ꢗꢶꢡ꣄ꢡ ꢡꢶꢥ꣄ꢥꢵꢳ꣄ ꢥꣁꢮ꣄ꢮꣁ ꢣꢶꢥ꣄ꢥꢸ ꣎
ꢪꢤꢸꢬꢵꢦꢸꢬꢶꢒꢷ ꢄꢥ꣄ꢣ꣄ꢬꢭꣂꢒ꣄ ꢪꢾꢥꢶ ꢪꢾꢭ꣄ꢭꢡ꣄ꢡꢶꢱꣁ ꢱꢿ ꢂꢮ꣄ꢬꢾ ꢪꢤꢸꢬꢾ | ꢮꢷꢡꢸꢪ꣄ ꢪꣃꢞꢵꢥ꣄ ꢒꢵꢫ꣄ ꢧꢹꢭꢸ ꢡꣁꢬꢠꢸꢥ꣄ ꢒꢵꢫ꣄ ꢒꢿꢳꢸ ꢚꢵꢞꢸꢥ꣄ ꢒꢵꢫ꣄ ꢗꢹꢡꢗꢶꢒꢸꢬꢸ ꢦꢵꢥꢸꢥꢸ ꢡꣁꢬꢠ꣄ ꢒꢵꢫ꣄ ꢙꢶꢫꢾ ꢦꣂꢒꢸꢪꢱ꣄ꢒꢶ ꢤꢥꢶꢥ꣄ ꢒꢾꢬꢥ꣄ ꢣꢵꢥ꣄ ꢒꢵꢫ꣄ ꢮꢿꢣꢶꢥ꣄ ꢒꢾꢬꢥ꣄ ꢮꢿꢣ ꢪꢥ꣄ꢡ꣄ꢬ ꢆꢗ꣄ꢗꢵꢬꢠꢸꢥ꣄ ꢒꢵꢫ꣄ ꢪꢷꢥꢵꢒ꣄ꢰꢶ ꢦꢜ꣄ꢜꢠꢪ꣄ ꢄꢥ꣄ꢣ꣄ꢬ ꢦꢜ꣄ꢜꢠꢪ꣄ ꢱꣁꢒꢥ꣄ ꢯꢿ |
ꢂꢪꢶ ꢲꢶꢥ꣄ꢣꣁ ꢗꢶꢡ꣄ꢡ ꢡꢶꢥ꣄ꢥꢵꢳꢸ ꢣꢿꢮꢸꢒ꣄ ꢱꢵꢡ꣄ꢡ ꢙꢵꢡ꣄ꢡ ꢥꢶꢔꢶꢳ꣄ꢫꢵꢱ꣄ ꣎ ꢗꢶꢡ꣄ꢡꢶꢬꣀ ꢮꢷꢡ꣄ ꢮꢵꢜꢸ ꢗꢭꢶ ꢙꢶꢭꢿꢡ꣄ ꢲꣁꢣꢾꢫꣁ ꣎ ꢕꢾꢠ꣄ꢞꣁ ꢱꢶꢫꢾꢡ꣄ ꢨꢵꢬꢾ ꢲꣁꢫ꣄ꢫꢶꢬꢱ꣄ ꣎ ꢂꢬꢾ ꢬꣃꢒꢭꢪ꣄ ꢑꢞꢶꢫꣁ ꢥꢵ ꢪꢾꢥꢶ ꢪꣁꢥ꣄ꢥꢸꢪ꣄ ꢪꢾꢭ꣄ꢭꢶꢭꢿꢡ꣄ ꢏꢱ꣄ꢡꣁ ꢆꢡ꣄ꢡꢬ꣄ ꢗꢶꢡ꣄ꢡꢶꢬꣀ ꢮꢷꢡ꣄ ꢱꢥ꣄ꢤꢶꢪꢸ ꢂꢮꢶ ꢲꢶꢨ꣄ꢨꢶꢫꢵꢱ꣄ ꣎ ꢡꢿꢜꢸ ꢯꢿꢡ꣄ꢡꢾ ꢦꢵꢣꢵꢳ ꢒꢸꢨꢿꢬ ꢨꣀꢬꢮꢬ꣄ ꢤꣃꢬꢵꢒ꣄ ꢙꢷꢒꢶꢥ꣄ ꢣꢿꢮꢸꢒ꣄ ꢣꢬ꣄ꢱꢥꣁ ꢒꢾꢬ꣄ꢡꢶ ꢩꢬꢵꢜ꣄ ꢂꢮ꣄ꢫꢵꢱ꣄ |
ꢏꢱ꣄ꢡꣁ ꢗꢶꢡ꣄ꢡꢶꢬꣀ ꢮꢷꢡꢸꢪ꣄ ꢱꣃꢭꢵ ꢂꢖ꣄ꢔꢶꢞꢶ ꢢꣁꢮ꣄ꢭ꣄ꢬꢶꢫꣁ ꢱꢶꢖ꣄ꢔꣀꢡ꣄ ꢙꣁꢮꢳ꣄ ꢱꣁꢳꢧꢵꢬ꣄ ꢂꢪ꣄ꢪꣁꢒꢶꢥ꣄ ꢂꢫ꣄ꢫꣁ ꢥꢴꢥ꣄ ꢬꢢꢪꢸ ꢪꢵꢱꢶ ꢮꢷꢡꢸꢥꢸꢪ꣄ ꢏꢬꢵꢡ꣄ ꢂꢮꢾ ꢮꢶꢰꢫꢸ ꢒꢳꣀꢭꢶꢫꢵꢱ꣄ ꣎ ꢧꢭ꣄ꢗꣁ ꢡꢿꢜ꣄ ꢬꢴꢷ ꢥꢶꢔꢶꢳꢶ ꢣꢒ꣄ꢰꢶꢠꢪꢵꢱꢶꢮꢷꢡꢸꢪ꣄ ꢯꢿꢡ꣄ꢡꢾ ꢗꢾꢥ꣄ꢥꢵ ꢤꣃꢬꣁ ꢙꣁꢮꢳ꣄ ꢂꢮꢶ ꢲꢶꢨ꣄ꢨꢶꢭꢶꢞꢶꢫꢵ ꢣꢿꢮꢸꢒ꣄ ꢱꢷꢡꢶꢒꢶꢥꢸꢱ꣄ ꢕꢿꢬ꣄ ꢙꢵꢡ꣄ꢡꢾ ꢪꢾꢥ꣄ꢡꢶ ꢬꢴꢷꢞꢶꢫꢵ |
ꢤꢸꢮꢵꢬꢶ ꢕꣁꢪ꣄ꢪꣁ ꢬꢴꢷꢒꢶꢥ꣄ ꢓꢳ꣄ꢳꢶ ꢙꢶꢫꢾ ꢂꢪ꣄ꢨꢜ꣄ ꢩꢵꢡ꣄ꢒꢶꢥ꣄ ꢒꢗ꣄ꢗꢾꢥ꣄ꢥꣁ ꢓꣀꢡꢶꢫꢵ | ꢲꢳ꣄ꢳꢸ ꢮꢷꢳ꣄ ꢲꣁꢫꢾꢱ꣄ ꣎ ꢂꢮ꣄ꢬꢾ ꢦꢜ꣄ꢜꢪꢲꢶꢰꢶ ꢓꣁꢨ꣄ꢨꣁ ꢂꢮꣀ ꢪꢾꢥꢶ ꢱꢶꢭꢿꢡ꣄ ꢲꣁꢣ꣄ꢫꢵꢱ꣄ | ꢂꢪ꣄ꢨꣁ ꢑꢞꢶꢒꢶ ꣎ ꢂꢮ꣄ꢬꢾ ꢨꢵꢣꢵꢥ꣄ ꢂꢱ꣄ꢒꢶ ꢙꢮꢞꢱ꣄ꢡꣁ ꢂꢰ꣄ꢜꢣꢶꢒ꣄ ꢨꢵꢭꢒꢸꢥꢸꢒ꣄ ꢙꢶꢔꢶ (ꢣꢶꢒ꣄ꢮꢶꢙꢫꢪ꣄) ꢬꢵꢙꢔꢪ꣄ꢨꢷꢬꢪ꣄ꢒꢥꢶ ꢱꢷꢭꢸ ꢱꢥꢶ ꢱꢾꢥ꣄ꢡꣁ ꢂꢪ꣄ꢒꣁ ꢂꢱ꣄ꢒꢶ ꢂꢩꢫꢪ꣄ꢣꢷꢭꢶ ꢄꢥ꣄ꢣ꣄ꢬ ꢮꢶꢪꢵꢥꢪꢸ ꢂꢪ꣄ꢨꣁ ꢂꢮ꣄ꢬꢾ ꢦꢜ꣄ꢜꢪꢲꢶꢰꢶ ꢪꢵꢱꢶ ꢮꢷꢡꢸꢥꢸꢪ꣄ ꢂꢮꢶꢱꢶ ꣎ ꢱꢾꢥ꣄ꢡꣁ ꢂꢫ꣄ꢫꣁꢒꢶꢥ꣄ ꢦ꣄ꢬꢶꢫꢵꢮꢶꢞꣀ ꢥꢵꢫꢒꢶ ꢂꢪ꣄ꢪꣁ ꢏꢬꢵꢡ꣄ ꢂꢮ꣄ꢫꢵꢱꢶ | ꢲꣁꢬꢵꢞꢸ ꢥꣁꢮ꣄ꢬꣁ ꢥꣁꢮ꣄ꢬꢶꢒ꣄ ꢱꢷꢡꢶ ꢂꢪꢶ ꢕꢿꢬ꣄ ꢂꢮ꣄ꢫꢵꢱꢶ ꣎
Leave a Reply
You must be logged in to post a comment.