ꢪꢲꢵꢦꢸꢬꢶ ꢪꢾꢥꢱ꣄ꢡꢾ ꢔꢵꢪ꣄ꢪꢸ ꢲꢿꢪꢥ꣄ ꢪꢾꢥꢱ꣄ꢡꢾ ꢏꢠ꣄ꢜꢾ ꢩꣃꢠꣁ ꢙꢶꢮ꣄ꢭꢶ ꢂꢮꢾꢱ꣄ ꣎ ꢡꢾꢥꣁ ꢄꢰ꣄ꢜꢾꢫꣁ ꢦꢹꢬ꣄ꢡꢶ ꢒꢾꢬ꣄ꢭꢱ꣄ꢡꣁ ꢒꢸꢬ꣄ꢗꢶ ꢫꢵꢔꢪ꣄ ꢒꢾꢬ꣄ꢥꣁ ꢪꢾꢥꢶ ꢚꢸꢒꢸ ꢣꢶꢥ꣄ꢥꢸ ꢬꢴꢷ ꢲꢜ꣄ꢮꢶꢭꢿꢡ꣄ ꢂꢮꢾꢱ꣄ ꣎ ꢄꢰ꣄ꢜꢾꢫꣁ ꢂꢨ꣄ꢨꢭꢱ꣄ꢡꣁ ꢒꢾꢬ꣄ꢗꢶ ꢒꢾꢬꢬꢶꢫꣁ ꢫꢵꢔꢪꢸꢒ꣄ ꢨꣁꢭꢶ ꢣꢾꢥꣁ ꢥꢵ ꢪꢾꢥꢶ ꢲꢜ꣄ꢮꢶꢭꢿꢡ꣄ ꢲꣁꢣꢾꢱ꣄ ꣎ ꢡꢾꢒ ꢱꣁꢮ꣄ꢥꢵꢪ꣄ ꢏꢠ꣄ꢜꢾꢣꢶ ꢗꣁꢒ꣄ꢒꢜ꣄ ꢤꢵꢰ꣄ꢜꢶꢫꢪ꣄ꢒꢥ꣄ ꢲꣁꢞ꣄ꢬꢶꢫꣁ ꢏꢥ꣄ꢜꢾ ꢩꢾꢠ꣄ꢞꢸ ꢣꢾꢒ꣄ꢒꢫꢾꢱ꣄ ! ꢧꢭ꣄ꢗꣁ ꢱꣁꢮ꣄ꢥꢵꢪ꣄ ꢬꢴꢷ ꢩꢬꢵꢜꢮꢶ ꢃꢲꢵ ꢂꢮ꣄ꢬꢾ ꢫꢵꢔꢪ꣄ꢪꢸ ꢩꢾꢠ꣄ꢞꢸꢒ꣄ ꢨꣁꢭꢶ ꢣꢾꢥꣁ ꢯꢿꢱ꣄ꢡꢾꢱ꣄ ꢪꢾꢥꢶ ꢲꢜ꣄ꢮꢶꢭꢶ ꢱꢾꢙ꣄ꢙꢾ ꢔꢵꢪꢸꢒꢮꢾꢱ꣄ ꣎ ꢡꢿꢜ꣄ ꢏꢠ꣄ꢜꢾ ꢩꢾꢠ꣄ꢞꢸꢮꢵꢥꢸꢒ꣄ꢣꢾꢒ꣄ꢒꢶ “ ꢥꢪꢱ꣄ꢒꢵꢬ꣄ ꢒꢾꢬ꣄ꢭꢬꢱ꣄ ꢪꢷ | ꢪꢲꢵꢦꢸꢬꢶꢪ꣄ ꢬꢴꢷ ꢂꢮꢬꢶꢫꣁ ꢭꣂꢒ꣄ ꢒ꣄ꢰꢿꢪꢪ꣄ꢒꢥ꣄ ꢬꢴꢥꣁ ꢪꢾꢥꢶ ꢄꢰ꣄ꢜꢶ ꢏꢠ꣄ꢜꢾ ꢫꢵꢔꢪ꣄ ꢒꢾꢬꢛ꣄ꢙꢵꢬꢶꢫꣁ ꣎
ꢪꢷ ꢒꢾꢬꢛ꣄ꢙꢵꢬꢶꢫꣁ ꢫꢵꢔꢪꢸꢒ꣄ ꢏꢠ꣄ꢜꢾ ꢩꢾꢠ꣄ꢞꢸ ꢦꢙꢾ ꢲꣂꢬꢶꢫꣁ ꢡꢾꢒ ꢲꢵꢭꢶꢪ꣄ ꢪꢷ ꢡꢸꢪ꣄ꢬꢾ ꢔꢵꢪꢸꢒ꣄ ꢂꢮ꣄ꢬꢶꢫꣁ ꣎ ꢡꢸꢪꢶꢥ꣄ ꢏꢠ꣄ꢜꢾ ꢗꣁꢒ꣄ꢒꢜ꣄ ꢩꢾꢠ꣄ꢞꢸ ꢪꣁꢒꣁ ꢣꢾꢮꣁ ” ꢪꢾꢥꢶ ꢪꢔꢶꢭꢶꢫꢾꢱ꣄ ꢲꢿꢪꢥ꣄ ꣎ ꢧꢭ꣄ꢗꣁ ꢩꢾꢠ꣄ꢞꢸꢮꢵꢥ꣄ “ ꢩꢮꢵꢥꢸꢒ꣄ ꢥꢪꢱ꣄ꢒꢵꢬ꣄ ! ꢪꢷ ꢡꢸꢪ꣄ꢒꣁ ꢣꢾꢒ꣄ꢒꢶꢠꢶ ꢦꣁꢞꢾꢱ꣄ꢡꢾꢪꣁ ꢚꢸꢒ꣄ꢒꢸ ꢱꣁꢥ꣄ꢡꣂꢰ꣄ ꢦꣁꢞꢬꢱ꣄ ꣎ ꢭꣂꢒ ꢒ꣄ꢰꢿꢪꢪꢸꢒ꣄ ꢡꢸꢪꢶꢥ꣄ ꢒꢾꢬꢛ꣄ꢙꢵꢬꢶꢫꣁ ꢫꢵꢔꢪꢸꢒ꣄ ꢪꢷ ꢪꢾꢭ꣄ꢭꢶ ꢮꢜꣁ ꢓꢳ꣄ꢳꢸꢱ꣄ ! ꢩꢮꢵꢥꢸ ! ꢫꢵꢔꢪꢸꢒ꣄ ꢦꢙꢾ ꢲꣂꢬꢶꢫꣁ ꢩꢾꢠ꣄ꢞꢸ ꢪꢷ ꢣꢾꢮꢸꢱ꣄ ꣎ ꢪꣁꢬ꣄ ꢙꣁꢮꢳ꣄ ꢤꢵꢰ꣄ꢜꢶꢫꢪ꣄ꢒꢥ꣄ ꢲꣁꢞ꣄ꢬꢶꢫꣁ ꢩꢾꢠ꣄ꢞꢸ ꢯꢿ ꣎ ꢡꢾꢭ꣄ꢭꢾ ꢩꢾꢠ꣄ꢞꢸ ꢣꢾꢮꢸꢱ꣄ ꢩꢮꢵꢥꢸ ꣎ ꢡꢸꢪꢶ ꢫꢵꢔꢪꢸꢒꢸꢬ꣄ꢗꢶ ꢓꢳ꣄ꢳꢸꢮꣁ” ꢪꢾꢥꢶ ꢩꢾꢠ꣄ꢞꢸꢮꢵꢥ꣄ ꢩꢾꢠ꣄ꢞꢸꢒ꣄ ꢡꢸꢒ꣄ꢒꢶ ꢲꢿꢪꢥ꣄ ꢪꢾꢥꢱ꣄ꢡꢾ ꢩꣃꢠꣁ ꢙꣁꢮꢳ꣄ ꢣꢶꢫꢾꢱ꣄ ꣎ ꢩꣃꢠꣁ ꢩꢾꢠ꣄ꢞꢸꢒ꣄ ꢓꢵꢥ꣄ꢣꢸꢬ꣄ ꢮꢮꢶꢭꢶ ꢂꢦꢸꢭ꣄ ꢔꢵꢪꢸꢒ꣄ ꢥꢶꢒꢶꢳꢾꢱ꣄ ꣎ ꢙꢵꢬꢶꢫꣁ ꢮꢵꢜꢸꢪ꣄ ꢏꢠ꣄ꢜꢾ ꢬꢵꢠꢸꢪ꣄ ꢢꢷꢥ꣄ ꢗꣁꢞ꣄ꢞꢵꢥ꣄ ꢲꣁꢣ꣄ꢫꢵꢱ꣄ ꣎
ꢂꢖ꣄ꢔꢸꢥ꣄ ꢂꢮꢫ꣄….
Leave a Reply
You must be logged in to post a comment.