ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢨꢬ꣄ꢮꣁ ꢣꢶꢥ꣄ꢥꢸ ꣎
ꢪꢤꢸꢬꢾꢥ꣄ ꢱꣀꢮ ꢮꣀꢰ꣄ꢠꢮ ꢪꢾꢥꢥ꣄ ꢣꢷ ꢱꢪꢫꢪꢸ ꢡꢶꢥ꣄ꢥꢵꢳ꣄ ꢐꢠ꣄ꢜꢾꢱ꣄ꢒꢥꢶ ꢒꣂꢭꢵꢒꢭꢪ꣄ꢒꢥ꣄ ꢗꢭ꣄ꢭꢿꢡ꣄ ꢯꢿ |
ꢲꢶꢥ꣄ꢣꣁ ꢱꣁꢳꢧꢵꢬ꣄ ꢗꢶꢥ꣄ꢥꢪꢭꢾ ꢪꢸꢬꢸꢔꢥ꣄ꢒꢶꢥ꣄ ꢦꢾꢬꢸꢪꢵꢳ꣄ ꢂꢖ꣄ꢔꢸꢥ꣄ ꢪꢤꢸꢬꢾ ꢪꢷꢥꢵꢒ꣄ꢰꢶ ꢂꢪ꣄ꢪꣁ ꢂꢫ꣄ꢫꣁ ꢪꢵꢱꢶ ꢮꢷꢡꢸꢪ꣄ ꢏꢬꢵꢡ꣄ ꢂꢮ꣄ꢫꢵꢱꢶ | ꢤꢸꢮꢵꢬꢶ ꢱꣁꢥ꣄ꢥꢵ ꢣꢪꢬ꣄ ꢓꣃꢬꢶꢪ꣄ ꢣꢿꢮꢿꢥ꣄ꢣ꣄ꢬ ꢦꢸꢙꢾ ꢗꢭꢾꢱꢶ | ꢧꢭ꣄ꢗꣁ ꢮꢷꢳ꣄ꢜꣁ ꢂꢪ꣄ꢪꣁ ꢂꢫ꣄ꢫꣁ ꢈꢰꢩ ꢮꢵꢲꢥꢵꢪ꣄ ꢪꢵꢱꢶꢮꢷꢡꢸꢪ꣄ ꢏꢬꢵꢡ꣄ ꢂꢮ꣄ꢫꢵꢱ꣄ | ꢪꢷꢥꢵꢒ꣄ꢰꢶ ꢂꢪ꣄ꢪꢵ ꢤꣃꢬꢵ ꢨꢵꢬ꣄ꢣꢶ ꢱꢾꢥ꣄ꢥꢸ ꢪꢸꢱꢾꢱꢶ |
ꢮꢿꢔꢮꢡꢶ ꢥꢣꢶ ꢆꢡ꣄ꢡꢬ꣄ ꢡꢷꢬꢸꢪ꣄ ꢲꢳ꣄ꢒꢾꢬꢦ꣄ꢦꢥꢸ ꢱꢾꢥ꣄ꢥꢸ ꢣꢵꢪ꣄ꢤꢹꢪ꣄ꢒꢥꢶ ꢗꢭꢬꢱꢶ | ꢒꢵꢭ꣄ ꢡꢭ꣄ꢭꢵꢒꢸꢳꢪꢸꢒ꣄ ꢂꢮꢾ ꢣꢿꢮꢸꢒ꣄ ꢌꢣꢶꢬ꣄ꢯꢿꢮꣁ ꢩꢾꢳꢶ ꢮꢶꢰꢿꢱ꣄ꢒꢥꢶ ꢗꢭ꣄ꢡ ꢲꣁꢫꢾꢱꢶ | ꢔꢬꢸꢞ ꢲꢥꢸꢪꢥ꣄ ꢤ꣄ꢮꢙꢪ꣄ ꢱꣁꢥ꣄ꢥꢵ ꢧꢹꢭꢸ ꢱꢡꢶ ꢔꣂꢮꢶꢥ꣄ꢣ ꢕꣂꢰꢪ꣄ ꢱꢾꢥ꣄ꢡꣁ ꢙꢭꢦ꣄ꢬꢮꢵꢲ꣄ ꢤꢪꢶꢭꢿꢡ꣄ ꢯꢿꢡ꣄ꢡꢾ ꢮꣀꢔꣀ ꢥꢾꢣ꣄ꢣꢶꢪ꣄ ꢙꢥꢱꢪꢸꢣ꣄ꢬꢸ ꢪꢶꢳꢶ ꢬꢴꢡꣁ ꢱꢲꢱ꣄ꢬ ꢱ꣄ꢮꢬ꣄ꢠ ꢕꣁꢞꢵ ꢮꢵꢲꢥꢵꢪ꣄ ꢪꢲꢵꢬꢵꢙ ꢔꢪ꣄ꢨꢷꢬꢪ꣄ꢒꢥꢶ ꢥꢶꢳ ꢱꣁꢥ꣄ꢥꢵ ꢮꢱ꣄ꢡꢬ꣄ ꢤꢬꢶꢭꢶ ꢥꢾꢣ꣄ꢣꢶꢪ꣄ ꢲꢸꢡ꣄ꢡꢶꢬꢾꢱ꣄ ꢲꢳ꣄ꢒꢾꢬꢦ꣄ꢦꢥ꣄ | ꢥꢾꢣ꣄ꢣꢶꢪ꣄ ꢲꢸꢡ꣄ꢬꢾ ꢲꢳ꣄ꢒꢾꢬꢦ꣄ꢦꢥꢸꢒ꣄ ꢯ꣄ꢬꢷꢮꢶꢭ꣄ꢭꢶꢦ꣄ꢦꢸꢡ꣄ꢡꢸꢬ꣄ ꢃꢠ꣄ꢞꢵꢭ꣄ꢫ꣄ꢒꢾ ꢲꢵꢬꢸꢥ꣄ ꢕꢭ꣄ꢫꢵꢱꢶ ꢮꢷꢬꢬꢵꢕꢮ ꢦꢾꢬꢸꢪꢵꢳ꣄ ꢌꢣꢶꢬ꣄ ꢯꢿꢮꣁ ꢒꢾꢬ꣄ꢫꢾꢱꢶ |
ꢂꢮ꣄ꢬꢾ ꢡꢾꢖ꣄ꢒ ꢪꣁꢠ꣄ꢞꢮ꣄ ꢏꢠ꣄ꢜꢾꢒꢷ ꢣꢶꢫ꣄ꢫꣁ ꢦꢵꢛ꣄ꢱꣂ ꢲꣁꢭ꣄ꢭꣁ ꢪꣁꢠ꣄ꢜꢮꢸꢥꢸꢪ꣄ ꢣꢿꢮ꣄ ꢂꢮꢶ ꢨꢶꢱꢶ ꢂꢱ꣄ꢒꢶꢥꢵꢒ꣄ ꢣꢬ꣄ꢱꢥꣁ ꢣꢶꢫꢾꢱꢶ | ꢱꣁꢥ꣄ꢣꣁ ꢪꢠ꣄ꢞꢹꢒ ꢈꢰꢶꢒ꣄ ꢱꢵꢦ ꢮꢶꢪꣂꢒ꣄ꢰꢥꢪ꣄ ꢣꢿꢡ꣄ꢡꢒ꣄ ꢲꢶꢥ꣄ꢣꣁ ꢂꢮ꣄ꢬꢾ ꢪꢷ ꢯꢿꢡ꣄ꢡꢾ ꢨꣁꢠ꣄ꢞꢸꢬ꣄ ꢔꢵꢪꢸꢒ꣄ ꢣꢿꢮ꣄ ꢂꢮꢶ ꢮꢱꢶꢭꢿꢡ꣄ ꢯꢿꢡ꣄ꢡꢾ | ꢂꢪꢶ ꢂꢪ꣄ꢒꣁ ꢪꢾꢒ꣄ꢒꢶꢭꢶ ꢂꢮꢾ ꢱꢸꢥ꣄ꢣꢬꢬꢵꢙ ꢪꢹꢬ꣄ꢡꢶꢒ꣄ ꢯꢾꢒ꣄ꢒꢬꢸ ꢦꢸꢙꢾ ꢒꢾꢬꢶ ꢱ꣄ꢮꢵꢔꢡꢪ꣄ ꢒꢾꢬꢶ ꢥꢪꢶꢭꢶ ꢕꢿꢬ꣄ ꢂꢮ꣄ꢫꢵꢱꢶ ꣎
ꢌꢭ꣄ꢭꢿ ꢱꢪꢫꢪꢸ ꢂꢮ꣄ꢬꢾ ꢦꢬꢪꢒ꣄ꢒꢸꢞꢶꢪ꣄ ꢪꢾꢭ꣄ꢭꢶ ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢩꢾꢳꢶ ꢮꢶꢯꢿꢰ꣄ꢒꢥꢶ ꢗꢭ꣄ꢭꢿꢡ꣄ ꢯꢿ ꣎
Leave a Reply
You must be logged in to post a comment.