ꢲꣁꢖ꣄ꢔꢾ ꢩꣃꢠꢵ ꢓꢾꢥꢶ – ꣒

ꢩꣃꢠꣁ ꢮꢮꢶꢭꢶ ꢂꢮꢬꢶꢫꣁ ꢩꢾꢠ꣄ꢞꢸꢒ꣄ ꢱꢷꢡꢶ “ꢬꢿꢫ꣄.. ꢍꢜ꣄ ꢱꢮꣁꢬꢵ.. ꢡꢾꢭ꣄ꢭꢾ ꢩꣃꢠꣁ ꢪꢴꣁꢜ꣄ꢜꣁ ꢩꢾꢠ꣄ꢞꢸ ꢓꢳ꣄ꢳꢶ ꢂꢮꢬꢱ꣄ ꣎ ꢡꢾꢒꣁ ꢲꢸꢖ꣄ꢔꢜ꣄ꢜꢶ ꢂꢪꢶ ꢡꢾꢭ꣄ꢭꢾ ꢩꢾꢠ꣄ꢞꢸ ꢓꢳ꣄ꢳꢶ ꢮꢜꣁ ꢒꢾꢬꢶ ꢓꢫꢾꢥ꣄” ꢪꢾꢥꢶ ꢗꣁꢞ꣄ꢞꢵꢥ꣄ ꢪꢾꢥ꣄ꢭꢶꢫꢵꢱ꣄ ꣎ ꢢꢶꢥꢹ ꢗꣁꢞ꣄ꢞꢵꢥ꣄ ꢗꢾꢬꢶ ꢏꢠ꣄ꢜꢾ ꢫꣂꢗꢥꣁ ꢒꢾꢬ꣄ꢫꢵꢱ꣄ ꣎ “ꢬꢿꢫ꣄ ꢌꢭ꣄ꢭꢾ ꢮꢵꢜꢸꢱ꣄ ꢡꢾꢭ꣄ꢭꢾ ꢩꣃꢠꣁ ꢂꢮꣀ ꣎ ꢡꢾꢒ ꢙꣁꢮꢳ꣄ ꢪꢷ ꢱꢖ꣄ꢔꢬꢶꢫꣁ ꢱꣁꢒꢥ꣄ ꢱꢖ꣄ꢔꢸꢮꣁ ꢬꢵ” ꢪꢾꢥꢶ ꢏꢠ꣄ꢜꢾ ꢗꣁꢞ꣄ꢞꣁ ꢣꢷ ꢗꣁꢞ꣄ꢞꢵꢥꢸ ꢒꢵꢥꢸꢪ꣄ ꢬꢲꢱ꣄ꢫꢪ꣄ꢒꢥ꣄ ꢱꢖ꣄ꢔꢾꢱ꣄ ꣎

ꢧꢭ꣄ꢗꣁ ꢦ꣄ꢬꢢꢪꢸꢒꢥ꣄ ꢏꢠ꣄ꢜꢾ ꢗꣁꢞ꣄ꢞꣁ ꢩꢾꢠ꣄ꢞꢸ ꢓꢳ꣄ꢳꢶ ꢂꢮꢬꢶꢫꣁ ꢩꣃꢠꢵꢒ꣄ ꢑꢞꣁ ꢙꢷ “ꢒꢵꢫ꣄ ꢱ꣄ꢮꢵꢪꢶꢥꢸ.. ꢡꢸꢪ꣄ꢒꣁ ꢱꢶꢫꢾꢡ꣄ ꢪꢴꣁꢜ꣄ꢜꣁ ꢮꢶꢦ꣄ꢬꢸ ꢱꣁꢒꢥ꣄ ꢣꢾꢒ꣄ꢒꢵꢬꢱꢶ ꢡꢸꢪꢶ ꢄꢱꢥꢶ ꢏꢠ꣄ꢜꢾ ꢱꢸꢥꢵꢒ꣄ ꢓꢵꢥ꣄ꢣꢸꢬ꣄ ꢮꢮꢶꢭꢶ ꢂꢮ꣄ꢮꢵꢫ꣄ ꢲꢵ !?” ꢪꢾꢥꢶ ꢦ꣄ꢬꢢꢪꢸꢒꢥꢮꢾ ꢗꣁꢞ꣄ꢞꣁ ꢦꢸꢱ꣄ꢡꣁ ꣎ ꢲꢿꢪꢥ꣄ “ꢬꢿꢫ꣄ ꢦꢶꢱꢵ ꢪꢷ ꢫꢵꢔꢪ꣄ ꢒꢾꢬꢱ꣄ꢡꢒꢸꢬ꣄ꢗꢶ ꢓꢳ꣄ꢳꢶ ꢙꢵꢬꢶꢫꣁ ꢩꢾꢠ꣄ꢞꢸꢒ꣄ ꢱꢶꢫꢾꢡ꣄ ꢡꣁꢒꣁ ꢱꢸꢥꣁ ꢱꣁꢒꢥ꣄ ꢣꢾꢒ꣄ꢒꢵꢬꢱ꣄ ꢲꢵ ! ꢙꢵ ꢡꢾꢖ꣄ꢔꢸꢜ꣄!” ꢪꢾꢥ꣄ꢡꢶ ꢲꢿꢪꢥ꣄ ꢨꢶꢱ꣄ꢱꣁ ꢗꢭꢥ꣄ ꢥꢶꢳꢾꢱ꣄ ꣎

ꢧꢬꢵꢡꢸ ꢲꢿꢪꢥ꣄ ꢬꢸꢮ꣄ꢮꣁꢣꢹꢬ꣄ ꢙꢶꢫꢡ꣄ꢡꢬ꣄ ꢣꢶꢮ꣄ꢮꣁ ꢗꣁꢞ꣄ꢞꣁ ꢑꢞꣁ ꢂꢮꢶ “ꢩꢮꢵꢥꢸꢒ꣄ ꢥꢪꢱ꣄ꢒꢵꢬ꣄.. ꢡꢸꢪ꣄ꢒꣁ ꢱꢶꢫꢾꢡ꣄ ꢪꢴꣁꢜ꣄ꢜꣁ ꢦꢠ꣄ꢞꢶꢡꢸꢥ꣄ ꢱꣁꢒꣁ ꢣꢾꢒ꣄ꢒꢵꢬꢱ꣄ ! ꢒꢵꢫ꣄ꢡꢶ ꢂꢪꢶ ꢲꣁꢮ꣄ꢞꢬꢶꢫꣁ ꢔꢵꢫ꣄ ꢔꣁꢬꢸꢥ꣄ ꢲꣁꢭ꣄ꢭꣁ ꢦ꣄ꢬꢿꢮ꣄ ꢬꢴꢶꢫꢾꢡ꣄ ꢪꢾꢳ꣄ꢳꢶ ꢄꢱꣁ ꢲꢵ ꢪꣁꢬꢶꢙꢶꢫꢾ ꢣꢸꢞꢵꢒ꣄ ꢮꢮꢶꢭꢶ ꢂꢮꢥꢸ !? ꢡꢾꢪꢵꢪ꣄ ꢡꢸꢪꢶꢥ꣄ ꢩꢮꢠ꣄ ꢱꣁꢒꢥ꣄ ꢣꢾꢒ꣄ꢒꢵꢬꢱ꣄ ꣎ ꢩꢮꢳ꣄ꢥꢸ ꢄꢱꣁ ꢒꢾꢬꢥ꣄ ꢲꣂꢥꢵꢥꢵ” ꢪꢾꢥꢶ ꢣꢶꢮ꣄ꢮꣁ ꢗꣁꢞ꣄ꢞꣁ ꢱꢖ꣄ꢔꢸꢡꣁ ꣎ ꢡꢾꢭ꣄ꢭꢾ ꢗꣁꢞ꣄ꢞꢵꢒ꣄ ꢱꢾꢫ꣄ ꢲꢿꢪꢥ꣄ “ꢬꢿꢫ꣄.. ꢡꣁꢒꣁ ꢣꣁꢳꣁ ꢣꢾꢒ꣄ꢒꢵꢬꢶꢫꣁ ꢥꢴꢷ ꢲꢵ ! ꢡꢹ ꢒꢵꢫ꣄ ꢂꢥ꣄ꢤꢸ ꢲꢵ ! ꢡꣁꢬ꣄ꢒꢵꢪ꣄ ꢱꢾꢫ꣄ꢭꢶ ꢙꢵ !” ꢪꢾꢥꢶ ꢗꣁꢞ꣄ꢞꢵꢒ꣄ ꢱꢾꢫ꣄ ꢱꢖ꣄ꢔꢶꢡꢶ ꢲꢿꢪꢥ꣄ ꢨꢶꢱ꣄ꢱꣁ ꢡꢾꢒ ꢮꢵꢜ꣄ ꢱꢷ ꢗꢭꢾꢱ꣄ ꣎

ꢧꢭ꣄ꢗꣁ ꢢꢾꢮ꣄ꢞ ꢕꢾꢞꢶ ꢧꢬꢵꢡꢸ ꢢꢶꢥ꣄ꢮꣁ ꢗꣁꢞ꣄ꢞꣁ ꢲꢿꢪꢥꢸꢒ꣄ ꢑꢞꣁ ꢂꢮꢶ “ꢣꢿꢮꢸꢥꢹ.. ꢡꢸꢪꢶ ꢒꢵꢫ꣄ ꢒꢵꢪ꣄ ꢒꢾꢬ꣄ꢭꢶ ꢂꢮꢬꢶꢫꣁ ! ꢡꢸꢪꢶ ꢄꢱꣁ ꢒꢾꢬꢸꢮꢵꢫ꣄ ꢲꢵ ! ꢪꢴꣁꢜ꣄ꢜꣁ ꢮꢿꢣꢶꢒꢥ꣄ ꢬꢴꢷꢭꢶ ꢄꢱꣁ ꢕꢾꢣꢞ꣄ ꢤꢾꢬꢶ ꢓꢵꢥ꣄ꢣꢸꢬ꣄ ꢮꢮꢶꢭꢶ ꢂꢮ꣄ꢫꢵꢫ꣄ ꢲꢵ ! ꢍ ꢱꢾꢬ꣄ꢒꣁ ꢲꢵ!?” ꢪꢾꢥꢶ ꢦꢸꢱꢸꢥꢵꢡꢶꢡ꣄ꢒꢵꢪ꣄ ꢲꢿꢪꢥꢸꢒ꣄ ꢤꢵꢒꢮꢶ ꢭꢔꢾꢱ꣄ ꣎ “ꢒꢵꢫ꣄ ꢬꢵ ꢪꢷ ꢩꢾꢠ꣄ꢞꢸ ꢓꢳ꣄ꢳꢶ ꢂꢮꢬꢱꢶ ꣎ ꢮꢵꢜꢸꢪ꣄ ꢣꢾꢒ꣄ꢒꢬꢵꢱ꣄ꢡꢾꢥꢸ ꢂꢱ꣄ꢒꢶ ꢏꢠ꣄ꢜꢾ ꢏꢠ꣄ꢜꢾ ꢱꢖ꣄ꢔꢬꢵꢱꢶ ꣎ ꢡꢾꢖ꣄ꢒꣁ ꢣꣁꢳꢵꢥꢸꢪꢱ꣄ꢒꢶ ꢒꣂꢥꢒ꣄ ꢣꢾꢒ꣄ꢒꢵꢬꢱ꣄ꢡꢾꢒꢷ ꣎ ꢍ ꢱꢵꢣꢵꢬꢠ ꢩꢾꢠ꣄ꢞꢸꢒꢥ꣄ ꢬꢴꢵꢥꢵ ꢒꣀꢒꢷ ꢪꢵꢫꢵ ꢩꢾꢠ꣄ꢞꢸꢒꢥ꣄ ꢬꢴꢵꢫ꣄ ꢱꣁꢥ꣄ꢱꢾ ꣎ ꢡꢾꢒ ꢲꢵꢭꢶꢱ꣄ ꢪꣁꢬ꣄ ꢣꣁꢳꢵꢒ꣄ ꢩꢾꢠ꣄ꢞꢸꢒꢥ꣄ꢒꢶꢥ꣄ ꢦꢬꢸꢥꢸꢒ꣄ ꢣꢸꢱ꣄ꢬꢾꢒꢥ꣄ ꢣꢾꢒ꣄ꢒꢵꢬꢶꢫꣁ !

ꢍꢭ꣄ꢭꢾ ꢂꢪꢶ ꢕꣁꢪ꣄ꢪꣁ ꢓꢳ꣄ꢳꢶ ꢙꢶꢫꢾꢡ꣄ ꢒꣀꢡꢶ ꢲꣁꢫ꣄ꢫꢵꢫ꣄ ꣎ ꢡꢾꢒ ꢲꢵꢭ꣄ ꢍꢜꢸꢱ꣄ ꢱꣁꢞ꣄ꢞꢶ ꢂꢪꢶ ꢂꢮ꣄ꢬꢾ ꢔꢵꢪꢸꢒ꣄ ꢙꢶꢫꢾꢥ꣄” ꢪꢾꢥꢶ ꢪꢾꢥ꣄ꢭꢶ ꢩꢾꢠ꣄ꢞꢸꢒ꣄ ꢮꢵꢜꢸꢪꢸꢱ꣄ ꢲꢸꢡ꣄ꢬꢞꢶ ꢱꣁꢞ꣄ꢞꢶ ꢲꢿꢪꢥ꣄ ꢨꢶꢱ꣄ꢱꣁ ꢤꢪꢶ ꢙꢶꢫꢾꢱ꣄ ꣎” ꢧꢭ꣄ꢗꣁ ꢢꢶꢥꢹ ꢗꣁꢞ꣄ꢞꢵꢥ꣄ ꢡꢾꢭ꣄ꢭꢾ ꢩꢾꢠ꣄ꢞꢸꢒ꣄ ꢤꢾꢬꢶ ꢪꢬꢶ ꢲꢥ꣄ꢣꢶ ꢮꢜꣁ ꢒꢾꢬꢶ ꢓꢫꢵꢱ꣄ ꣎ ꢌꢭ꣄ꢭꢾ ꢓꢾꢥꢶꢪ꣄ ꢬꢴꢷ ꢂꢪꢶ ꢒꢵꢫ꣄ ꢙꢥ꣄ꢭꢸꢥꣁ ꢪꢾꢥꢾꢡꢶ ꢒꣂꢥ꣄ ꢒꢵꢫ꣄ ꢱꢖ꣄ꢔꢾꢡ꣄ ꢒꢵꢫ꣄ ꢡꢾꢭ꣄ꢭꢾ ꢂꢪꢶ ꢡꢶꢔꢸꢗ꣄ꢗꢬ꣄ ꢓꢳ꣄ꢳꢸꢥꢵꢱ꣄ꢡꣁ ꢒꢵꢫ꣄ ꢒꢶꢱꣁ ꢪꢾꢥꢶ ꢱꢷꢒꢶꢥ꣄ ꢂꢬ꣄ꢢꢸ ꢙꢥ꣄ꢭꢶ ꢒꢵꢪꢸꢥ꣄ ꢒꢾꢬ꣄ꢥꣁ ꢪꢾꢥꢶ ꢱꢖ꣄ꢔꢬꢶꢫꣁ ꣏

꣏ ꢦꢛ꣄ꢗꢡꢥ꣄ꢡ꣄ꢬ ꢓꢾꢥꢶꢪ꣄ ꢡꣁꢒꢥ꣄ ꢢꢶꢥ꣄ꢮꣁ ꢩꢵꢔꢸꢪ꣄ ꢦꢛ꣄ꢗ꣄ꢮꣁ ꢓꢾꢥꢶ ꢱꢪ꣄ꢦꢹꢬ꣄ꢠꢸ ꢲꣁꢫꢾꢱꢶ ꣏

ꢒꣂꢥ꣄ꢮꢱ꣄ꢡꢸ ꢒꣂꢥ꣄ꢒꣂꢥ꣄ꢡꣂꢠ꣄ ꢎꢒꢾꢡꢶꢥ꣄ꢡꢿ ꢮꢱ꣄ꢡꢸ

ꢱꢡ꣄ꢮꢱ꣄ꢡꢸ ꢣꢾꢒ꣄ꢒꢡ꣄ꢡꢿꢱ꣄ ꢛꢵꢥꢸ ꣏ ꣔꣒꣓

ꢒꣂꢥ꣄ꢒꢵꢫ꣄ ꢱꢖ꣄ꢔꢾꢡ꣄ ꢒꢵꢫ꣄ ꢪꢾꢭ꣄ꢭꢶ ꢡꢾꢭ꣄ꢭꢾ ꢡꢶꢔꢶꢗ꣄ꢗꢬ꣄ ꢩꢶꢠ꣄ꢞꢸꢥꢵꢱ꣄ꢡꣁ ꢒꢵꢫ꣄ ꢒꢶꢱꣁ ꢪꢾꢥꢶ ꢂꢮ꣄ꢬꢾ ꢱꢸꢫꢨꢸꢣ꣄ꢣꢶ ꢱꢾꢥ꣄ꢡꣁ ꢂꢥ꣄ꢣꢭ꣄ꢭꢱ꣄ꢡꢿꢱ꣄ ꢛꢵꢥꢸ ꣏