ꢍꢒꢥꢵꢢ꣄ꢒꢶꢥ꣄ ꢩꢭ꣄ꢭꢸ ꢓꢾꢥꢶ – ꣒

ꢲꢷꢞꢮꢥ꣄ ꢧꣀꢭꢵꢪꢸꢱ꣄ ꢒꢨꢥ꣄ꢣꢸꢒꢥ꣄ ꢬꢴꢷꢭꢱ꣄ꢡꢾ ꢗꣁꢒ꣄ꢒꢞ꣄ ꣎  ꢡꣁꢬ꣄ ꢗꣁꢒ꣄ꢒꢞꢸꢒ꣄ ꢪꢷ ꢏꢠ꣄ꢜꢾ ꢮꢡ꣄ꢡ ꢱꢖ꣄ꢔꢸꢱ꣄ ꢎꢒꢷ ! ꢂꢡ꣄ꢡꣂꢱ꣄ ꢄꢫꢾ ꢩꢭ꣄ꢭꢸꢒ꣄ ꢓꢵꢭ꣄ ꢣꣁꢨ꣄ꢨꢶ ꢱꣂꢞꢶ ꣎ ꢩꢭ꣄ꢭꢸꢒ꣄ ꢓꣀꢡꢶ ꢪꢷ ꢙꢮꢸꢱꢸ ꣎ ꢪꣁꢒꣂ ꢩꢹꢒꢠ꣄ꢗꢵꢫ꣄ ꢡꣁꢒꣁ ꢤꢵꢒ꣄ ꢙꢵꢫ꣄ ꢪꢾꢥꢶ ꢪꢫꢵꢭ꣄ꢒꢥ꣄ ꢮꢗꢾꢱ꣄ ꢮꢵꢔ꣄ ꣎ ꢮꢵꢔꢸ ꢮꢵꢗꣀꢒ꣄ꢒꢾ ꢍꢒꢥꢵꢢ꣄ ꢒꢶꢛ꣄ꢗꢶꢡ꣄ ꢱꢿꢬꢸ ꢪꢾꢳ꣄ꢳꣁ ꢧꢭ꣄ꢗꣁ ꢒꢵꢫ꣄ ꢲꣂꢫ꣄ ꢪꢾꢥꢶ ꢲꢮ꣄ꢜꢶ ꢱꢵꢥꢵꢱ꣄ꢡ ꢯꢵꢒꢵꢪ꣄ ꢥꢶꢛ꣄ꢙꢶ ꢲꣁꢣꢾ ꢩꢭ꣄ꢭꢸꢒ꣄ ꢍꢒꢥꢵꢢ꣄ ꢣꣁꢨ꣄ꢨꢶ ꢱꣁꢞꢾꢱꢶ ꣎

ꢲꣁꢫꢾꢡꢶ ꢨꢸꢣ꣄ꢤꢶꢱꢵꢭꢶ ꢩꢭ꣄ꢭꢸ ꢥꢶꢛ꣄ꢙꢸꢥꢵꢱ꣄ꢡꢒ꣄ ꢮꢵꢔ꣄ꢒꢶꢥ꣄ ꢍꢒꢥꢵꢢ꣄ ꢒꢬꢾ ꢮꢡ꣄ꢡꢵꢥꣀꢒ꣄ꢒꢶꢭꢿꢡꢸ ꢬꢴꢷ ꢍꢒꢥꢵꢢ꣄ ꢣꣁꢨ꣄ꢨꢶ ꢱꣁꢞ꣄ꢠꢵꢱ꣄ꢡꢶꢡ꣄ꢒꢵꢪ꣄ ꢩꢭ꣄ꢭꢸ ꢣꢸꢱ ꢏꢠ꣄ꢜꢾ ꢯꢵꢒꣁ ꢤꢾꢬ꣄ꢭꢶ ꢆꢛ꣄ꢗ ꢲꢶꢖ꣄ꢔꢶ ꢬꢙꢵꢨꢾꢜ ꢭꢾꢒ꣄ꢡ ꢂꢮꢾꢱꢶ ꣎ ꢡ꣄ꢫꢾ ꢱꢶꢫꢾ ꢍꢒꢥꢵꢢ꣄ ꢩꢭ꣄ꢭꢸꢒ꣄ ꢱꢷ ꢤꢒ꣄ꢒꢶ ꢏꢠ꣄ꢔꢾꢱꢶ ꣎ ꢓꢭ꣄ꢭꣁ ꢨꢶꢱꢶ ꢲꣁꢣꢾ ꢮꢵꢔ꣄ ꢤꢪꢵꢤꢵꢪ꣄ꢒꢥ꣄ ꢤꢪꢶ ꢙꢶꢫꢾꢱꢶ ꣎ ꢩꢭ꣄ꢭꢸ ꢍꢒꢥꢵꢢꢸꢒ꣄ ꢱꢷ ꢮꢶꢱ꣄ꢮꢵꢱ꣄ ꢥꢴꢷꢱ꣄ꢡ ꢪꢾꢥꢶꢒꢸ ꢙꢾꢭꢸꢪ꣄ ꢍꢒꢥꢵꢢꢵ ! ꢤꢒ꣄ꢒꢸꢥꢒꣁ ! ꢮꢵꢔ꣄ ꢙꣁꢮꢳ꣄ ꢬꢴꢷ ꢒꢨꢥ꣄ꢡꢸ ꢒꢾꢬꢾ ꢪꣁꢒꣂꢱ꣄ ꢡꢹ ꢮꢵꢔ꣄ ꢙꣁꢮꢳ꣄ ꢣꣁꢨ꣄ꢨꢶ ꢱꣁꢞꢶ ꢲꢥꢥ꣄ ꢱꢶꢫꢾꢱ꣄ ꢥꢵ ꣎ 

ꢮꢶꢱ꣄ꢮꢵꢱ꣄ ꢮꢶꢱꢸꢬꢳ꣄ꢳꢱ꣄ꢡꢾ ꢪꢲꢵ ꢦꢵꢦ꣄ ꣎  ꢒꣀ ꢤꢬ꣄ꢪ ꢱꢵꢱ꣄ꢡꢬ꣄ꢥꢸꢪ꣄ ꢌꢒ ꢦꢬꢶꢲꢵꢬ꣄ ꢙꢸꢠ꣄ꢠ ꣎  ꢒꣂꢥ꣄ ꢡꢷꢬ꣄ꢡꢸꢥꢸꢪ꣄ ꢨꢸꢞꢾꢡ꣄ꢒꢵꢫ꣄ ꢦꢵꢦ꣄ ꢤꢸꢮꢵꢥꢵ ꣎ ꢪꢷ ꢡꣁꢒꣁ ꢒꣀ ꢒꢾꢬ꣄ꢥꢵ ꣎ ꢍꢭꢵ ꢱꢸꢬꢶꢡ꣄ ꢂꢒꢵꢱꢸꢛ꣄ꢗꣁ ꢑꢞꢶꢫꣁ ꣎  ꢡꢹ ꢤꢵꢒ꣄ ꢥꢴꢷꢱ꣄ꢡꢒ꣄ ꢓꢵꢭ꣄ ꢲꢸꢡ꣄ꢡꢶꢬꢶ ꢔꢵꢪ꣄ ꢱꢷ ꢙꢵ ꣎ ꢡꢹ ꢒꢬꢾ ꢦꢵꢦꢸꢒ꣄ ꢡꣁꢒꣁ ꢦꢶꢱ ꢤꢾꢬ꣄ꢙꢵꢫꢶ ꣎ ꢱꢹ ꢱꢹ ꢪꢾꢥ꣄ ꢪꢾꢭ꣄ꢭꢿꢡ꣄ ꢲꢶꢠ꣄ꢞꣀꢫꢶ ꢪꢾꢥꢶ ꢬꢙꢵ ꢨꢾꢜꢵꢒ꣄ ꢙꢷ ꢩꢭ꣄ꢭꢸ ꢬꢵꢠ꣄ꢙꢡꣁ ꢙꢶꢫꢾꢱ꣄ ꣎ ꢍꢒꢥꢵꢢ꣄ ꢚꢵꢞ꣄ ꢱꣁꢞꢶ ꢲꢸꢡꢶꢬꢾꢱ꣄ ꣎ ꢡꢷꢱꣂꢱ꣄  ꢍꢒꢥꢵꢢ꣄ ꢚꢵꢞ꣄ ꢱꣁꢞꢶ ꢲꢸꢡ꣄ꢡꢸꢬꢾ ꢕꢾꢞꢶꢪ꣄ ꢦꢶꢱ ꢤꢾꢬ꣄ꢙꣁ ꣎ ꢱꢹ ꢱꢹ ꢪꢾꢥ꣄ꢭꢿꢡ꣄ ꢬꢵꢠꢸꢪ꣄ ꢡꢠꣁ ꢡꢔꢶꢭꢿꢡ꣄ ꢲꢶꢠ꣄ꢞꢾꢱ꣄ ꣎

ꢪꢺꢔꢸꢥꢸꢒ꣄ ꢲꢥꢱ꣄ꢡ ꢙꢶꢫꢾ ꢨꢾꢜꣁ ꢂꢖ꣄ꢔꢸꢥꢸꢒꢸ ꢕꢿꢬꣃꢬꢥꢶ ꢥꢵ ꢪꢾꢥ꣄ꢡꢶ ꢬꣃꢳꢸꢪ꣄ ꢯꢿꢡ꣄ꢡꢾ ꢪꢾꢥ꣄ꢒ꣄ꢫꢵꢥꢸꢒ꣄ ꢨꣁꢮꢶ  ꢪꣁꢬ꣄ ꢨꢾꢜꣁ ꢱꣁꢳꢧꢵꢬꢸꢪ꣄ ꢪꢺꢔꢸꢥꢸꢒ꣄ ꢲꢥꢱ꣄ꢡ ꢬꢵꢠꢸꢒ꣄ ꢙꢶꢫꢾꢡ꣄ꢡꢾ ꢂꢖ꣄ꢔꢸꢥ꣄ ꢔꢵꢪ꣄ ꢱꢡ ꢧꢶꢬ꣄ꢬꢾꢥꢶ ꢒꢵꢫ꣄ ꢪꢾꢥꢶ ꢒꢳꢵꢬꢥꢶ ꣎ ꢡꢸꢪꢶ ꢃꢜ꣄ ꢡꢾꢥꢸ ꢃꢜ꣄ ꢣꢶꢒ꣄ꢒꢸꢪ꣄ ꢙꢷ ꢪꣁꢬ꣄ ꢨꢾꢜꣁ ꢍꢒꢥꢵꢢꢸꢒ꣄ ꢮꢾꢒ꣄ꢒꢸꢮꣁ ꢪꢾꢥꢶ ꢤꢞ꣄ꢞꢶꢫꢾꢱ꣄ ꣎ ꢢꢾꢮ꣄ꢞ ꢡꢾꢥꢸ ꢬꢵꢠꢸꢪ꣄ ꢱꢹ ꢱꢹ ꢪꢾꢥꢶ ꢪꢾꢭ꣄ꢭꢿꢡ꣄ ꢲꢶꢠ꣄ꢞꢶꢭꢿꢡ꣄ ꢲꣁꢣꢾ ꢬꢙꢵ ꢨꢾꢜꣁ ꢍꢒꢥꢵꢢꢸꢒ꣄ ꢣꢾꢒ꣄ꢒꢶ ꢤꢾꢬꢶ ꢬꢙꣁ ꢙꣁꢮꢳ꣄ ꢨꣁꢭ꣄ꢭꢶ ꢂꢮ꣄ꢫꢵꢱ꣄ ꣎

ꢬꢙꣁ ꢂꢦꢸꢭ꣄ ꢨꢾꢜꢵꢒ꣄ ꢤꢾꢬ꣄ꢬꢶꢫ ꢦꢶꢱꢶ ꢨꢬ ꢒꢾꢬ꣄ꢥꢵꢱ꣄ꢡꢒ꣄ ꢏꢫ꣄ꢣꢸꢥ꣄ ꢥꢴꢷ ꢙꢵꢥꢵꢱ꣄ꢡ ꢤꢸꢬꢵꢥ꣄ ꢥꢴꢷ ꢒꣀꢒ꣄ꢒꢵꢫ꣄ ꢒꢬꢶ ꢱꢶꢫꢾꢱ꣄ ꢒꣁꢥ꣄ꢥꢶ ꢲꢵꢡ꣄ ꢣꢶꢫꢾꢥꢶ ꣎ ꢱꢾꢡ꣄ꢭ ꢣꢿꢱ꣄ ꢱꣁꢞ꣄ꢞꢶ ꢩꢬꢵꢜ꣄ ꢙꢷ ꢲꣁꢣꢾ ꢒꢵꢳꢶꢣꢵꢱꢸ ꢧꢶꢬꢶꢫꢮꢶ ꢗꢵꢬ꣄ ꢱ꣄ꢭꣂꢒꢸꢥ꣄ ꢔꢮꢶ ꢬꢙꢵ ꢨꢾꢜꢵꢒ꣄ ꢤꢾꢬꢾ ꢱꢹꢱꢹ ꢦꢶꢱ ꢨꢬ ꢒꢬꢾꢱ꣄ ꣎

ꢱꢸꢒꢺꢡꢸ ꢮꢶꢱ꣄ꢬꢞ꣄ꢭꢥ꣄ ꢱꢸꢒꢺꢡꢸꢥꢴꢵ ꢥꢴꢷꢱꢸꢒꢺꢡꢸ
ꢡꢿ ꢕꢾꢞꢶꢪ꣄ꢮꢶꢱ꣄ꢬꢞ꣄ꢭꢥ꣄ ꢱꢸꢒꢺꢡꢸ  ꣏

-  ꢯ꣄ꢬꢷꢣ꣄ꢮꢶꢥ꣄ ꣑꣐꣘

ꢒꣂꢥꢸꢦꢒꢵꢬ꣄ ꢥꢵꢗ꣄ꢒꢬꢾꢡꢶꢥ꣄ ꢯꢵꢥ꣄ꢡꢶꢯꢿ ꢯꢵꢥ꣄ꢡꢶꢥꢴꢷ
ꢱꢵꢥꢸꢦꢒꢵꢬ꣄ ꢲꢷꢥ꣄ꢒꢬꢾ ꢙꢥꢵꢒꢸ  ꣏

- ꢯ꣄ꢬꢷꢣ꣄ꢮꢶꢥ꣄ ꣑꣑꣐