ ꢫꢮ꣄ꢥꢶꢥ꣄ ꢱ꣄ꢮꢵꢔꢡꢪ꣄ ꢮꢾꢣꢸꢬ꣄ ꢒꢾꢬ꣄ꢡ꣄ꢡꣁ
ꢪꢤꢸꢬꢵꢦꢸꢬꢶ ꢬꢙꣁ ꢒꣂꢜ꣄ ꢡꢿꢞꢸ ꢨꢾꢣꢸꢬꢡ꣄ꢡꢶꢱ
ꢕꢪ꣄ꢩꢷꢬ꣄ꢒꢥ꣄ ꢂꢮꢾꢫꣁ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣕)
ꢤꣁꢠ꣄ꢞꢵꢥ꣄ ꢱꢨ꣄ꢣꢸ ꢱꢾꢬ ꢲꢶꢨ꣄ꢨꢶ ꢱꢖ꣄ꢔꢸꢥ꣄ ꢧꢸꢮ꣄ꢡꣁ
ꢪꣁꢡꢶꢥ꣄ ꢏꢳꢸꢖ꣄ꢔꢸ ꢗꢾꢬ ꢱꢶꢖ꣄ꢔꢬꢾ ꢪꢮ꣄ꢞꢵꢪꢸ
ꢪꣂꢲꢥ ꢱꢸꢥ꣄ꢣꢬꢥ꣄ ꢪꢤꢸꢱꢹꢣꢥ꣄ ꢂꢮꢶ ꢪꣁꢒꣁ
ꢲꢵꢡ꣄ ꢤꢾꢭ꣄ꢭꢡ꣄ꢡꢶꢱ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣖).
ꢗꢸꢜ꣄ꢜꢸꢬ꣄ ꢣꢬ꣄ꢨꢵꢥ꣄ ꢢꣁꢮꢶ ꢂꢔ꣄ꢥꢶ ꢦꢾꢮ꣄ꢜꢶꢭꢶ
ꢮꢿꢣꢸ ꢪꣁꢥ꣄ꢡꢸꢬ꣄ꢥꢸ ꢮꢿꢣ ꢯ꣄ꢬꢷꢥ꣄ ꢪꢾꢥꢥ꣄ ꢮꢿꢳꢸꢪ꣄
ꢪꣁꢬ꣄ ꢲꢵꢡ꣄ ꢤꢾꢭ꣄ꢭꢶ ꢪꢣ ꢔꢙꢪ꣄ ꢱꣁꢒꢥꢸ
ꢂꢔ꣄ꢥꢶ ꢗꢸꢜ꣄ꢜꢸ ꢧꢶꢬꢾ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣗)
ꢌꢭ꣄ꢭꢾ ꢙꢾꢭꢸꢪꢸꢔꢸ ꢂꢮꢥ꣄ ꢱꢵꢡ꣄ ꢙꢾꢭꢸꢪꢸꢔꢸ
ꢔꢡꢶ ꢲꣁꢫꢾꢱ꣄ ꢡꢾꢥꣁ ꢪꣁꢥ꣄ꢥꢸꢪ꣄ ꢂꢪ꣄ꢒꣁ ꢢꣁꢮ꣄ꢭꢾꢡ꣄ꢡꢾꢥꣁ
ꢯ꣄ꢬꢷꢪꢥ꣄ ꢥꢵꢬꢵꢫꢠ꣄ ꢯ꣄ꢬꢷ ꢲꢱ꣄ꢡꢪ꣄ ꢦꢵꢣꢪ꣄ ꢤꢾꢭ꣄ꢭꢶ
ꢦꢜꣁ ꢡꣁꢒ꣄ꢒꢡ꣄ꢡꢶꢱꣁ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣘)
ꢱꢶꢖ꣄ꢔꢵꢬ꣄ ꢦꢮ꣄ꢥꢶꢥꢸ ꢦ꣄ꢬꢒꢵꢰ꣄ꢲꣁꢫꢾ ꢮꢣꢥꢪꢸ ꢱꢿꢡ꣄ꢡꢾ ꢪꣁꢬ꣄ ꢩꢫꢶꢥ꣄ ꢂꢮꢶ
ꢲꣂꢪ ꢒꢸꢠ꣄ꢞꢪ꣄ ꢦꢾꢮ꣄ꢜꢶ ꢪꣁꢒꣁ ꢮꢾꢣꢸꢬ꣄ ꢬꢴꢮꢞꢶ
ꢱꢶꢪ꣄ꢲꢪꢸꢓꢪ꣄ ꢱꢾꢬ ꢂꢮꢾ ꢂꢗ꣄ꢗꢸꢡꢥꢸ ꢲꢵꢡ꣄ꢲꣂꢬ꣄ ꢪꣁꢬ꣄ ꢲꢵꢡ꣄ ꢢꣁꢮꢶ
ꢦꢾꢬꢵꢭ꣄ ꢂꢔ꣄ꢥꢶꢪ꣄ ꢕꢭꢡ꣄ꢡꢶꢱ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣙)
ꢒꢸꢖ꣄ꢒꢸꢪ꣄ ꢂꢦ꣄ꢦꢶ ꢱꢶꢳ꣄ꢳ ꢱꢶꢬ꣄ꢒꢠ꣄ ꢣꢿꢔꢸꢪ꣄ ꢭꢮꢶ
ꢪꢖ꣄ꢔꢭ ꢮꢷꢣꢸꢥꢸꢪ꣄ ꢙꣀꢥꣁ ꢧꢶꢬꢶ ꢮꢱ꣄ꢥ ꢦꢥꢶ
ꢡꢾꢔ ꢱꢾꢬ ꢎꢱ꣄ꢡꢸ ꢲꣂꢬ꣄ ꢡꢿꢜ꣄ ꢬꢴꢡꣁ ꢂꢪ꣄ꢒꣁ
ꢂꢩꢶꢰꢿꢒ꣄ ꢒꢾꢬꢡ꣄ꢡꢶꢱ ꢱꣁꢦ꣄ꢥꣁ ꢣꢾꢒ꣄ꢒꢶꢱ꣄ ꢱꢓꢷ ꢪꢷ (꣑꣐)
.