ꢡꢾꢥꢵꢭꢶꢬꢵꢪ꣄ – ꣑

ꢡꢾꢥꢵꢭꢶꢬꢵꢪ꣄ ꢓꢾꢥꢶ ꢪꢾꢥꢾꢡꢶ ꢲꢵꢱ꣄ꢫꢪ꣄ꢒꢥꢸꢱ꣄ ꢭꢔꣀ ꣎ ꢲꢵꢱ꣄ꢫꢪ꣄ꢪꢸ ꢥꢵꢮ꣄ ꢦꣁꢞꢾꢡ꣄ꢡꢾꢥꣁ ꢡꢾꢥꢵꢭꢶꢬꢵꢪꣁ ꣎ ꢦꢬꢸꢥꢸꢒ꣄ ꢲꢱꢞꢡ꣄ꢡꢿꢱ꣄ ꢂꢦꢸꢭ꣄ ꢒꢵꢪ꣄ꢒꢥ꣄ ꢢꣁꢮ꣄ꢭꢶꢫꢱ꣄ꢡꢾꢥꣁ ꣎ ꢭꣂꢒꢪꢵꢡꢵ ꢦꢬꢵꢯꢒ꣄ꢡꢶ ꢙꣁꢮꢳ꣄ ꢮꢶꢒꢜꢒꢮꢶ ꢪꢾꢥꢶ ꢥꢵꢮ꣄ ꢦꣁꢞꢾꢡ꣄ꢡꢾꢥꣁ ꣏ ꢮꢶꢙꢫꢥꢒꢬ ꢱꢵꢪ꣄ꢬꢵꢙ꣄ꢫꢪ꣄ ꢱꣁꢮ꣄ꢮꢳ꣄ꢮ ꢱꢲꢵꢨ꣄ꢣꢸꢪ꣄ ꢒꢺꢰ꣄ꢠ ꢣꢿꢮꢬꢵꢫꢬ꣄ ꢪꢾꢥꢥ꣄ ꢬꢙꣁ ꢬꢵꢙ꣄ꢙꢭ꣄ꢭꢿꢡ꣄ ꢂꢮꢾꢱ꣄ ꣎ ꢡꢾꢒ ꢱꢩꢵꢪ꣄ ꢮꢶꢣꢹꢰꢒꣁꢒꢥ꣄ ꢡꢾꢥꢵꢭꢶꢬꢵꢪꣁ ꢲꣁꢣꢾꢱꢶ ꣎ ꢂꢱ꣄ꢒꢶ ꢡꢾꢖ꣄ꢒꣁ ꢂꢦꢸꢭ꣄ ꢮꢡ꣄ꢡꢵꢪ꣄ ꢒꢵꢪ꣄ ꢲꢵꢭ꣄ ꢲꢱꢞꢡ꣄ꢡꢾꢪꣁ ꢬꢙꣁꢒꢥ꣄ ꢲꣁꢣꢾꢱ꣄ ꢡꢾꢥꢵꢭꢶ ꣏

ꢒꢺꢰ꣄ꢠ ꢙꢶꢭ꣄ꢭꢵ ꢒꢵꢭꢦꢞꢸ ꢪꢾꢥꢥ꣄ ꢔ꣄ꢬꢵꢪꢪ꣄ꢪꢸ ꢬꢵꢪꢫ꣄ꢫꣁ ꢪꢾꢥꢥ꣄ ꢩꢮꢠ꣄ ꢙꢶꢮ꣄ꢭꢶ ꢂꢮ꣄ꢫꢵꢱ꣄ ꣎ ꢡꢾꢒ ꢩꢵꢬ꣄ꢫꢵ ꢥꢵꢮ꣄ ꢭꢒ꣄ꢰ꣄ꢪꢶꢫꢪ꣄ꢪꣁ ꣎ ꢌꢖ꣄ꢒꣁ ꢒꢸꢜꢸꢪ꣄ꢨꢪꢸ ꢣꢬꢶꢣ꣄ꢬꢸ ꢒꣂꢬꢡꢵꢠ꣄ꢞꢮꢪ꣄ ꢓꢳꢾꢱ꣄ ꣎ ꢡ꣄ꢫꢿ ꢮꢿꢳꣂꢱ꣄ ꢡꢾꢥꢵꢭꢶꢬꢵꢪꣁ ꢡꢾꢖ꣄ꢒꣁ ꢨꣁꢜꣁꢒꢥ꣄ ꢆꢙꢾꢡ꣄ꢡꢾ ꣎ ꢡꢾꢒꣁ ꢡꢾꢥꢵꢭꢶ ꢪꢾꢥꢥ꣄ ꢔꢵꢪ꣄ꢪꢸꢬ꣄ ꢯꢿꢡ꣄ꢡꢾ ꢬꢵꢪꢭꢶꢖ꣄ꢔꢸ ꢱ꣄ꢮꢵꢪꢶ ꢥꢵꢮꢸꢱ꣄ ꢕꢭ꣄ꢬꢶꢫꣁ ꣎ ꢡ꣄ꢫꢿꢱ꣄ ꢡꢾꢒꣁ ꢡꢾꢥꢵꢭꢶꢬꢵꢪꣁ ꢪꢾꢥꢶ ꢲꣁꢫ꣄ꢫꢶꢬꢶꢫꣁ ꣏ ꢡꢾꢥꣁ ꢆꢙꢾ ꢢꢶꢥ꣄ꢮꢣꢶꢥ꣄ꢥꢸꢪꢸꢱ꣄ ꢬꢵꢪꢫ꣄ꢫꣁ ꢲꢔ꣄ꢔꢸꢥꣁ ꢂꢮꢶ ꢪꣁꢙ꣄ꢙꣁ ꣎ ꢬꢵꢪꢫ꣄ꢫꣁ ꢔꢾꢔꢸꢥꢵ ꢡꢶꢡ꣄ꢒꢵꢪ꣄ ꢣꢬꢶꢣ꣄ꢬꢸꢪ꣄ ꢯꢿꢡ꣄ꢡꢾ ꢭꢒ꣄ꢰ꣄ꢪꢶꢫꢪ꣄ꢪꣁ ꢮꢿꢥ꣄ ꢒꢾꢰ꣄ꢜꢪ꣄ ꢦꣁꢞꢶꢱ꣄ ꣎ ꢆꢙꢾ ꢥꢴꢸꢬꢸꢒ꣄ ꢦꣂꢣꢶ ꢒꢬꢱ꣄ꢡꢒ꣄ ꢯꢒ꣄ꢡꢶ ꢥꢴꢷꢱ꣄ꢡꢾꢥꣁꢒꢥ꣄ ꢡꢶꢥꣁ ꢆꢙꢾ ꢡꢾꢥꢵꢭꢶ ꢪꢾꢥꢥ꣄ ꢔꢵꢪ꣄ꢪꢸꢬ꣄ ꢯꢿꢡ꣄ꢡꢾ ꢂꢦꢸꢭ꣄ ꢩꣀ ꢕꢿꢬꢮꢶ ꢗꢾꢬꢶꢱ꣄ ꣎꣎ ꢡꢾꢥꢵꢭꢶꢬꢵꢪꣁ ꢂꢦꢸꢭ꣄ ꢪꢪꢵ ꢕꣁꢪ꣄ꢪꣁ ꢲꣁꢞꢶꢫꢮꢾꢱ꣄ ꣎ ꢡꢾꢥꣁ ꢣꢸꢱ ꢥꢴꢸꢬꢸꢥ꣄ ꢱꣁꢒꣁ ꢬꢴꢵꢥꢵꢡ꣄ꢡꣁ ꢂꢣ꣄ꢣꢶ ꢱꢿꢰ꣄ꢝꣁ ꢒꢾꢬ꣄ꢭꢶꢫꢮꢾꢱ꣄ ꣎ ꢡꢾꢒꢵ ꢱꢿꢰ꣄ꢝꢵꢪ꣄ ꢨꢵꢣꣁ ꢦꣁꢥ꣄ꢣ꣄ꢫꢵꢱ꣄ꢡꢾꢖ꣄ꢒꣁ ꢬꢵꢒ꣄ ꢂꢮꢾꢡ꣄ ꢪꢾꢳ꣄ꢳꢶ ꢡꢾꢒꢵ ꢲꢵꢱ꣄ꢫꢪꢸ ꢂꢠ꣄ꢗꢫꢶ ꢙꢶꢫꢵꢱ꣄ ꣏

ꢲꢸꢬꢶꢪ꣄ ꢗꢾꢬ꣄ꢗ꣄ꢗꢸꢥ ꢲꣂꢬꢶꢫꣁ ꢏꢬ꣄ꢱꢸꢪ꣄ ꢲꢸꢬꢶꢪ꣄ ꢗꢾꢬ꣄ꢗ꣄ꢫꢵꢱ꣄ ꣎ ꢏꢣ꣄ꢣꢶꢥ꣄ ꢱꢶꢒ꣄ꢒꢞꢬꢶꢫꣁ ꢦꢵꢝꢪꢸ ꢕꣁꢬꢪ꣄ ꢢꣁꢮ꣄ꢥꢵꢡ꣄ꢡꣁ ꢱꢿꢰ꣄ꢝꢵꢥ꣄ ꢒꢾꢬ꣄ꢭꢶ ꢒꢶꢮꢶꢞꢶ ꢮꢡ꣄ꢡꢵꢥ꣄ ꢒꢾꢬ꣄ꢭꢶ ꢬꢴꢵꢫ꣄ ꢡꢾꢥꢵꢭꢶꢬꢪꣁ ꣎ ꢌꢒ ꢲꢵꢭꢸꢱ꣄ ꢣꢸꢱ ꢨꢵꢳꢸꢥ꣄ ꢪꢾꢳ꣄ꢳꣁ ꢦꢵꢝꢪꢸ ꢕꣁꢬꢪ꣄ ꢢꣁꢮ꣄ꢥꢵꢡ꣄ꢡꣁ  ꢒꢶꢮꢶꢞꢶ ꢒꢾꢬ꣄ꢫꢵꢱ꣄ ꣎ ꢲꢸꢬꣁꢣ꣄ꢣꢶ ꢒꢵꢫ꣄ ꢓꢾꢜꢶꢥ꣄ ꢒꢾꢬꢾꢡ꣄ ꢪꢾꢳ꣄ꢳꢶ ꢎꢒ꣄ꢫꢵꢥꢶ ꣎꣎ ꢙꢾꢥꢾ ꢪꢵꢫ꣄ ꢂꢖ꣄ꢔꢸꢥ꣄ ꢏꢱ꣄ꢡꢸꢥ꣄ ꢱꢖ꣄ꢔꢾ ꢮꢡ꣄ꢡꢵꢥ꣄ ꢒꣀ ꢎꢒ꣄ꢒꢾꢥꢶ ꢡꢾꢥꢵꢭꢶꢬꢵꢪꣁ ꣎ ꢒꣁꢪꢳꢶ ꢱꣁꢒꢥ꣄ ꢮꢡ꣄ꢡꣁ ꢒꢾꢬ꣄ꢭꢶ ꢦꢬꢸꢥꢸꢒ꣄ ꢲꢱꢭ꣄ꢭꢶ ꢲꣁꢣꢾꢱ꣄ ꣎ ꢌꢒ ꢲꢵꢭ꣄ ꢕꣁꢪ꣄ꢪꢵ ꢒꢾꢰ꣄ꢝꢪ꣄ ꢦꢵꢣꣁ ꢌꢒꣁ ꢒꣁꢥ꣄ꢥꢶ ꢒꢳꢫꢥꢶ ꣎ ꢓꢿꢳꢸ ꢨꢵꢳꢸꢒꢥ꣄ ꢬꢴꢷꢱ꣄ ꢙꣃꢠꣁ ꢲꣁꢫꢾꢱ꣄ ꣏ ꢡꢾꢥꢵꢭꢶꢬꢵꢪꢵꢒ꣄ ꢲꣁꢬꢵꢜ꣄ ꢒꢾꢬꢶ ꢢꣁꢮ꣄ꢥꣁ ꢪꢾꢥꢶ ꢡꢾꢖ꣄ꢒ ꢂꢪ꣄ꢨꢵꢒ꣄ ꢃꢱ꣄ꢡꣁ ꢲꣁꢣꢾꢫꣁ ꣎ ꢡꢿꢤꢵꢥꢸ ꢲꣁꢬꢵꢜ꣄ ꢪꢾꢳ꣄ꢳꢶ ꢒꢾꢬꢶ ꢢꣁꢮꢶꢱ꣄ ꣎ ꢒꢪꢭꢵ ꢪꢾꢥꢥ꣄ ꢏꢠ꣄ꢜꢾ ꢩꣁꢮ꣄ꢠ꣄ꢞꢶ ꢂꢮꢶꢱ꣄ ꢡꢶꢒꣁ ꣎ ꢲꣁꢬꢵꢜ꣄ ꢲꣁꢫꢾ ꢧꢭ꣄ꢗꣁ  ꢪꢾꢳ꣄ꢳꢶ ꢡꢾꢥꢵꢭꢶꢬꢵꢪꢵꢒ꣄ ꢨꢸꢣ꣄ꢣꢶ ꢂꢮꢾꢥꢶ ꣎ ꢕꣁꢪ꣄ꢪꢵ ꢣꢬꢶꢣ꣄ꢬꢸ ꢙꢮꢞꢡ꣄ꢡꢒ꣄ ꢗꢶꢥ꣄ꢡꢥꣁ ꢪꢾꢳ꣄ꢳꢶ ꢒꢾꢬꢾꢥꢶ ꣎ ꢂꢦꢸꢭ꣄ ꢩꢬ꣄ꢡꣁ ꢨꢸꢣ꣄ꢣꢶ ꢲꢷꢥꢥ꣄ꢒ ꢯꢿꢥꢵ ꢪꢾꢥꢶ ꢲꢜ꣄ꢮꢸꢥꢵꢡ꣄ꢡ ꢡꢾꢒꢵ ꢲꢵꢱ꣄ꢫꢪꢸ ꢭꢔꢶꢛ꣄ꢙꢶꢭꢶ ꢕꣁꢪ꣄ꢪꢵ ꢒꢾꢰ꣄ꢜꢪꢸꢥ꣄ ꢪꢴꣁꢜꣁ ꢒꢾꢬ꣄ꢭꢸꢥꢵꢡ꣄ꢡ ꢬꢴꢷꢱ꣄ ꢡꢾꢥꢵꢭꢶ ꢨꢾꢫꢶꢭ꣄ ꣎ ꢄꢱꣂꢱ꣄ ꢒꣀ ꢒꢵꢪꢸꢥ꣄ ꢒꢾꢬ꣄ꢥꢵꢡ꣄ꢡꣁ ꢒꢸꢜꢸꢪ꣄ꢨꢪꢸꢒ꣄ ꢱꢲꢵꢮ꣄ꢒꢥ꣄ ꢬꢴꢵꢥꢵꢡ꣄ꢡ ꢭꣂꢭ꣄ꢦꣁꢞ꣄ꢭꢿꢡ꣄ ꢲꣁꢣꢾꢱ꣄ ꣎꣎

ꢄꢱꣂꢱ꣄ꢒꢥꢶ ꢣꢶꢥ꣄ꢥꢸ ꢤꢪꢾꢱ꣄ ꢲꢸꢥꢳꣁ ꢂꢮꢾꢱ꣄ ꣎ ꢦꣁꢮ꣄ꢱ꣄ ꢦꣁꢠ꣄ꢠꣁ ꢲꣂꢬꢶꢫꣁ ꢒꢵꢭꢸꢪ꣄ ꢦꣁꢠ꣄ꢠꢵꢡ꣄ꢡꢾ ꢲꢵꢭꢶ ꢂꢡ꣄ꢡꣁ ꢲꢸꢥꢳꢵꢪ꣄ ꢦꢥꢶ ꢒꢾꢰ꣄ꢜꢪ꣄ ꢂꢣ꣄ꢣꢶ ꢂꢮꢾꢱ꣄ ꣎ ꢙꢾꢥꢸꢭ꣄ꢥꢸ ꢦꢿꢡ꣄ꢡꢒ꣄ ꢦꢥꢶ ꢂꢨ꣄ꢨꢸꢥꢵꢡ꣄ꢡ ꢒꢾꢰ꣄ꢝꢪ꣄ ꢦꣁꢞ꣄ꢫꢵꢱ꣄ ꣏ ꢄꢱꢵꢥ꣄ ꢮꢿꢳꣁꢱꢷ ꢡꢿ ꢔꢵꢪ꣄ꢪꢸ ꢏꢠ꣄ꢜꢾ ꢱꢥ꣄ꢫꢵꢱꢶ ꢂꢮ꣄ꢫꢵꢱ꣄ ꣎ ꢡꢾꢥꢸ ꢂꢮꢾ ꢮꢿꢳꣁ ꢡꢾꢭ꣄ꢭꢾ ꢔꢵꢪ꣄ꢪꢸ ꢪꢴꣁꢜꣁ ꢦꣁꢮ꣄ꢱ꣄ ꢱꢸꢜ꣄ꢜꢸꢥꢵꢡ꣄ꢡ ꢦꣁꢞꢾꢱ꣄ ꣎ ꢡꢿ ꢱꢶꢫꢾ ꢙꢾꢥꢸꢭ꣄ꢥꢸ ꢱꣁꢥ꣄ꢡꣂꢰꢸꢪ꣄ ꢤꢸꢪ꣄ꢒꢶꢫꢵꢱ꣄ ꣎ ꢱꢥ꣄ꢫꢵꢱꢶ ꢂꢮꢾ ꢮꢿꢳꣁ ꢂꢮ꣄ꢬꢾ ꢔꢵꢪꢸꢒ꣄ ꢗꣂꢜ꣄ ꢮꢿꢳ꣄ ꢑꢞꢶꢫꣁ ꢪꢾꢥꢶ ꢱꣁꢥ꣄ꢡꣂꢰ꣄ ꢦꣁꢞ꣄ꢫꢵꢱ꣄ ꣎ ꢱꢥ꣄ꢫꢵꢱꢶꢒ꣄ ꢕꢾꢥꢪ꣄ ꢒꢾꢬ꣄ꢫꢵꢱ꣄ ꣏ ꢲꣁꢫꢾꢡꢶ ꢡꢾꢥꢵꢭꢶꢬꢵꢪꣁ ꢪꢵꢡ꣄ꢬꢪ꣄ ꢙꢾꢥꢸꢭ꣄ꢥꢸ ꢱꢥ꣄ꢫꢵꢱꢶꢒ꣄ ꢕꢾꢥꢪ꣄ ꢒꢾꢬꢶ ꢮꢡ꣄ꢡꢵꢥ꣄ ꢒꢾꢬꢬꢶꢫꣁ ꢪꢵꢥ꣄ꢣꢸꢬ꣄ ꢎꢒꢶꢭꢶꢫꢾꢱ꣄ ꣎ ꢱꢥ꣄ꢫꢵꢱꢶ ꢂꢮꢾ ꢲꢵꢭ꣄ ꢦꣁꢮ꣄ꢱ꣄ ꢦꣁꢞꢾꢫꣁ ꢪꢾꢥꢶ ꢪꢾꢥꢬꢶꢫꣁ ꢮꢡ꣄ꢡꣁ ꢂꢱ꣄ꢒꢶ ꢗꣁꢞ꣄ꢞꢮꢡ꣄ꢡꣁ  ꣎ ꢒꣃꢳꣁ ꢨꢶꢱꢸꢥꢵꢡꢶꢡ꣄ꢒ꣄ꢒꢵꢪ꣄ ꢡꢵꢳꢸꢦꣁꢳ꣄ꢳꣁ ꢦꣁꢞꢾ ꢓꢾꢥꢶ ꢱꣁꢒꢥ꣄ ꢯꢿ ꢌꢭ꣄ꢭꢾ ꢪꢾꢥꢶ ꢔꢿꢭꢶ ꢒꢾꢬꢶ ꢲꢵꢱ꣄ꢫꢪ꣄ ꢒꢾꢬꢾꢱ꣄ ꣎  ꢍ ꢎꢒ꣄ꢒꢾ ꢂꢱ꣄ꢒꢶꢥ꣄ ꢂꢱꢶꢫꢵꢱ꣄ ꣎ ꢂꢦꢸꢭ꣄ ꢩꢵꢮ꣄ ꢙꢥ꣄ꢥꢵꢡ꣄ꢡ ꢡꢾꢥꢵꢭꢶꢬꢵꢪꢸꢒ꣄ ꢱꢾꢫ꣄ ꢱꢥ꣄ꢫꢵꢱꢶ ꢬꢵꢒ꣄ ꢂꢥ꣄ꢭꢸꢥꢵꢡ꣄ꢡ ꢡꢾꢥꢸ ꢂꢱꢶꢭꢶ ꢥꢥ꣄ꢣ꣄ꢫꢵꢱ꣄ ꣏  ꢧꢭ꣄ꢗꣁ ꢂꢦꢸꢭ꣄ ꢂꢥ꣄ꢡꢶꢪꢒꢵꢭꢪ꣄ ꢙꢥ꣄ꢭꢶꢫꢾ ꢱꢥ꣄ꢫꢵꢱꢶ ꢂꢦꢸꢭ꣄ ꢱꢶꢒ꣄ꢒꢾ ꢪꢥ꣄ꢡ꣄ꢬ ꢮꢶꢣ꣄ꢫꢵꢥꢱ꣄ꢒꢶ ꢏꢙꢥꢵꢒ꣄ ꢱꢶꢒ꣄ꢒꢞꢶ ꢣꢾꢥꣁ ꢪꢾꢥꢶ ꢲꢮ꣄ꢜꢶꢭꢶꢫꢵꢱ꣄ ꣎