ꢣꢷ ꢔꢵꢪ꣄ ꢤꢶꢒ꣄ꢒꢬꢿꢱ꣄ – ꣔

ꢨꢾꢜ꣄ꢒꢶ : ꢡ꣄ꢫꢿ ꢥꢴꢵꢪ꣄ꢪꢵ … ꢌꢥꢶ ꢦꢥꢶ ꢕꢭ꣄ꢭꢸꢥꢵꢥ꣄ ꢪꢾꢥꢵ .. ꢮꢜ꣄ꢒꢾ ꢥꢴꢷ ꢪꢾꢥꢵ … ꢡ꣄ꢫꢿ ꢔꢵꢪ꣄ꢪꢸ ꢂꢱ꣄ꢒꢶꢥ꣄ ꢄꢱ꣄ꢒꢥꢷꢱ꣄ ꢬꢴꢵꢥ꣄ ꢱꣁꢒꢥ꣄ ꢯꢿ… ꢪꣁꢒꣁ ꢏꢠ꣄ꢜꢶ ꢣꢶꢥ꣄ꢥꢸ ꢦꢥꢶ ꢕꢭ꣄ꢭꢸꢥꢵꢡ꣄ꢒꣁ ꢬꢴꢵꢡ꣄ꢒꣁ ꢪꢸꢱꢸꢥꢵ .. ꢡ꣄ꢫꢾꢜ꣄ ꢩꢥ꣄ꢣꢶ ꢣꢷꢞꢶ ꢪꣁꢒꣁ ꢨꢵꢣꣁ ꢒꢾꢬꢸꢖ꣄ꢔꣂ … ꢪꣁꢒꣁ ꢲꢜ꣄ꢮꢡꢷꢱ꣄ ꢒꣁꢥꢒ꣄ꢒꢷꢱ꣄ ꢭꢔꢬꢶꢱ꣄ …

ꢪꢵꢫ꣄ : ꢬꣁꢞꢸꢖ꣄ꢒꢮꢵ … ꢩꢬ꣄ꢳ ꢔꢵꢪꢸ ꢙꢷꢬꢾ ꢡꢸꢪ꣄ꢨꢶꢬꢾ ꢣꢵ ꢂꢮꣂꢥ꣄ꢣꢒ꣄.. ꢒꣂꢥꢶꢫꢾ ꢲꣁꢫꢾꢡꢶꢥ꣄ꢥꢸ ꢦꢱ꣄ꢭꣁ ꢮꢡ꣄ꢡꣁ ꢒꢾꢭꢶꢙꢾꢥ꣄… ꢡꢹ ꢂꢡ꣄ꢡꣁ ꢒꢵꢦ꣄ꢦꢶ ꢡꢒꢶ ꢪꢸꢱꢵꢜ꣄ … ꢡꢿꢭꢵ ꢨꢾꢜ꣄ꢒꣁ ꢂꢮ꣄ꢞꢬꢷꢱ꣄…

                    [ꢱꣃꢥ꣄ꢣꢬ꣄ ꢂꢮꢱ꣄]

ꢱꣃꢥ꣄ꢣꢬ꣄ : ꢂꢪ꣄ꢪꢵ..  ꢱꣁꢪ꣄ꢪꢬ꣄ ꢒꣂꢥ꣄ ꢣꢷ ꢱꣂꢣꢵꢥ꣄ ꢨꢶꢱꢶꢬꢵꢡ꣄ꢡꢾ?

ꢪꢵꢫ꣄ : ꢲꢳ꣄ꢳꢸ ꢮꢡ꣄ꢡꣁ ꢒꢿꢬ꣄ … ꢒꢸꢪ꣄ꢨꣂꢠ꣄ ꢬꢴꢷ ꢂꢮ꣄ꢬꢵꢡ꣄ꢡꢾ … ꢥꣁꢒꢸꢬꣁ..

ꢱꣃꢥ꣄ꢣꢬ꣄ :  ꢌꢥꢹꢱ꣄ꢒ꣄ꢫꢵ? [ꢱꣁꢪ꣄ꢪꢬ꣄ ꢨꢶꢱ꣄ꢱꢒꢥ꣄ ꢂꢮꢱ꣄]ꢂꢮꣁ .. ꢂꢮꣁ.. ꢂꢮꣁ .. ꢡꢸꢪꢶ ꢂꢮꢶ ꢚꢸꢒꢸ ꢕꢾꢞꢶ ꢲꣂꢬꢶꢱ꣄ ꢱꣁꢒꢥ꣄ ꢯꢿ … ꢂꢪ꣄ꢪꢵ  ꢒꢵꢦ꣄ꢦꢶ ꢱꢾꢠꢪ꣄ꢒꣁ ꢃꢥ꣄ …

(ꢲꢬꢶꢒ꣄ ꢱꢷ) ꢡꢸꢪꢶ ꢒꢵꢫ꣄ ꢲꢸꢜꢶꢭ꣄ꢞꢶꢫꢵ?  ꢨꢶꢱꣁ ꢩꢮꢵ..  

ꢲꢬꢶ : ꢬꢵꢪ꣄ꢒꢸꢪꢵꢬꢸ… ꢪꣁꢒꣁ ꢥꣁꢮ꣄ꢬꣁ ꢪꢾꢥꢶ ꢲꢮ꣄ꢜꢶꢭ꣄ꢞꢶꢬꢴꢵꢡ꣄ꢡꢾ ꢱꣁꢒꢥ꣄ ꢯꢿ .. ꢩꢮꢵ ꢪꢾꢥꢬꢵꢱꢶ …

(ꢱꣃꢥ꣄ꢣꢬꢸꢒ꣄ ꢱꢷ) ꢣꢣꢵ …ꢥꣁꢮ꣄ꢬꣁ ꢌꢥꣁ … ꢪꢷ ꢥꢴꢵ ..ꢪꣁꢒꣁ ꢩꢮꢵ ꢪꢾꢥꢶ ꢨꣁꢮꢬꢵꢱꢶ …

ꢱꣃꢥ꣄ꢡꢬ꣄ :  ꢄꢫꢿꢜ꣄ ꢂꢱ꣄ꢒꢶ ꢡꢾꢖ꣄ꢒꣁ ꢩꢮꢵ ꢪꢾꢥꢷꢱ꣄ ꢨꣁꢮꢥ꣄ ꣎ ꢡꢸꢪ꣄ꢨꢶꢬꢾ ꢔꢵꢪ꣄ꢪꢸ ꢣꢣꢵ ꢪꢾꢥꢬꢵꢱ꣄ꢒꢶꢥꢵ .. ꢡ꣄ꢫꢿ ꢱꣁꢒꢥꢶ…

ꢲꢬꢶ : ꢡꢶꢱꢥꢶꢫꢵ !  ꢱꢾꢬ꣄ꢒ꣄ꢒꢱ꣄ … ꢪꢷꢱ꣄ ꢌꢒꣁ ꢥꢱ꣄ꢡꢶꢫꢵꢥ꣄..

ꢱꣃꢥ꣄ꢣꢬ꣄ :  ꢥꢱ꣄ꢡꢶꢫꢵꢥ꣄ ꢪꢾꢥ꣄ꢡꣁ ?

ꢬꢵꢪ꣄ :  ꢪ꣄  … ꢱꢶꢖ꣄ꢔꣀꢡ꣄ ..

ꢱꣃꢥ꣄ꢣꢬ꣄ : ꢱꢾꢬ꣄ꢒ꣄ꢒꣂꢱ꣄ .. ꢏꢠ꣄ꢜꢶ ꢏꢠ꣄ꢜꢶ ꢔꢵꢪꢸꢒ꣄ꢒꢷ ꢂꢪ꣄ꢨꢶꢬꢾ ꢮꢡ꣄ꢡꣁ ꢒꣂꢥꢒ꣄ ꢪꢬ꣄ꢗ꣄ꢗꢵꢬꢶꢱ꣄ ꢪꢾꢥꢶ ꢱꢶꢫꢵꢱ꣄ꢒ꣄ꢫꢵ …

[ꢨꢾꢜ꣄ꢒꢶ ꢒꢵꢦ꣄ꢦꢶ ꢂꢥꢶ ꢣꢷꢞꢶ ꢒꢮꢵꢜ꣄ ꢭꢾꢒꢸꢡ꣄ꢡꢾ ꢲꢶꢨ꣄ꢨꢶꢬꢵꢱ꣄]

ꢱꣃꢥ꣄ꢣꢬ꣄ :  ꢤꢾꢬꣁ … ꢒꢵꢦ꣄ꢦꢶ ꢓꢳ꣄ꢳꢸꢮꣂ..

ꢬꢵꢪ꣄ :  ꢬꢴꢵꢥ꣄ꢣꢒ꣄ .. ꢡꢸꢪꢶ ꢨꣁꢪ꣄ꢨꢵꢫꢶꢒ꣄ ꢙꢷꢬꢵꢱ꣄ ꢪꢾꢥꢶ … ꢍꢜ꣄ ꢪꢾꢥꢵꢱꢶ..

ꢱꣃꢥ꣄ꢣꢬ꣄ :  ꢨꢪ꣄ꢨꢵꢫꢶꢒꢵ? ꢪꢷ ꢒꣂꢜ꣄ ꢙꢷꢬꢶꢱꢶ !

ꢲꢬꢶ :  ꢣꢣꣁ ꢒꣂꢜ꣄ ꢯꢿ ꢪꢾꢥꢶ ꢦꢸꢱꢾꢫꢾꢒꣁ ! ꢨꢪ꣄ꢨꢵꢫꢶꢒ꣄ ꢙꢷꢬꢵꢱ꣄ .. ꢦꣁꢬꢪꢸꢒ꣄ ꢂꢮꢥ꣄ ꢪꢾꢥꢵꢱꢶ ..

ꢱꣃꢥ꣄ꢣꢬ꣄ :  ꢲꢵꢫ꣄ .. ꢲꢵꢫ꣄ .. ꢂꢪ꣄ꢨꢶꢬꢾ ꢣꢣꣁ ꢨꣁꢪ꣄ꢨꢵꢫꢶꢒ꣄ ꢙꢷꢬ꣄ꢫꢵꢡ꣄ꢡꢾ … ꢣꢣꣁ ꢪꢾꢥꢾꢡꢷ … ꢂꢪ꣄ꢨꢶꢬꢾ ꢨꢵ … ꢍꢜꢸ ꢨꢵꢦꢸꢒ꣄ ꢣꢣꣁ ꢪꢾꢥꢷꢱ꣄ ꢪꢾꢥꢥ꣄..

ꢬꢵꢪ꣄ :  ꢂꢪꢶ ꢣꢣꣁ ꢪꢾꢥꢾꢡ꣄ ꢡꢸꢪꢶ ꢲꣁꢫ꣄ꢬꢴꢵꢥ꣄ ꢪꢾꢥꢶ ꢲꢮ꣄ꢜꢶꢭ꣄ꢞꢶꢫꢵ.. ꢱꢾꢬ꣄ꢒ꣄ꢒꣁ .. ꢂꢪ꣄ꢒꣁ  ꢱꢾꢠꢪ꣄ ꢒꢵꢪ꣄ ꢪꢸꢱꢞꢶꢶ ꢤꢞ꣄ꢞꢸꢮꣂ..

ꢂꢖ꣄ꢔꢸꢥ꣄ ꢂꢮꢫ꣄….…