ꢪꢡꢶ ꢩꣁꢬꢾ ꢂꢪꢵꢡ꣄ꢫꣁ

ꢦꢹꢬꢸꢪ꣄ ꢮꢶꢙꢫꢥꢔꢬꢶ ꢪꢾꢥꢶ ꢫꣂꢒ꣄ ꢬꢵꢰ꣄ꢜ꣄ꢬꢸ ꢲꣁꢡꢾꢱ꣄ ꣎ ꢒꢺꢰ꣄ꢠꢣꢿꢮꢬꢵꢫꢸ ꢪꢾꢥꢱ꣄ꢡꢾ ꢬꢙꣁ ꢡ꣄ꢫꢾ ꢬꢵꢰ꣄ꢜ꣄ꢬꢸ ꢬꢵꢙ꣄ꢙꢶ ꢒꢾꢬ꣄ꢭꢿꢡꢸ ꢲꣁꢡꢾꢱ꣄ ꣎ ꢡ꣄ꢫꢾ ꢬꢙꢵꢒꢸ ꢨꢵꢦꢸꢙꢷ ꢪꢾꢥꢶ ꢫꣂꢒ꣄ ꢂꢪꢵꢡ꣄ꢫꣁ ꢲꣁꢡꢾꢱ꣄ ꣎ ꢨꢵꢦꢸꢙꢷ ꢲꣂꢬ꣄ ꢬꢙꢵꢒꢸ ꢦ꣄ꢬꢿꢮꢸ ꢮꢿꢥ꣄ ꣎ ꢬꢙꢵꢒꢸ ꢚꢸꢒꢸ ꢏꢱ꣄ꢡꢸꢥ꣄ ꢲꣁꢡ꣄ꢫꢵꢱ꣄ ꣎ ꢡꢾꢪꢵꢪ꣄ ꢚꢸꢒ꣄ꢒꢸ ꢡꢾꢥꢸ ꢪꢴꢸꢞꢵꢥ꣄ꢒꢥꢶ ꢲꣁꢡ꣄ꢫꢵꢱ꣄ ꣎ ꢡꢾꢪꢵꢪ꣄ ꢬꢠꢶ ꢩꣀ ꢏꢙꢥꣁ ꣎ ꢬꢠꢶꢒꢸ ꢂꢦꢸꢭ꣄ ꢩꣀ ꢂꢪꢵꢡ꣄ꢫꣁꢒꢥꢶ ꢬꢴꢥꣁ ꢪꢾꢥꢶ ꢫꣂꢒ꣄ ꢂꢱ꣄ꢡꣁ ꢲꣁꢡꢾꢱ꣄ ꣎

ꢏꢠ꣄ꢜꢾꢣꢶ ꢬꢙꣁ ꢂꢭꢔ꣄ꢔꣁꢒꢥꢶ ꢆꢣ꣄ꢫꢵꢥꢸꢪ꣄ ꢂꢦꢸꢭ꣄ ꢲꢵꢡꢸꢪ꣄ ꢦꢶꢭ꣄ꢭꣁ ꢱꢾꢥ꣄ꢡꣁ ꢓꢳ꣄ꢳꢿꢡꢸ ꢲꣁꢡꢾꢱ꣄ ꣎ ꢢꢾꢨ꣄ꢨꣁ ꢬꢠꢶ ꢂꢮꢶꢒꢶꢥ꣄ ꢬꢙꣁ ꢙꣁꢮꢳ꣄ “ꢱ꣄ꢮꢵꢪꢶ ! ꢪꣁꢬꣁ ꢩꣀ ꢗꣁꢒ꣄ꢒꢜ꣄ ꢪꢡꢶꢮꢵꢥꢸꢱ꣄ ꢥꢵ ! ꢡꢾꢒꣁ ꢒꢒꣁ ꢡꢸꢪꢶ ꢂꢪꢵꢡ꣄ꢫꣁꢒꢥꢶ ꢢꣁꢮ꣄ꢭꢥ꣄ ꢲꣂꢥꢵ?” ꢪꢾꢥꢶ ꢦꢸꢱꢶꢱ꣄ ꣎ ꢌꢭ꣄ꢫꢾꢒꣁ ꢬꢙꣁ ꢙꢾꢮꢵꢦ꣄ ꢒꣁꢥ꣄ꢥꢶ ꢒꢾꢬ꣄ꢥꢵꢱ꣄ꢡꢒꢸ ꢂꢦꢸꢭ꣄ ꢥꢴꢸꢬꢸ ꢱꢾꢥ꣄ꢡꣁ ꢓꢳ꣄ꢳꢿꢡ꣄ ꢲꣁꢡꢾꢱ꣄ ꣎ ꢥꢴꢸꢬꢸ ꢂꢦꢸꢭ꣄ ꢒꣁꢪ꣄ꢨꢸꢳꣁ ꢦꢵꢛꢶꢥ꣄ ꢲꢵꢭ꣄ ꢬꢙꢵ ꢲꢿꢪ꣄ꢪꢸ ꢭꢡꢶꢭꢡꢶ ꢓꢳꢾꢱ꣄ ꣎

ꢢꢾꢮ꣄ꢞꣁ ꢕꢾꢞꢶ ꢧꢬꢵꢡꢸ ꢨꢵꢦꢸꢙꢷꢒꢶꢥ꣄ ꢬꢠꢶ ꢩꣀ ꢬꢙꢵꢒꢸ ꢣꢾꢒ꣄ꢒꢱ꣄ꢡꢒꢸ ꢂꢮ꣄ꢫꢵꢱ꣄ ꣎ ꢬꢙꣁ  ꢏꢒ꣄ꢒꣁꢒ꣄ꢒꣁ ꢡꢾꢒꣁ ꢣꢾꢒ꣄ꢒꢶ ꢮꢡ꣄ꢡꣁ ꢒꢾꢬ꣄ꢫꢵꢱ꣄ ꣎ ꢧꣀꢭꣁꢒꢥꢶ ꢬꢠꢶꢒꢸ ꢩꣀ ꢲꣁꢫꢾꢱ꣄ꢡꢾꢒꣁ ꢨꣁꢮꢶ ꢮꢡ꣄ꢡꣁ ꢒꢾꢬꢱ꣄ ꢄꢱꣁ “ꢪꣁꢬꣁ ꢲꢿꢪꢸꢬ꣄ ꢭꢡꢾꢱ꣄ꢡꢾꢒꣁ ꢒꢵꢫ꣄ ꢣꢠ꣄ꢞꢥꣁ ꢣꢾꢮ꣄ꢮꢵꢫ꣄ ? ꢪꢾꢥꢶ ꢬꢙꣁ ꢦꢸꢱ꣄ꢡꣁ.. ꢒꣁꢥ꣄ꢥꢶ ꢗꢶꢥ꣄ꢡꢥꣁ ꢒꢾꢬ꣄ꢥꢵꢱ꣄ꢡꢒꢸ “ ꢡꢸꢪ꣄ꢒꣁ ꢭꢡꢾꢱ꣄ꢡꢾꢒꣁ ꢤꢾꢬꢶ ꢡꢾꢒꢵ ꢣꢷ ꢦꢵꢛꢶꢥ꣄ ꢗꢾꢒ꣄ꢒꢶ ꢒꢸꢜ꣄ꢒꣁ ꢒꢾꢬ꣄ꢡꢸꢮꢵꢫ꣄” ꢌꢭ꣄ꢭꢾ ꢣꢠ꣄ꢞꢥꣁ ꢣꢾꢮ꣄ꢮꢵꢫ꣄ ꢪꢾꢥꢶ ꢱꢖ꣄ꢔꢾꢱ꣄ ꣎

ꢧꢭ꣄ꢗꣁ ꢨꢵꢦꢸꢙꢷꢒꢸ ꢨꣁꢮꢶ “ ꢪꣁꢒꣁ ꢭꢡꢾꢱ꣄ꢡꢾꢒꣁ ꢒꢵꢫ꣄ ꢣꢠ꣄ꢞꢥꣁ ꢣꢾꢮ꣄ꢮꢵꢫ꣄” ꢪꢾꢥꢶ ꢦꢸꢱꢾꢱ꣄ ꢬꢙꣁ ꣎ ꢌꢭ꣄ꢭꢾꢒꣁ ꢨꢵꢦꢸꢙꢷ ꢲꢱꢶꢭꢿꢡ꣄ꢒꢥꢶ “ ꢬꢙꢵ ꢲꢿꢪꢸꢬ꣄ ꢭꢡꢱ꣄ꢡꢒꢸ ꢒꣁꢖ꣄ꢒꣁꢒꢸ ꢯꢒ꣄ꢡꢶ ꢯꢿ ! ꢡꢸꢪ꣄ꢬꢾ ꢥꢴꢸꢬꢸꢒꢸ ꢡ꣄ꢫꢾ ꢯꢒ꣄ꢡꢶ ꢯꢿ ! ꢡꢾꢒꢵ ꢒꣁꢪ꣄ꢨꢸꢳꣁ ꢦꢵꢛꢶꢥꢸꢒꢸ ꢱꣁꢥ꣄ꢥꢵꢪꢸ ꢨꢶꢥ꣄ꢣꢸꢭꣁ ꢒꢾꢬꢶ ꢕꢭꢶ ꢡ꣄ꢫꢾ ꢦꢵꢛꢶꢒꢸ ꢗꢸꢪ꣄ꢦꢡ꣄ꢡꢿꢱ꣄ ꢡꢾꢒ ꢣꢿꢬꢶꢫꣁ ꢣꢠ꣄ꢞꢥꣁ” ꢪꢾꢥꢶ ꢨꢵꢦꢸꢙꢷ ꢱꢖ꣄ꢔꢾꢱ꣄ ꣎

ꢧꢭ꣄ꢗꣁ ꢨꢵꢦꢸꢙꢷꢒꢶꢥ꣄ ꢬꢠꢶ ꢩꣀ ꢥꢶꢒꢶꢳꢶ ꢙꢶꢫꢾ ꢧꢬꢵꢡꢸ ꢬꢙꣁ ꢬꢠꢶꢒꢸ ꢯꢾꢫ꣄ꢥꢸ “ꢂꢡ꣄ꢡꣁ ꢡꢹ ꢒꢵꢫ꣄ ꢪꢾꢥꢱ꣄ ? ꢡꣁꢬꣁ ꢩꣀ ꢱꢖ꣄ꢔꢾ ꢤꢵꢥꢸꢒꢸ ꢥꢴꢸꢬꢸ ꢦꢵꢛꢶꢥ꣄ ꢲꢾꢜ꣄ꢜꢶꢫꢾꢥ꣄ꢒꢷ ? ꢥꢴꢷ ꢨꢵꢦꢸꢙꢷ ꢱꢖ꣄ꢔꢾ ꢤꢵꢥꢸ ꢱꣁꢥ꣄ꢥꢵꢪ꣄ ꢨꢶꢥ꣄ꢣꢸꢭꣁ ꢒꢾꢬꢶ ꢕꢭꢶ ꢗꢸꢪ꣄ꢦꢾꢥ꣄ ?” ꢪꢾꢥꢶ ꢦꢸꢱꢶꢫꢵꢱ꣄ ꣎ ꢬꢠꢶ ꢮꢶꢗꢵꢬ꣄ꢒꢥꢶ ꢣꣁꢱ꣄ꢒꣁ ꢏꢖ꣄ꢔꢶꢭꢶ ꢙꢾꢮꢵꢦ꣄ ꢒꣁꢥ꣄ꢥꢶ ꢒꢾꢬ꣄ꢥꢵꢱ꣄ꢡꢒꢸ ꢲꢶꢨ꣄ꢨꢶ ꢲꣁꢡꢶꢱ꣄ ꣎ ꢡꢾꢥ꣄ꢣꢸꢱ꣄ ꢬꢴꢷ ꢬꢠꢶ ꢂꢦꢸꢭ꣄ ꢪꣁꢥ꣄ꢥꢸ ꢪꢬ꣄ꢗꢶꢭꢶ ꢱꣁꢥ꣄ꢡꢸꢒꢥꢶ ꢙꢶꢮꢶꢱ꣄ ꣏