ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢪꢾꢥꢾꢡꢷꢱ꣄ ꢪꢤꢸꢬꢾ ꢪꢾꢥ꣄ꢒ꣄ꢫꢵꢥꢸꢒ꣄ ꢒꢸꢰꢵꢭ꣄ ꢂꢮ꣄ꢞꣀ ꣎ ꢡꢾꢪꢵꢪ꣄ ꢐꢞꢵ ꢚꢵꢞꢸ ꢡꢶꢥ꣄ꢥꢵꢳ꣄ ꢤꢾꢬꢶ ꢮꢡ꣄ꢡꣁ ꢒꢾꢬꢾꢡꢶ ꢪꣁꢥ꣄ꢥꢸ ꢩꣁꢬꢶ ꢥꢥ꣄ꢣꢥ꣄ ꣎ ꢥꢴꢥ꣄ꢥ ꢦꢶꢭ꣄ꢭꢭ꣄ꢒꢥ꣄ ꢡꢾꢥꢸ ꢒꢾꢬꢾ ꢒꢶꢱꢸꢪ꣄ꢨꢸꢥ꣄ ꢂꢱ꣄ꢒꢶ ꢡꢾꢖ꣄ꢔ ꢣꣁꢭꢵꢪ꣄ ꢱꢮꢵꢫ꣄ ꣎
ꢱꢸꢥ꣄ꢣꢸꢬ꣄ ꢣꢞꢶ ꢔꢪꢸꢭꣁ ꢔꢵꢪꢸꢪ꣄ ꢙꢶꢮꢬꢶꢫꣁ ꢂꢮ꣄ꢬꢾ ꢱꢪꢸꢲ ꢪꢾꢥ꣄ꢒ꣄ꢫꢵꢥꢸꢒ꣄ ꢐꢞꢵ ꢚꢵꢜ꣄ ꢡꢶꢥ꣄ꢥꢵꢳ꣄ ꢮꢾꢡꢸꢬ꣄ ꢙꢶ ꢱꢵꢡ꣄ꢡꢒ꣄ ꢪꢸꢱꢬꢶꢫꣁ ꢥꢴꢷ ꣎ ꢡꢾꢒꢲꢵꢭ꣄ ꢱꢿꢡ꣄ꢡ ꢢꢵꢪꢸꢪꢹꢱ꣄ ꢡꢶꢥ꣄ꢥꢵꢳ꣄ ꢒꢾꢭ꣄ꢭꢡꣁ ꢲꢬꢸꢪ꣄ꢨꢪ꣄ ꢒꢾꢬ꣄ꢡꢶꢬꢶꢫꣁ ꣎ ꢂꢮ꣄ꢬꢾ ꢦꢶꢭ꣄ꢭꢥꢸꢒ꣄ ꢪꢾꢳ꣄ꢳꣁ ꢱꢶꢒ꣄ꢒꢞꢾ ꢱꣁꢒꢥ꣄ ꢲꣁꢫ꣄ꢫꢵꢫ꣄ ꢥꢴꢵꢫꢵ ꣎
ꢂꢪꢾꢬꢶꢒ꣄ꢒꢵꢪ꣄ ꢱꢿꢡ꣄ꢡꢾ ꢗꢵꢬ꣄ꢭꢜ꣄ ꢪꢾꢥꢾꢡ꣄ꢡꢾ ꢔꢵꢪꢸꢪ꣄ ꢗꢬ꣄ꢦꢵꢛ꣄ꢗ꣄ ꢏꢬ꣄ꢱꢸꢒꢥ꣄ ꢐꢞꢵ ꢚꢵꢜ꣄ ꢡꢶꢥ꣄ꢥꢵꢭ꣄ ꢒꢾꢬꢬꢶꢫꣁ ꣎ ꢦꢾꢬꢸꢪꢵꢳ꣄ ꢕꣁꢞꢵ ꢮꢵꢔꢥꢵꢪ꣄ ꢨꢶꢱꢶꢬꢶꢫꣁ ꢭꣂꢱꢸ ꢢꣁꢮꢶ ꢱꢾꢒ꣄ꢒꢬ꣄ ꢦꢸꢙꢾ ꢪꢸꢡꢸꢭ꣄ꢭꣁ ꢒꢾꢬꢸꢮꢾ ꣎ ꢲꣁꢭ꣄ꢭꢵꢡꢸ ꢦꢶꢭ꣄ꢭꢥꢸꢒ꣄ ꢂꢱ꣄ꢒꢶ ꢨꢶꢱꢞꢶ ꢡꢶꢥ꣄ꢥꢵꢳ꣄ ꢒꣁꢔꣁ ꢒꣁꢠ꣄ꢞꢭ꣄ꢭꢬꢶꢫꣁ ꢪꢾꢥꢡ꣄ꢡꢾ ꢓꢾꢥꢶ ꢱꢖ꣄ꢔꢸꢮꢾ ꣎ ꢡꢾꢥ꣄ꢡꢾꢥꢸ ꢔꣁꢪ꣄ꢪꢵꢥꢸꢪ꣄ ꢬꢴꢶ ꢲꢥ꣄ꢣꢶ ꢓꢭ꣄ꢭꢶ ꢂꢮꢾ ꢂꢪ꣄ꢨꢞ꣄ ꢩꢵꢡ꣄, ꢗꣁꢮ꣄ꢭꣁ, ꢒꢗ꣄ꢗꢥ꣄ꢥꣁ ꢂꢱ꣄ꢒꢶ ꢮꢞꢵꢥ꣄ ꢒꢾꢬ꣄ꢭꢶ ꢓꢫꢶ ꢪꢸꢱꢞꢸꢮꢾ ꣎ ꢣꢾꢛꢶ ꢦꢥꢶ ꢪꢾꢳ꣄ꢳꣁ ꢬꢴꢵꢫ꣄ ꣎
ꢂꢪꢶ ꢣꢾꢒ꣄ꢒꢸꢭꢬꢶꢫꣁ ꢢꢵꢪꢸꢪ꣄ ꢐꢞꢵꢪ꣄ ꢦꢥꢶ ꢤꢪꢬꢴꢵꢫ꣄, ꢚꢵꢞꢸꢥ꣄ ꢚꢸꢒ꣄ꢒꢸ ꢬꢴꢵꢫ꣄, ꢦꢾꢬꢸꢪꢵꢳ꣄ ꢥꢴꢶꢥꢵꢡꣁ ꢢꢵꢪ꣄ꢣꢶ ꢥꢴꢷꢥꢵ ꣎ ꢌꢔ ꢱꣁꢞꢶ ꢒꢵꢫ꣄ ꢦꢙꢾ ꢡꢶꢥ꣄ꢥꢵꢳ꣄ ꢒꢾꢬꢡ꣄ꢡꣁꢔ꣄ ?
ꢂꢱ꣄ꢒꢶꢡꢾꢥꢸ ꢥꢵꢪ꣄ ꢭꢮ꣄ꢭꢶ ” ꢔꣂꢮꢶꢥ꣄ꢣꢵ, ꢔꣂꢮꢶꢥ꣄ꢣꢵ ” ꢪꢾꢥꢶ ꢪꢾꢥꢬꢶꢫꣁ ꢎꢒꢾꢡ꣄ ꢪꢤꢸꢬꢾ ꢡꢶꢥ꣄ꢥꢵꢳꢸꢒ꣄ ꢙꢶꢫꢾ ꢱꣁꢒꢥ꣄ ꢭꢔꢫ꣄ ꣎ ꢣꣁꢨ꣄ꢨꢬꢶꢫꣁ ꢪꢸꢔꣂ ꢪꣁꢜ꣄ꢜꢸꢪ꣄ ꢬꢴꢵꢥꢵ ꣎
ꢪꢷꢥꢵꢒ꣄ꢰꢶ ꢂꢪ꣄ꢪꣁ ꢬꢵꢜ꣄ ꢙꢭꢾ ꢔꢵꢪ꣄ ꢪꢤꢸꢬꢾ, ꢗꢵꢬ꣄ꢭꢜ꣄ꢜꢸꢒ꣄ ꢣꢸꢱꢸꢬꢾ ꢥꢵꢮ꣄ ” Queen city ” ( ꢬꢵꢠꢶꢦꢸꢬꢶ ) !!! ꢌꢭ꣄ꢭꢾ ꢏꢬ꣄ꢱꢸ ꢍꢦ꣄ꢬꢭ꣄ ꣑꣖-ꢪ꣄ ꢡꢿꢡꢶ ꢂꢮ꣄ꢬꢾ ꢔꢵꢪꢸꢪ꣄ ꢐꢞꢵ ꢚꢵꢜ꣄ ꢡꢶꢥ꣄ꢥꢵꢳ꣄ ꢗꢭꢾꢫꣁ ꣏
ꢦꢶꢬꢿꢮ꣄ꢒꢥ꣄,
ꢥꢶꢬ꣄ꢪꢭꢵ ꢔꢠꢿꢰ꣄
ꢭꣂꢱꢸꢥ꣄ :
ꢒꢺꢰ꣄ꢠꢵ ꢒꣁꢗ꣄ꢗꢶ
ꢡꢸꢪꢶ ꢗꢵꢬ꣄ꢭꢜꢸꢪ꣄ ꢒꣂꢥꣂ ꢮꢶꢱꢾꢯ꣄ꢒꢥ꣄ ꢡꢸꢬꢿ ꢥꢸꢬꢸꢩꢭ꣄ꢥꢸꢒ꣄ ꢂꢱ꣄ꢒꢶ ꢡꢾꢮꢸꢥꢸ ꢒꢾꢢꣁ ꢯꢖ꣄ꢒꢶ ꢡꢶꢥ꣄ꢥꢵꢳ꣄ ꢒꢾꢬꢬꢵꢯ꣄ ꢪꢾꢥꢶ ꢒ꣄ꢭꢡ꣄ꢡꣁꢭ꣄ ꢙꢸꢒ꣄ꢒꢸ ꢦ꣄ꢬꢪꣂꢒꣁ ꢭꢔꢬꢱ꣄꣎
ꢗꣁꢒ꣄ꢒꢜ꣄ ꢭꢶꢒ꣄ꢒꢶꢬꢵꢱꢶ ꣎ ꢬꢸꢮ꣄ꢮꣁ ꢮꢡ꣄ꢡꢵꢥ꣄ ꢓꢵꢭ꣄ ꢣꢷꢬꢶꢫꣁꢤꢵꢥꢸꢒ꣄ ꢱꢾꢬ꣄ꢒꣁ ꢒꢾꢬꢸꢮꢵꢫ꣄ ꣎
ꢮꢶꢱꢾꢯ꣄ꢒꢥ꣄ –> ꢮꢶꢰꢿꢱ꣄ꢒꢥ꣄
ꢥꢸꢬꢸꢩꢭ꣄ꢥꢸꢒ꣄ –> ꢥꢴꢸꢬꢸꢩꢵꢭ꣄ꢥꢸꢒ꣄
ꢡꢾꢮꢸꢥꢸ –> ꢡꢾꢥꢸ
ꢒꢾꢢꣁ –> ꢓꢾꢢꣁ
ꢯꢖ꣄ꢒꢶ –> ꢱꢖ꣄ꢔꢶ
ꢒꢾꢬꢬꢵꢯ꣄ –> ꢒꢾꢬꢬꢵꢱ꣄
ꢒ꣄ꢭꢡ꣄ꢡꣁꢭ꣄ –> ꢒꢭꢵꢡ꣄ꢡꢮꢿꢭ꣄
ꢙꢸꢒ꣄ꢒꢸ –> ꢚꢸꢒ꣄ꢒꢸ
ꢄꢱꢥꢶ ꢡꢸꢖ꣄ꢒꣁ ꢒꢭꢫꢾꢣꢹꢬꢸ ꢭꢶꢒ꣄ꢒꢶꢭꢿꢡ꣄ ꢂꢮꢿꢡꢶ , ꢂꢮ꣄ꢬꢾ ꢩꢵꢰꢵꢪ꣄ ꢗꢹꢬꢸꢪ꣄ ꢗꢾꢮ꣄ꢣꢡ꣄ꢡꢒ꣄ , ꢭꢶꢒ꣄ꢒꢡ꣄ꢡꢒ꣄ ꢪꢸꢱꣀ ꣎