ꢒꢸꢦ꣄ꢦꢸꢱꢵꢪ꣄: ꢒꢵꢫ꣄ ꢲꢳ꣄ꢔꢾꢱꢵꢪ꣄ ꢣꢵꢥꢸ, ꢱꣃꢬ꣄ꢫꢪ꣄ꢫꢵ ?
ꢲꢳ꣄ꢔꢾꢱꢵꢪ꣄: ꢚꢸꢒ꣄ꢒꢸ ꢱꣃꢬ꣄ꢫꢪꢸꢱ꣄ ꣎ ꢡꣁꢦ꣄ꢦꢭ꣄ ꢡꢶꢥ꣄ꢥꢵꢳ꣄ ꢦꢞꢪꢸꢥ꣄ ꢂꢱ꣄ꢒꢶ ꢱꢶꢫꢵꢱ꣄ꢫꢵ ? ꢒꣂꢥꢒ꣄ ꢲꣁꢡꢾꢱ꣄ ?
ꢒꢸꢦ꣄ꢦꢸꢱꢵꢪ꣄: ꢪꢣꢸꢬꢾꢪ꣄ ꣒꣐꣒꣒ ꢙꢥꢮꢬꢶ ꣑꣘ ꢡꢿꢡꢶꢪ꣄ ꢡꣁꢦ꣄ꢦꢭ꣄ ꢡꢶꢥ꣄ꢥꢵꢳ꣄ ꢗꢭꢾ ꢮꢶꢮꢬ꣄ ꢡꢸꢬ ꢦꢞꢸꢪꢸꢥ꣄ ꢱꢾꢖ꣄ꢔꢵꢞꢶ ꢯꢷꢡꢶ ꢚꢸꢒ꣄ꢒꢸ ꢱꣁꢥ꣄ꢡꣂꢰ꣄ ꢦꣁꢞꢾꢱ꣄ ꣎ ꢫꢾꢭ꣄ꢭꢾ ꢡꢶꢥ꣄ꢥꢵꢳꢸꢪ꣄ ꢂꢮ꣄ꢬꢾ ꢱꣃꢬꢵꢰ꣄ꢜ꣄ꢬ ꢙꢾꢥꢸꢭꢸ ꢪꢸꢣꢸꢭ꣄ ꢙꢾꢡꣁ ꢙꢾꢡꣁꢒꢥ꣄ ꢗꢾꢬꢶ ꢙꢵꢥ꣄ ꣎ ꢤꢾꢛꢶ ꢦꢥꢶ ꢂꢱ꣄ꢒꢶ ꢱꣁꢞꢥ꣄ ꣎ ꢭꢾꢔꢸꢡ꣄ꢡ ꢯꢿꢡ꣄ꢡꢾ ꢂꢮ꣄ꢬꢾ ꢱꣃꢬꢵꢰ꣄ꢜ꣄ꢬ ꢒ꣄ꢭꢨ꣄ꢨꢸꢪ꣄ ꢪꢴꣁꢜ꣄ꢜꣁ ꢪꢴꣁꢜ꣄ꢜꣁ ꢙꢾꢖ꣄ꢒꢳꢪ꣄ ꢡꢫ꣄ꢭꢶ ꢨꢶꢱꢶ , ꢬꢵꢡꢶ ꢮꢿꢳ꣄ ꢂꢪ꣄ꢨꢜ꣄ ꢩꢵꢡ꣄ , ꢭꢶꢪ꣄ꢨꢸ ꢦꣁꢖ꣄ꢔꢭ꣄ , ꢤꢾꢛꢶꢪ꣄ ꢦꣁꢖ꣄ꢔꢭ꣄ ꢓꢫꢾꢫꣁ ꢂꢖ꣄ꢔꢸꢥ꣄ ꢲꢮ꣄ꢜꢥ꣄ ꢯꢿ ꣎
ꢲꢳ꣄ꢔꢾꢱꢵꢪ꣄: ꢲꢵꢫ꣄, ꢲꢵꢫ꣄ , ꢒꣂꢥꢒ꣄ ꢡꢾꢭ꣄ꢭꢾ ꢲꢮ꣄ꢜꢥ꣄ ꢙꢵꢫ꣄ ?
ꢒꢸꢦ꣄ꢦꢸꢱꢵꢪ꣄: ꢂꢡ꣄ꢡ ꢒꢭꢪ꣄ꢪꢸ ꢂꢮ꣄ꢬꢾ ꢪꢾꢥ꣄ꢒ꣄ꢫꢵꢥ꣄ ꢚꢸꢒ꣄ꢒꢸ ꢡꢾꢥꢸ ꢌꢭ꣄ꢭꢾ ꢡꢶꢥ꣄ꢥꢵꢳꢸꢒ꣄ ꢂꢱ꣄ꢒꢶ ꢙꢵꢬ꣄ꢫꢵꢱ꣄ꢫꢵ ꢪꢾꢥꢡ꣄ꢡꢾ ꢒꢳꢵꢬꢥꢶ ꣎ ꢬꢸꢮ꣄ꢮꣁ ꢮꢶꢮꢬ꣄ꢒꢥ꣄ ꢱꢖ꣄ꢔꢸꢮꣂ ꣎ ꢂꢪꢶ ꢒꢳꢳ꣄ꢳꢸꢮꢿꢱ꣄ ꣎
ꢲꢳ꣄ꢔꢾꢱꢵꢪ꣄: ꢒꢸꢦ꣄ꢦꢸꢱꢵꢪ꣄ ꢣꢵꢥꢸ, ꢡꢸꢪꢶ ꢱꢖ꣄ꢔꢬꢶꢫꣁ ꢬꢴꢡ꣄ꢡ ꢮꢡ꣄ꢡꣁ ꣎ ꢂꢮ꣄ꢬꢾ ꢪꢾꢥ꣄ꢒ꣄ꢫꢵꢥ꣄ ꢡꢶꢥ꣄ꢥꢵꢳꢸꢒ꣄ ꢂꢱ꣄ꢒꢶ ꢙꢵꢡ꣄ꢡꢾ ꢚꢸꢒ꣄ꢒꢸ ꢆꢥ꣄ꢥꣁ ꢦꣁꢞ꣄ꢭꢿꢡ꣄ ꢂꢮ꣄ꢞꢬꢿꢱ꣄ ꣎ ꢕꣁꢪ꣄ꢪꣁ ꢨꢶꢱꢶꢒꢶꢥ꣄ ꢂꢫ꣄ꢫꢵꢥ꣄ ꢂꢪ꣄ꢪꢵꢥ꣄ ꢂꢱ꣄ꢒꢶ ꢜꢷ ꢮꢷ ꢱꢵꢡ꣄ꢡꢾꢪꢵꢪꢹꢱ꣄ ꢕꣁꢬꢪ꣄ꢒꢥ꣄ ꢯꢿ ꣎
ꢒꢸꢦ꣄ꢦꢸꢱꢵꢪ꣄: ꢲꢵꢫ꣄ ꢮꢿꢫ꣄ , “ꢒꣂꢭꢖ꣄ꢔꢭ꣄” ꢪꢾꢥꢶ “ꢒꢵꢭꢖ꣄ꢔꢭ꣄” ꢪꢾꢥꢶ ꢮꢷꢳ꣄ꢜꣁ ꢲꣁꢫ꣄ꢫꣁ ꢪꢾꢥꢡꢶ ꢜꢷ ꢮꢷ ꢱꣁꢪ꣄ꢪꢬ꣄ ꢨꢶꢱꢶ ꢣꣁꢳꣁ ꢪꢶꢱ꣄ꢒꢸꢥꢵꢡ꣄ꢡꢒ꣄ ꢱꢷꢒꢶꢥ꣄ ꢣꢶꢥ꣄ꢥꢸ ꢔꢪ꣄ꢞꢥ꣄ ꣎ ꢦꢸꢱꢡꢶ “ꢣꢿꢮ ꢂꢱ꣄ꢒꢶ ꢂꢮ꣄ꢬꢾ ꢪꣁꢥ꣄ꢥꢸꢪꢸꢪ꣄ ꢯꢿꢡ꣄ꢡꢾ ꢩꢮꢵ” ꢪꢾꢥꢶ ꢮ꣄ꢫꢵꢓ꣄ꢫꢵꢥ꣄ ꢱꢖ꣄ꢔꢥ꣄ ꣎ ꢡꢸꢪꢶ ꢱꢖ꣄ꢔꢸꢮꣁ ꢣꢵꢥꢸ, ꢡꢶꢥ꣄ꢥꢵꢳ꣄ ꢒꣂꢥꢒ꣄ ꢭꢔꢾꢱ꣄ ꢪꢾꢥꢶꢒꢶꢥ꣄ ꣎
ꢲꢳ꣄ꢔꢾꢱꢵꢪ꣄: ꢡꢾꢥ꣄ꢣꢣꢹꢱ꣄ ꢣꢶꢥ꣄ꢥꢸꢪ꣄ ꢨꣁꢠ꣄ꢞꢹꢬꢸꢪ꣄ ꢯꢿꢡ꣄ꢡꢾ ꢪꣁꢬ꣄ ꢱꢳꢶ ꢙꣁꢪꢥ꣄ ꢨꣁꢮꢾ ꢲꢵꢭ꣄ ꢡꢾꢭ꣄ꢭꢾ ꢦꣁꢒ꣄ꢒꢜ꣄ ꢙꢥꣁ ꢲꣁꢫ꣄ꢫꣁ ꣎
ꢒꢸꢦ꣄ꢦꢸꢱꢵꢪ꣄: ꢃꢔ ꢡꢶꢥ꣄ꢥꢵꢳꢸꢒ꣄ ꢣꢿꢮꢸ ꢦꢵꢫꢶꢛ꣄ ꢦꣁꢞꢡ꣄ꢡꢒ꣄ ꢪꢾꢥꢶ ꢙꢶꢫꢾꢫꣁ ꢥꢴꢵꢫꢵ ? ꢙꣁꢪꢥ꣄ ꢲꢵꢭ꣄ ꢡꢾꢖ꣄ꢔꢸꢜ꣄ ꢙꢷ ꢲꣁꢡꢾꢫꢾ ꢔꢵ ?
ꢲꢳ꣄ꢔꢾꢱꢵꢪ꣄: ( ꢬꢵꢒ꣄ ꢂꢮꢳ꣄ꢳꢶ ) ꢌꢭ꣄ꢭꢾ ꢗꢶꢮ꣄ꢞꢵꢭ꣄ ꢮꢡ꣄ꢡꢥ꣄ ꢒꢾꢬ꣄ꢫꢵꢱ꣄ ꢪꢾꢥꢾꢡꢶ , ꢪꣁꢬ ꢦꢵꢜꢸꢒ꣄ ꢪꣁꢬ꣄ ꢒꢵꢪ꣄ ꢱꢷꢭꢶ ꢙꢶꢭꢿꢡ꣄ ꢬꢴꢮꢸ ꣎
ꢒꢸꢦ꣄ꢦꢸꢱꢵꢪ꣄: ꢮꢾꢔ ꢣꢵꢥꢸ, ꢏꢠ꣄ꢜꢾ ꢮꢡ꣄ꢡꢵꢒ꣄ ꢦꢸꢱꢾꢫꣂ ꣎ ꢡꢸꢪꢶ ꢡꢶꢥ꣄ꢥꢵꢳꢸꢪ꣄ ꢗꢭꢾ ꢮꢶꢮꢬ꣄ꢥꢸ ꢱꢖ꣄ꢔꢸꢮꣂ ꣎
ꢲꢳ꣄ꢔꢾꢱꢵꢪ꣄: ( ꢬꢸꢮ꣄ꢮꣁ ꢯꢵꢥ꣄ꢡꢶ ꢒꢾꢬ꣄ꢭꢶ ) ꢡꢶꢥ꣄ꢥꢵꢳ꣄ ꢡꢾꢥ꣄ꢣꢹꢱ꣄ ꢪꣁꢬ꣄ ꢏꢳ꣄ꢞꢸ ꢱꣁꢱꢸꢬꢵ ꢨꢾꢞꢵꢒꢸ ꢱꢳꢵꢒ꣄ ꢕꣁꢪ꣄ꢪꣁ, ꢡꢾꢖ꣄ꢒ ꢣꢶꢮ ꢨꢾꢜꢶ ꢲꣁꢬꢵꢞꢸꢒ꣄ ꢙꢶ ꢲꣁꢡꢾꢫꣁ ꣎ ꢡꢿꢜ꣄ ꢂꢮ꣄ꢬꢶꢫꣁ ꢡꢾꢖ꣄ꢒ ꢱꢾꢬꣁ ꢮꢡ꣄ꢡ ꢒꢾꢬ꣄ꢡꢶ ꢨꣂꢠ꣄ꢞꢹꢬ꣄ ꢙꢶ ꢔꢸꢳ꣄ꢳꢾꢫꣁ ꢡꢶꢒ꣄ꢒꢾꢫꣁ ꢮꢷꢳ꣄ꢜꣁꢒꢶꢥ꣄ , ꢬꢵꢡꢶꢒ꣄ ꢂꢪ꣄ꢬꢾ ꢎꢜ꣄ꢜꢪ꣄ ꢂꢪ꣄ꢨꢜ꣄ꢩꢵꢡ꣄ ꢓꣀꢡꢶ ꢡꣁꢦ꣄ꢦꢭ꣄ ꢡꢶꢥ꣄ꢥꢵꢳ꣄ ꢱꢵꢡ꣄ꢡꢒ꣄ ꢥꢶꢔꢸꢳꢾꢫꣂ ꣎
ꢒꢸꢦ꣄ꢦꢸꢱꢵꢪ꣄: ( ꢪꣁꢥ꣄ꢥꢸꢪ꣄ ꢪꢾꢭ꣄ꢭꢬꢶꢫꣁ ) ꢙꢵꢬꢨ꣄ꢨꢵ , ꢐꢠ꣄ꢜꢾ ꢮꢵꢜ꣄ꢒꢥ꣄ ꢂꢮꢾꢫꣁ ꢙꢶꢫꢾꢫꣁ ꢓꢾꢥꢶꢥ꣄ ꢪꢸꢱꢜ꣄ꢜꢶ ꢡꢶꢥ꣄ꢥꢵꢳ꣄ ꢮꢶꢮꢬ꣄ꢥꢸ ꢱꢖ꣄ꢔꢡ꣄ꢡꢒ꣄ ꢲꢬꢸꢪ꣄ꢨꢪ꣄ ꢒꢾꢬ꣄ꢡꢬꢵꢱ꣄ ꣎
ꢲꢳ꣄ꢔꢾꢱꢵꢪ꣄: ꢂꢱꣂꢱ꣄ ꢡꢶꢥ꣄ꢥꢵꢳ꣄ ꢱꢶꢫꢾꢖ꣄ꢔꢾꢥ꣄ ꢪꢾꢥ꣄ꢡꢶ , ꢒꢸꢬꢶꢮꢶꢒꢵꢬꢥ꣄ ꢱꢵꢭꣀ ꢮꢵꢜ꣄ ꢂꢮꢶ ꢡꢶꢒꢶꢗ꣄ꢗꢬ꣄ ꢥꢾꢣ꣄ꢣꢶ ꢒꢾꢜ꣄ꢜꣁ ꢗꢾꢬ꣄ꢪꢵꢥ꣄ ꢯꢿꢡ꣄ꢡꢾ ꢬꣂꢞꢸꢪ꣄ ꢂꢮꢶ ꢂꢥ꣄ꢥꣀ ꢗꢥ꣄ꢣꢶꢬꢪꢡꢶ ꢒꢭ꣄ꢫꢵꢠ ꢪꢲꢵꢭ꣄ ꢱꢾꢥ꣄ꢣꢸꢪ꣄ ꢲꢸꢡ꣄ꢡꢶꢬꢶ ꢱ꣄ꢒꢹꢜ꣄ꢜꢬ꣄ ꢲꢶꢨ꣄ꢨꢶ ꢬꢴꢮꢞꢾꢫꣁ ꣎ ꢡꢿꢜ꣄ꢬꢴꢷ ꢡꢾꢦ꣄ꢦꢒꢸꢳꢪ꣄ ꢙꣁꢮꢭ꣄ ꢪꢹꢔꢵꢪ꣄ ꢥꢾꢱ꣄ꢒꢶꢭꢶ ꢦꢶꢱ꣄ꢒꢶꢭꢶ ꢙꢷ ꢱꢵꢡ꣄ꢡꢾꢮꢿꢳ꣄ ꢗꣁꢮ꣄ꢬꢪ꣄ ꢥꢵꢫꢒꢶ ꢪꢥ꣄ꢣꢶꢬ꣄ ꢮꢾꢣꢹꢬ꣄ ꢂꢮ꣄ꢞ ꢲꣁꢡꢾꢱ꣄ ꣎
ꢒꢸꢦ꣄ꢦꢸꢱꢵꢪ꣄: ꢄꢱꢥꢶꢫꢵ ꢣꢵꢥꢸ, ꢱꢖ꣄ꢔꢸꢮꣂ , ꢱꢖ꣄ꢔꢸꢮꣂ ꣎
ꢂꢖ꣄ꢔꢸꢥ꣄ ꢂꢮꢫꢶ ………
ꢂꢪ꣄ꢪꢥ꣄ ꢂꢱ꣄ꢒꢶ ꢜꢷ ꢮꢷ ꢱꢵꢡ꣄ꢡꢵꢪꢪꢹꢱ꣄ ꢕꣁꢬꢪ꣄ꢒꢥ꣄ ꢯꢿ –> ꢂꢪ꣄ꢪꢵꢥ꣄ ꢂꢱ꣄ꢒꢶ ꢜꢷ.ꢮꢷ. ꢱꢵꢡ꣄ꢡꢾꢪꢵꢪꢹꢱ꣄ ꢕꣁꢬꢪ꣄ ꢒꢥ꣄ ꢯꢿ ꣎
ꢒꣁꢥꢒ꣄ ꢭꢔꢾꢱ꣄ –> ꢒꣂꢥꢒ꣄ ꢭꢔꢾꢱ꣄ ꢪꢾꢥꢡ꣄ꢡꢾ
ꢡꢾꢥ꣄ꢣꢸꢱ꣄ ꢣꢶꢥ꣄ꢥꢪ꣄ –> ꢡꢾꢥ꣄ꢣꢹꢱ꣄ ꢣꢶꢥ꣄ꢥꢸꢪ꣄
ꢨꣁꢠ꣄ꢞꢸꢬꢸꢪ꣄ –> ꢨꣁꢠ꣄ꢞꢹꢬꢸꢪ꣄
ꢙꢶ ꢲꣁꢡꢾꢫꢾꢫꢵ ? –. ꢙꢷ ꢲꣁꢡꢾꢫꣁꢔꢵ?
ꢪꢸꢔꢵꢪ꣄ –> ꢪꢹꢔꢵꢪ꣄
ꢙꢶ –. ꢙꢷ
ꢗꢾꢮꢬꢪ꣄ – ꢗꣁꢮ꣄ꢬꢪ꣄
ꢤꢥ꣄ꢥꢸ ꣎ ꢂꢱ꣄ꢒꢶ ꢪꢥ꣄ꢡꢸꢥ꣄ ꢱꢾꢬ꣄ꢒꣁ ꢒꢾꢬ꣄ꢡꢶꢬꢶꢫꣁ ꣎